O PPdeG considera que a sentenza europea sobre a tramitación eólica “abre un novo horizonte en Galicia” e fai posible un futuro con enerxías limpas, industria e emprego

O PPdeG celebra o recente aval da xustiza europea á tramitación dos proxectos eólicos por parte do Goberno galego na medida en que “abre un novo horizonte de proxectos industriais en Galicia” e fai posible un futuro con enerxías limpas, industria e emprego na Comunidade.

Así o manifestou esta mañá a secretaria xeral Paula Prado nunha visita que realizou a un parque eólico ubicado en Lalín xunto á responsable de Medio Ambiente no Goberno galego, Ánxeles Vázquez, e o alcalde e senador José Crespo. Unha visita na que todos eles valoraron de xeito moi positivo a sentenza do Tribunal de Xustiza da Unión Europea (TXUE) sobre a tramitación ambiental dos proxectos eólicos levada a cabo en Galicia nos últimos anos.

“Nós xa sabiamos que os técnicos da Xunta son uns magníficos profesionais que traballan con rigor, obxectividade e sen outra presión que o cumprimento da lei. Pero fixo falta que o recoñeceran o Tribunal Supremo e, agora, o TXUE”, asegurou a número dous dos populares galegos ao tempo que amosaba a súa satisfacción polo feito de que “por fin se fixo xustiza fronte ao bloqueo”.

Un bloqueo do que culpou “aos de sempre, aos do ‘non’ sistemático, aos da crítica sen proposta e aos que sempre poñen os seus intereses partidistas por riba do interese xeral e do futuro de Galicia”. Pedíndolles agora “respecto” ás sentenzas xudiciais, Paula Prado esixiu ademais unha desculpa pública para “todas aquelas persoas ás que se lle faltou ao respecto con estas críticas”.

“A partir de agora será o momento de aproveitar todas as oportunidades que temos por diante, sempre desde o respecto ao medio ambiente e aos galegos e galegas”, concluíu a secretaria xeral do PPdeG reivindicando ao seu partido como “o partido do ‘si’ a Galicia, ás enerxías, á industria, ao emprego e ao futuro”.

VOLVER A COLLER O RITMO LOGO DO PARÓN

Na mesma liña, Ángeles Vázquez avogou por “restituír a normalidade” logo desta sentenza e comprometeu o traballo do Goberno galego para, co mesmo rigor e coa mesma claridade que ata o de agora, “deixar atrás o parón que houbo durante estes anos e volver coller o ritmo do futuro”.

“En Lalín hai catro parques eólicos proxectados dos que tres están autorizados pero paralizados só porque o Tribunal Superior de Xustiza de Galicia entendía que a tramitación non cumpría todos os preceptos das directivas nacional e europea”, explicou como exemplo da importancia das sentenzas do Tribunal Supremo e do TXUE para “deixar totalmente claro o rigor dos técnicos municipais e da asesoría xurídica xeral”.

A responsable de Medio Ambiente no Executivo autonómico pediu “a máxima premura” nas futuras sentenzas xudiciais pendentes e lamentou o tempo “perdido” estes anos antes de concluír: “Despois da claridade que aporta a sentenza europea, xa non quedan desculpas e temos que seguir convencendo á poboación do que supón a implantación da eólica en Galicia e que non queda outra cousa que avanzar cara ás enerxías verdes e limpas”.

UN ANTES E UN DESPOIS PARA OS CONCELLOS GALEGOS

José Crespo amosouse convencido tamén de que o aval da xustiza europea ao traballo da Xunta de Galicia “vai marcar un antes e un despois” e celebrou que, a pesar de todo o esforzo, “ao final a razón sempre se impón”.

“Para ter vida, sobre todo nos concellos de interior, que temos máis dificultades de acceso a recursos que os da costa, temos que aproveitar os recursos que temos. Porque na nosa terra, se non temos de que vivir, non temos nada”, subliñou incidindo na importancia dos proxectos eólicos para o futuro de lugares como Lalín.

O alcalde e senador criticou as “arremetidas” protagonizadas neste tempo por colectivos e partidos que “só traballan pola Galicia do ‘non’ e consideran que só o que fan eles está ben feito”. E, neste sentido, sentenciou: “Aí está a quen lle dá a razón a Xustiza e a quen non”.

O PPdeG quere saber se Sánchez cumprirá o seu compromiso de ampliar ata 24 semanas os permisos de maternidade e ata 8 as licenzas retribuídas para coidados de fillos

Os senadores do Partido Popular de Galicia queren saber se Pedro Sánchez cumprirá o compromiso adquirido no ano 2021 cando prometeu ampliar de 16 a 24 semanas os permisos de maternidade e paternidade e estender ata as 8 semanas as licenzas retribuídas para coidado de fillos e, con este obxecto, formulan unha pregunta na Cámara Alta, encabezada polos lucenses José Manuel Barreiro, José Manuel Balseiro e Juan Serrano.

Para os populares o Goberno de coalición entre PSOE e Sumar “suspende” á hora de adoptar iniciativas que favorezan a conciliación e a maternidade.

Desde o PPdeG lembran que a recente ampliación dos permisos parentais, que o Goberno presentou como un gran logro, en realidade é “outro fraude máis” de Sánchez, xa que logo a medida queda moi lonxe do prometido, “é marcadamente insuficiente” e foi obrigada polas multas que España paga por non aplicar a lexislación europea. Ata o momento, a sanción que debe aboar o noso país superaba os 10 millóns de euros, a razón de 9.000 euros ao día e, desde o pasado 2 de agosto, elévase a 43.000 euros diarios, pendente de revisión.

“O Executivo de esquerdas viuse obrigado a ampliar de 16 a 17 semanas o permiso de maternidade e paternidade, lonxe do que prometeran, que era chegar ata 24. E o mesmo ocorre co permiso de coidado do menor, co que agora aproba, das 8 semanas de permiso só retribuiranse 2, polo que as outras 6 seguirá pagándoas o traballador do seu soldo”, explican desde o PPdeG.

BLOQUEO Á LEI DE CONCILIACIÓN DO PP

Os senadores populares din que Sánchez tería que aprender de iniciativas de apoio á maternidade e á conciliación como as impulsadas pola Xunta de Galicia, no ámbito das súas competencias, por exemplo coa rede de casas niño ou coa gratuidade das escolas infantís, medidas nas que Galicia é pioneira.

No que respecta ás competencias estatais anima ao Goberno a votar a favor da Lei de conciliación que Alberto Núñez Feijóo rexistrou nas Cortes Xerais e que o Executivo mantén bloqueada, na que se inclúen multitude de medidas en apoio a todos aqueles que queren ser nais e pais e conciliar esta circunstancia coa súa actividade profesional e persoal.

Barreiro, Balseiro e Serrano poñen como exemplo o desprezo de Sánchez a necesidades como as que ten a provincia de Lugo, onde o reto demográfico representa todo un desafío para as familias e traballadores, especialmente no rural e polo tanto, potencialmente se converte nun dos territorios máis beneficiados de habilitarse os devanditos apoios.

Alberto Pazos cualifica de “satisfactorio” o traballo realizado no Parlamento galego e asegura que os datos “botan abaixo o mantra da oposición sobre o suposto uso do rolo da maioría para silencialos”

O portavoz do Grupo Popular, Alberto Pazos, cualificou hoxe de “satisfactorio” o traballo que se leva desenvolvido no Parlamento galego ao longo da actual lexislatura e asegurou que os datos “botan abaixo ese mantra da oposición sobre o suposto rolo do que se vale a maioría para silencialos, xa que tres de cada catro iniciativas que se debateron nas sesións plenarias foron a iniciativa da oposición, que teñen todas as posibilidades na súa man para defender todo aquilo que consideren oportuno”.

Acompañado dos viceportavoces do Grupo Popular, Paula Prado, Julio García Comesaña e Cristina Sanz, Alberto Pazos destacou que, despois de case 1.060 horas de actividade, das que máis de 360 foron en Pleno e case 700 en comisións, distribuídas en 414 xuntanzas tanto en sesión plenaria como en comisións, o Parlamento galego sitúase entre as cámaras autonómicas que máis tempo se reúne.

NOVAS LEIS DA CSAG E DE INTELIXENCIA ARTIFICIAL

A nivel lexislativo, o Parlamento galego leva aprobado nesta XII lexislatura un total de 7 leis, destacando, ademais dos orzamentos e da lei de acompañamento para o presente ano, a lei de promoción dos beneficios sociais e económicos dos proxectos que utilizan os recursos naturais de Galicia, a lei de cultura inclusiva e accesible de Galicia ou a Lei de estatística de Galicia. A estas hai que engadir os dous textos lexislativos que se aprobaron neste último período de sesións: o de servizos dos medios públicos de comunicación audiovisual de Galicia para a sociedade dixital e o de desenvolvemento e impulso da intelixencia artificial en Galicia.

O portavoz popular negou que o Grupo Popular utilice a súa maioría no Parlamento galego para silenciar á oposición e explicou que nos 33 plenos que se levan celebrado nesta lexislatura se debateron 595 iniciativas, das que 374 foron de control e 221 de impulso ao Goberno galego. “Tres de cada catro destas iniciativas foron a iniciativa dos grupos da oposición”, subliñou, para anotar que case a metade das proposicións non de lei aprobadas en Pleno saíron adiante por unanimidade de todos os grupos.

“Creo que son datos máis que elocuentes de que no Parlamento de Galicia os grupos da oposición teñen todas as posibilidades na súa man para defender todo aquilo que consideren oportuno, tanto a nivel de impulso como de control ao Goberno galego, polo que non se poden queixar da man aberta da que gozan neste Parlamento”, sinalou Alberto Pazos, para lembrar que “ben que nos tivera gustado a outros gozar desta situación noutros momentos nos que eran eles os que manexaban os tempos da Cámara galega”.

Respecto do traballo desenvolvido nas comisións parlamentarias, explicou que a porcentaxe de proposicións non de lei aprobadas por unanimidade se incrementa ata superar o 55 por cento, ao tempo que tres de cada catro preguntas que responderon os membros do Goberno galego en comisión foron realizadas polos grupos da oposición.

CAMIÑO DE NORMALIDADE NO EÓLICO GALEGO

Por outra banda, Alberto Pazos referiuse á recente resolución do Tribunal de Xustiza da Unión Europea que avala a tramitación ambiental feita pola Xunta dos proxectos eólicos que se queren implantar na nosa Comunidade autónoma, un fallo que se suma aos catro ditados con anterioridade polo Tribunal Supremo español, que tamén daban a razón ao procedemento seguido pola Xunta para autorizar proxectos eólicos.

En primeiro lugar, felicitou e trasladou todo o apoio do Grupo Popular “a eses técnicos da Xunta que viron como desde certas instancias se desconfiaba do seu exquisito traballo e desde o ano 2022 paralizaron máis de 90 parques eólicos e, conseguintemente, o futuro da puxante industria eólica na Comunidade galega”. “Galicia non pode perder máis tempo e, unha vez que se sacou de diante esa man negra que estaba taponando o futuro da industria eólica no noso país, urxe que o Tribunal Superior de Xustiza de Galicia retome a tramitación dos parques que tiña paralizados, xa que non lle queda escusa algunha para seguir mantendo esta situación de bloqueo aos proxectos”, demandou.

“Despois de máis de tres anos e medio dunha paralización sen sentido, ábrese un camiño de normalidade que nunca se tivo que cortar, no que o Goberno galego, cos seus técnicos á cabeza, continuará traballando con rigor e cumprindo estritamente o que marcan as leis para avanzar nunha Galicia sostible e pioneira no uso de enerxías limpas”, manifestou.

Deste xeito, amosou a súa confianza en que “a partir de agora a paralización do eólico galego se quede nun mal pesadelo e Galicia volva ser un referente a nivel de España e Europa no desenvolvemento do sector eólico, que agora afronta un novo proceso de repotenciación co que veremos diminuír o número de xeradores nos nosos montes ao mesmo tempo que se incrementa a potencia eléctrica xerada”.

O Pleno do Parlamento galego aproba o teito de gasto de Galicia para 2026, o máis alto da historia para consolidar e ampliar o mellor estado de benestar que os galegos nunca teñen desfrutado

O Pleno do Parlamento de Galicia aprobou hoxe o teito de gasto de 14.177 millóns de euros para os orzamentos xerais da Xunta para o ano 2026, “os máis altos da súa historia e que servirán para consolidar e para continuar ampliando o mellor e máis amplo estado do benestar que os galegos nunca teñen desfrutado”, asegurou o portavoz do Grupo Popular, Alberto Pazos.

“Namentres España permanece na maior das incertezas políticas, Galicia está a crecer de maneira sólida e sustentable, froito da planificación rigorosa dun goberno que durante tres lustros antepuxo os intereses dos galegos ao interese particular ou partidista”, manifestou Pazos. Neste sentido, lembrou que “cando o cómodo era endebedarse sen límite, Galicia apostou por un aumento moderado da débeda; e mentres outros apostaban por un asfixiante aumento da presión fiscal, Galicia baixaba impostos para aliviar as familias e favorecer o emprendemento”.

COMEZAR A LEXISLATURA

Alberto Pazos tamén quixo facer “un recoñecemento á oposición, sen dúbida a máis apocalíptica, cinza, desnortada e cínica da historia do noso autogoberno”. “Sosteñen e aplauden un Goberno de España anegado de corrupción, politicamente paralizado e incapaz de cumprir as súas obrigas institucionais, ao tempo que intentan convencernos de que este goberno moribundo vai esgotar a lexislatura, cando a pregunta é se imos comezala nalgún momento, porque seguimos cos orzamentos da anterior lexislatura, aprobados en 2022”, sinalou.

“Son os mesmos deputados que afirman aspirar á soberanía fiscal de Galicia, pero aceptan sen queixarse que, sen o concurso das institucións galegas, se negocie unha transferencia da débeda a medida de Cataluña”, lamentou o portavoz popular, quen anotou que “os mesmos deputados que afirman defender un maior autogoberno para Galicia póñense unha e outra vez do lado dos que tentan limitar ese autogoberno”.

O PPdeG urxe ao Goberno central o traspaso das competencias en materia de autorizacións de traballo das persoas migrantes

A portavoz de Emprego do Grupo Popular, Noelia Pérez, urxiu hoxe ao Goberno de España o traspaso a Galicia das competencias executivas en materia das autorizacións iniciais de traballo das persoas migrantes. “Diante da falta de man de obra que existe na actualidade en moitos ámbitos empresariais, resulta intolerable que o Goberno de Pedro Sánchez castigue a estes traballadores atrasando sine die a tramitación do seu permiso para poder emprender a súa vida laboral en Galicia”, indicou.

Noelia Pérez mantivo un encontro cunha emigrante venezolana en Ourense que lle trasladou “a odisea que viven para poder, en primeiro lugar, conseguir unha cita para tramitar o permiso de traballo e, en segundo lugar, que se lles responda á solicitude”. “A única saída que se lles deixa para poder seguir vivindo é acceder pola vía irregular para poder traballar e saír adiante temporalmente”, dixo a portavoz popular.

“Un dos máis significativos síntomas de que o Goberno de España está totalmente desconectado da realidade é o colapso administrativo que existe no acceso aos permisos de residencia e traballo para as persoas migrantes”, lamentou Noelia Pérez, quen lembrou que a solicitude realizada pola Xunta para o traspaso desta competencia conta co apoio unánime do Parlamento de Galicia a través dunha proposición non de lei aprobada do Grupo Popular.

Paula Prado asiste á XXIV Festa do Galo Piñeiro e Mostra Cabalar do Pino

A secretaria xeral do Partido Popular de Galicia (PPdeG), Paula Prado, participou este domingo na XXIV edición da Festa do Galo Piñeiro e Mostra Cabalar, celebrada no concello do Pino. O evento contou coa presenza do alcalde Manuel Taboada, que exerceu como anfitrión.

Prado destacou a súa presenza “un ano máis, fiel á miña cita cos veciños e veciñas do Pino e coa súa Festa do Galo Piñeiro”, sinalando a importancia desta celebración como referente gastronómico e cultural da comarca.

A popular festa, que combina tradición, gastronomía e actividades ecuestres, xa prepara a súa edición número 25. “Comeza xa a conta atrás para o 25 aniversario e para celebrar xuntos as vodas de prata desta festa imprescindible”, apuntou Paula Prado, quen tamén puxo en valor o traballo organizativo e o compromiso do concello co evento.

O PPdeG salienta a importancia de contar cunha boa rede de estradas secundarias e locais para mellorar a atención sanitaria urxente dos galegos

A portavoz de Sanidade do Grupo Popular, Encarna Amigo, salientou hoxe “a importancia de contar cunha boa rede de estradas secundarias e locais á hora de mellorar a atención sanitaria urxente que reciben os galegos”, polo que demandou unha “actuación coordinada e decidida” de todas as administracións públicas e destacou que a Xunta destinará máis de 18 millóns de euros entre 2025 e 2026 para axudar a 299 concellos galegos na mellora da súa rede viaria rural.

Encarna Amigo manifestou que “o estado das vías de comunicación é un factor determinante para a equidade e a eficacia do sistema sanitario”. “As deficiencias na rede viaria secundaria e local non só alongan os tempos de resposta sanitaria, senón que tamén incrementan o risco de accidentes, dificultan a condución dos vehículos de emerxencia e xeran unha angustia insoportable para pacientes e familias”, apuntou.

“As estradas non son só unha cuestión de desenvolvemento económico e conectividade territorial: son un auténtico salvavidas, xa que en situacións de emerxencia médica, cada minuto conta”, manifestou a portavoz popular, quen destacou as 174 actuacións de mellora de seguridade viaria, reforzo do firme, adecuación de pasos fluviais ou mantemento das marxes das estradas que a Xunta financiará na provincia de Lugo ao longo de 2025 e 2026.

Neste sentido, afirmou que “reforzar a rede viaria do rural é investir en saúde pública, é asegurar que unha persoa que vive en Cervantes, en Xermade, en A Fonsagrada ou no corazón do Courel ten o mesmo dereito a unha atención urxente e de calidade que quen vive en Lugo, Santiago ou Vigo”. “Estamos falando de desigualdade sanitaria e dunha brecha profunda entre o urbano e o rural a consecuencia do estado de moitas das infraestruturas viarias existentes no noso rural”, sinalou.

O PPdeG salienta que Galicia é pioneira na atención ás enfermidades raras, cunha estratexia á que destinará 400 millóns de euros ata 2030

A deputada do Grupo Popular Ethel Vázquez salientou o papel de Galicia como pioneira na atención ás persoas que padecen enfermidades raras, que se traduce na posta en marcha dunha estratexia á que destinará 400 millóns de euros ata 2030. “O obxectivo é reducir nun 30 por cento os prazos de probas diagnósticas e xenéticas, a rehabilitación funcional integral e a ampliación do cribado neonatal de 37 a 49 enfermidades”, manifestou.

Nun encontro mantido en A Coruña con membros da Xunta Directiva e persoal da Federación Galega de Enfermidades Raras e Crónicas (Federec), a deputada popular puxo en valor “o firme compromiso e a sensibilidade da Xunta coas persoas e familias afectadas por enfermidades raras, unha realidade que require unha resposta institucional coordinada, próxima e eficaz”.

PAPEL FUNDAMENTAL DAS ENTIDADES

A Estratexia de Enfermidades Raras 2025-2030 impulsada polo Goberno Galego constitúe unha prioridade dentro das súas políticas sanitarias e sociais, cunha vontade clara de avanzar na mellora do diagnóstico precoz, o acceso equitativo aos tratamentos e a atención integral aos pacientes. “Deste xeito, Galicia foi pioneira no impulso de protocolos específicos, na formación dos profesionais sanitarios e no reforzo da coordinación entre niveis asistenciais”, dixo.

Ademais, Ethel Vázquez salientou que a Xunta ten reforzado a colaboración coas entidades do ámbito asociativo, como é o caso de Federec, “que xogan un papel fundamental na visibilización da realidade das enfermidades raras e no acompañamento ás familias”. Neste sentido, apuntou que “este traballo conxunto permitiu deseñar medidas adaptadas ás necesidades reais dos pacientes, sempre desde unha perspectiva humana e de proximidade”.

A deputada popular agradeceu o esforzo que tanto o Goberno galego como a Federación Galega de Enfermidades Raras e Crónicas están a facer para a atención das persoas con estas doenzas e avanzou que “seguiremos traballando para que Galicia siga sendo un referente na atención ás enfermidades raras, situando sempre as persoas no centro da acción política, porque cada caso conta, cada familia importa e cada paso que damos xuntos é un avance cara a unha sociedade máis xusta, inclusiva e comprometida”.

 

 

Deputadas do PPdeG destacan en Bueu a “excelente aceptación” do Bono Peixe tanto por parte dos consumidores como dos comerciantes

As deputadas do Grupo Popular Loli Hermelo e Felisa Rodríguez, acompañadas da portavoz do PP en Bueu, Elena Estévez, visitaron esta mañá a Pescadería Mayka na parroquia de Beluso en Bueu para comprobar a “excelente aceptación” que está a ter entre os galegos o Bono Peixe, do mesmo xeito que con anterioridade tiveron outras iniciativas como o Bono Comercio ou o Bono Turístico. “Animamos a todos os consumidores a beneficiarse destes descontos facilitados pola Xunta en pescado fresco e marisco, unha media que ao mesmo tempo permite reactivar tanto o comercio de proximidade como as ventas do sector pesqueiro”, manifestaron.

Loli Hermelo e Felisa Rodríguez explicaron que os comercios ou vendedores ambulantes de peixe e marisco fresco que desexen participar nesta campaña da Xunta poderán solicitar a súa inscrición a través da páxina web www.bonopeixe.gal. “É o caso concreto de Pescadería Mayka, un establecemento de proximidade que aposta pola venta directa e cunha clientela fiel nunha das parroquias do Concello de Bueu como é Beluso”, concretaron.

5 EUROS POR SEMANA

Así mesmo, indicaron que as persoas interesadas en gozar do Bono Peixe poden descargalo desde a citada plataforma ou na app móbil, dispoñible tanto para dispositivos Android como iOS. Cada Bono Peixe ten un valor de 50 euros que se van liberando progresivamente a través do desconto dun 25 por cento na compra realizada ata un máximo de 5 euros por semana, acumulando o importe non gastado nas sucesivas semanas ata un máximo de 25 euros, que poderán gastarse ao longo dun total de 10 semanas ou ata que se esgote o crédito. Segundo os datos que figuran na plataforma do Bono Peixe, neste momento existen máis de 700 comercios adheridos á campaña e xa se teñen descargado máis de 110.000 bonos.

“Estamos a falar dun incentivo para o consumo de peixe e marisco frescos, produtos que están rexistrando un progresivo descenso na cesta da compra dos galegos”, sinalaron as deputadas populares, quen apuntaron que esta iniciativa da Xunta “axuda ao mesmo tampo a impulsar o comercio de proximidade e o sector pesqueiro, estratéxico na Comunidade galega xa que representa o 5 por cento do PIB cunha facturación de máis de 11.600 millóns de euros”.

O PPdeG critica a “desfeita” que o Goberno de Pedro Sánchez está a facer coa realización dos exames de MIR

Os deputados do Grupo Popular Julio García Comesaña e Manuel Santos criticaron hoxe a “desfeita” que o Goberno de Pedro Sánchez está a facer coa realización dos exames de formación sanitaria especializada (MIR), algo que funcionaba ben e o Ministerio de Sanidade “estao convertendo nun proceso opaco, centralizado e inseguro para miles de aspirantes”, ante o que esixiron “explicacións inmediatas, diálogo coas comunidades autónomas e respecto polos profesionais sanitarios”. Así mesmo, avanzaron que o Grupo Popular demandará desde o Parlamento galego explicacións a esta situación que está a provocar unha grave crise profesional e institucional na sanidade pública española.

García Comesaña e Manuel Santos acusaron ao Goberno de Pedro Sánchez de “destrozar todo o que toca, como xa fixo co Estatuto Marco e agora coa organización do exame MIR de 2026, xerando unha grave crise profesional e institucional”. Neste sentido, referíronse á recente dimisión masiva dos comités de expertos encargados da elaboración do exame (nas especialidades de Medicina, Farmacia, Enfermaría, Física e Química), “o que evidencia a ruptura coa tradición de rigor, independencia e consenso que caracterizaba o proceso”.

CASTIGO SEN SENTIDO

A eliminación da sede do exame MIR en Vigo é “especialmente preocupante xa que obrigará a centos de aspirantes desta área metropolitana a realizar longos desprazamentos, cun claro prexuízo persoal e económico”, indicou o viceportavoz popular. “É un castigo sen sentido a unha das áreas sanitarias máis potentes de Galicia”, subliñaron os representantes populares.

Ademais, lembraron que o Ministerio de Sanidade tomou decisións unilaterais, como reducir o número de colaboradores por experto, recortar as retribucións ou trasladar parte da organización ao Ministerio de Función Pública, sen contar coas comunidades autónomas nin co consenso dos profesionais.

No eido da planificación sanitaria, os deputados populares denunciaron tamén a inacción do Ministerio ante o déficit recoñecido de 4.500 médicos de familia. “En lugar de actuar con ambición, este ano só se incrementaron en 36 as prazas de Medicina Familiar e Comunitaria, moi lonxe das 1.000 prazas anuais comprometidas polo Congreso e o Senado para paliar o déficit”, lamentaron.