O Parlamento galego reproba a campaña sexista levada a cabo polo sindicato CIG contra a conselleira de Política Social

O Pleno do Parlamento de Galicia acordou hoxe, a través dunha proposición non lei do Grupo Popular, coa abstención do PSdeG e a ausencia de voto do BNG, reprobar a campaña sexista levada a cabo polo sindicato CIG contra a conselleira de Política Social, que claramente desvaloriza o traballo dun cargo político; así como calquera manifestación que vulnere o principio de igualdade. Ademais, exprésase a vontade de que o Bloque Nacionalista Galego, a través da súa voceira, a señora Ana Pontón, rexeite o contido sexista destes carteis.

A portavoz popular de Igualdade, Raquel Arias, considerou “imprescindible a reflexión conxunta e a condena dun dos ataques machistas e sexistas máis graves dos últimos tempos sobre unha muller con responsabilidades públicas, que xa foi reprobado por todos os sectores da sociedade galega agás o BNG e a súa lideresa, Ana Pontón”.

COVARDÍA QUE NORMALIZA TRATO VEXATORIO

“Ao non condenar esta viñeta, Ana Pontón demostra o covarde que é e normaliza o trato vexatorio cara unha muller que exerce responsabilidades públicas”, indicou Raquel Arias, quen apuntou que “tampouco se loita a prol do feminismo cando unha muller se queda sen argumentos no debate político e usa a súa condición de muller para no ser atacada, algo que usa a señora Pontón unha e outra vez neste Parlamento”.

Así mesmo, manifestou que a viñeta da CIG e a negativa do BNG a condenar expresamente a viñeta “vai en detrimento dos principios de igualdade e equidade, ademais de representar un descrédito profesional ao desvalorizar o traballo dunha persoa simplemente polo seu xénero”. “Desde o Grupo Popular consideramos que este tipo de actos non axudan en absoluto ao recoñecemento do valor da experiencia profesional das mulleres e ao traballo que se desenvolve pola igualdade das mulleres e dos homes”, dixo.

Coa decisión do BNG de negarse a votar esta iniciativa parlamentaria, Raquel Arias subliñou que “o nacionalismo galego, con Ana Pontón á fronte, queda absolutamente deslexitimado para falar de igualdade e feminismo, porque cada vez que teñen que elixir entre nacionalismo e igualdade, elixen nacionalismo; e cada vez que teñen que elixir entre a CIG e o feminismo, elixen a CIG”.

“Unha Ana Pontón que se presenta como unha feminista absolutamente combativa pero que, cando a vítima do machismo é unha muller que non pensa como ela, mira para outro lado, lanzando a mensaxe letal de que algunhas mulleres merecen menos protección que outras”, criticou a portavoz popular.

Para rematar, Raquel Arias considerou necesario “deixar moi claro que a igualdade e o feminismo é un principio ético universal, e que este Parlamento non tolera nin tolerará o uso político interesado da igualdade nin o silencio ante agresións políticas e persoais a ningunha muller, sexa cal sexa o seu partido político”.

O Grupo Popular avoga porque talento e esforzo sexa o único que determine o futuro laboral das mulleres galegas

A portavoz de Emprego do Grupo Popular, Noelia Pérez, destacou no Pleno do Parlamento galego o “firme compromiso do Goberno galego para seguir impulsando medidas que rompan barreiras en materia de igualdade laboral e garantan que o talento e o esforzo sexa o único que determine o futuro laboral das mulleres galegas”. En concreto, salientou que nunca houbo tantas mulleres traballando en Galicia, o paro feminino é dous puntos máis baixo que a media estatal e a fenda salarial está na menor cifra da serie histórica.

Noelia Pérez referiuse ás medidas adoptadas polo Goberno galego para combater a desigualdade laboral e fomentar a incorporación das mulleres en sectores masculinizados, así como os máis de 72 millóns de euros que este ano se destinarán ao apoio a autónomas e emprendedoras.

MEDIDAS DO GOBERNO CENTRAL

Neste sentido, demandou ao Goberno central que “adopte as medidas que lle estamos pedindo desde Galicia para abordar de verdade as desigualdades laborais e sociais que aínda persisten”. En concreto, solicitou que “o Goberno de Pedro Sánchez flexibilice os fondos finalistas de emprego para que a Xunta poida adaptalos á realidade e ás necesidades das mulleres de Galicia ou que transfira a Galicia a recadación do IRPF das cotizacións das traballadoras autónomas en concepto de formación profesional”.

“Non podemos aceptar que queiran vir a darnos leccións sobre igualdade laboral os mesmos que teñen afogados ás pequenas e medianas empresas e autónomos e autónomas, porque desde que o Partido Socialista chegou a Madrid, co apoio gratuíto do BNG, os custos laborais disparáronse un 40 por cento, acadando os 54.000 millóns de euros”, manifestou a portavoz popular. Así, apuntou que “esta situación supón máis custes sociais, que se traducen en menos empregabilidade para as mulleres e unha rebaixa dos salarios”.

Por outra banda, Noelia Pérez criticou o “feminismo intermitente” do BNG, “para o que existen mulleres de primeira e de segunda, pedindo respecto para unhas e non para as outras”. “Iso non é feminismo, é sectarismo, e están a xerar división baixo o paraugas de igualdade”, incidiu.

“A inmensa maioría das mulleres de Galicia estamos fartas de que o BNG nos use para o seu discurso mentres temos que soportar os seus machismos, os seus desprezos e o seu paternalismo”, afirmou a portavoz popular.

O Parlamento de Galicia reitera ao Goberno central a solicitude para que declare o Xacobeo 2027 como evento de excepcional interese para que as empresas poidan acceder a beneficios fiscais

O Pleno do Parlamento de Galicia reiterou hoxe ao Goberno de España, a través dunha proposición non de lei do Grupo Popular que foi aprobada por unanimidade, a solicitude para que declare o Xacobeo 2027 como acontecemento de excepcional interese ao abeiro do previsto Lei 49/2002 de réxime fiscal de entidades sen ánimo de lucro, e de incentivos ao mecenado, e con efectos xa desde o presente ano 2025.

O portavoz popular de Turismo, Borja Verea, lamentou que, “a pesar de que existe un consenso total en que o Xacobeo 2027 sexa declarado evento de excepcional interese público, aínda non o é a día de hoxe”. Neste sentido, apuntou que “a causa principal é a falta de orzamentos estatais”, ante o que demandou “vontade política para poñer en marcha esta declaración a través doutra lei ou incluso dunha lei independente aos orzamentos”. “O que fai falta é vontade política por parte do Partido Socialista e do Goberno de Pedro Sánchez”, dixo.

Borja Verea explicou que esta declaración “permite poñer en marcha os incentivos fiscais de apoio ao Xacobeo 2027 e, polo tanto, abre a porta á colaboración público-privada”, que no anterior Xacobeo 2021-22 permitiu poñer a disposición de todos os galegos 28 millóns de euros procedentes de 40 empresas colaboradoras.

TEMPO DO URXENTÍSIMO

“Estamos no tempo do urxentísimo para que se declare o Xacobeo 2027 como evento de excepcional interese público, porque de non facelo terá consecuencias negativas para Galicia e para os galegos”, sinalou o deputado popular, quen anotou que, “se a insistente unanimidade do Parlamento de Galicia non é suficiente para activar ao Goberno de España, só quedaría a triste conclusión de que estamos ante un boicot doloso co único obxectivo de facer dano a Galicia por intereses partidistas”.

Para rematar, Verea manifestou que o próximo Ano Santo Xacobeo 2027 “representa unha oportunidade única para reforzar o posicionamento internacional de Galicia como destino cultural de referencia a nivel mundial, e isto terá un impacto directo sobre os sectores estratéxicos da economía galega e, tamén, sobre iniciativas de sostibilidade e preservación do patrimonio, porque o Camiño de Santiago e o Ano Santo son os produtos culturais máis sostibles, máis socializadores e máis ecolóxicos que existen, e que temos a sorte histórica que sexan 100 por cento galegos”.

O Grupo Popular asegura que xa existen organismos que compren as funcións da Valedoría da Igualdade que propón o BNG

A viceportavoz do Grupo Popular, Paula Prado, afirmou hoxe no Pleno do Parlamento galego que a proposta do BNG de crear unha Valedoría da Igualdade “só serviría para xerar duplicidades e solapamentos innecesarios con outros organismos xa existentes”, como o Valedor do Pobo, o Consello Galego das Mulleres ou a Dirección Xeral de Promoción da Igualdade.

Paula Prado criticou que o BNG “recicle e descafeine as súas propostas coas que supostamente pretenden cumprir a estratexia feminista que lles mandan dos coroneis da UPG”. Así, explicou que “esta vetusta iniciativa nacionalista, que xa vén dos tempos de Anxo Quintana, pasou de ser unha proposición de lei de 24 folios en 2023 a converterse nunha proposición non de lei de apenas catro páxinas, de tantas boas intencións como imprecisións e termos excesivamente amplos”.

ESFARELAMENTO E ANEMIA DO FEMINISMO NACIONALISTA

“As funcións desta Valedoría entrarían en colisión coas funcións doutros departamentos xa existentes, como o Consello Galego das Mulleres, as direccións xerais de Promoción da Igualdade e de Relacións Laborais da Xunta, ou a inspección de Traballo do Goberno central”, explicou Paula Prado.

Así mesmo, indicou que “non é necesario crear un órgano deste tipo cando en Galicia xa contamos cunha institución como é a Valedora do Pobo, que precisamente ten entre as súas competencias a de velar pola igualdade de trato e de oportunidades entre homes e mulleres, así como pola erradicación da discriminación por razón de sexo”.

“O único que se atopa en situación de esfarelamento e anemia é o falso feminismo da esquerda”, asegurou a viceportavoz popular, quen criticou ás deputadas do BNG por “gardar silencio ante o machismo que rezuma o seu sindicato ao perpetuar os estereotipos sexistas coas súas viñetas de humor de taberna”. Ademais, lamentou que este silencio dos nacionalistas “tamén lles privou de condenar o ataque desta fin de semana á conselleira de Medio Ambiente e á súa familia”, polo que dixo que “aínda están a tempo para condenar este escrache na porta da súa casa, porque en política non vale todo”.

O Grupo Popular critica que o BNG fale de reto demográfico mentres boicotean o desenvolvemento industrial e enerxético de Galicia

O deputado do Grupo Popular Argimiro Marnotes criticou hoxe no Pleno do Parlamento galego que o BNG “fale de reto demográfico mentres boicotean o desenvolvemento industrial e enerxético de Galicia”. “Se queremos que a xente quede en Galicia e que outros veñan, mellorando demograficamente esta terra, non basta con mellorar cada ano a aportación aos concellos desde a Xunta, porque tamén compre facilitar que novas empresas se implanten e que as empresas existentes sigan investindo e creando emprego”, anotou.

Argimiro Marnotes manifestou que “falar de mecanismos de reto demográfico negándose si ou si á implantación de novas industrias xeradoras de emprego é dicir claramente que ao BNG lle importa absolutamente nada o reto demografico”. Neste sentido, acusou aos nacionalistas galegos de “pretender impoñer o bloqueo ideolóxico que impide o progreso e pon en perigo o emprego e o incremento da poboación”.

IGUALDADE DE TRATO

O deputado popular salientou que “todos os concellos de menos de 15.000 habitantes xa son considerados como municipios en situación prioritaria para a Xunta, de aí que no reparto de fondos sexan os primeiros beneficiarios”. Neste sentido, explicou que “o carácter xeral de reparto garante a igualdade de trato entre os concellos de Galicia e o cumprimento da normativa de subvencións, sendo o sistema xeneralizado o de concorrencia competitiva”.

“Galicia conseguiu frear as previsións de perda de poboación e gañar poboación ata superar os 2,71 millóns de habitantes, acadando unha esperanza de vida no máximo histórico de 83,62 anos”, indicou Marnotes. Así, salientou que “a Xunta é consciente de que para seguir mellorando as cifras demográficas é fundamental ofrecer facilidades ás familias, intensificando medidas como a gratuidade das escolas infantís e universidade, a tarxeta Benvida, a posta en marcha de máis de 100 casas-niño e máis de 140 casas do maior, o Bono Concilia e os beneficios para as familias numerosas e monoparentais”.

O Grupo Popular critica que “ninguén do BNG amosara hoxe no Pleno a súa condena expresa ao ataque sufrido pola conselleira de Medio Ambiente”

O deputado do Grupo Popular Gonzalo Trenor criticou hoxe que “ningún dos tres voceiros do BNG que interviñeron esta mañá no Pleno do Parlamento galego amosara a súa condena expresa ao ataque sufrido esta fin de semana pola conselleira de Medio Ambiente e pola súa familia a través de persoas próximas ao nacionalismo galego”. Sobre o expediente do proxecto de Altri en Palas de Rei, Trenor insistiu que “a autorización é un asunto técnico que dependerá dos expertos e do persoal funcionario da Xunta”, polo que demandou “deixalos traballar con tranquilidade e evitar calquera tipo de presión política sobre eles”.

“En política non vale todo”, dixo o deputado popular, quen rexeitou expresamente “o acoso ás familias, as coaccións, os insultos, a manipulación ou a difusión de bulos que se están a facer en relación co proxecto de Altri”. Neste sentido, amosou a “rotunda condena ao ataque que sufriu a conselleira de Medio Ambiente e a súa familia esta fin de semana no seu domicilio por persoas que foron nas listas do BNG e que teñen un completo álbum de fotos coa señora Pontón”. Porén, lamentou que “ningún dos tres do politburó do BNG que falaron esta mañá no Pleno tiveron a máis mínima palabra de apoio coa conselleira”.

RESPONSABILIDADE

Gonzalo Trenor afirmou que no BNG “son profesionais da manipulación, do engano e da difusión de bulos, inventando argumentos pseudocientíficos para poñer á xente en contra do proxecto de Altri, porque necesitan alterar a realidade para que o seu discurso chegue á cidadanía”.

“Non é propio dunha democracia as presións que están a facer a través do seu sindicato machista para dobregar a independencia dos expertos e funcionarios que traballan neste expediente”, sinalou o deputado popular, quen demandou “responsabilidade para trasladar á sociedade que os técnicos da Administración informan baixo premisas técnicas e non atendendo a presións de partidos políticos”.

O PPdeG esixe ao Goberno de Sánchez que cese no seu boicot á transferencia da AP-9 a Galicia e aborde a posibilidade de rescatar a súa concesión

O PPdeG esixe ao Goberno de Pedro Sánchez que cese no seu boicot á transferencia da autopista AP-9 a Galicia e cumpra o mandato parlamentario de analizar os custos e os aspectos xurídicos vinculados a un posible rescate da concesión desta infraestrutura.

Así llo trasladou esta mañá o deputado galego Celso Delgado á secretaria xeral de Transporte Terrestre na súa comparecencia na Comisión de Transportes e Mobilidade Sostible do Congreso dos Deputados para responder á pregunta formulada polo Grupo Popular sobre, precisamente, as razóns polas que o Goberno central aínda non realizou o estudo sobre as vías xurídicas para a anulación da prórroga e a valoración dos custos económicos que tería para o Estado a asunción da xestión directa da AP-9.

“O Goberno que preside desde hai sete anos Pedro Sánchez non respecta a división de poderes, senón que ningunea ás Cortes Xerais e despreza ao Parlamento de Galicia”, afirmou o parlamentario galego citando os diferentes acordos aos que se chegou en ambas Cámaras instándoo tanto á elaboración de dito estudo como ao desbloqueo da tramitación da proposición de lei orgánica de transferencia da titularidade e competencias da AP-9 a Galicia.

O TRATO DIFERENCIADO DE SÁNCHEZ EN MATERIA DE INFRAESTRUTURAS

En relación a isto último, Delgado esixiu o “cese” do “boicot” que se está producindo no Congreso dos Deputados e denunciou que hoxe mesmo a Mesa desta institución –dominada por PSOE e Sumar– acordou a prórroga número 23  nesta lexislatura do prazo de presentación de emendas á referida lei. “En total, xa son 38 as prórrogas desde que Sánchez asumiu a Presidencia do Goberno de España”, engadiu cualificando a situación de “indignante” e “inaceptable”.

Unha situación á que hai que engadir a promesa realizada esta última fin de semana por Xosé Ramón Gómez Besteiro no Congreso do PSdeG en alusión á AP-9, asegurando que “chegaremos á liberación das peaxes”. Esta promesa supón, en opinión dos populares, “máis palabras baleiras e mentiras como as pronunciadas polo mesmo Besteiro en campaña electoral cando dixo, supostamente co aval de Pedro Sánchez, que con el a autopista sería gratuíta”.

“Mentres a Galicia se lle boicotea a transferencia e a liberación das peaxes, outras comunidades autónomas reciben un trato diferenciado”, alegou Delgado poñendo como exemplo o recente acordo para prorrogar a gratuidade da AP-7 en Alacante e os traballos para liberala definitivamente de peaxes cando, en cambio, o Goberno “non accede nin a eliminar o pago da peaxe do tramo Vigo-O Porriño da AP-9”.

O MOMENTO PROPICIO E NECESARIO PARA DAR PASOS ADIANTE

Para cumprir a reclamación unánime do Parlamento de Galicia sobre a transferencia  da titularidade e a gratuidade da AP-9, o deputado galego sinalou que “é necesario dar pasos” como a consideración dos custos que está soportando o Estado para financiar as actuais bonificacións e peaxes na sombra. “Este é un momento moi propicio para analizar os custos e os aspectos xurídicos dun rescate da concesión da AP-9”, subliñou.

Un obxectivo no que o Goberno galego si ten avanzado, xa que en xuño de 2024 encargou a unha empresa experta e independente un estudo pormenorizado do custo dos diferentes escenarios “que xa obra en poder do Goberno de España”.

“O primeiro escenario era o da transferencia da titularidade da AP-9 á Comunidade Autónoma e, segundo este estudo, tería un valor de 526 millóns de euros adicional ás bonificacións vixentes. Un segundo escenario avaliaba o rescate e, en consecuencia, a gratuidade; cuxo custo podería chegar aos 2.355 millóns de euros”, explicou urxindo ao Executivo central a elaborar o seu propio estudo tendo en conta o xa entregado pola Xunta.

O Pleno do Parlamento galego aproba a Lei de servizos dos medios públicos de comunicación audiovisual de Galicia para a sociedade dixital

O Pleno do Parlamento galego aprobou hoxe a nova Lei de servizos dos medios públicos de comunicación audiovisual de Galicia para a sociedade dixital, que “garante o futuro dos medios públicos para que sigan servindo á cidadanía dun xeito efectivo nun panorama dixital en constante e imparable transformación”, manifestou a deputada popular, Carmen Pomar. Así mesmo, asegurou que os medios públicos galegos “seguirán a ser independentes, cun modelo de xestión baseado na boa gobernanza, na administración rigorosa, na estabilidade e non na interinidade”.

Carmen Pomar manifestou que a nova lei “garante uns medios públicos que incorporan as necesidades das audiencias, capaces de ofrecer contidos de calidade que os conectan coa sociedade galega e o fan con rigor, pluralidade, obxectividade e profesionalidade”. “Estamos garantindo uns medios públicos na vangarda tecnolóxica, coa transformación dixital como piar que, ademais, son un motor da nosa industria audiovisual”, apuntou.

ADAPTADA AO MARCO NORMATIVO ESPAÑOL E EUROPEO

Ademais, afirmou que “sobre todo garántese a promoción, difusión e o impulso da lingua galega, e o coñecemento da identidade cultural e lingüística de Galicia”. Así, subliñou que “mantense sempre con firmeza e esixencia a principal razón de ser dos medios públicos autonómicos, que radicaba na súa creación e segue a facelo, na promoción, difusión e impulso da lingua galega para dar a coñecer a identidade cultural e lingüística de Galicia”. “Así foi ata o de agora e así continuará a suceder no futuro porque esta lei así o recolle explicitamente, con claridade e sen ningún tipo de dúbida”, puntualizou.

“Unha lei necesaria para actualizar o noso marco normativo á lexislación española e á europea”, indicou a deputada popular, quen sinalou que, “na liña das directrices europeas, a nova lei contempla a creación dun Consello Asesor de participación social e profesional, onde haberá representantes dos traballadores dos medios públicos”. En concreto, asegurou que “a nova lei prevé os mecanismos necesarios para garantir a independencia, a rendición de contas, a transparencia e a responsabilidade”.

Carmen Pomar destacou a “aposta polo diálogo e o consenso” que guiou a tramitación desta nova lei, que recibiu na súa fase de anteproxecto 111 alegacións, das que arredor dunha cuarta parte foron incorporadas total ou parcialmente. Neste sentido, dixo que “a Lei de medios é froito dun proceso transparente e participativo, que multiplica a pluralidade da futura Corporación de Servizos Audiovisuais de Galicia, a través, por exemplo, do Consello Asesor de Participación Social e Profesional, cunha maioría dos seus integrantes elixidos por este Parlamento galego para dar cabida a practicamente todos os sectores relacionados e tamén a unha representación dos profesionais da Corporación”.

Paula Prado lamenta que o PSdeG inicie a súa nova etapa “poñendo a alfombra vermella” a Sánchez e consolidando a unha presidenta “acurralada pola corrupción”

A secretaria xeral do Partido Popular de Galicia, Paula Prado, lamentou hoxe que o PSdeG iniciara a súa nova etapa “póñenlle a alfombra vermella” ao presidente do Goberno máis lesivo para Galicia da Historia da democracia: Pedro Sánchez” e, ao mesmo tempo, mantivera na presidencia do partido a unha persoa “acurralada pola corrupción”, Carmela Silva.

De feito, os populares galegos pregúntanse se os socialistas “non se cansan de facer o ridículo” despois de que Besteiro lle dixera hoxe a Sánchez «benvido á túa casa» e “un bulo aínda peor, dicirlle que é o presidente máis galego de toda a Historia».

“Esta semana dicía que Sánchez tiña que vir hoxe pedir perdón aos galegos e galegas por todos os agravios e por todas as débedas que acumula con Galicia, pero a súa arrogancia non llo permitiu”, subliñou a número dous do PPdeG.

De feito, lembrou, Sánchez levaba máis dun ano sen pisar Galicia, “desde que os galegos lle pecharon a porta do goberno autonómico e lle deron o peor resultado do socialismo na nosa Comunidade”.

E hoxe veu, ademais, “esquecéndose do cambio climático e empregando un jet privado para unha viaxe entre Madrid e Santiago de Compostela”: “Esta debe ser a mobilidade sostible que promociona o Goberno de España”, ironizou Prado.

Así mesmo, denunciou que onte o ministro Félix Bolaños tivo “o descaro” de facer aquí un anuncio en materia de violencia de xénero, cando segue sen cumprir o compromiso que fixo por escrito —no pacto co BNG— de crear de cinco novos xulgados específicos de violencia de xénero en Galicia, un deles onde estivo este sábado, en Santiago de Compostela.

“Estamos ante un PSdeG desorientado, con moitísimos problemas internos en Santiago de Compostela, na Coruña ou en Narón, e que aínda por riba mantén na presidencia a unha persoa que, ao igual que o Goberno central, está acurralada pola corrupción: Carmela Silva”, abundou a secretaria xeral.

“Pedímoslle ao PSOE galego que deixe a un lado a corrupción e o seu apoio a Sánchez, que deixen de ser soldados de Sánchez e que realmente se preocupen polos galegos e galegas, que cumpran todas esas débedas que teñen en infraestruturas, en materia ferroviaria ou en traspaso de competencias”, apuntou.

Neste sentido, os populares non entenden que despois de dicir o ministro Óscar Puente en máis dunha ocasión que a gratuidade da autoestrada AP-9 era “tremendamente difícil”, hoxe Besteiro volvera prometer diante de Sánchez a “liberación das peaxes”. “Non o cre nin el”, engadiron.

Paula Prado desexoulle “o mellor” a Xosé Ramón Gómez Besteiro tras ser elixido secretario xeral do PSdeG, pero lamentou que “mal empeza”.

OVIDIO RODEIRO SEMPRE TEN O SEU CONCELLO “A PUNTO”

Por último, Paula Prado sinalou que mentres o PSOE galego “non ten nada que celebrar”, Galicia “ten algo que festexar cada fin de semana”, e “iso tamén é o resultado do benestar do que gozan os galegos e as galegas, e das políticas con sentidiño do PPdeG”.

Así, en clave local asegurou que é “unha ledicia” desfrutar da xornada na Festa da Filloa de Lestedo, en Boqueixón, xunto ao alcalde Ovidio Rodeiro, que sempre ten o seu municipio “a punto” para esta gran celebración.

O PPdeG ponse como reto para as próximas eleccións municipais incorporar a máis mulleres como candidatas para que haxa máis alcaldesas

O Partido Popular de Galicia ponse como reto para as próximas eleccións municipais de 2027 que haxa máis alcaldesas do partido e para iso comprométese a traballar estes dous anos na incorporación de máis mulleres como cabezas de lista nas candidaturas municipais.

Así o manifestou esta mañá a secretaria xeral do partido, Paula Prado, na reunión do Foro de Alcaldesas celebrado en Boimorto para conmemorar o Día Internacional da Muller e celebrar que o PPdeG é “o partido das mulleres que gobernan”. Algo que acredita o feito de ser a formación con máis alcaldesas de Galicia (29), con máis concelleiras (un total de 700), con máis deputadas no Parlamento galego e con máis representantes no Congreso e no Senado.

“Somos o partido das mulleres e, grazas a iso, en Galicia somos o partido máis apoiado polas mulleres eleccións tras eleccións”, asegurou a número dous do PPdeG poñendo en valor a identificación das mulleres galegos co seu partido e coas medidas que pon en marcha alá onde goberna, xa sexa na Xunta ou nos concellos.

Paula Prado destacou que as 29 alcaldesas do seu partido “trazan un feminismo real e un mellor camiño para as súas veciñas e veciñas” e “non son só unha referencia para as mulleres, senón para toda Galicia”. Neste sentido puxo en valor que o 90% das alcaldesas do PPdeG gobernan con maioría absoluto e cunha porcentaxe media de apoio nos seus concellos do 60% e, en varios casos, superior ao 70%.

UNHA ESQUERDA AVERGOÑADA POLO DANO QUE FAI AO FEMINISMO

Manifestou acto seguido que se o PPdeG non ten máis alcaldesas é “polos pactos de perdedores protagonizados principalmente polo PSOE e o BNG”, así como por “unha esquerda que este ano está conmemorando o 8 de marzo moito menos que anos anteriores”.

Algo que na súa opinión se debe a que “senten vergoña do dano que lle están facendo ao feminismo e ás mulleres”. Fixo así referencia a que PSOE, BNG e Sumar “seguen apoiando a Lei do ‘só si é si’ que xa rebaixou as penas a máis de 1.500 agresores sexuais” e a que “estase descubrindo que a esquerda tapou durante anos a depredadores sexuais como Errejón ou Monedero e mesmo a pederastas como Xabier Ron ou o candidato do BNG en Coles”.

Por todo isto, e facendo referencia ao lema elixido polo PSdeG para o seu Congreso, Paula Prado ironizou que máis que “A esquerda que pode” debería ser “A esquerda que poda”, xa que “están podando os dereitos ás mulleres, as condenas dos agresores sexuais, o benestar das galegas e os avances do feminismo”.

“Esa ‘esquerda que poda” mañá estará representada por Pedro Sánchez, un presidente que non debería vir dar leccións, senón que debería vir a pedir perdón, a Galicia e ás mulleres”, concluíu.

FABIOLA GARCÍA: “XUNTAS SOMOS MOITO MÁIS FORTES”

Pola súa banda, a responsable de Igualdade no Goberno galego, Fabiola García, referiuse ás alcaldesas populares como “referentes que deron un paso adiante para poñerse á fronte dos seus concellos” e manifestou o seu orgullo por “contar con tantas mulleres representando aos seus veciños e loitando polos seus dereitos”.

Rememorando o moito que se ten avanzado desde que hai 100 anos Concha Pérez se convertera, en 1925, na primeira muller alcaldesa de Galicia, amosou a esperanza de que as mulleres galegas no seu conxunto “poidamos seguir celebrando o 8 de marzo unidas, traballando da man e conscientes de que xuntas somos moito máis fortes”.

A responsable de Igualdade no Goberno galego destacou tamén a importancia do poder feminino na política local na medida en que os concellos son as administracións máis próximas á xente. Por iso, na súa opinión, o traballo diario das alcaldesas representa un feminismo transformador e inclusivo que contribúe a crear unha sociedade cada vez máis xusta, equitativa e solidaria.

Xunto a Paula Prado e Fabiola García estiveron tamén presentes a responsable do departamento de Promoción da Igualdade do Goberno galego, María Quintiana, e a alcaldesa de Boimorto, María Jesús Novo.

A rexedora coruñesa é, de feito, a alcaldesa do PP máis votada na provincia da Coruña, cun 65% de apoio nas pasadas eleccións municipais. De aí que o seu partido elixira este concello para celebrar esta nova reunión do Foro de Alcaldesas.

“Desde este Centro de Maiores quero reivindicar ás mulleres do rural”, apuntou María Jesús Novo facendo referencia ao lugar elixido para esta reunión e no que día a día as veciñas do concello se reúnen para realizar actividades e desfrutar do seu tempo de lecer.