Autor: ppdegaliciaredes

O Grupo Popular demandará no Pleno da vindeira semana que o Parlamento de Galicia amose o seu rexeitamento expreso á corrupción instalada no seo do PSOE, do Goberno de España e na contorna persoal e política máis próxima ao Presidente Pedro Sánchez, unha situación que debe derivar na disolución das Cortes e a inmediata convocatoria de eleccións xerais. Así mesmo, reiterarase ao Goberno central a declaración do Xacobeo 2027 como evento de excepcional interese público.

Ao remate da Xunta de Portavoces, a viceportavoz popular, Paula Prado, explicou que a sesión plenaria dará comezo coa votación para a elección, por maioría absoluta, de María Concepción Pombo Romero como presidenta da Corporación de Servizos Audiovisuais de Galicia. Neste sentido, trasladou o agradecemento a Alfonso Sánchez Izquierdo polo traballo realizado ao longo de todos estes anos á fronte da Corporación de Radio e Televisión de Galicia, desexándolle o mellor na súa vida persoal e profesional no futuro.

AVANCE HISTÓRICO NO AUTOGOBERNO

A sesión plenaria continuará coa comparecencia da conselleira de Medio Ambiente e Cambio Climático para informar sobre a planificación e os últimos avances na xestión e ordenación do litoral de Galicia. “Desde o día de hoxe, Galicia asume a plena xestión sobre o seu litoral, un avance histórico no autogoberno da nosa Comunidade autónoma e que o Goberno galego tivo que traballar duramente polos atrancos que desde o Goberno central se puxeron para que esta transferencia fora realidade”, manifestou Paula Prado.

A portavoz popular afirmou que “a complexa e preocupante situación que se vive neste momento na política española, a consecuencia das investigacións xudiciais que cada vez máis acurralan ao entorno do Presidente Sánchez, ao Partido Socialista e ao seu Goberno”, tamén terá cabida no Pleno da vindeira semana. “Diante deste deterioro institucional e dano reputacional ás institucións españolas, a mellor saída que se lles ocorre aos responsables socialistas é atacar e proferir descualificacións a xuíces e tribunais, nun comportamento impropio dun Estado de Dereito, democrático e avanzado”, lamentou.

Ademais, criticou que a estas descualificacións “tamén recorren os socios máis fieis do Goberno de Pedro Sánchez, como foi o caso do BNG, quen na boca da súa portavoz nacional, a señora Pontón, saíu rapidamente ao rescate de Pedro Sánchez e do seu goberno acusando á Xustiza de lawfare”. “Acusación que, practicamente de inmediato, tivo que corrixir ao percatarse de que non tiña escapatoria posible á ola de corrupción que asolagaba ao Goberno de Pedro Sánchez e ao Partido Socialista”, indicou.

CONDENA DAS ACUSACIÓNS Á XUSTIZA E XORNALISTAS

“Diante desta situación vergoñenta e de perda da lexitimidade institucional, desde o Grupo Popular propoñemos no Pleno da vindeira semana que o Parlamento de Galicia amose o seu rexeitamento expreso á corrupción instalada no seo do PSOE, do Goberno de España e na contorna persoal e política máis próxima ao Presidente Pedro Sánchez, pero tamén queremos que se condenen as acusacións realizadas polos membros do goberno de España e os seus socios atacando á Xustiza e aos xornalistas que están destapando as tramas de corrupción que rodean a Pedro Sánchez”, dixo Paula Prado.

Ademais, a través desta proposición non de lei do Grupo Popular se reclama a inmediata depuración de responsabilidades políticas derivadas dos casos de corrupción coñecidos nas últimas datas, o que debe levar aos socios do PSOE nas distintas institucións á revisión dos acordos de goberno ou de apoio político”. “En definitiva, todo isto debe derivar, necesariamente, na disolución das Cortes por parte do Presidente do Goberno de España e a inmediata convocatoria de eleccións xerais, para permitir que todos os españois, a través do seu voto, abran un novo tempo político”, demandou.

APOIO PARA O LUSTRO XACOBEO 2027-2032

A segunda das proposicións non de lei que o Grupo Popular incorporou á sesión plenaria da vindeira semana ten que ver coa celebración do vindeiro Xacobeo 27 e a necesidade de que o Goberno de España conceda, canto antes, a declaración como evento de excepcional interese público, un recoñecemento que está respaldado pola Comisión Executiva do Consello Xacobeo e ten o visto bo do Ministerio de Cultura.

A iniciativa tamén demanda ao Goberno central un maior e firme apoio económico ante o próximo lustro Xacobeo 2027-2032, co fin de ter unha maior presenza nacional e internacional que sirva para o reforzo turístico non so de Galicia senón de España enteira.

“Consideramos necesario que o Goberno de Pedro Sánchez atope un oco fóra das súas preocupacións pola corrupción que o asola un día tras outro e se centre no que importa aos españois e, en especial, aos galegos: atendendo a solicitude de declaración do Xacobeo 2027 como evento de excepcional interese público, tendo en conta a capacidade mobilizadora desta celebración, xerando beneficios económicos, sociais e culturais non só en Galicia, senón en todas as comunidades autónomas polas que atravesa o Camiño de Santiago”, afirmou a viceportavoz popular.

Por último, e dentro do apartado de preguntas ao Goberno galego, o Grupo Popular interesarase polas medidas que está a impulsar a Xunta para promover o uso da lingua galega entre a xuventude de Galicia; sobre a valoración que fai a Xunta do Real-Decreto estatal que regula o traspaso de menores migrantes non acompañados; e sobre a situación financeira da Universidade de A Coruña, logo de que se coñecera desequilibrio contable de 13 millóns de euros que presenta esta institución segundo os datos da liquidación do exercicio de 2023.

Os deputados do Grupo Popular, en visitas a distintos centros de saúde de Galicia, aseguraron que a incorporación de máis de 260 profesionais voluntarios permitirá garantir, un ano máis, unha asistencia sanitaria de calidade durante os meses de verán en toda Galicia. Nese sentido, pediron ao BNG e ao PSdeG que “abandonen o seu discurso alarmista e catastrofista sobre a situación da sanidade galega, porque calquera galego ou persoa que nos visite contará cunha atención sanitaria de primeiro nivel, prestada por profesionais comprometidos e cunha excelente formación”.

Durante estas visitas, subliñaron que a Xunta traballa sempre para ofrecer a mellor asistencia sanitaria á cidadanía, todos os días do ano. Engadiron que o verán non será unha excepción, malia o reto que supón a chegada de milleiros de visitantes a Galicia e o necesario respecto polo dereito ao descanso dos profesionais sanitarios.

MÁIS DE 12 MILLÓNS DE INVESTIMENTO

Neste sentido, explicaron para atender todas as necesidades de atención sanitaria ao longo do verán a Xunta elaborou, como todos os anos, un plan específico de reforzo, dotado con máis de 12 millóns de euros e a través do que está prevista a incorporación de máis de 260 profesionais sanitarios, tanto persoal médico voluntario, como profesionais do 061 que se incorporan voluntariamente ao programa, sanitarios desprazados temporalmente a centros con maior demanda ou a encomenda de funcións a persoal residente de cuarto ano.

“Estamos a falar dunha planificación que a Xunta leva a cabo con criterio e baseándose na demanda asistencial real, non en exercicios de adiviñación nin en augurios de BNG e PSdeG que ao final nunca se cumpren”, manifestaron os deputados populares.

TODAS AS CAMAS HOSPITALARIAS DISPOÑIBLES

Unha planificación para a atención primaria que tamén se estende á atención hospitalaria, onde este verán estarán activas cerca do 92 por cento das camas hospitalarias, aínda que continuarán dispoñibles a totalidade das camas no caso de que fora necesario o seu uso.

“Estamos a falar dun número de camas hospitalarias activas que se realiza tendo en conta a porcentaxe de ocupación real rexistrada entre os meses de xuño e setembro dos últimos anos, unha cifra á que se lle engade unha marxe de seguridade superior ao 10 por cento co fin de garantir a correcta atención sanitaria dos pacientes”, puntualizaron os deputados populares.

Neste sentido, incidiron que “todas as camas dos hospitais públicos galegos estarán dispoñibles ao longo do verán para o seu uso se os pacientes o precisan ou se a situación sanitaria o require, pero é preciso recordar que nunca foi preciso habilitar máis camas das programadas nos meses de verán, incluso nos anos 2021 ou 2022 coa pandemia da Covid-19”.

VISITAS DOS PARLAMENTARIOS POPULARES

As visitas dos parlamentarios tiveron lugar en distintos puntos da comunidade. En Lugo, Encarna Amigo, Raquel Arias e José Manuel Mato acudiron ao centro de saúde de Outeiro de Rei. Miguel Fidalgo e Felisa Rodríguez, acompañados pola presidenta do PP de Vigo, Luisa Sánchez, visitaron o Hospital Público Álvaro Cunqueiro.

Pola súa banda, Noelia Pérez e Argimiro Marnotes visitaron o centro de saúde do Couto, en Ourense, mentres que Gonzalo Trenor e Magdalena Pérez acudiron ao de Ponteceso, na Coruña.

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España unha maior flexibilidade fiscal no IRPF e no imposto de Sociedades que permita unha mellora da xestión forestal en España, así como o desenvolvemento dun plan sectorial contable que permita a este sector tributar de forma máis xusta e de acordo coa capacidade de renda xerada, tal como establece a Constitución Española.

A deputada popular Nicole Grueira lembrou que esta iniciativa parlamentaria “é froito da escoita activa, xa que responde a unha demanda concreta do sector e plenamente coherente coas medidas xa recompiladas no Plan Forestal de Galicia aprobado en 2021, que establece medidas claras para avanzar cara á sustentabilidade e rendibilidade do monte galego”.

MARCO XUSTO E ADAPTADO

Na súa intervención, Grueira explicou que “o calendario fiscal actual, ríxido e pensado para outras actividades, non se axusta á realidade do monte”, polo que demandou “un marco xusto e adaptado, que recoñeza tecnicamente a especificidade dun sector que ocupa unha parte importante do territorio galego, xera emprego e actividade no rural, e contribúe activamente á loita contra o cambio climático”.

“Poñémoslle deberes ao Goberno de España e non á Xunta porque cómpre recordar que os impostos cedidos de titularidade autonómica xa presentan, en maior ou menor medida, unha serie de bonificacións e beneficios fiscais aplicables ao sector forestal, como é o caso das deducións aplicables ás transmisións de solo rústico ou na cota íntegra de actos xurídicos documentados”, manifestou.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita o impulso da Comunidade galega como referente na loita biolóxica contra o Psílido Africano dos cítricos en particular e, por extensión, como rexión produtora e comercializadora de axentes invertebrados de control biolóxico en xeral. Así mesmo, a través dunha emenda do BNG, pídese un reforzo da capacidade pública de diagnóstico, seguimento e resposta fronte a pragas vexetais dotadas cos medios suficientes.

O portavoz popular do Medio Rural, Miguel Ángel Viso, lembrou que o insecto vector que causa o HLB ou enverdecemento dos cítricos apareceu en Galicia en 2014 e a Xunta puxo en marcha ao ano seguinte un plan urxente de erradicación desta praga. A partir de 2019, a Xunta, o Ministerio de Agricultura e o Instituto Valenciano de Investigación Agraria puxeron en marcha nas zonas costeiras de O Rosal, O Grove e Romai un plan especial de soltas do himenóptero Tamarixia Dryi, un parasitoide empregado con éxito en programas de control biolóxico clásico en numerosas zonas citrícolas afectadas polo HLB.

Como resultado deste plan, a presenza de Tamarixia Dryi é xa anecdótica en Pontevedra, en A Coruña foi regulada completamente durante o verán e na actualidade o parasitoide segue activo e expandido, e a súa cría en Maceda está en óptimas condicións.

ACTUACIÓNS E ESTRATEXIA A DESENVOLVER

“Galicia lidera a loita biolóxica en España e demostra que os métodos naturais son eficaces, seguros e sostibles”, salientou o portavoz popular, quen alertou de que “a introdución de inimigos naturais pode conlevar efectos negativos sobre a fauna e flora autóctonas, polo que resulta imprescindible determinar con rigor a especificidade dos organismos que se pretende introducir”.

Miguel Ángel Viso avogou porque a Xunta “continúe neste camiño expandindo a industria asociada, fomentando a investigación, formando aos produtores e impulsando a cooperación interrexional e internacional”. En concreto, fixou catro liñas de actuación principais: o fomento da investigación e a innovación, apoiando centros como o de Maceda; a formación de produtores, para que vexan a loita biolóxica como unha ferramenta práctica e rendible; o desenvolvemento dunha industria galega de organismos biolóxicos; e a aposta por unha economía circular e a sostibilidade, reducindo residuos químicos, protexendo o solo, a auga e os polinizadores.

“Esta estratexia conduciranos, a curto e medio prazo, a reducir significativamente o uso de pesticidas sintéticos, mellorando a calidade dos produtos agrícolas; incrementar o valor diferencial dos produtos galegos, máis sostibles e respectuosos co medio; xerar novos postos de traballo cualificado en investigación, produción e distribución de axentes biolóxicos; e posicionar a Galicia como un modelo de innovación rural e agricultura verde”, afirmou.

O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Concello de Mondariz-Balneario que leve a cabo os trámites necesarios para solicitar formalmente a incoación do expediente para a declaración da Fonte de Troncoso como Ben de Interese Cultural (BIC). Neste sentido, pídese que a Xunta preste apoio técnico e institucional durante o proceso de tramitación desta solicitude e na elaboración da documentación necesaria para a incoación do expediente, así como que, unha vez declarada a Fonte de Troncoso como BIC, promova a solicitude de fondos no marco do Programa do Ministerio de Vivenda denominado 2% cultural co obxectivo de recuperar un ben patrimonial de gran valor para Galicia e reforzar a identidade cultural deste municipio pontevedrés.

O viceportavoz do Grupo Popular, Julio García Comesaña, lembrou que a Fonte de Troncoso é “un lugar cunha fonda vinculación á historia do termalismo galego, unha mostra destacada da arquitectura de Antonio Palacios e un símbolo da identidade local e da memoria cultural de Galicia”.

Porén, lamentou que “nos últimos anos sufriu un deterioro progresivo, agravado polas inundacións recorrentes”, polo que sinalou que “desde o Grupo Popular propoñemos unha folla de ruta clara, viable e coordinada onde cada administración faga o que lle corresponde, co obxectivo común de recuperar este ben patrimonial con todas as garantías legais, técnicas e financeiras”.

ACTUACIÓNS DA XUNTA

En primeiro lugar, García Comesaña recordou que a Fonte de Troncoso é propiedade do Concello de Mondariz-Balneario, polo que, “para que a Xunta poida incoar o expediente de declaración de ben de interese cultural, é imprescindible que o Concello solicite formalmente a súa apertura e achegue a documentación necesaria”.

“Ao mesmo tempo que se respecta o papel do Concello como titular do ben, tamén se reforza a implicación da Xunta, sen esquecer a necesaria actuación da Confederación Hidrográfica do Miño-Sil para resolver o problema estrutural das continuas inundacións que sufre esta fonte provocadas polo desbordamento do río Tea”, indicou.

Julio García Comesaña explicou que “só se a Fonte de Troncoso é declarada BIC poderá optar ás axudas do programa do 2% cultural, coas que se poderá complementar o investimento xa iniciado pola Xunta neste ben”. En concreto, dixo que a Xunta xa ten encargada a redacción dun proxecto técnico integral de rehabilitación da fonte, asinado polo prestixioso arquitecto César Portela, que prevé unha intervención global sobre os dous pavillóns existentes e no seu contorno inmediato, coa intención de dotalos dun novo uso turístico e divulgativo compatible coa protección patrimonial.

Ademais, apuntou que a Xunta xa actuou para garantir a consolidación estrutural do conxunto e a protección do inmoble fronte ao seu progresivo deterioro, con actuacións como o apuntalamento e tapiado dos ocos con risco de derrumbe; a instalación de valado perimetral e lona decorativa para garantir a seguridade e evitar o vandalismo; e a reconstrución parcial de muros e a execución dun zuncho de formigón armado no pavillón de embotellado, que permitirá no futuro a instalación da nova cuberta.

O portavoz do Grupo Popular, Alberto Pazos, salientou hoxe que o inicio da preparación dos orzamentos da Xunta para 2026 “é unha mostra máis de que Galicia continúa pola senda da estabilidade e da confianza, mantendo o estilo propio que nos caracteriza e do que goza desde que está gobernada polo PPdeG”. “Un anuncio que para os galegos supón algo normal e totalmente habitual, pero que ten a súa importancia se miramos cara ao Goberno central, que leva coas súas contas prorrogadas desde o ano 2023 e, o que é peor, sen perspectiva de conseguir sacar adiante uns orzamentos no que resta de lexislatura”, apuntou.

Alberto Pazos subliñou que “Galicia continuará, un ano máis e xa sumará 17 anos consecutivos, tramitando uns orzamentos coa regularidade que marcan as normas para que estean en condicións de entrar en vigor o vindeiro 1 de xaneiro de 2026”. En concreto, afirmou que con estas contas o Goberno de Alfonso Rueda seguirá avanzando no cumprimento dos compromisos asumidos no seu programa electoral, favorecendo o desenvolvemento industrial para mellorar o crecemento da economía galega e xerar empregos de calidade; impulsando novos investimentos para a transformación e modernización da nosa sanidade e a educación, garantindo a igualdade de oportunidades, a calidade de vida dos galegos e a atención ás persoas máis vulnerables; dando novos pasos no seu plan de vivenda, incrementando a oferta pública e protexida, ao tempo que se facilita o acceso a un fogar digno e accesible, sobre todo para a nosa xuventude; reforzando as políticas activas de emprego e a formación profesional, así como o retorno do talento, para atender as demandas existentes nos nosos sectores produtivos; e, tamén, poñendo especial énfase no impulso do sector turístico, coa vista posta na próxima celebración do Xacobeo 2027”.

SEN INFORMACIÓN DO GOBERNO CENTRAL

“Lamentablemente, o Goberno galego terá que afrontar a elaboración e tramitación dos orzamentos para 2026 sen a necesaria información do Goberno central sobre os recursos que traspasará a Galicia a modo de financiamento autonómico, así como as posibles entregas a conta, cuestións sobre as que non temos esperanza algunha de que se nos fagan chegar tendo en conta que o Goberno de Pedro Sánchez funciona cuns orzamentos da pasada lexislatura”, sinalou.

Neste sentido, considerou “inasumible que un goberno que pretende levar adiante un mínimo proxecto político non conte con orzamentos”, ante o que amosou a súa sorpresa porque “cada día nos anuncia sen rubor algún novas axudas e novos investimentos, pero sen concretar de onde vai sacar os cartos para financiar todas esas promesas”.

Alberto Pazos manifestou que, “nun momento no que Galicia da un paso máis na súa senda de estabilidade política e social coa tramitación dos orzamentos para 2026, resulta incomprensible que o BNG continúe coa súa teima de solicitar un concerto económico para Galicia, unha proposta rexeitada pola práctica totalidade dos expertos en financiamento autonómico que pasaron pola Comisión de Estudo realizada neste Parlamento galego, e por entidades do prestixio do Foro Económico de Galicia ou Fedea, pero que os nacionalistas galegos continúan defendendo co único respaldo dun licenciado en económicas con carné do BNG

“Resulta moi demagóxico afirmar que España nos rouba arredor de 5.000 millóns de euros cada ano, como din os nacionalistas galegos, sen ter en conta todos os servizos dos que gozamos os galegos e están financiados polo Goberno central, como a defensa nacional ou a seguridade cidadá, a construción e mantemento de infraestruturas; a posta en marcha de iniciativas estratéxicas e necesarias en materia de industria, enerxía ou I+D; as transferencias aos concellos ou á propia Unión Europea; ou o custo que supón o mantemento da seguridade social e das mutuas de funcionarios para o financiamento das pensións, algo tan fundamental para milleiros de familias galegas”, explicou.

Neste sentido, apuntou que “o que realmente suporía un concerto económico para Galicia, como ben recollen os informes elaborados por expertos na materia, sería unha perda de entre 2.128 e 2.646 millóns de euros de financiamento para a nosa comunidade, en función de se o cálculo se fai tendo en conta o PIB ou a poboación existente en Galicia”. “Desde o PPdeG e o Goberno da Xunta de Galicia non estamos dispostos a que os galegos perdan un só euro polo simple feito de compracer as ansias soberanistas e independentistas do BNG”, afirmou.

O portavoz popular reiterou que “o que Galicia realmente necesita é unha reforma urxente do sistema de financiamento autonómico, que contemple o custo real da prestación dos servizos públicos e que compense adecuadamente factores como o avellentamento ou a dispersión da poboación, algo que seguiremos demandando coa convicción de que esta reforma non será posible ata que España estea dirixida por unha persoa perfectamente coñecedora das necesidades das comunidades autónomas, que non é outra que Alberto Núñez Feijóo”.

AUTORIZACIÓN DAS ATRACCIÓNS EN FESTAS PATRONAIS

Por último, e logo de lembrar que hoxe se celebra o décimo aniversario da posta en marcha do Hospital Público Álvaro Cunqueiro de Vigo, “unha obra que nos enche de satisfacción ao ver cumprido o obxectivo de dotar a esta área sanitaria dun Hospital Público que é referencia a nivel nacional e internacional”, Alberto Pazos referiuse á sorprendente situación que se está a vivir coas festas populares da cidade viguesa, unha vez que se suspenderon as festas de Coia e perigan as de Bouzas pola parálise na tramitación das solicitudes que se está a producir no Concello de Vigo

“O alcalde de Vigo pretende escudarse na existencia dunha nova lei galega que este Parlamento galego non ten tramitado e da que non temos coñecemento”, indicou o portavoz popular, quen engadiu que, “se fai referencia ao decreto pola Xunta para facilitar a aplicación dunha Lei de 2017, esta norma non supuxo problema algún ata agora para a celebración das festas nas parroquias de Vigo e a instalación das atraccións que axudan a sufragar estas celebracións”.

Deste xeito, Alberto Pazos amosouse sorprendido porque “esta normativa, que é perfectamente aplicable en 312 concellos galegos, unicamente cause problemas nesta cidade, o que demostra que non é un problema de normativa, senón de xestión eficaz e eficiente do Concello”.

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta de Galicia a realizar un acto de homenaxe en lembranza e recoñecemento de José Manuel Costas Capelo para salientar a súa importancia no sector náutico-pesqueiro e na mariña mercante de Galicia, así como na formación neste ámbito.

O viceportavoz popular, Julio García Comesaña, salientou que “hai persoas que, sen ocupar titulares nin buscar protagonismo, constrúen país desde o compromiso cotián coa formación, a seguridade e a dignidade profesional”. “Un deses homes foi o profesor José Manuel Costas Capelo, vigués de nacemento e coruñés de adopción, que dedicou toda unha vida ao servizo da educación náutico-pesqueira en Galicia”, indicou.

RECENTE FALECEMENTO

Costas Capelo obtivo o título de capitán da Escola Oficial de Náutica de A Coruña no ano 1964 e durante varios anos navegou en distintos buques mercantes, adquirindo unha experiencia directa do mar que marcaría o seu labor docente. Xa en terra, en 1971, accedeu á praza de profesor adxunto de Construción Naval, e en 1972 pasou a impartir docencia na Universidade Laboral Crucero Baleares de A Coruña, centro no que se xubilou como catedrático de Navegación e Instalacións Mariñas, sen deixar nunca de formar a futuras xeracións de mariños tamén no IES Universidade Laboral.

“Foi un divulgador técnico rigoroso, un mentor entregado e unha autoridade moral e profesional recoñecida en toda España”, afirmou o viceportavoz popular, quen engadiu que Costas Capelo foi socio de honra de AETINAPE, entidade coa que colaborou de forma intensa, sendo autor de numerosos artigos publicados na súa revista e inspirador de propostas lexislativas e técnicas para mellorar as condicións do traballo marítimo. Entre elas, cabe destacar a sinalización segura das bateas, a prohibición de faenar en condicións meteorolóxicas extremas, a substitución das balsas salvavidas por botes de rescate nos buques que operan en augas frías ou a implantación de sistemas de emerxencia con luces LED, como alternativa ás tradicionais bengalas.

Julio García Comesaña lamentou que o seu recente falecemento de forma repentina “deixou un fondo baleiro na comunidade educativa e profesional do mar, pero tamén deixou unha pegada profunda e transversal que o fai merecedor dun recoñecemento público, sereno e respectuoso”.