O PPdeG denuncia o “veto” do Goberno central ao Xacobeo 2027 e insiste en reclamar que se declare acontecemento de excepcional interese público

O Partido Popular de Galicia fala abertamente de “veto” por parte de Pedro Sánchez ao Xacobeo 2027 ante as “negativas” e as “evasivas” do Goberno central no que se refire á declaración do próximo Ano Santo como acontecemento de excepcional interese público.

Así o denuncia a senadora pola provincia de Pontevedra e portavoz de Xustiza do Grupo Popular na Cámara Alta, Pepa Pardo, ao tempo que insiste no “fundamental” desta declaración “para os intereses de Galicia” e censura a actitude amosada neste sentido polo Executivo central. “Non podemos entender as súas negativas e evasivas máis que como un novo desprezo a Galicia”, sostén.

Recorda que o Ministerio de Cultura adquiriu no seu día o compromiso de promover a declaración do Xacobeo 2027 como acontecemento de excepcional interese público e incorporar as exencións fiscais vinculadas a esta figura nos Presupostos Xerais do Estado. Un compromiso que viu motivado logo da aprobación unánime en maio de 2024 dunha proposición non de lei no Parlamento de Galicia na que, a iniciativa do Grupo Popular, se solicitaba esta declaración.

De feito, esta semana o Parlamento de Galicia aprobou tamén por unanimidade unha iniciativa do PPdeG no mesmo sentido.

“A realidade é que o Ministerio de Cultura non só non cumpriu o seu propio compromiso, senón que tampouco atendeu ás demandas do Parlamento galego”, alega Pepa Pardo ao tempo que recorda que os populares tamén levaron esta reclamación ao Congreso dos Deputados a través dunha proposición de lei cuxa tramitación foi vetada pola Mesa desta Cámara (dominada polo PSOE e Sumar).

De aí que, ante a consideración de que “é fundamental garantir as exencións fiscais ás empresas patrocinadoras do Xacobeo 2027”, con efectos desde o 1 de xaneiro de 2025, por tratarse dunha ferramenta “esencial e eficaz para dotar a tan importante acontecemento de maior capacidade económica”, os populares galegos trasladen agora esta cuestión ao Senado a través dunha moción que defenderá a próxima semana o senador José Manuel Barreiro e coa que agardan que, por fin, o próximo Ano Santo sexa declarado acontecemento de excepcional interese público.

“A ver que fan os senadores galegos do PSOE”, pregúntase ironicamente Pepa Pardo apuntando ao acontecido no que se refire á AP-9 e ás contradicións do socialismo galego “dicindo unha cousa en Galicia e votando a contraria en Madrid”.

O CAMIÑO DE SANTIAGO E A SÚA PROXECCIÓN INTERNACIONAL

O patrocinio tense revelado como clave e moi eficaz para incentivar a participación de empresas privadas na celebración deste evento e dotalo dunha maior capacidade económica. Tamén é unha oportunidade excepcional para que Galicia, e por extensión España, consoliden a súa marca e a proxección internacional do Camiño de Santiago.

Ademais, medidas coma esta contribúen a desenvolver un programa de dinamización turística, social e cultural. De feito, grazas ao desenvolvemento do programa de patrocinios que permiten as desgravacións fiscais das achegas no marco da lexislación de mecenado, no Xacobeo 21-22 adheríronse un total de 40 empresas, o que se traduciu nunha achega total de 28 millóns de euros.

O Grupo Popular solicita ao Goberno de España a elaboración dun informe no que xustifique que o rescate da AP-9 non é viable

O Grupo Popular solicita ao Goberno central a elaboración dun informe que xustifique que o rescate da AP-9 non é viable, no que se recolla expresamente unha estimación do custo que suporía este rescate e o gasto que tería que afrontar o Goberno de España en bonificacións das peaxes ata o remate da concesión. “Sería todo un exercicio de transparencia que nos permitiría a todos xogar coas mesmas cartas e valorar con obxectividade a mellor opción a seguir respecto do futuro da AP-9”, sinalou o portavoz popular, Alberto Pazos.

A secretaria xeral de Transporte Terrestre do Ministerio de Fomento anunciou esta semana no Congreso que o rescate da concesión da AP-9 “non é viable polo altísimo volume de gastos que conlevaría, inasubmibles agora mesmo polo Estado”, “unha afirmación que tivo lugar dous días despois de que o reelixido secretario xeral dos socialistas galegos anunciara a bombo e prato en Santiago que ‘nós chegaremos á liberación das peaxes’”, lembrou Pazos. “Un anuncio que fixo diante do mismísimo Pedro Sánchez, quen non dixo nin mu na súa intervención a pesar de que era perfectamente consciente de que o que estaba vendendo o seu fiel soldado Besteiro era mentira e que para nada entraba nos plans do Goberno de España esa gratuidade”, engadiu.

“Descoñecemos os argumentos sobre os que se sustenta esta decisión do Goberno de España de non proceder ao rescate neste momento da concesión da AP-9, polo que desde o Grupo Popular imos solicitar a través dunha iniciativa neste Parlamento galego que o Goberno central elabore con urxencia un informe xustifique esta decisión”, indicou o portavoz popular.

BAILE CONSTANTE DE CIFRAS

Alberto Pazos sinalou que “xa estamos fartos do baile constante de cifras que se ofrecen por parte dos responsables do Ministerio para valorar o rescate, que un día cifran en 4.000 millóns e ao seguinte en 6.000 millóns, cando o que si coñecemos é que o Estado xa ten reservados 3.150 millóns de euros para o abono á empresa concesionaria polas bonificacións das peaxes ata o remate da concesión en 2048, unha cifra moi superior ao máximo de 2.331 millóns que suporía o rescate da AP-9, segundo o informe elaborado para a Xunta por unha consultora de prestixio especializada nestas cuestións”.

“Esiximos seriedade e que o Goberno central cumpra os compromisos anunciados aos galegos, liberando de peaxes a AP-9, como dixeron en plena campaña electoral, e procedendo á transferencia desta autoestrada a Galicia, como temos acordado neste Parlamento en numerosas ocasións”, demandou o portavoz popular. En concreto, dixo que “o primeiro paso sería levantar o bloqueo que a tramitación da proposición de lei aprobada por unanimidade neste Parlamento está a sufrir no Congreso pola decisión da Mesa e da súa Presidenta, que xa que leva 23 prorrogas nesta lexislatura ao prazo para a presentación de emendas a esta proposición”.

Alberto Pazos referiuse, tamén, á actividade desenvolvida esta semana no Parlamento de Galicia, protagonizada pola celebración da sesión plenaria. En concreto, subliñou que “o conselleiro de Facenda deixou ben claro as razóns polas que Galicia non pode aceptar a condonación da débeda que, para cumprir os desexos dos independentismo catalán, o Goberno de Pedro Sánchez pretende impoñer ás comunidades autónomas”.

GALICIA, A MÁIS PREXUDICADA

Así, explicou que “en primeiro lugar, rexeitamos que o Goberno central premie desta forma a comunidades autónomas que se destacaron por malgastar o diñeiro público e incumprir os compromisos de débeda e déficit impostos pola Unión Europea e o Goberno de España para os momentos de crise económica que sufrimos non hai moitos anos; pero tampouco podemos aceptar que os galegos sexan os máis prexudicados nesta condonación da débeda: 1.369 euros por galego fronte afronte a 1.892 euros de media española”.

“Un negocio ruinoso para Galicia, porque a cada galego, polo feito de ser galego, se lle reduce a débeda en 1.477 euros, pero, ao mesmo tempo, a ese mesmo galego, polo feito de ser español, a débeda se lle incrementa en case 1.700 euros, o que da como resultado que cada galego verá incrementada a súa débeda en case 220 euros”, manifestou.

Deste xeito, Alberto Pazos insistiu que “Galicia precisa realmente unha reforma do financiamento autonómico, que atenda realmente o custo da prestación dos servizos e recolla, expresamente, o agravante que supón o envellecemento da nosa poboación e a súa dispersión pola xeografía galega”.

A curto prazo, o portavoz popular reclamou que o Goberno de España “actualice as entregas a conta ás comunidades autónomas, porque este retraso xa supón a retención de case 1.600 millóns de euros a Galicia e 1,5 millóns de euros en xuros adicionais cada mes”.

Pazos considerou “lamentable o apoio incondicional tanto dos socialistas galegos como do BNG a este propósito de impoñer unha condonación da débeda ás comunidades autónomas, que miran máis polos seus intereses partidistas que polos de todos os galegos”.

A TEMPO DE RECTIFICAR

Para rematar, Alberto Pazos amosou “a decepción do Grupo Popular pola covardía amosada polo BNG e, principalmente, pola súa voceira, a señora Pontón, á hora de condenar a noxenta campaña machista levada a cabo pola CIG contra a conselleira de Política Social, un comportamento vergoñento que os levou a negarse a votar unha iniciativa no Pleno e de amosar a máis mínima mostra de apoio á conselleira de Medio Ambiente, polo ataque que sufriu a pasada fin de semana por detractores de Altri, entre os que figuraban representantes e simpatizantes do BNG da comarca de Melide”.

“Aínda están a tempo todas as deputadas do BNG de rectificar, algo que a bo seguro agradecerán as que realmente traballan pola igualdade real de homes e mulleres, e loitan contra este tipo de estereotipos machistas utilizados contra as mulleres”, rematou.

Aprobado o ditame do proxecto de Lei para o desenvolvemento e impulso da intelixencia artificial en Galicia, paso previo á aprobación definitiva desta norma en sesión plenaria

A Comisión 1ª do Parlamento de Galicia aprobou esta mañá, sen votos en contra, o ditame do proxecto de Lei para o desenvolvemento e impulso da intelixencia artificial en Galicia, co que este texto lexislativo queda pendente da súa aprobación definitiva en sesión plenaria.

O viceportavoz popular, Julio García Comesaña, salientou que “estamos a falar dunha norma pioneira, coa que Galicia abriu o camiño para que outras comunidades autónomas estean tomando exemplo e tramitando leis semellantes”.

En concreto, García Comesaña fixou tres obxectivos desta nova lei: mellorar a eficacia da Administración autonómica, dispoñer dunha intelixencia artificial segura que salvagarda os dereitos da cidadanía e consolidar a Galicia como unha rexión de referencia en Europa.

LEI GARANTISTA

“Preténdese impulsar e asegurar os beneficios que a intelixencia artificial vai ter tanto para o tecido produtivo como para a cidadanía, mellorando os servizos que presta aos cidadáns a Administración galega ao mesmo tempo que se respectan os dereitos de todos os galegos”, indicou.

Así mesmo, Julio García Comesaña afirmou que “estamos diante dunha lei garantista, coa que se asegura a supervisión humana daqueles procedementos que así o precisen e coa que todos os sistemas de intelixencia artificial formarán parte dun rexistro para o seu coñecemento por parte da cidadanía”.

O PPdeG asegura que seguirá dando a batalla pola transferencia e a gratuidade da AP-9 fronte á falta de compromiso e os incumprimentos do PSOE

O Partido Popular de Galicia asegura que seguirá dando a batalla pola transferencia e a gratuidade da AP-9, así como reclamando a avaliación da oportunidade do rescate desta infraestrutura, ante a falta de compromiso do Goberno central e as promesas incumpridas do PSOE galego.

Fíxoo esta mañá a través da súa secretaria xeral, Paula Prado, que compareceu nunha rolda de prensa na que explicou que o partido pide isto mesmo para a AP-53, entre Santiago e Dozón, na que “prometeron hai tres meses avances que seguen sen chegar”, e ante a constatación de que demandas como estas si se están a satisfacer no caso doutras comunidades autónomas.

“Non podemos estar vendo como se prorroga por exemplo a gratuidade da AP-7, en Alacante, e para Galicia só quedan migallas”, explicou a número dous dos populares galegos ao tempo que parafraseaba as palabras do presidente Alfonso Rueda: “Galicia non quere ser máis ca ninguén, pero tampouco menos”.

Recordou que esta mesma semana os deputados do PPdeG no Congreso volveron reclamar ao Goberno central que avalíe a oportunidade do rescate da autopista do Atlántico, tendo en conta que o custo estimado pola Xunta da indemnización –2.331 millóns de euros– se asemellaba de xeito considerable ao custo das bonificacións ata o final da concesión. “Non obtivemos resposta e eles seguen sen ensinar as súas contas”, engadiu ao respecto.

Un asunto do que falou ademais o renovado secretario xeral do PSOE galego, Xosé Ramón Gómez Besteiro, que “lle botou valor” e esta fin de semana asegurou que o seu partido ía no camiño da liberación das peaxes. Algo sobre o que Paula Prado ironizou: “Que pasou tres días despois? O PSOE desmentiu ao propio PSOE dicindo que ‘non é viable na actualidade’. Sen dúbida, unha boa tripla a que lle meteron a Besteiro e ao PSOE galego”.

“Non me dá pena que a nova etapa do señor Besteiro empece así, cunha derrota ante o seu partido na primeira semana. Porque xa avisamos: de todo o que levamos tragado, un galego non pode seguir sendo un soldado de Sánchez”, afirmou a secretaria xeral do PPdeG ao tempo que sacaba a relucir, entre outros agravios, as 38 prórrogas –23 só nesta lexislatura– que acumula o debate sobre a transferencia da AP-9 no Congreso desde que Pedro Sánchez chegou á Moncloa.

OS ECOS DO DÍA INTERNACIONAL DA MULLER

Cinco días despois do 8 de marzo, Paula Prado asegurou que “cada vez é máis necesario cumprir iso que dicimos tanto en política de que o Día da Muller ten que ser todos os días”. Algo que xa fai o PPdeG, que traballa a diario para executar os seus compromisos electoral e polos que recibiu o apoio das galegas e galegos.

Necesario tamén “ante o dano que lle está facendo a esquerda ás mulleres”, como se constata en Galicia cun BNG que “leva un mes sen condenar un panfleto machista contra unha conselleira e xustifica o escrache a outra conselleira alegando que se trataba dun acto reivindicativo polo 8-M”.

A isto engádese que o cartel do 8-M dos independentistas galegos ten detrás a unha autora que dixo que lle gustaría “dar hostias” a Isabel Díaz Ayuso e que o BNG non di nada tampouco de que haxa máis de 1.500 agresores sexuais beneficiados pola Lei do ‘só si é si’ que apoian eles e tamén o PSOE.

“O mesmo PSOE, por certo, que segue sen abrir unha investigación interna sobre a contratación de señoritas de compañía elixidas por catálogo, que se desmarca de Ábalos e que segue aliado con Sumar a pesar de Errejón ou Monedero”, concluíu.

O Grupo Popular critica que BNG e PSdeG pidan hoxe suspender as axudas do Fondo de Transición Xusta cando hai 15 días pedían axilizar a súa concesión

O portavoz de Industria do Grupo Popular, Rubén Lorenzo, criticou hoxe “a incongruencia de BNG e PSdeG ao demandar hoxe no Pleno suspender a convocatoria das axudas do Fondo de Transición Xusta cando na sesión plenaria de hai 15 días pedían que se axilizase a concesión destas mesmas axudas”.

Rubén Lorenzo lamentou que “Galicia sofre as consecuencias de decisións precipitadas do Goberno de Pedro Sánchez no marco dunha transición inxusta que agora emendan”. En concreto, lembrou que España recibirá a través do Fondo de Transición Xusta 868 millóns de euros que recalará nos territorios de seis comunidades autónomas españolas, entre elas Galicia, afectados polo peche de minas de carbón e centrais térmicas de carbón.

CRITERIOS MARCADOS POR MADRID E EUROPA

“O programa do Fondo de Transición Xusta de España 2021-2027, deseñado polo Goberno de España e aprobado pola Comisión Europea, chega tarde, porque este retraso impediu que as axudas xa se puidesen activar ao longo do ano 2022; e chega mal, porque beneficia unicamente a concellos da provincia de A Coruña e exclúe os tres concellos da provincia de Lugo afectados polo peche de minas e centrais térmicas do carbón”, explicou o portavoz popular.

Deste xeito, apuntou que “as axudas artelladas pola Xunta, a través dos convenios de transición xusta, non poden facer outra cousa que non fose seguir os criterios marcados polo Goberno central e Europa, o que non supón que estes concellos se vexan favorecidos por outras axudas, a través do Inega ou do Igape, para paliar os efectos do peche das centrais térmicas”.

O Parlamento galego reproba a campaña sexista levada a cabo polo sindicato CIG contra a conselleira de Política Social

O Pleno do Parlamento de Galicia acordou hoxe, a través dunha proposición non lei do Grupo Popular, coa abstención do PSdeG e a ausencia de voto do BNG, reprobar a campaña sexista levada a cabo polo sindicato CIG contra a conselleira de Política Social, que claramente desvaloriza o traballo dun cargo político; así como calquera manifestación que vulnere o principio de igualdade. Ademais, exprésase a vontade de que o Bloque Nacionalista Galego, a través da súa voceira, a señora Ana Pontón, rexeite o contido sexista destes carteis.

A portavoz popular de Igualdade, Raquel Arias, considerou “imprescindible a reflexión conxunta e a condena dun dos ataques machistas e sexistas máis graves dos últimos tempos sobre unha muller con responsabilidades públicas, que xa foi reprobado por todos os sectores da sociedade galega agás o BNG e a súa lideresa, Ana Pontón”.

COVARDÍA QUE NORMALIZA TRATO VEXATORIO

“Ao non condenar esta viñeta, Ana Pontón demostra o covarde que é e normaliza o trato vexatorio cara unha muller que exerce responsabilidades públicas”, indicou Raquel Arias, quen apuntou que “tampouco se loita a prol do feminismo cando unha muller se queda sen argumentos no debate político e usa a súa condición de muller para no ser atacada, algo que usa a señora Pontón unha e outra vez neste Parlamento”.

Así mesmo, manifestou que a viñeta da CIG e a negativa do BNG a condenar expresamente a viñeta “vai en detrimento dos principios de igualdade e equidade, ademais de representar un descrédito profesional ao desvalorizar o traballo dunha persoa simplemente polo seu xénero”. “Desde o Grupo Popular consideramos que este tipo de actos non axudan en absoluto ao recoñecemento do valor da experiencia profesional das mulleres e ao traballo que se desenvolve pola igualdade das mulleres e dos homes”, dixo.

Coa decisión do BNG de negarse a votar esta iniciativa parlamentaria, Raquel Arias subliñou que “o nacionalismo galego, con Ana Pontón á fronte, queda absolutamente deslexitimado para falar de igualdade e feminismo, porque cada vez que teñen que elixir entre nacionalismo e igualdade, elixen nacionalismo; e cada vez que teñen que elixir entre a CIG e o feminismo, elixen a CIG”.

“Unha Ana Pontón que se presenta como unha feminista absolutamente combativa pero que, cando a vítima do machismo é unha muller que non pensa como ela, mira para outro lado, lanzando a mensaxe letal de que algunhas mulleres merecen menos protección que outras”, criticou a portavoz popular.

Para rematar, Raquel Arias considerou necesario “deixar moi claro que a igualdade e o feminismo é un principio ético universal, e que este Parlamento non tolera nin tolerará o uso político interesado da igualdade nin o silencio ante agresións políticas e persoais a ningunha muller, sexa cal sexa o seu partido político”.

O Grupo Popular avoga porque talento e esforzo sexa o único que determine o futuro laboral das mulleres galegas

A portavoz de Emprego do Grupo Popular, Noelia Pérez, destacou no Pleno do Parlamento galego o “firme compromiso do Goberno galego para seguir impulsando medidas que rompan barreiras en materia de igualdade laboral e garantan que o talento e o esforzo sexa o único que determine o futuro laboral das mulleres galegas”. En concreto, salientou que nunca houbo tantas mulleres traballando en Galicia, o paro feminino é dous puntos máis baixo que a media estatal e a fenda salarial está na menor cifra da serie histórica.

Noelia Pérez referiuse ás medidas adoptadas polo Goberno galego para combater a desigualdade laboral e fomentar a incorporación das mulleres en sectores masculinizados, así como os máis de 72 millóns de euros que este ano se destinarán ao apoio a autónomas e emprendedoras.

MEDIDAS DO GOBERNO CENTRAL

Neste sentido, demandou ao Goberno central que “adopte as medidas que lle estamos pedindo desde Galicia para abordar de verdade as desigualdades laborais e sociais que aínda persisten”. En concreto, solicitou que “o Goberno de Pedro Sánchez flexibilice os fondos finalistas de emprego para que a Xunta poida adaptalos á realidade e ás necesidades das mulleres de Galicia ou que transfira a Galicia a recadación do IRPF das cotizacións das traballadoras autónomas en concepto de formación profesional”.

“Non podemos aceptar que queiran vir a darnos leccións sobre igualdade laboral os mesmos que teñen afogados ás pequenas e medianas empresas e autónomos e autónomas, porque desde que o Partido Socialista chegou a Madrid, co apoio gratuíto do BNG, os custos laborais disparáronse un 40 por cento, acadando os 54.000 millóns de euros”, manifestou a portavoz popular. Así, apuntou que “esta situación supón máis custes sociais, que se traducen en menos empregabilidade para as mulleres e unha rebaixa dos salarios”.

Por outra banda, Noelia Pérez criticou o “feminismo intermitente” do BNG, “para o que existen mulleres de primeira e de segunda, pedindo respecto para unhas e non para as outras”. “Iso non é feminismo, é sectarismo, e están a xerar división baixo o paraugas de igualdade”, incidiu.

“A inmensa maioría das mulleres de Galicia estamos fartas de que o BNG nos use para o seu discurso mentres temos que soportar os seus machismos, os seus desprezos e o seu paternalismo”, afirmou a portavoz popular.

O Parlamento de Galicia reitera ao Goberno central a solicitude para que declare o Xacobeo 2027 como evento de excepcional interese para que as empresas poidan acceder a beneficios fiscais

O Pleno do Parlamento de Galicia reiterou hoxe ao Goberno de España, a través dunha proposición non de lei do Grupo Popular que foi aprobada por unanimidade, a solicitude para que declare o Xacobeo 2027 como acontecemento de excepcional interese ao abeiro do previsto Lei 49/2002 de réxime fiscal de entidades sen ánimo de lucro, e de incentivos ao mecenado, e con efectos xa desde o presente ano 2025.

O portavoz popular de Turismo, Borja Verea, lamentou que, “a pesar de que existe un consenso total en que o Xacobeo 2027 sexa declarado evento de excepcional interese público, aínda non o é a día de hoxe”. Neste sentido, apuntou que “a causa principal é a falta de orzamentos estatais”, ante o que demandou “vontade política para poñer en marcha esta declaración a través doutra lei ou incluso dunha lei independente aos orzamentos”. “O que fai falta é vontade política por parte do Partido Socialista e do Goberno de Pedro Sánchez”, dixo.

Borja Verea explicou que esta declaración “permite poñer en marcha os incentivos fiscais de apoio ao Xacobeo 2027 e, polo tanto, abre a porta á colaboración público-privada”, que no anterior Xacobeo 2021-22 permitiu poñer a disposición de todos os galegos 28 millóns de euros procedentes de 40 empresas colaboradoras.

TEMPO DO URXENTÍSIMO

“Estamos no tempo do urxentísimo para que se declare o Xacobeo 2027 como evento de excepcional interese público, porque de non facelo terá consecuencias negativas para Galicia e para os galegos”, sinalou o deputado popular, quen anotou que, “se a insistente unanimidade do Parlamento de Galicia non é suficiente para activar ao Goberno de España, só quedaría a triste conclusión de que estamos ante un boicot doloso co único obxectivo de facer dano a Galicia por intereses partidistas”.

Para rematar, Verea manifestou que o próximo Ano Santo Xacobeo 2027 “representa unha oportunidade única para reforzar o posicionamento internacional de Galicia como destino cultural de referencia a nivel mundial, e isto terá un impacto directo sobre os sectores estratéxicos da economía galega e, tamén, sobre iniciativas de sostibilidade e preservación do patrimonio, porque o Camiño de Santiago e o Ano Santo son os produtos culturais máis sostibles, máis socializadores e máis ecolóxicos que existen, e que temos a sorte histórica que sexan 100 por cento galegos”.

O Grupo Popular asegura que xa existen organismos que compren as funcións da Valedoría da Igualdade que propón o BNG

A viceportavoz do Grupo Popular, Paula Prado, afirmou hoxe no Pleno do Parlamento galego que a proposta do BNG de crear unha Valedoría da Igualdade “só serviría para xerar duplicidades e solapamentos innecesarios con outros organismos xa existentes”, como o Valedor do Pobo, o Consello Galego das Mulleres ou a Dirección Xeral de Promoción da Igualdade.

Paula Prado criticou que o BNG “recicle e descafeine as súas propostas coas que supostamente pretenden cumprir a estratexia feminista que lles mandan dos coroneis da UPG”. Así, explicou que “esta vetusta iniciativa nacionalista, que xa vén dos tempos de Anxo Quintana, pasou de ser unha proposición de lei de 24 folios en 2023 a converterse nunha proposición non de lei de apenas catro páxinas, de tantas boas intencións como imprecisións e termos excesivamente amplos”.

ESFARELAMENTO E ANEMIA DO FEMINISMO NACIONALISTA

“As funcións desta Valedoría entrarían en colisión coas funcións doutros departamentos xa existentes, como o Consello Galego das Mulleres, as direccións xerais de Promoción da Igualdade e de Relacións Laborais da Xunta, ou a inspección de Traballo do Goberno central”, explicou Paula Prado.

Así mesmo, indicou que “non é necesario crear un órgano deste tipo cando en Galicia xa contamos cunha institución como é a Valedora do Pobo, que precisamente ten entre as súas competencias a de velar pola igualdade de trato e de oportunidades entre homes e mulleres, así como pola erradicación da discriminación por razón de sexo”.

“O único que se atopa en situación de esfarelamento e anemia é o falso feminismo da esquerda”, asegurou a viceportavoz popular, quen criticou ás deputadas do BNG por “gardar silencio ante o machismo que rezuma o seu sindicato ao perpetuar os estereotipos sexistas coas súas viñetas de humor de taberna”. Ademais, lamentou que este silencio dos nacionalistas “tamén lles privou de condenar o ataque desta fin de semana á conselleira de Medio Ambiente e á súa familia”, polo que dixo que “aínda están a tempo para condenar este escrache na porta da súa casa, porque en política non vale todo”.

O Grupo Popular critica que o BNG fale de reto demográfico mentres boicotean o desenvolvemento industrial e enerxético de Galicia

O deputado do Grupo Popular Argimiro Marnotes criticou hoxe no Pleno do Parlamento galego que o BNG “fale de reto demográfico mentres boicotean o desenvolvemento industrial e enerxético de Galicia”. “Se queremos que a xente quede en Galicia e que outros veñan, mellorando demograficamente esta terra, non basta con mellorar cada ano a aportación aos concellos desde a Xunta, porque tamén compre facilitar que novas empresas se implanten e que as empresas existentes sigan investindo e creando emprego”, anotou.

Argimiro Marnotes manifestou que “falar de mecanismos de reto demográfico negándose si ou si á implantación de novas industrias xeradoras de emprego é dicir claramente que ao BNG lle importa absolutamente nada o reto demografico”. Neste sentido, acusou aos nacionalistas galegos de “pretender impoñer o bloqueo ideolóxico que impide o progreso e pon en perigo o emprego e o incremento da poboación”.

IGUALDADE DE TRATO

O deputado popular salientou que “todos os concellos de menos de 15.000 habitantes xa son considerados como municipios en situación prioritaria para a Xunta, de aí que no reparto de fondos sexan os primeiros beneficiarios”. Neste sentido, explicou que “o carácter xeral de reparto garante a igualdade de trato entre os concellos de Galicia e o cumprimento da normativa de subvencións, sendo o sistema xeneralizado o de concorrencia competitiva”.

“Galicia conseguiu frear as previsións de perda de poboación e gañar poboación ata superar os 2,71 millóns de habitantes, acadando unha esperanza de vida no máximo histórico de 83,62 anos”, indicou Marnotes. Así, salientou que “a Xunta é consciente de que para seguir mellorando as cifras demográficas é fundamental ofrecer facilidades ás familias, intensificando medidas como a gratuidade das escolas infantís e universidade, a tarxeta Benvida, a posta en marcha de máis de 100 casas-niño e máis de 140 casas do maior, o Bono Concilia e os beneficios para as familias numerosas e monoparentais”.