O Parlamento de Galicia solicita ao Goberno central que acade o 1% do PIB en financiamento ás universidades no 2030

O Parlamento de Galicia aprobou hoxe a proposición non de lei do Grupo Popular, sen o voto favorable dos deputados do PSdeG, a través da que se solicita ao Goberno central que participe de xeito claro no financiamento do Sistema Público Universitario e, en consecuencia, na consecución do obxectivo de acadar o 1 por cento do PIB en recursos públicos as universidades no 2030. Así mesmo, pídese que calquera reforma que se realice no sistema universitario que afecte ás comunidades autónomas sexa en dialogo con elas e sempre trasladando os fondos necesarios para a aplicación das medidas propostas.

A portavoz popular de Educación, Cecilia Vázquez, lembrou que “en Galicia está operativo o Plan de financiamento universitario 2022-2026, a través do que as universidades galegas reciben o maior apoio da historia ao mobilizarse arredor de 3.200 millóns de euros neste período, ao que se suman outras achegas adicionais como as vinculadas ao plan de infraestruturas universitarias”.

RECIBIR O QUE NOS CORRESPONDE

“Somos a primeira comunidade autónoma que acada o 1 por cento do seu PIB en gasto na universidade pública, cumprindo con moita antelación un obxectivo fixado para o ano 2030 e mellorando o que marca a Lei de universidades estatal para o conxunto de axentes públicos”, destacou.

Diante desta situación, Cecilia Vázquez demandou que o Ministerio de Ciencia e Universidades “poña dunha vez as cartas enriba da mesa e peche xa un plan para acadar ese 1 por cento do PIB en toda España”, pero advertiu que “non imos permitir que ese plan prexudique a Galicia e sexa penalizada con menos financiamento estatal por ter cumprido xa co obxectivo do 1 por cento”. “Se hai un plan de financiamento estatal para as universidades para acadar ese 1 por cento do PIB, Galicia debe recibir o que lle corresponde consonte ao esforzo realizado e que nos permite estar hoxe onde estamos”, indicou.

Para rematar, a portavoz popular afirmou que “o Goberno central non está actuando conforme ao obxectivo fixado e deberá incrementar o financiamento ás universidades, máxime tendo en contra que o Goberno central elaborou e aprobou a norma que establece esta meta de xeito universal sen contar coa colaboración das comunidades autónomas e sen o correspondente traslado de fondos para o desenvolvemento das medidas que recolle”.

O Parlamento de Galicia pide ao Goberno central que impulse unha nova Lei do Patrimonio Cultural

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se solicita ao Goberno central que impulse unha nova Lei do Patrimonio Cultural para modernizar e refundir a lexislación vixente en materia de patrimonio, en colaboración coa Comunidade galega, os concellos e as demais institucións públicas e privadas do sector.

O deputado popular José Luís Ferro lembrou que “o Goberno de Pedro Sánchez  presentou en 2021 un anteproxecto da nova Lei de patrimonio cultural, da que o Goberno galego se posicionou en contra por varios motivos: invadía as competencias das comunidades autónomas, trataba de recuperar para o Estado funcións que non é capaz de facer no día a dia, e impoñía ríxidos trámites burocráticos que dificultan a xestión do patrimonio e empeoran a atención á cidadanía”.

Porén, criticou que “este Goberno de España non foi capaz de sacar adiante esta norma, que incluía medidas que restaba eficacia e eficiencia á xestión dos poderes públicos en materia de patrimonio cultural, e que claramente invadía competencias autonómicas retrotraéndose a un proceso centralizador xa superado pola madurez das competencias das autonomías”.

RESPOSTAS E SEGURIDADE

“Galicia e as entidades que teñen incidencia sobre o patrimonio precisan respostas e seguridade, porque non podemos estar pendentes dos cambios de opinión de última hora dun Goberno de España que amosa, día si e día tamén, pouca capacidade de acción para as cousas importantes e moita celeridade cando se trata de manterse no poder a costa do que sexa”, afirmou.

Ferro demandou que o Goberno de Pedro Sánchez “reinicie as tarefas que deixou a medias e que se leve a cabo un debate con todos os actores públicos e privados que protexen e promoven o coñecemento do patrimonio cultural”, porque indicou que “a redacción do anteproxecto resulta hoxe moi xenérica e débese adaptar ao moito que se evolucionou e se innovou, incluíndo asuntos que hai 40 anos non existían”.

“A creación dunha nova Lei estatal de patrimonio cultural outorgaría a Galicia seguridade no exercicio das súas competencias”, indicou o deputado popular, quen anotou que “necesitamos unha lei sinxela e unificadora, que non adultere a cultura, pois a protección e promoción da nosa cultura debe ser o prioritario”.

O PPdeG afirma que a Xunta completará nas vindeiras semanas o informe de avaliación do estado dos murais de Lugrís na rúa Olmos de A Coruña e o custo que suporía o seu traslado

O deputado do Grupo Popular Roberto Rodríguez afirmou hoxe no Parlamento de Galicia que a Xunta completará nas vindeiras semanas o informe de avaliación do estado dos murais de Urbano Lugrís na rúa Olmos e que determinará o custo que suporía a súa retirada e traslado a outro espazo na cidade de A Coruña que reúna as condicións adecuadas para a súa conservación. Porén, criticou “o desleixo do Goberno socialista de A Coruña, apoiado polo BNG, que non foi quen de facer unha aposta, nin económica nin política, por un proxecto cultural para a cidade ou pola protección da obra de Urbano Lugrís”.

Roberto Rodríguez lembrou que a Xunta, exercendo o seu dereito de tanteo, adquiriu por 36.000 euros os murais de Urbano Lugrís existentes en dúas casas unidas na rúa Olmos de A Coruña, unha vez que incoou o procedemento para declarar ben de interese cultural, na categoría de monumento, estas obras. “Fronte á actitude da alcaldesa, que deixou claro que o Concello non compraría os murais, o Goberno galego actuou con rapidez para salvagardar unhas obras tan importantes e sumalas ao patrimonio público de Galicia”, apuntou.

HIPOCRISÍA DO BNG

“O Goberno municipal de A Coruña, que o BNG apoia incondicionalmente, non fixo absolutamente nada nin para protexer os murais de Urbano Lugrís nin para que estas obras quedaran na cidade”, incidiu o deputado popular. Neste sentido, criticou que, logo de que a alcaldesa anunciara en abril de 2023 que se ía solicitar a tramitación da declaración destes murais como BIC, “tardaron once meses e só remitiron a solicitude ao día seguinte que a Xunta anunciou o seu interese por estas obras”.

Ademais, Roberto Rodríguez asegurou que “os murais quedarán en A Coruña pola aposta seria e decidida da Xunta, porque se fora polo interese e a dilixencia dos responsables municipais xa estarían hoxe nunha galería privada de Vigo, a pesar de que no seu programa electoral se comprometeron literalmente a recuperar os murais da rúa Olmos e crear en Fornos o Espazo Urbano Lugrís”. Agora, afirmou que o informe de avaliación sobre os murais “será unha boa base para sentar a conversar e tender pontes entre administracións para buscar a mellor solución”.

Para rematar, o deputado popular criticou a “hipocrisía do BNG ao traer hoxe ao Parlamento galego a súa preocupación polos murais de Lugrís en A Coruña, pedindo a outros o que non son quen de esixirlle que cumpra a alcaldesa, pese a facela e mantela no seu posto”.

O PPdeG reivindica os lazos que unen Europa e Galicia a través dos seus “intereses comúns”

Os representantes do Partido Popular de Galicia aproveitaron a súa presenza no Congreso do PP Europeo en Valencia para poñer de manifesto os lazos que unen Europa e Galicia a través dos “intereses comúns” que comparten no eido da vivenda, o sector primario, a pesca ou a competitividade industrial.

Así o quixeron destacar os eurodeputados galegos Francisco Millán Mon e Adrián Vázquez acompañados pola secretaria xeral do PPdeG, Paula Prado, nun Congreso, celebrado entre onte e hoxe, no que os representantes galegos trasladaron que “Galicia, ao igual que Europa, quere máis competitividade, máis defensa e un sector primario máis forte”.

“Este Congreso é importante para Galicia porque ratificamos que os intereses dos galegos coinciden cos de Europa”, explicou Millán Mon na mesma liña que o seu compañeiro Adrián Vázquez, que ten claro que entre os temas a tratar neste cumio están “non só os temas que importan a Europa e a España, senón tamén os temas que importan a Galicia”.

O eurodeputado lalinense aproveitou ademais para recordar a “aplastante” vitoria protagonizada polo Partido Popular en Galicia nas pasadas eleccións europeas. Unha vitoria grazas á cal, na súa opinión, “os intereses dos galegos son tamén defendidos na capital de Europa”.

Millán Mon tamén lembrou estes comicios e especialmente a súa campaña electoral, na que “Galicia se converteu por uns días no corazón de Europa” grazas á presenza da presidenta da Comisión Europea, Ursula von der Leyen, na tradicional Romaría do Pino xunto ao presidentes Alberto Núñez Feijóo e Alfonso Rueda.

O pontevedrés apuntou que tamén tivo un papel destacado nesta campaña a eurodeputada española, Dolors Montserrat, que neste Congreso será designada nova secretaria xeral do PP Europeo e que con motivo das eleccións europeas tivo a oportunidade de visitar Lugo, Ponteareas, Santiago de Compostela ou O Pino. De aí que celebre a elección como número dous dos populares europeos de alguén que “coñece ben Galicia”.

Por último, os representantes galegos en Valencia, encabezados por Paula Prado, subliñaron a importancia de que todo volva á normalidade en Galicia despois da caída do sistema eléctrico, unha emerxencia que seguiron con atención, en contacto en todo momento coa Comunidade.

O Parlamento pide ao Goberno central asegurar a subministración eléctrica a todos os proxectos industriais estratéxicos previstos en Galicia

O Parlamento de Galicia aprobou hoxe, sen o apoio dos deputados de BNG e PSdeG, a proposición non de lei do Grupo Popular a través da que se solicita ao Goberno de España que realice, de maneira urxente e inmediata, as actuacións necesarias para asegurar a subministración eléctrica a todos os proxectos industriais estratéxicos previstos na Comunidade galega, e garantir a evacuación de enerxía derivada do aumento da xeración renovable no sistema eléctrico. Así mesmo, pídese que colabore estreitamente coas comunidades autónomas e dea resposta ás súas necesidades no deseño da nova planificación eléctrica con horizonte 2030, co obxectivo de garantir o desenvolvemento enerxético e industrial de Galicia.

O portavoz popular de Industria, Rubén Lorenzo, manifestou que “a planificación eléctrica deberíase de configurar como un instrumento normativo que establece os desenvolvementos necesarios da rede de transporte de electricidade para que a subministración en España siga sendo segura, de alta calidade e cada vez máis renovable”. Deste xeito, afirmou que “débese facer unha planificación dimensionada e preparar a rede de transporte para que, ademais de atender a demanda actual, sexa capaz de dar resposta a novos consumos e facilite a transición ecolóxica”.

APAGÓN ELÉCTRICO E INFORMATIVO

Lorenzo cualificou de “surrealista e incomprensible que no 2025 esteamos falando de que se dea unha situación de cero enerxético en España” como a que aconteceu onte, na que “moito máis grave que o apagón eléctrico sufrido durante moitas horas, foi o apagón informativo ao que nos someteu o Goberno central”. Neste sentido, puxo en valor “o civismo dos españois, porque gracias a el non estamos falando de situacións preocupantes no país”.

“Pedro Sánchez non pode falar de rede eléctrica como se fose unha empresa privada máis, porque todos sabemos que Redeia é un organismo público”, manifestou o portavoz popular, quen cuestionou “onde está a presidenta de Rede Eléctrica Española, unha señora que era ministra co señor Zapatero e que está desaparecida para a cidadanía e para as empresas”.

O Grupo Popular pedirá no Pleno que o Goberno central apoie ás comunidades autónomas na xestión do lobo e a defensa dos gandeiros

O Grupo Popular demandará no Pleno ordinario que se celebra a vindeira semana o apoio do Parlamento galego á rebaixa do nivel de protección do lobo e que o Goberno central apoie ás comunidades autónomas no desenvolvemento das accións oportunas e necesarias para a xestión desta especie e a defensa dos intereses dos gandeiros. Asemade, pedirá que a tramitación do proxecto da mina de Doade en Ourense, seleccionada como un dos sete proxectos en España para o procesado e reciclado de materias primas estratéxicas na Unión Europea, se leve a cabo consonte á normativa actual e sen ningún menoscabo ambiental, de tal xeito que so poida ser aprobado se cumpre toda a lexislación vixente, especialmente a medioambiental.

Ao remate da Xunta de Portavoces, o portavoz popular, Alberto Pazos, lamentou “os dous apagóns que sufrimos onte todos os españois: o eléctrico e o informativo por parte do Goberno central”. Neste sentido, agradeceu o traballo desenvolvido polos profesionais de todas as administracións públicas, de xeito especial o realizado pola Xunta de Galicia, “que traballaron nunha situación complicada para mitigar os efectos que podía ter na cidadanía a falta de enerxía eléctrica”.

“Nos congratula que a gran maioría dos galegos poida gozar neste momento do normal subministro eléctrico” afirmou Pazos, quen demandou explicacións sobre o acontecido ao Goberno central “porque é un problema que afectou ao conxunto do Estado”. “Non sei que debe pasar en España para que se declare unha emerxencia nacional”, indicou.

Respecto da orde do día da sesión plenaria, o portavoz popular informou que terá lugar a comparecencia de dous conselleiros: o de Cultura, Lingua de Xuventude, para dar conta dos proxectos a curto e medio prazo que afronta este departamento; e o do Mar, para informar sobre a comercialización dos produtos pesqueiros ante as negociacións do acordo de libre comercio da Unión Europea con Tailandia.

APOIO Á REBAIXA DA PROTECCIÓN DO LOBO

Dentro do apartado de proposicións non de lei, o Grupo Popular pretende que o Parlamento de Galicia manifeste o seu apoio á rebaixa do nivel de protección do lobo, restablecendo o equilibrio entre a necesaria preservación desta especie e as actividades gandeiras desenvolvidas no rural; ao tempo que se pide ao Goberno central que apoie ás comunidades autónomas no desenvolvemento das accións oportunas e necesarias para a xestión do lobo e a defensa dos intereses dos gandeiros.

Alberto Pazos lembrou que o Congreso acordou rebaixar a protección desta especie ao norte do río Douro, “o que supón unha corrección á errada decisión do Goberno de España de incluír en 2021 o lobo no listado de especies silvestres en réxime de protección especial, adoptada de xeito unilateral, sen consultar coas comunidades autónomas afectadas, e sen ningún tipo de aval científico”.

“Esta decisión do Goberno de Pedro Sánchez privou ás comunidades autónomas de adoptar medidas de control sobre o lobo, o que dificultou a súa convivencia co sector gandeiro e derivou en perdas considerables aos propietarios polos ataques aos seus animais”, lembrou. Unha mostra desta preocupante situación foi que os avisos por danos provocados polo lobo se incrementaron cerca dun 77 por cento, ao tempo que as reses afectadas por ataques desta especie aumentaron nun 57 por cento, cunha media de dez animais atacados cada día.

IMPULSO Á ACTIVIDADE INDUSTRIAL

A segunda das proposicións non de lei que defenderá o Grupo Popular ten que ver co impulso da actividade industrial en Galicia, en concreto a raíz da selección por parte da Comisión Europea da explotación da mina de litio de Doade en Ourense como un dos sete proxectos estratéxicos en España. “Esta decisión permitirá a esta explotación mineira dispor dun mellor financiamento europeo e nacional, así como contar cunha maior axilidade á hora de obter permisos para reducir a dependencia da Unión Europea de materiais estratéxicos procedentes doutras áreas do mundo”, explicou o portavoz popular.

Deste xeito, desde o Grupo Popular pedirase que se recoñeza a importancia das materias primas fundamentais e das materias primas estratéxicas para reforzar a autonomía estratéxica e reducir a dependencia exterior. Para iso, solicitarase no Pleno que a tramitación do proxecto da mina de Doade se leve adiante co máximo respecto á normativa actual, incluídas as esixencias do Regulamento Europeo de materias críticas, e, por suposto, sen ningún menoscabo medioambiental, e que non exista un posicionamento a favor ou en contra do proxecto da mina de Doade en tanto non haxa un pronunciamento dos técnicos competentes na materia.

Por último, dentro do apartado de preguntas ao Goberno galego, o Grupo Popular interesarase pola sociedade Vivenda Pública de Galicia e de que xeito está a contribuír na promoción de vivenda pública, con destino á venda ou alugueiro, desde a súa creación en novembro de 2024. Asemade, solicítase unha valoración sobre o proceso de gobernanza realizado polo Goberno de Pedro Sánchez na planificación e execución dos recursos recollidos no Plan de Recuperación, Transformación e Resiliencia de España e pedirase información sobre os datos definitivos das listas de espera sanitarias correspondentes ao pasado ano 2024.

Paula Prado subliña que no Debate do Estado da Autonomía quedou demostrado que o PPdeG “representa a Galicia do ‘si’” mentres a esquerda “só torpedea o futuro”

A secretaria xeral do PPdeG, Paula Prado, subliñou hoxe que no Debate do Estado da Autonomía (DEA) quedou demostrado que o Partido Popular “representa a Galicia do ‘si’” mentres a esquerda “só busca torpedear o futuro” da Comunidade.

Nunha visita na mañá deste sábado á Praza de Abastos de Lugo, acompañada da portavoz municipal do PP, Elena Candia, e a tamén deputada autonómica e concelleira, Cristina Sanz, a número dous dos populares galegos fixo balance da “intensa semana” vivida no Parlamento de Galicia, onde tivo lugar o DEA.

No mesmo, dixo, o presidente Alfonso Rueda marcou unha folla de ruta de “medidas ambiciosas e realistas, pensadas para mellorar a vida dos galegos e das galegas”, e das que a cidade e a provincia de Lugo “tamén se beneficiarán”, xa que xurdiron, en gran parte, das inquedanzas que os alcaldes e portavoces trasladaron desde cada un dos seus territorios.

“Quedou demostrado, sobre todo onte, que o único que representa a Galicia do ‘si’ é o Partido Popular”, deixou claro Paula Prado, lembrando que se aprobaron 53 propostas de resolución —7 por unanimidade— que “marcan o camiño dos vindeiros meses”. “O PPdeG chegou a un bo número de acordos, demostrando que nós estivemos en todo momento dispostos a negociar”, engadiu.

Mentres tanto, lamentou, “os de sempre, os do ‘non’, o Bloque Negacionista Galego” trataron “de torpedear, de voar as pontes mesmo antes de acabar as negociacións, demostrando unha deslealdade nunca vista antes neste Debate”.

Prado asegurou non comprender como o BNG “se posicionou en contra de medidas de futuro” como reforzar a atención e aprobar un novo Plan de saúde mental —unha medida consensuada entre PPdeG e PSOE—, e tampouco apoiou axilizar a tramitación para a xente que quere vivir e traballar no litoral, agora que Galicia ten as competencias; ou impulsar un Pacto pola lingua galega, con medidas que promovan un maior uso do galego en todos os ámbitos sociais.

“Quedou claro, unha vez máis, que non queren nada bo para Galicia: só facer ruído e entorpecer ao Goberno galego”, censurou.

Nese sentido, considera que “iso é un gran perigo tamén para cidades como Lugo, que seguen dando pasos atrás co BNG do ‘non a todo’ e cun PSOE incapaz que agora se mestura entre bandeiras independentistas”.

Os socialistas, entre outras cuestións, votaron no DEA en contra de reclamar ao Goberno de Sánchez que pague a súa parte do financiamento da dependencia ou de demandar ao Executivo central que cumpra co seu deber constitucional de presentar os Presupostos Xerais do Estado.

MEDIDAS PIONEIRAS COMO O BONO PEIXE

Por outra banda, no marco da súa visita ás peixerías da Praza de Abastos de Lugo, a secretaria xeral do PPdeG subliñou que o DEA tamén serviu para seguir concienciando á poboación sobre a importancia de que os produtos do mar sexan unha parte fundamental de calquera dieta equilibrada e saudable.

Así, destacou o lanzamento do Bono Peixe para estimular o consumo de peixe fresco, dotado con 50 euros por persoa e que vai chegar a 50.000 consumidores. Un total de 2,5 millóns de euros para animar á xente para que recupere o hábito.

“Somos a Galicia do ‘si’ tamén ao peixe fresco, a Galicia que está coa xente do mar, coas peixerías e cos consumidores”, concluíu, denunciando que o PPdeG leva anos insistindo ante o Goberno central para que rebaixe o IVE do peixe do 10 ao 4%, pero “ao outro lado atopamos sempre hai desprezo e silencio”.

ELENA CANDIA: “PROPUXEMOS SOLUCIÓNS PARA A PRAZA”

A portavoz municipal, Elena Candia, salientou que o PP de Lugo presentou iniciativas no Pleno do Concello para que a Praza de Abastos “estea no centro das políticas públicas” e “se corrixan as deficiencias que ten”. “Propuxemos solucións e seguimos traballando”, indicou, sobre un lugar “importante sobre todo pola actividade económica e a transcendencia que ten para a cidade e a provincia”.

Candia lamentou que o Goberno local tivera que renunciar a unha subvención da Xunta de Galicia “por non ser quen de executala” e agarda que, coa deste ano e que volve ter concedida, “traballen máis e mellor”.

“Na nosa cidade, pola falta de planificación e polas incertezas na mobilidade, a Praza de Abastos segue sendo unha materia pendente, tamén polo que pasará despois de que as obras rematen. Unhas obras que se atrasan e que están ocasionando moitos prexuízos tamén neste mercado”, abundou.

Por último, a tamén deputada autonómica, despois da visita ás peixerías da praza, celebrou que o Goberno galego “segue reivindicando medidas importantes para fomentar o consumo saudable de peixe e que sexa posible para as economías familiares, coidando o seu peto”.

O PPdeG pide ao Goberno central que localice o futuro Centro Nacional de Ciberseguridade en Ourense

Os deputados do Grupo Popular Noelia Pérez e Argimiro Marnotes visitaron hoxe, en compañía da alcaldesa de San Cibrao das Viñas, Marta Nóvoa, as obras de construción do novo Centro de Excelencia en Ciberseguridade de Galicia que a Xunta está a realizar na parcela 3E da Tecnópole e demandaron que o Goberno de España localice neste espazo o futuro Centro Nacional de Ciberseguridade, tendo en conta a existencia na Comunidade galega dun sólido ecosistema empresarial e de formación e investigación nesta materia.

Noelia Pérez e Argimiro Marnotes lembraron que o futuro Centro que se está a levantar no polígono industrial de San Cibrao acollerá os sistemas de monitorización e xestión da ciberseguridade en Galicia, en coordinación co Centro Criptolóxico Nacional e co Institito Nacional de Ciberseguridade.

REFERENTE NACIONAL E INTERNACIONAL

“Queremos que Ourense se converta non só na capital galega da ciberseguridade, concentrando aquí os recursos a disposición da Xunta, dos concellos, das deputacións, das universidades, dos centros tecnolóxicos e de innovación, e do sector privado que presta estes servizos, senón que o Goberno central recoñeza o bo traballo que se leva a cabo e se decida tamén por Ourense como a sede do futuro Centro Nacional de Ciberseguridade”, sinalaron.

Os deputados populares lembraron que esta demanda é unha das resolucións aprobadas onte no Debate sobre Política Xeral celebrado esta semana no Parlamento de Galicia, unha proposta que saíu adiante co voto favorable de todos os grupos parlamentarios.

“A localización do futuro Centro Estatal de Ciberseguridade en Ourense situaría á nosa provincia como un referente neste ámbito non só a nivel nacional, senón tamén internacional, contribuíndo a un desenvolvemento máis equilibrado do país, á cohesión territorial e á redución da brecha dixital entre as rexións”, afirmaron.

O PPdeG salienta que unha aportación de 800.000 euros da Xunta permitirá adaptar a nave de Aceros del Tea como a nova praza de abastos de Ponteareas

As deputadas do Grupo Popular Felisa Rodríguez e María Deza, acompañadas da alcaldesa de Ponteareas, Nava Castro, salientaron hoxe a importancia das axudas da Xunta de Galicia para a modernización e rehabilitación das prazas de abastos galegas. Neste sentido, puxeron de exemplo a transformación que se levará a cabo na nave de Aceros del Tea en Ponteareas, un espazo no que se investirán cerca de 800.000 euros para convertelo na nova praza de abastos desta localidade pontevedresa.

Felisa Rodríguez e María Deza visitaron esta mañá a praza de abastos de Ponteareas para comprobar a situación na que desenvolven neste momento o seu traballo os praceiros e realizan as súas compras os consumidores. “As condicións cambiarán totalmente unha vez rematen as obras de rehabilitación e modernización da nave de Aceros del Tea, un espazo máis accesible e eficiente que albergará o novo mercado municipal e ofrecerá novas opcións gastronómicas e de restauración, ao tempo que porá en valor os produtos frescos e impulsará o comercio de proximidade”, manifestaron, para apuntar que “o obxectivo é conseguir que sexa declarado como Mercado de Excelencia”.

PEIXE E MARISCO MÁIS ASEQUIBLE

A Xunta de Galicia pon a disposición dos concellos unha liña de axudas destinadas a reforzar os mercados e prazas de abastos como motor económico local, fomentando o comercio de proximidade e dinamizando a actividade social e comercial dos municipios. Esta liña de axudas forma parte do Plan Estratéxico do Comercio de Galicia 2025-2030, en cuxa elaboración participaron máis de 300 representantes e expertos do sector do comercio galego.

As deputadas populares aproveitaron a súa visita á praza de abastos de Ponteareas para informar a praceiros e clientes da próxima implantación en Galicia do Bono Peixe, anunciado polo Presidente Rueda no Debate sobre Política Xeral celebrado esta semana no Parlamento galego.

Este bono consiste nunha axuda de 50 euros por persoa para estimular o consumo de peixe e marisco fresco por parte dos galegos. “En total, a Xunta investirá 2,5 millóns de euros para facer máis asequible e ao alcance de todos os petos estes produtos, mentres o Goberno central non adopta a redución do IVE que todo o sector lle está a pedir”, concretaron.

O PPdeG critica a incompetencia do Concello da Pobra do Caramiñal e de Costas do Estado para dar unha solución aos vertidos da Ribeiriña

Os deputados do Grupo Popular Gonzalo Trenor, Magdalena Pérez e Miguel Fidalgo lamentaron hoxe a incompetencia do Concello de Pobra do Caramiñal e da Demarcación de Costas do Estado por dar unha solución adecuada aos vertidos por hidrocarburos que se están a producir na zona da Ribeiriña, que obrigaron ao peche de varios bancos marisqueiros.

Nunha visita á zona acompañados do portavoz local do PPdeG, Manuel Durán, os deputados populares consideraron “incomprensible como o Concello de Pobra permitiu facer esta obra nas vellas instalacións de La Onza de Oro sen unha descontaminación do solo e que provoca agora estas consecuencias”.

DILIXENCIA DA XUNTA PARA ACTUAR DE INMEDIATO

“A suposta rexeneración da zona converteuse nun pesadelo, xa que ao eliminar parte do recheo sen descontaminar está a provocar agora que as filtracións cheguen directamente ao mar”, criticaron.

Ademais, Gonzalo Trenor, Magdalena Pérez e Miguel Fidalgo amosaron a súa preocupación pola situación de “abandono total das instalacións da antiga fábrica de HADASA, sen que ata o momento os responsables municipais teñan dado resposta ao requirimento feito pola Xunta para coñecer as medidas que ten previsto levar adiante para mitigar os riscos medioambientais e protexer a salubridade pública dos veciños”.

Os deputados populares destacaron “a dilixencia coa que actuou, desde o momento no que se notificaron os vertidos, a Xunta de Galicia, activando o plan de continxencias por contaminación mariña accidental e desprazando á zona da Ribeiriña a efectivos do Servizo de Gardacostas de Galicia para abordar o problema e que causara os menores danos posibles”.

“O único que busca o cuatripartito de esquerdas que malgoberna A Pobra do Caramiñal é ocultar o abandono no que teñen sumida esta privilexiada zona da costa deste concello, intentando tapar a súa lamentable xestión con acusacións sen sentido á Xunta, cando a verdade é que a Administración galega é a única que non ten competencia algunha para solucionar este problema e o único que fixo foi poñer en marcha medidas para evitar males maiores”, manifestaron.