O PPdeG denuncia que Galicia será a 4ª comunidade máis afectada polo “colapso” derivado da nova Lei de eficiencia da Xustiza do Goberno central

O PPdeG denuncia que Galicia será a cuarta Comunidade máis afectada polo “colapso” que suporá a entrada en vigor da nova Lei de eficiencia da Xustiza aprobada polo Goberno central co apoio do BNG e que incrementará en máis dun 18% a carga de traballo nos xulgados de Violencia sobre a Muller.

Os populares galegos fanse eco así dos datos feitos públicos polo propio Consello Xeral do Poder Xudicial e que apuntan a que esta sobrecarga de traballo en Galicia será incluso superior á da media nacional. É máis, no caso concreto dos xulgados de Vigo e A Coruña, a aplicación da nova lei implicará a asunción dun cento de casos máis ao ano en cada un deles.

Unha sobrecarga de traballo que, en opinión dos propios xuíces especializados, repercutirá negativamente na loita contra a violencia de xénero. Algo que para o PPdeG é inadmisible e do cal acusan directamente tanto ao PSOE como ao BNG por votar a favor desta lei a pesar das súas consecuencias: “Primeiro sacaron á rúa aos agresores sexuais e agora pretenden desprotexer aínda máis ás vítimas privándoas dun sistema xudicial eficaz para atopar saída á tiranía da violencia”.

A senadora por Pontevedra e portavoz de Xustiza do Grupo Popular na Cámara Alta, Pepa Pardo, afea a socialistas e nacionalistas que ademais votaran en contra da toma en consideración dunha proposición de lei presentada polo PP no Congreso dos Deputados precisamente para reverter esta situación.

“Non imos admitir ningunha rebaixa na protección coa que deben contar as mulleres vítimas de violencia de xénero e os seus fillos e fillas”, sostén afeándolles que “dicindo ‘non’ a esta proposta o que fan e dicir ‘si’ ao colapso dos xulgados galegos” e anunciando que levarán esta mesma iniciativa ao Senado.

A senadora galega, en referencia a esta iniciativa que xa está rexistrada e pendente do seu debate, invita tanto aos socialistas como aos independentistas a “estar á altura das circunstancias” e rectificar a súa postura “polo ben das vítimas”.

MÁIS XULGADOS DE VIOLENCIA DE XÉNERO

Unha situación que se produce ademais logo de coñecerse que o número de denuncias por violencia de xénero rexistradas o pasado ano foi superior á de 2023. Algo que, en opinión dos populares, “obriga a todas as Administracións a actuar redobrando esforzos e en ningún caso remando en sentido contrario”.

De aí que insistan na demanda que a Xunta de Galicia leva anos trasladando ao Goberno central para que se habiliten xulgados específicos de violencia de xénero en todas as cidades galegas. “Eses xulgados que segundo prometeu o señor Besteiro en campaña e tal e como asinou Ana Pontón no seu pacto de investidura con Pedro Sánchez estarían en funcionamento en 2024”.

O PPdeG sitúa a axilización burocrática como un dos eixos prioritarios e unha das claves da efectividade das políticas de retorno do Goberno galego

O Partido Popular de Galicia sitúa a axilización burocrática como un dos eixos prioritarios e unha das claves da efectividade das políticas de retorno do Goberno galego á hora de xerar oportunidades de emprego e responder a retos como a falta de man de obra en sectores estratéxicos.

Así llo trasladou a secretaria xeral dos populares galegos, Paula Prado, e o secretario executivo do PP no Exterior, Antonio Rodríguez Miranda, á responsable do PP na rexión brasileira da Baixada Santista e unha das vogais dos galegos residentes no exterior no Comité Executivo do PPdeG, , Amanda Barrio, durante a reunión que mantiveron co obxectivo de abordar a situación actual e as principais necesidades dos 52.500 galegos e galegas residentes en Brasil.

Entre outras cuestións, ambas partes coincidiron na necesidade de “desburocratizar” o proceso de retorno tanto no que se refire á axilización dos procesos de homologación de títulos universitarios obtidos no estranxeiro como á concesión de permisos de residencia e traballo para familiares de retornados.

Tamén concordaron no positivo que sería neste eido que o Goberno central, ao igual que fai o Goberno galego, afondase no desenvolvemento de políticas públicas de acceso á vivenda e na posta en marcha de medidas específicas de apoio para a integración laboral das familias que regresan.

RETOS DA COLECTIVIDADE GALEGA NO BRASIL

No que se refire aos retos que afectan directamente á colectividade galega no Brasil, abordaron a situación de “colapso administrativo” que padecen o servizo consular en xeral e o Consulado de São Paulo en particular ante a escaseza de persoal e recursos. Unha situación que cualificaron de “emerxencia” pola súa repercusión directa sobre miles de galegos e galegas.

En materia electoral, solicitan así mesmo a ampliación dos puntos de depósito de voto. O cal é especialmente necesario nun país de dimensións continentais como o Brasil, onde a dispersión xeográfica dificulta a participación.

Durante a súa visita a Galicia, Amanda Barrio tamén tivo ocasión de reunirse co líder dos populares galegos, Alfonso Rueda.

Transmitiulle, ao igual que fixera durante a visita do presidente Rueda a Brasil, o fondo interese que amosan os galegos e galegas do seu país polas políticas de retorno que está desenvolvendo o Goberno galego a través de iniciativas pioneiras no conxunto do Estado español e que contribúen a reforzar aínda máis os vínculos entre Galicia e a súa diáspora.

O PPdeG urxe ao Goberno central a mellorar a dotación de material e equipamento das Forzas e Corpos de Seguridade do Estado en Galicia

O Partido Popular de Galicia urxe ao Goberno central a que dote ás Forzas e Corpos de Seguridade do Estado que operan na nosa Comunidade dos medios necesarios para garantir tanto o cumprimento seguro e eficaz das súas funcións de seguridade como a protección da integridade física dos axentes.

Faino a través dunha proposición non de lei rexistrada no Parlamento de Galicia logo de que a secretaria xeral do partido, Paula Prado, a secretaria nacional de Interior do Partido Popular, Ana Vázquez, e o deputado autonómico Jesús Fernández Rosende mantiveran unha reunión con representantes de sindicatos policiais e asociacións profesionais de gardas civís na que estes trasladaron o seu descontento ante a “infradotación” e a “precariedade” material que sofren no seu día a día.

Unha situación que supón un risco tanto para a seguridade dos axentes como para a da cidadanía no seu conxunto, xa que “os retos relacionados co aumento da criminalidade e da percepción de inseguridade en certos contextos requiren ferramentas modernas que permitan unha actuación máis eficiente”.

Neste contexto, defenden os populares na súa iniciativa, mellorar os recursos e os medios dos que dispoñen as Forzas e Corpos de Seguridade para desempeñar “en condicións de calidade, confortabilidade e funcionalidade” as súas funcións –desde os recursos tecnolóxicos ata os vehículos de servizo, así como as instalacións– “contribúe a reforzar a súa eficacia na prevención e persecución do crime”.

O que demandan, polo tanto, é que o Ministerio do Interior proporcione a todos os axentes cámaras persoais para garantir a súa seguridade e integridade física, recoller probas e previr abusos e lles facilite canto antes outros materiais tales como chalecos antibalas, esposas de seguridade, cintos de ancoraxe, sprays defensivos, fundas antirroubo para armas curtas ou dispositivos Taser.

Así mesmo, reclaman a realización dunha auditoría pública e anual dos recursos materiais asignados ás Forzas e Corpos de Seguridade do Estado “co obxectivo de garantir que os recursos non só sexan suficientes e eficaces, senón que tamén estean ben xestionados e cumprindo prazos que no se prolongan no tempo”.

Tamén poñen de manifesto a necesidade de que se rehabiliten as instalacións que actualmente se atopan en peores condicións, así como de que se renoven aqueles vehículos de servizo dos distintos organismos e dependencias que o requiran.

Por último, demandan que se proceda a establecer un novo sistema actualizado de dietas separado do resto dos funcionarios da Administración Xeral do Estado que teña en conta a propia especialidade do traballo desempeñado e que supoña un incremento das retribucións en concepto de dietas.

OUTRAS DEMANDAS PARA A MELLORA DA SEGURIDADE EN GALICIA

Máis alá destas cuestións específicas e vinculadas ao cumprimento do artigo 14.1 da Lei Orgánica 2/1986, de 13 de marzo, de Forzas e Corpos de Seguridade, a iniciativa rexistrada polo PPdeG tamén afonda noutras reclamacións que levan anos trasladando ao Goberno de Sánchez e que seguen pendentes de resolución.

É o caso da declaración de profesión de risco e a correspondente xubilación anticipada para os membros da Garda Civil e da Policía Nacional, a equiparación salarial co resto de corpos de Policía Autonómica, a actualización do catálogo de postos de traballo, a cobertura das vacantes e a modificación da lexislación vixente para deixar fóra da aplicación do código penal militar os feitos que se produzan fóra do ámbito laboral.

Os concellos do PPdeG instan á Fegamp a pedirlle ao Goberno central que chegue ao 50% que lle corresponde de financiamento do SAF

Os concellos do PPdeG instan á Federación Galega de Municipios e Provincias a pedirlle ao Goberno central que chegue ao 50% que lle corresponde de financiamento do Servizo de Axuda no Fogar (SAF), ao tempo que agradecen á Xunta que sexa consciente do incremento que está sufrindo o prezo do SAF e, polo tanto, da necesidade de aumentar a aportación.

Nestes termos se referiu hoxe, en declaración remitidas aos medios, o vicepresidente primeiro da Fegamp e voceiro dos populares galegos no organismo, Ángel Moldes, sobre o SAF, grazas ao cal unhas 25.000 persoas con dependencia reciben atención nos seus domicilios en Galicia.

Desde o grupo popular no ente supramunicipal sinalan que, aínda que os concellos son os encargados de prestar este servizo, non é unha competencia propia, senón que debe ser financiada tanto pola Administración autonómica como pola Administración do Estado.

Por iso, cando “si existe este compromiso para incrementar a aportación” por parte da Consellería de Política Social —a Xunta destina este ano 140 millóns de euros, un 8% máis que en 2024—, os populares non entenden que non sexa así por parte do Goberno central: “É a hora de que dean pasos, mostras de que hai interese en paliar ese déficit de financiamento”.

“A realidade é que parece que camiñamos en sentido contrario”, lamenta Ángel Moldes, quen censura que o Executivo de Sánchez, “en vez de incrementar proporcionalmente esa achega para aproximarse ao 50% como establece a lei, o que vai é cada ano reducindo drasticamente as súas porcentaxes: no 2023 achegou un 40%, mentres que no 2024 quedouse nun 34,9%”.

Por este motivo, e máis aínda tendo en conta que o presidente da Fegamp é do mesmo partido político que o que lidera o Goberno central, desde o PPdeG pídenlle a Alberto Varela que inste á Administración estatal a que “faga o mesmo que está facendo a Xunta: dar mostra de que quere paliar un problema que están sufrindo as economías de todos os concellos”.

Cómpre lembrar que o Goberno galego xa está en negociacións coa Fegamp, co firme compromiso de ampliar a súa achega.

Mentres tanto, o Goberno central acumula unha débeda cos galegos e galegas en materia de dependencia que supera os 2.500 millóns de euros, e a ausencia de apoios dos seus socios para sacar adiante uns novos Presupostos Xerais do Estado complica aínda máis o panorama de cara a este 2025.

O Parlamento de Galicia demanda ao Goberno central financiamento adicional para que os concellos poidan cumprir coa nova Lei de eficiencia do Servizo Público de Xustiza

O Parlamento galego aprobou hoxe a proposición non de lei do Grupo Popular, sen o voto favorable dos deputados do PSdeG, a través da que se demanda ao Goberno Central financiamento adicional para o mantemento das oficinas de xustiza nos concellos como consecuencia do incremento de funcións que é de obrigado cumprimento pola entrada en vigor da Lei de medidas en materia de eficiencia do Servizo Público de Xustiza.

O deputado popular Roberto Rodríguez explicou que un dos cambios máis significativos da recente reforma da Lei Orgánica 1/2025 é a conversión dos actuais Xulgados de Paz en Oficinas de Xustiza nos concellos, “co obxectivo de ofrecer unha
xustiza máis próxima en todo o territorio nun momento en que o risco de despoboamento no rural é elevado e no que se require aumentar os servizos da Administración”. Deste xeito, a Oficina de Xustiza non só manterá os actuais servizos dos Xulgados de Paz, senón que os ampliará ao ofrecer novos e mellores servizos ás persoas que habitan atendendo aos espazos e medios dispoñibles.

MESMOS SERVIZOS QUE ATA AGORA

“Trátase de evitar que quen se atopa nestes municipios teñan que desprazarse ás capitais para realizar aquelas xestións ante a administración que actualmente teñen que levar a cabo de xeito presencial, dotando a estas Oficinas de Xustiza dos medios tecnolóxicos necesarios para a práctica de actos procesuais e a intervención nos mesmos a distancia”, concretou.

Así, apuntou que nas Oficinas de Xustiza nos municipios seguiranse prestando os mesmos servizos que ata o de agora: a asistencia ao xuíz ou a xuíza de paz do municipio no exercicio das funcións que teña atribuídas legalmente; e a práctica dos actos de comunicación procesual con quen resida no municipio ou municipios para os que presten os seus servizos, sempre que os mesmos non se puideran practicar por medios electrónicos.

Roberto Rodríguez manifestou que “a dotación inicial das instalacións e dos medios instrumentais destas novas Oficinas Xudiciais corresponderase cos dispoñibles actualmente para os Xulgados de Paz asumidos polas entidades locais, o que suporá que os concellos teñan que facer grandes investimentos nin grandes obras”.

Porén, apuntou que “o concello deberá dispoñer dun espazo acondicionado e unha conexión de rede que garanta a adecuada conectividade, de xeito que sexa viable a intervención en actos procesuais e doutra clase a través de sistemas de videoconferencia desde a propia Oficina Xudicial, espazo que, ademais, deberá ofrecer as condicións adecuadas e necesarias de privacidade e seguridade para que estas actuacións se realicen coas debidas garantías”.

“O Goberno central lexisla e impón obrigas ás demais administracións, pero non prevé traspasos de fondos adicionais para poder asumilas”, reclamou o deputado popular, polo que considerou necesario que “dispoña dun financiamento adicional para adecuación dos actuais Xulgados de Paz en Oficinas de Xustiza, así como para sufragar o incremento de funcións para os concellos pola entrada en vigor na nova Lei”.

O PPdeG apoia no Parlamento galego a solicitude ao Goberno de España para crear unha base marítima permanente do SVA na Costa da Morte

O Grupo Popular apoiou hoxe a aprobación no Parlamento de Galicia dunha proposición non de lei a través da que se demanda ao Goberno central a creación dunha base marítima permanente do Servizo de Vixilancia Aduaneira na Costa da Morte. Porén, a deputada popular Paula Mouzo lamentou que o BNG vetara a emenda do PPdeG para que esta iniciativa parlamentaria incorporara outras medidas, como solicitar a modernización e reforzo dos medios materiais e tecnolóxicos do Servizo de Vixilancia Aduaneira, ampliar a dotación de medios persoais e materiais empregados polo Goberno de España na loita contra o narcotráfico ou garantir a plena operatividade horaria do persoal do SVA para non comprometer a execución de operacións contra o narcotráfico.

Paula Mouzo incidiu que desde o PPdeG “apoiamos a creación dunha base permanente do Servizo de Vixilancia Aduaneira na Costa da Morte”, pero criticou que a proposta do BNG “non é todo o ambiciosa que debería para atender as demandas dos traballadores deste servizo para atallar un verdadeiro problema social”. “Queremos ser máis concretos e demandar unha solución máis efectiva, pedindo que se adopten medidas útiles, ambiciosas e, ao mesmo tempo, factibles”, concretou.

REVISIÓN INTEGRAL

“É necesario demandar ao Goberno de España máis compromiso con Galicia”, subliñou a deputada popular, quen anunciou o rexistro no Parlamento de Galicia dunha iniciativa na que se incorporan todas as demandas que hoxe foron rexeitadas polo BNG, “porque consideramos necesario e urxente que haxa unha revisión integral de todos os medios persoais e materiais que temos para loitar contra o narcotráfico no litoral da provincia de A Coruña e en toda a costa galega”.

A deputada popular manifestou que “se todos coincidimos que temos medios obsoletos, teremos que pedir a modernización e o reforzo dos medios materiais e tecnolóxicos do Servizo de Vixilancia Aduaneira en Galicia, porque a situación actual pide unha proposta máis ampla e completa para atallar un verdadeiro problema social, e pide facelo dun xeito construtivo”.

MEDIOS MÁIS ANTIGOS E OBSOLETOS PARA GALICIA

Paula Mouzo criticou que o Goberno de Pedro Sánchez “estea dotando de medios para a loita contra o narcotráfico a outras comunidades pero non a Galicia”, e puxo como exemplo a Andalucía. “A nós parécenos un acerto que Vixilancia Aduaneira sume medios máis modernos alí onde se necesitan, como é o caso de Alxeciras, pero ao mesmo tempo están enviando a Galicia medios máis antigos e obsoletos que non queren noutras bases ou directamente non nos envían nada”, apuntou.

“O único que lle pedimos ao Goberno de Pedro Sánchez é que a distribución de medios non veña condicionada pola necesidade da vicepresidenta Montero de apuntalar as súas malas perspectivas electorais en Andalucía”, rematou.

O Parlamento galego pide aos concellos que sigan impulsando a delegación dos procesos selectivos de policías locais na Academia Galega de Seguridade

O Parlamento galego aprobou hoxe por unanimidade a proposición non de lei do Grupo Popular a través da que se solicita aos concellos que sigan impulsando a delegación dos procesos selectivos de acceso aos corpos de policía local e a selección de auxiliares de policía local unitarios na Academia Galega de Seguridade Pública, coa finalidade de garantir unha homoxeneización de requisitos e capacitación semellante en todo o territorio.

A deputada popular Felisa Rodríguez explicou que a Academia Galega de Seguridade Pública se encarga principalmente da formación do persoal en seguridade pública e das emerxencias en Galicia, ademais doutros ámbitos de actuación como poden ser os socorristas ou o persoal de seguridade privada. A Xunta, en aras dunha mellor coordinación dos corpos policiais de Galicia, asumiu competencias de selección dos corpos de policía local de Galicia, que redunda nun aforro de custes e de simplificación administrativa para os concellos e, ademais, garante unha selección uniforme en todo o territorio.

O 73% DOS CONCELLOS XA DELEGARON

“Na actualidade, o 73 por cento dos concellos galegos con corpo de policía local xa teñen delegado na Xunta a xestión da realización efectiva dos procesos selectivos ou de mobilidade para a cobertura das prazas vacantes nas categorías de policías e mandos, auxiliares de policía local e vixiantes municipais”, apuntou.

Neste sentido, a deputada popular considerou “necesario asegurar que tanto a formación que reciben como os procesos selectivos nos que participan para ampliar o persoal das policías locais dos distintos concellos sexan homoxéneos en toda Galicia, porque o obxectivo é garantir á cidadanía o mellor servizo posible e dar máis seguridade aos candidatos”.

Felisa Rodríguez salientou que a Academia Galega de Seguridade Pública “é unha institución referente en España que destaca pola excelencia no seu traballo, tanto na investigación como na formación en seguridade pública; pola innovación, na mellora continua coas tecnoloxías máis avanzadas; e polo compromiso firme coa seguridade das galegas e dos galegos”.

O Parlamento de Galicia pide ao Goberno central a inmediata rehabilitación integral do firme da N-540 entre Lugo e Ourense

O Parlamento de Galicia aprobou hoxe por unanimidade a proposición non de lei do Grupo Popular a través da que se pide ao Goberno Central levar a cabo de maneira inmediata labores de rehabilitación integral do firme da estrada nacional 540 entre Lugo e Ourense.

A deputada popular Katy Varela lembrou que a N-540 é “unha estrada fundamental que une as capitais de provincia de Lugo e Ourense e que ten 80 quilómetros de lonxitude, pero o abandono afecta tamén a cidadáns de concellos como Guntín, Taboada, Chantada e Carballedo, na provincia de Lugo; ou de A Peroxa, Vilamarín e Coles na provincia de Ourense”.

“Resulta incrible como os representantes dos partidos políticos que auparon a Pedro Sánchez á Presidencia do Goberno de España aparezan agora nas manifestacións convocadas polos afectados polo mal estado desta estrada, cando o que deberían é conseguir a execución do arranxo do firme de maneira inmediata”, sinalou a deputada popular.

ATRASO E ABANDONO DA A-56

Así mesmo, Katy Varela lamentou “a paralización, atrasou ou abandono que sofre a construción da autovía A-56 entre Ourense e Lugo”, xa que neste momento só existe un tramo aberto de 8,8 quilómetros entre A Barrela (Carballedo) e San Martiño (Vilamartín) “que quedou totalmente illado e sen funcionalidade”.

A este tramo sumouse o pasado mes de setembro os primeiros movementos de terra do primeiro tramo da variante norte de Ourense, entre Eirasvedras e Quintela, “pero é decepcionante a situación de abandono que viven os restantes tramos”, dixo.

O PPdeG pide ao Goberno de España unha base permanente do Servizo de Vixilancia Aduaneira na ría de Camariñas para reforzar a loita contra o narcotráfico

A deputada do Grupo Popular Paula Mouzo demandará mañá na Comisión 1ª do Parlamento de Galicia que o Goberno de España estableza unha base permanente do Servizo de Vixilancia Aduaneira na ría de Camariñas, co fin de reforzar a loita contra o narcotráfico. Así mesmo, pedirá que se modernicen e reforcen os medios materiais e tecnolóxicos do Servizo de Vixilancia Aduaneira en Galicia; ampliar a dotación de medios persoais e materiais empregados polo Goberno de España na loita contra o narcotráfico na provincia de A Coruña; e garantir a plena operatividade horaria do Servizo de Vixilancia Aduaneira en Galicia para que non se comprometa a execución de operacións contra o narcotráfico ou outras actividades.

A iniciativa que mañá defenderá a deputada popular na Comisión 1ª recolle as demandas e suxerencias realizadas polo responsable autonómico de CSIF-Galicia na Axencia Tributaria, Pablo Burgos, nunha reunión que mantivo co portavoz do Grupo Popular, Alberto Pazos, a viceportavoz Paula Prado e a deputada Paula Mouzo.

Neste encontro os deputados populares amosaron todo o seu apoio aos traballadores do Servizo de Vixilancia Aduaneira ante o abandono ao que os ten sometidos o Goberno de Pedro Sánchez, o que implica unha preocupante desprotección das costas galegas pola insuficiente dotación tanto de medios materiais como humanos cos que opera este servizo.

A deputada Paula Mouzo lamentou que “actualmente non existe unha soa base do Servizo de Vixilancia Aduaneira nin un só destacamento da Garda Civil en toda a Costa da Morte, o que converte a este área nun auténtico punto cego na loita contra o narcotráfico e que as mafias operen con total impunidade”.

O Grupo Popular tende a man a estudar e negociar as propostas sensatas e viables que presenten os grupos da oposición no Debate de Política Xeral

O portavoz do Grupo Popular, Alberto Pazos, afirmou hoxe que “afrontamos o Debate sobre Política Xeral que terá lugar a vindeira semana coas mans tendidas para estudar e negociar as propostas sensatas e viables que nos presenten os grupos da oposición, opoñéndonos a calquera cuestión demagóxica e irrealizable no momento e na sociedade actual”.

A Xunta de Portavoces fixou esta mañá a celebración do Debate sobre Política Xeral da Comunidade galega para os días 23 e 25 de abril, “xusto un ano e dez días despois da toma de posesión de Alfonso Rueda como Presidente da Xunta, o que pon de manifesto a súa vontade total de transparencia e de poñer enriba da mesa o seu proxecto de Goberno para a valoración tanto dos grupos da oposición como de toda a sociedade galega”, manifestou Alberto Pazos.

ÁNIMO CONSTRUTIVO

Neste sentido, lembrou que o Regulamento do Parlamento galego recolle que o Debate sobre Política Xeral non se celebra no mesmo ano no que se investise ao Presidente da Xunta, “pero Alfonso Rueda non quere aprazar máis a súa rendición de contas ante o Parlamento e vaino facer xusto cando se cumpre ese primeiro ano de lexislatura”.

O portavoz popular demandou a BNG, PSdeG e Grupo Mixto que “afronten este debate co mesmo ánimo construtivo co que o imos facer desde o Grupo Popular, para que as resolucións que se aproben finalmente sirvan para mellorar a economía e o benestar de todos os galegos”.

INTENSO TRABALLO PARLAMENTARIO

Alberto Pazos afirmou que “afrontamos este debate coa tranquilidade que nos da o traballo feito ao longo do presente ano, un ano moi intenso a nivel parlamentario”. En concreto, lembrou a aprobación de sete novas leis, entre as que figuran textos tan importantes como os orzamentos da Xunta para o presente ano 2025; a lei de promoción dos beneficios sociais e económicos dos proxectos que utilizan os recursos naturais de Galicia; a nova Lei dos medios públicos de comunicación audiovisual de Galicia; ou as leis de cultura inclusiva e accesible de Galicia, de estatística de Galicia e de impulso da intelixencia artificial.

O portavoz popular salientou que estas tres últimas leis aprobáronse sen o voto en contra da oposición, “un feito que se merece destacar para demostrar que o suposto rolo do Partido Popular que quere trasladar a oposición á cidadanía non é tal, se temos en conta que practicamente a metade das proposicións non de lei que se aprobaron en Pleno nesta lexislatura saíron adiante por unanimidade, unha cifra que se incrementa sensiblemente cando falamos de proposicións non de lei en Comisión, onde 90 das 165 proposicións non de lei se aprobaron foron por unanimidade”.

Ademais, apuntou que os grupos da oposición “son os que se levan a palma nas iniciativas de control ao Goberno galego, xa que levan feito 218 accións de control ao Goberno galego das 297 que se teñen feito en Pleno neste primeiro ano de lexislatura”.

Dentro do traballo parlamentario desenvolvido ao longo deste primeiro ano de lexislatura, Pazos destacou a Comisión de Investigación sobre a sanidade pública galega, impulsada polos grupos da oposición, “que nos permitiu botar abaixo todas e cada unha das falsidades e inexactitudes que están a espallar nacionalistas e socialistas sobre o suposto caos que vive a nosa sanidade pública”.

“Demostrouse, con datos e afirmacións dos propios comparecentes, que non existiu sobrecuste na construción do Hospital Público Álvaro Cunqueiro e que a colaboración pública privada era a única opción viable para dotar a Vigo deste centro sanitario nun contexto de crise económica extrema e de incapacidade para recorrer á débeda pública”, manifestou o portavoz popular, quen lembrou que tamén quedou probado que “toda a contratación da Xunta de Galicia en materia de sanidade pública se realiza cumprindo todo o procedemento que está previsto na normativa”.

COMEZO O MÉRCORES, ÁS 10 DA MAÑÁ

O Debate de Política Xeral dará comezo o vindeiro mércores, ás 10 da mañá, coa intervención do Presidente da Xunta. Pola tarde, terá lugar a intervención dos portavoces dos catro grupos parlamentarios, por un tempo máximo de 45 minutos, aos que seguirá a réplica do Presidente da Xunta, ben en conxunto a todos os grupos ou de xeitos individual, sen límite de tempo. A continuación, os portavoces dos grupos terán unha segunda intervención por un tempo máximo de 15 minutos, para poñer fin a esta primeira xornada do Debate de Política Xeral co peche a cargo do Presidente da Xunta.

Os grupos parlamentarios terán de prazo ata as 10.30 da mañá do xoves, 24 de abril, para rexistrar un máximo de 40 propostas de resolución, que serán negociadas ao longo de todo o día tendo como prazo ata as 22.30 para rexistrar as transaccións e propostas de votación por separado.

O Debate sobre Política Xeral retomarase o venres, a partir das 11 horas co debate das propostas de resolución, no que cada grupo parlamentario disporá dunha primeira quenda de 30 minutos para defender as propostas propias e dunha segunda quenda de 10 minutos para a fixación da súa posición respecto das propostas dos demais grupos parlamentarios.