O Grupo Popular defende un aproveitamento dos recursos dun xeito sostible, respectuoso co territorio e que deixe un retorno para os cidadáns

O portavoz de Industria do Grupo Popular, Rubén Lorenzo, afirmou hoxe no Pleno do Parlamento galego que “temos unha oportunidade de aproveitar os avances tecnolóxicos e esixir aos promotores o uso destas tecnoloxías limpas acompañadas de plans de restauración ambiciosos”. “Estamos ante un debate entre o medioambientalismo radical que busca o inmobilismo ou a aposta dun Goberno galego responsable por un aproveitamento dos recursos dun xeito sostible, respectuoso cos territorios e que obrigue aos promotores a deixar un retorno para quen vivimos neles”, manifestou.

No debate dunha proposición non de lei sobre a planificación do sector mineiro en Galicia, Rubén Lorenzo salientou que “temos en Galicia un sector dunha longa tradición e que é estratéxico, xa que proporciona materias primas a moitos dos sectores considerados fundamentais para a economía galega, creando emprego e mellorando os datos de produción ano a ano”.

EQUILIBRIO ENTRE OPORTUNIDADE E PRECAUCIÓN

Neste sentido, avogou porque o aproveitamento dos recursos deixe un retorno para a sociedade que vive neles, para o que lembrou que a Lei de recursos naturais de Galicia “garante que calquera proxecto que se desenvolva na Comunidade galega xere riqueza social e económica no noso territorio”. “Cómpre atopar un equilibrio entre a oportunidade e a precaución, e para iso temos un marco normativo moi estrito, moito máis que o que aplica o Goberno central, que debe velar por ese desenvolvemento sostible”, dixo Rubén Lorenzo.

Con este fin, lembrou que o Goberno galego convocou nos primeiros días deste ano os concursos de dereitos mineiros nas catro provincias: un total de 51 dereitos con permisos caducados que abre a súa posible explotación, a fin de seguir afondando en materiais fundamentais para sectores estratéxicos.

“Pero sempre debe ser en colaboración e cooperación co Goberno central, que tamén debe promover as iniciativas lexislativas necesarias para avanzar no recoñecemento destas materias primas minerais como recursos de primeira necesidade e de carácter estratéxico”, manifestou o portavoz popular, quen apuntou que “as terras raras son materias primas críticas e imprescindibles”.

O Grupo Popular salienta que “a política social do Goberno de Alfonso Rueda consiste en non deixar a ninguén atrás”

A deputada do Grupo Popular Raquel Arias salientou hoxe no Pleno do Parlamento galego que “a política social do Goberno de Alfonso Rueda consiste en non deixar a ninguén atrás” e destacou que o plan de simplificación e axilización das valoracións de dependencia e discapacidade “xa resolveu no primeiro trimestre máis de 23.200 expedientes, 3.000 máis das previsións feitas no momento da súa presentación”.

Raquel Arias concretou que a política social do Goberno galego “consiste en contar con máis de 16.000 prazas públicas en residencias, o triplo máis que cando gobernaban socialistas e nacionalistas e unha cifra que se incrementará en 1.500 novas prazas nos vindeiros meses; ou en multiplicar por 6 o número de prazas en centros de día desde que gobernaron PSdeG e BNG”.

“Ao mesmo tempo, dotamos de recursos de conciliación a todos os municipios de Galicia coa creación de 140 casas de maior que atenden a 700 persoas; multiplicando por 6 as persoas que reciben o servizo de axuda no fogar; facilitando o bono coidado no fogar a máis de 20.000 persoas; ou entregando máis de 17.000 menús semanais co servizo de Xantar na Casa”, apuntou.

DÉBEDA DE MÁIS DE 2.500 MILLÓNS DE EUROS

Ademais, engadiu que “todos os maiores de 65 anos de Galicia gozan xa de descontos en máis de 700 establecementos de todo tipo gracias ao Carné +65, que chega a todos os fogares dos beneficiarios sen ter que pedilo”.

“E todo isto cun Goberno galego ao que o Estado lle debe máis de 2.500 millóns de euros da dependencia, porque nunca pagou o 50 por cento que lle corresponde por lei, e incluso recorta as aportacións, xa que no ano 2023 pagou o 40 por cento e ao ano seguinte só o 34,9 por cento”, lamentou.

A deputada popular rexeitou o “Plan Estratéxico de Servizos Sociais que nos propoñen o BNG e o PSdeG, porque xa sabemos en que consiste: en privatizar as residencias da terceira idade, como veñen facendo na Deputación de Lugo; en ter rematadas residencias desde hai tres anos, como a de Becerreá, e non ser capaces de abrila; en asinar convenios con concellos hai máis de sete anos, ter licenzas e non poñer nin un só ladrillo, como no Caurel; ou en botar a correr e deixar desamparados aos maiores e ás súas familias, como na residencia municipal de Foz”.

“Ademais, este plan estratéxico de nacionalistas e socialistas consiste en privatizar o servizo de axuda no fogar en máis do 60 por cento dos concellos nos que gobernan; en ser dos que menos invisten en políticas sociais de toda España, como é o caso do Concello de Pontevedra; en deixar desamparados aos enfermos de ELA e ás súas familias, aprobando unha lei que, logo de decenas de aprazamentos, non pon cartos enriba da mesa para que as medidas se poidan levar a cabo; ou en deixar desamparados aos dependentes galegos, aos que o Goberno central debe máis de 2.500 millóns de euros”, rematou.

O Grupo Popular pide a BNG e PSdeG que “abandonen a estratexia deliberada de desprestixio da sanidade pública galega”

A portavoz de Sanidade do Grupo Popular, Encarna Amigo, pediu hoxe a BNG e PSdeG que “abandonen esa estratexia deliberada de desprestixio da sanidade pública galega” e acusounos de “ser incapaces de reclamar ao Goberno de Pedro Sánchez máis médicos, de votar a favor das medidas da Xunta para cubrir as prazas de difícil cobertura e mesmo rexeitan iniciativas para previr a violencia contra os sanitarios”.

“Recoñecendo que queda marxe de mellora e que niso está o Goberno galego, hoxe a sanidade en Galicia ten máis actividade, menos espera, mellores resultados e responde con eficacia aos retos presentes e futuros”, afirmou a portavoz popular, polo que demandou aos grupos da oposición “unha política construtiva e capaz de votar a favor das cousas importantes, comezando por unirse ao Partido Popular para facer fronte ao principal problema da sanidade pública en Galicia e en toda España, que é a falta de profesionais que só o Goberno central pode arranxar e non quere facelo”.

REFERENTE DA SANIDADE PÚBLICA UNIVERSAL E DE CALIDADE

Encarna Amigo lamentou que BNG e PSdeG “son incapaces de asumir que hoxe a sanidade en Galicia conta co maior orzamento da súa historia, de aceptar cando os usuarios fan valoracións positivas do sistema de saúde de Galicia ou de recoñecer a evolución da activiade asistencial do SERGAS”. “A gran mentira da esquerda é esquecer que en Galicia somos referente da sanidade pública universal e de calidade”, subliñou.

A portavoz popular recoñeceu que “existen retos e problemas que hai que afrontar para prestar o mellor servizo sanitario aos cidadáns”, pero tamén puxo en valor “o extraordinario traballo, esforzo e implicación que fan os profesionais da sanidade publica galega para incrementar a actividade asistencial en todas as áreas e reducir paulatimente as listas de espera”.

En concreto, salientou que “superamos as 200.000 operacións cirúrxicas nun só ano, o que supuxo incrementar un 5,6 por cento respecto do pasado ano; situando o tempo medio para operarse en Galicia en 67,1 días”. “Somos a terceira comunidade con mellores tempos de espera cirúrxica, mentres que en 2008, cando gobernaban socialistas e nacionalistas, éramos a cuarta comunidade pola cola”, apuntou.

O Grupo Popular pide ao Goberno central máis psiquiatras e psicólogos clínicos, así como fondos para implantar o Plan estatal de saúde mental

A portavoz de Asuntos Sociais do Grupo Popular, Raquel Arias, demandou hoxe no Pleno ao Goberno central “máis profesionais de psiquiatría e psicoloxía clínica, así como máis fondos para a implantación do Plan estatal de saúde mental, que se aprobou a pasada semana no Consello Interterritorial do Sistema Nacional de Saúde pero que nace sen orzamentos, do mesmo xeito que pasa coa Lei da ELA, a modificación da Lei de dependencia e con todas as leis que está aprobando o Goberno de Pedro Sánchez e os seus socios”.

Raquel Arias manifestou que “o compromiso da Xunta coa saúde mental quedou patente xa hai moitos anos” e lembrou a implementación en 2017 do Plan de prevención do suicidio en Galicia, o primeiro plan autononómico posto en marcha en España; ou a aprobación en 2022 do Plan de saúde mental 2022-2024, ao que se sumou nesta lexislatura a creación dunhs Subdirección específica de saúde mental.

CREACIÓN DE UNIDADES PSICOXERIÁTRICAS NAS RESIDENCIAS

“Ademais, e con respecto ao Goberno bipartito de PSdeG e BNG, os gobernos do PPdeG dobraron os psicólogos clínicos formados e multiplicáronse por 10 as prazas de formación de enfermería en saúde mental”, apuntou.

Respecto das persoas usuarias de residencias con enfermidades mentais, Raquel Arias asegurou que “teñen dereito a unha praza pública residencial exactamente igual que calquera outra persoa, sufra a patoloxía que sufra e sen estigmas nen señalamentos”. “Por iso, desde a Xunta avógase pola atención, pola conciliación, pola sensibilización, e pola inclusión de todas as persoas que padecen esta enfermidades”, indicou.

Por este motivo, recordou que a carteira de servizos para a atención á dependencia da dependencia “conta con programas específicos de atencións psicosocial e se incrementou a atención en residencias para persoas con patoloxías psiquiátricas con especialistas en saúde mental a través de acción directa, a consultoria e o apoio por telemedicina, ao tempo que xa se está a traballar nunha maior especialización dos diferentes servizos e dos diferentes recursos con que contamos nestes momentos”.

A portavoz popular explicou que “a propia Valedora do Pobo recolle no seu informe sobre a atención nas residencias de maiores galegas que ‘as medidas que está tomando a Xunta entendemos que son axeitadas, e que soamente teñen como obxectivo a mellora constante, tanto para os propios traballadores como para os propios usuarios dos diferentes centros residenciais”. “E neste proceso de mellora contínua, o novo modelo de residencias de Galicia xa inclúe a creación de unidades psicoxeriátricas especializadas nos centros de maiores”, afirmou.

Alberto Pazos: “A sanidade pública galega nunca contou con tantos recursos, nin con tanto persoal como agora”

O voceiro do Grupo Popular no Parlamento de Galicia, Alberto Pazos, sinalou que a sanidade pública galega goza dunha saúde excelente, e destacou que nunca contou con tantos recursos, nin con tanto persoal, como baixo os gobernos do Partido Popular na Xunta.
“Hoxe hai máis de 7.000 profesionais sanitarios que cando chegamos ao Goberno galego. A realidade é que estamos ante o momento de maior investimento na sanidade pública en Galicia”, engadiu.

Tamén lembrou que os actuais niveis de concertación con servizos privados están moi por debaixo dos que existían baixo gobernos anteriores, incluídos aqueles que hoxe promoven mobilizacións.“É curioso que quen máis privatizou sexa agora quen máis berra. Pero os berros non curan, nin melloran a sanidade. Para iso, traballamos nós cada día”, sentenciou.

Pazos fixo memoria sobre a folla de ruta iniciada hai sete anos, durante o Goberno de Mariano Rajoy, para abordar os retos comúns das comunidades autónomas no ámbito sanitario.“Aquel acordo foi paralizado semanas despois coa chegada do Goberno de Pedro Sánchez, e ningún dos seus seis ministros de Sanidade foi quen de darlle continuidade. Mentres uns esquecen os acordos, nós seguimos traballando”, declarou.

Finalmente, o voceiro popular reiterou o compromiso do Partido Popular coa sanidade pública:“A nosa prioridade segue sendo garantir que os galegos conten cun dos mellores sistemas sanitarios de Europa. Non negamos que existan problemas, pero asumímolos con responsabilidade, e non con consignas. Mentres outros se dedican á pancarta, nós traballamos”.

Os deputados Julio García Comesaña e Manuel Costa reúnense con responsables do sector vitivinícola galego e salientan a preocupación do sector ante os aranceis impostos por EE.UU.

Os deputados do Grupo Popular Julio García Comesaña e Manuel Santos Costa visitaron esta mañá as Bodegas Terras Gauda para coñecer de primeira man as preocupacións e incertezas no sector vitivinícola galego ante a proposta do presidente de Estados Unidos, Donald Trump, de impoñer novos aranceis.

No encontro celebrado co presidente, director xeral e CEO de Terras Gauda, José María Fonseca, Iago Becerra e Antón Fonseca, respectivamente, os deputados populares constataron que a imposición de aranceis por parte dos EEUU suporía a posibilidade de perder un dos mercados mais importantes das exportacións da denominación de orixe Rías Baixas. En concreto, no ano 2024, un total de 85 bodegas desta denominación exportaron cerca de tres millóns de litros a este país, xerando uns ingresos de 23,4 millóns de euros, polo que as políticas arancelarias poderían ter graves consecuencias.

NEGOCIACIÓN FUNDAMENTAL

“O mercado de EE.UU. é fundamental para a sostenibilidade económica do sector vitivinícola da Unión Europea e non existe agora mesmo un mercado vitivinícola alternativo que poida compensar esta perdida”, manifestaron os deputados populares, quen incidiron especialmente que a imposición dos aranceis “prexudica especialmente ás pequenas e medianas empresas, que son a gran maioría das bodegas, xa que teñen menor capacidade para diversificar as súas exportacións e dependen máis dos principais mercados de exportación, ademais de que teñen menor capacidade económica para afrontar situacións complicadas como esta”.

Julio García Comesaña e Manuel Santos consideraron “fundamental que as autoridades europeas e estadounidenses negocien para evitar que o viño se converta en moeda de cambio en disputas comerciais entre a Unión Europea e os Estados Unidos”.

Nesta situación, salientaron que a Xunta de Galicia seguirá apostando por potenciar a calidade diferenciada das nosas producións agroalimentarias, como fórmula para manter a competitividade do sector nos diferentes mercados. En concreto, destacaron a Estratexia de dinamización económica, territorial e turística das comarcas vitivinícolas e o apoio aos consellos reguladores, para sufragar os seus gastos de funcionamento e para apoiar os seus programas de control da calidade e da orixe de produtos agroalimentarios con distintivo de calidade.

Por último, os deputados populares reclamaron ao Goberno de España “unha resposta de país, coordinada e consensuada coas comunidades autónomas, que nos permita asegurar que o apoio chega aos afectados, ao tempo que se busquen novos mercados e se potencien os mercados internos español e europeo, en lugar de decisións unilaterais cuxos intereses descoñecemos”.

As deputadas Cristina Sanz e Nicole Grueira visita MOEXMU e destacan que o programa de titorización da Xunta xa axudou a máis de 450 persoas en 2024

As deputadas do Grupo Popular Cristina Sanz e Nicole Grueira visitaron a XLI edición da Mostra Exposición de Muimenta (MOEXMU) en Cospeito onde salientaron a importancia do Programa de titorización para a incorporación da actividade agraria posto en marcha pola Xunta, a través do que pasado ano xa recibiron axuda máis de 450 persoas.

Nicole Grueira lembrou que “o relevo é fundamental para garantir a continuidade das actividades agrícolas, gandeiras e forestais, esenciais tanto para a economía como para a sustentabilidade do territorio”. Deste xeito, apuntou que a Xunta “considera unha prioridade estratéxica fomentar a incorporación de persoas mozas e novos agricultores ao sector primario”.

Para iso, explicou que o Goberno galego puxo en marcha en 2024 o Programa de Titorización para a incorporación á actividade agraria, a través do que os beneficiarios dispoñen dun acompañamento real e efectivo a través dunha rede de técnicos das oficinas rurais, que exercen como titores e guían aos novos agricultores durante os seus primeiros anos de actividade.

CONTINUIDADE NO CAMPO GALEGO

“Este programa xa está a ter os seus efectos positivos ao facilitar o relevo xeracional e asegurando que o campo galego teña continuidade, ao tempo que se frea a desaparición de explotacións familiares e se impulsa a formación e capacitación, asegurando que as novas explotacións teñan viabilidade e competitividade”, apuntou a deputada popular.

En definitiva, esta iniciativa da Xunta converteuse nun instrumento clave para o futuro do rural, contribuíndo ao relevo xeracional e fomentando a recuperación de terras en desuso, ao tempo que favorece o asentamento de novos produtores para garantir a sustentabilidade do rural galego.

Incautos, intelixentes, malvados e estúpidos

Pedro Puy.

Reputado historiador económico, Carlo Cipolla (1922-2000) merece ser recordado por esa pequena xoia que nos legou, o Allegro ma non troppo coas súas coñecidas leis da estupidez humana. Cipolla clasifica aos humanos, o zoon politikon aristotélico, en función do resultado que cada persoa ten cando se relaciona con outra. Dado que unha persoa calquera, poñamos Usa, ao interactuar con calquera outra, digamos Ue, pode obter un beneficio o unha perda, son posibles catro resultados alternativos. Se Usa obtén unha perda e Ue unha ganancia, Usa foi incauto. Usa é intelixente se tras interactuar con Ue ambos sacan proveito. Se é Usa o que perde e Ue o que gaña, Ue foi malvado. E se ambos os dous perden… entón movémonos no ámbito da estupidez: o estúpido, define Cipolla, é o que causa dano a outra ou a outras persoas sen obter proveito para si mesmo, e incluso prexudicándose.

 A ciencia económica ten ben estudiados os efectos do proteccionismo comercial, que ten como expresión máis evidente, aínda que non única, o establecemento de aranceis. Estes impostos que gravan ás importacións desde outros países provocan, entre outros, dous efectos salientables. Na orde interna unha transferencia de renda, habitualmente desde o consumidor local do produto gravado ao produtor nacional dese mesmo produto (máis caro e peor). Esta lóxica é a que explica a decisión de Trump: protexer eses perdedores da globalización que lle votan masivamente, pero a costa de maiores prezos dos produtos que consumen todos os norteamericanos, provocando unha importante perda de benestar agregada ao conxunto. Pero hai outro efecto, este na orde exterior. As represalias arancelarias dos demais países e o feito de que os produtores dos bens gravados busquen mercados alternativos, provoca un efecto desviación do comercio. Ábrense novas canles comerciais, polo que o país que impón aranceis non só queda illado a curto prazo, tamén no futuro porque mesmo levantando os aranceis pode tardar en recuperar as liñas de subministro que os aranceis pecharon.

Trump acaba de dinamitar a orde comercial internacional coa imposición xenérica de aranceis fronte ao resto do mundo. Entre o ano 2000 e o 2023 o Producto Interior Bruto per capita dos Estados Unidos multiplicouse por 2,3 (pasou de 36.000 dólares a case 83.000, dados do Banco Mundial). O da Unión Europea multiplicouse menos, por 2 (de 23.000 dólares a 48.000 dólares). Semella que era unha situación intelixente, da que ambas partes sacaban proveito, e os Estados Unidos en particular xa que o diferencial débese ao incremento da produtividade.

Ao presentar os novos aranceis, Trump describiu á Unión Europea como malvada, e aos Estados Unidos como incautos. Moitos europeos pensan xustamente o contrario: que o malvado é Trump, e nós os incautos. O que estamos é diante dunha enorme estupidez. E como argumentaba Cipolla, o malo de quen fai unha estupidez é que non sabe que o é, polo que os seus resultados son devastadores. Á espera de que a intelixencia retorne á Casa Branca, a Unión Europea debería buscar interaccións intelixentes…. Mercosur ou a India non soan mal. Aínda que as estupideces poden xurdir en calquera parte.

Paula Prado destaca a aposta do PPdeG pola remuda xeracional para que o rural galego teña moito presente e aínda máis futuro

A secretaria xeral do PPdeG, Paula Prado, destaca a aposta da súa formación pola remuda xeracional no sector agrogandeiro para garantir que o rural galego siga tendo moito presente e aínda máis futuro.

Esta tarde visitou a 41ª edición da Mostra Exposición de Muimenta (Moexmu) no concello de Cospeito acompañada polo alcalde Armando Castosa, o senador José Manuel Barreiro, e outros representantes do PP na comarca.

Unha visita na que puido comprobar de primeira man o traballo incansable, o compromiso coa excelencia e o amor pola terra que hai detrás de cada un dos exemplares. O cal, en opinión da número dous dos populares galegos, confirma que os gandeiros de Galicia son o motor que impulsa o rural creando emprego, xerando riqueza e mantendo viva a súa contorna.

Consciente disto, o presidente Alfonso Rueda comprometeuse nas eleccións a adoptar unha serie de medidas específicas para este sector que, a día de hoxe, xa pasaron do dito ao feito. É o caso do aumento da porcentaxe de axudas que concede a Xunta para os seguros agrarios, o impulso da incorporación das persoas mozas ás gandarías ou o establecemento de axudas para a recría en pureza das razas autóctonas en perigo de extinción.

Paula Prado subliñou así mesmo a importancia do sector nunha provincia como a de Lugo, que, tal e como apuntou, debe estar aberta a calquera tipo de investimentos que xeren emprego, actividade económica, riqueza e contribúan a un futuro máis verde e sostible para Galicia no seu conxunto.

O PPdeG demanda ao Goberno de España que impulse dunha vez a execución da autovía A-76 entre Ourense e Ponferrada

Os deputados do Grupo Popular Miguel Viso e Cristina Campero anunciaron hoxe a presentación no Parlamento de Galicia dunha iniciativa a través da que se demanda ao Goberno de España que impulse dunha vez a execución da autovía A-76 entre Ourense e Ponferrada, por tratarse dunha infraestrutura estratéxica para acceder á Meseta desde o interior da Comunidade galega, vertebrando as comarcas de Valdeorras, Quiroga e Lemos das provincias de Lugo e Ourense.

Nun encontro celebrado coa portavoz do PP no Barco de Valdeorras, Inmaculada Rodríguez, e veciños desta localidade ourensá, os deputados populares lamentaron “o bloqueo ao que o Goberno de Pedro Sánchez está a someter a esta autovía clave para acceder á Meseta desde o interior de Galicia, unha situación que conta coa complicidade do BNG ao aceptar o incumprimento do pacto que asinaron cos socialistas para colocar a Pedro Sánchez na Moncloa”.

NIN PLANIFICACIÓN NIN ORZAMENTOS

“O Goberno central nin avanza na planificación dos tramos necesarios para impulsar a A-76 nin habilita os investimentos correspondentes”, criticaron os deputados populares, quen apuntaron a negativa do Ministerio de Transportes a facilitar información algunha sobre o estado da tramitación desta autovía e as previsións reais para a súa execución.

Miguel Viso e Cristina Campero lembraron que esta autovía foi considerada como prioritaria pola patronal das empresas construtoras (Seopan) nun informe sobre as actuacións a acometer polo Estado no horizonte 2024-2035.

A esta demanda sumouse o recente informe realizado polo Eixo Atlántico sobre infraestruturas viarias e ferroviarias da Eurorrexión, no que se pon de manifesto que, “vinte anos despois da inclusión da A-76 no Plan Estratéxico de Infraestruturas do Transporte 2005-2020, non se ten materializado nin un só quilómetro desta autovía, que é reiteradamente reivindicada non só como conexión de Galicia coa Meseta norte, senón tamén como medio para acadar unha mellor comunicación de Valdeorras coa súa capital de provincia e o resto de Galicia”.