As deputadas Katy Varela e Encarna Amigo destacan no Caudal Fest os espazos da Xunta contra a violencia machista, LGBTIfobia e para a prevención de infeccións de transmisión sexual

As deputadas do Grupo Popular Katy Varela e Encarna Amigo destacaron hoxe o traballo que a Xunta de Galicia vén desenvolvendo pola igualdade e a loita contra a violencia contra a muller, un labor que se expande aos festivais musicais, como o Caudal Fest que se está a celebrar en Lugo e onde os mozos e mozos teñen á súa disposición un Espazo de Igualdade e un Punto Lila e Arco Iris.

Nunha visita ao recinto do Caudal Fest, as deputadas comprobaron o funcionamento destes espazos de sensibilización e de atención e asesoramento continuado ante calquera tipo de violencia de xénero o LGBTIfóbica instalados pola Consellería de Política Social, coa colaboración de Turismo de Galicia, neste festival musical.

Estes puntos están compostos por dúas zonas diferentes, pero integradas. Unha primeira, de igualdade, pensada para a aprendizaxe e a sensibilización; e unha segunda, o Punto Lila e Arco Iris, para a atención continuada durante todo o festival a posibles vítimas de agresións sexuais ou calquera tipo de violencia machista ou LGBTIfóbica, que conta, ademais, cun espazo privado para poder facer un acompañamento, de ser necesario, con total confidencialidade.

Ambos espazos están a ser atendidos por un equipo multidisciplinar de profesionais especializados, entre os que se inclúen psicólogos, sexólogos, traballadores sociais, educadoras sociais ou axentes de igualdade con formación específica en igualdade de xénero, trata e prevención da violencia de xénero e LGBTIfobia.

Katy Varela e Encarna Amigo puxeron en valor a posta a disposición de todos os asistentes a este festival, nos que, en colaboración coa Consellería de Sanidade e os centros Quérote +, servirán tamén de espazos de información e prevención das infeccións de transmisión sexual.

Alberto Pazos urxe ao Goberno central información e financiamento para prestar todos os coidados que precisan e merecen os menores non acompañados

O portavoz do Grupo Popular, Alberto Pazos, urxiu hoxe ao Goberno central a que “informe, adecuada e puntualmente, sobre o envío dos menores non acompañados a Galicia e poña enriba da mesa o financiamento necesario para facilitarlles todos os coidados que precisan e merecen”. Neste sentido, demandou a BNG e PSdeG que “colaboren desde as institucións que gobernan para a prestación das mellores atencións a estes menores”.

Alberto Pazos reiterou que “Galicia foi, é e será unha terra de acollida, pero non estamos dispostos a aceptar que se nos impoña desde o Goberno central esta distribución dos menores non acompañados, sen contar tan sequera coa opinión e as dispoñibilidades existentes en cada comunidade autónoma”.

TALANTE DITATORIAL DO GOBERNO DE PEDRO SÁNCHEZ

Deste xeito, pediu ao Goberno central que “abandone o seu talante ditatorial coas comunidades autónomas e cese neste reparto inxusto e arbitrario de menores non acompañados”, para o que considerou “fundamental que se abra unha vía de diálogo interinstitucional que permita un reparto equitativo destes menores”.

O portavoz popular pediu “que se informe, adecuada e puntualmente, ás comunidades sobre o envío destes menores, porque a súa chegada a Galicia xa provocou que a Xunta tivera que improvisar e modificar a súa política de acollemento de menores baseada na integración e convivencia en pequenos fogares”. Ao mesmo tempo, demandou que “poña enriba da mesa o financiamento necesario para facilitarlles as atencións educativas, sanitarias e sociais que precisan e merecen”.

“Non pode ser que Pedro Sánchez utilice ás comunidades autónomas ao seu antollo e as desprece un día si e outro tamén, polo que pedimos tanto a BNG como a PSdeG que, por unha vez, se poñan de lado dos galegos e apoien ao Grupo Popular na súa demanda”, sinalou Alberto Pazos.

Neste sentido, demandou aos grupos da oposición que “deixen de buscar réditos políticos a todo o que fan e colaboren desde as institucións que gobernan para a prestación das mellores atencións a estes menores”, pero avanzou que “non esperamos nada de socialistas e nacionalistas galegos e o Goberno de Alfonso Rueda terá que seguir traballando e buscando as solucións máis adecuadas para responder ao autoritarismo e falta de diálogo co que actúa habitualmente o Goberno de Pedro Sánchez”.

PLANS DE TRABALLO DAS COMISIÓNS

Respecto da actividade no Parlamento galego, Alberto Pazos lembrou a aprobación no día de onte, sen voto en contra algún, do plan de traballo da Comisión de estudo para a posible modificación da letra do himno de Galicia, que inclúe informes e comparecencias do Consello da Cultura, a Real Academia Galega e do Instituto de Estudos Galegos Padre Sarmiento, así como a comparecencia do profesor Manuel Ferreiro.

“Desde o Grupo Popular imos traballar porque a conclusión final desta comisión se elabore sen presa pero sen pausa, sen prolongar o debate máis do estritamente necesario e co obxectivo de chegar a unha conclusión que conte co maior respaldo posible”, indicou o portavoz popular.

Así mesmo, informou que esta mesma mañá se aprobou o plan de traballo da Comisión para o seguimento das políticas relativas á discapacidade e elaboración de novas propostas a prol da integración das persoas con discapacidade, que basicamente está dirixido a elaborar as conclusións finais baseándose na recompilación da extensa documentación achegada nas pasadas lexislaturas, a incorporación das cuestións relacionadas coa discapacidade que xurdiron na Comisión especial de estudo sobre a reactivación económica, social e cultural de Galicia pola crise da Covid-19; así como as transcricións das comparecencias que tiveron lugar durante a pasada lexislatura no seo desta Comisión de dependencia, entre as que figura a da propia conselleira de Política Social.

Outra das comisións non permanentes que se retomarán a vindeira semana é a de Igualdade e para os dereitos das mulleres, co obxectivo de seguir afondando no estudo e na busca de medidas para avanzar nunha sociedade máis igualitaria e na que poidamos felicitarnos porque conseguimos acabar coa violencia contra a muller. Para iso, o portavoz popular avanzou que “imos solicitar a presenza neste Parlamento galego de expertos e responsables políticos, así como o envío dunha ampla documentación que nos sirvan de base para unha proposta de medidas que axuden no obxectivo de que a sociedade galega sexa cada día máis xusta e igualitaria e poñamos en marcha accións que nos permitan deixar atrás esa lacra social que é a violencia machista”.

INCREMENTO DAS CONDENAS POR DELITOS SEXUAIS

Por último, Alberto Pazos considerou un “escándalo” o fallo nas pulseiras telemáticas que levan os maltratadores, denunciada pola propia Fiscalía Xeral do Estado na súa memoria de 2025. “Non pode ser que un país como España deixe ás mulleres vítimas de violencia de xénero totalmente desprotexidas dos seus agresores por unha chapuza do Goberno de Pedro Sánchez ao cambiar de sistema”, dixo.

O portavoz popular sinalou que “esta polémica coincide xustamente coa publicación do novo informe do Instituto Nacional de Estatística, no que se pon de manifesto o incremento dun 37,3 por cento das condenas por delitos sexuais o pasado ano, o que confirma que coas decisións e as accións deste Goberno de España non imos polo bo camiño: beneficiando aos condenados por este tipo de delitos a través da Lei do si é si, e agora deixando aos maltratadores total liberdade durante máis de 8 meses a consecuencia da nefasta xestión no cambio do operador das pulseras de seguimento”.

O Parlamento galego reitera por unanimidade a solicitude ao Goberno central para que asuma o 50% do financiamento da Lei de dependencia e abone os máis de 2.500 M€ que debe á Xunta

O Parlamento de Galicia aprobou hoxe por unanimidade a proposición non de lei do Grupo Popular a través da que se reitera a esixencia ao Goberno de España para que cumpra co establecido na Lei de Dependencia e asuma o financiamento do 50% do custo dos servizos e prestacións, garantindo un reparto equitativo dos recursos entre o Goberno de España e as comunidades autónomas; e que abone de maneira inmediata a débeda acumulada con Galicia, que supera os 2.500 millóns de euros, permitindo así fortalecer o sistema de atención á dependencia na nosa Comunidade.

Así mesmo, pídese que o Goberno central incremente os fondos destinados ás comunidades autónomas para a atención á dependencia, asegurando que todas as persoas con dereito a prestacións poidan acceder a elas sen demoras inxustificadas; e estableza un plan de financiamento estable e plurianual, que permita ás comunidades autónomas planificar e mellorar os servizos de dependencia con previsibilidade e seguridade orzamentaria.

INTERIORIZAR A GRAVIDADE

A portavoz popular de Asuntos Sociais, Raquel Arias, afirmou que con esta nova proposta “queremos que interioricen a gravidade que ten para as persoas dependentes a débeda de 2.500 millóns de euros do Goberno central con Galicia, demandando aos socialistas galegos que esixan a Pedro Sánchez que trate igual a Galicia que ao País Vasco e ao BNG que lle retire o seu apoio se esa equidade non se da”.

“Porque esta actitude do Goberno central con Galicia está a prexudicar a calidade de vida dos maiores e dependentes galegos, causa un gran prexuízo económico e pon aos concellos ao borde da quebra”, apuntou.

A SITUACIÓN EMPEARA DÍA A DÍA

Raquel Arias lamentou que “a situación empeora día tras día porque Pedro Sánchez, en vez de incrementar a súa aportación para a prestación dos servizos de dependencia, reduciuna nos últimos anos, pasando dunha achega do 40 por cento en 2023 a menos do 35 por cento ao ano seguinte”. “Iso si, comprometéndose co País Vasco a aboarlle o 50 por cento sen escusas, e co aplauso tanto do BNG como do PSdeG”, indicou.

Ademais, criticou que, “a medida que o Goberno central recorta as aportacións, vai modificando a Lei de dependencia para dar máis prestacións e máis servizos aos dependentes, pero en absoluto acompañadas do orzamento correspondente para levalos a cabo”. “Esta situación está a levar á quebra aos concellos, afecta ás políticas xerais da Xunta e, o que é peor, crea unha gran frustración entre os dependentes que ven sobre o papel uns servizos aos que non teñen acceso por falta de financiamento”.

O Parlamento de Galicia solicita ao Goberno central que manteña a cidade de Vigo como sede para a realización dos exames de MIR en Galicia

O Parlamento de Galicia aprobou hoxe a proposición non de lei do Grupo Popular, co voto en contra do PSdeG, a través da que se solicita ao Goberno central o mantemento da cidade de Vigo, xunto con Santiago de Compostela, como sede para a realización dos exames de formación sanitaria especializada (MIR) na Comunidade galega. “É unha demanda que nace do sentido común, da evidencia técnica e do recoñecemento á realidade sanitaria e universitaria galega”, indicou a deputada popular Patricia García.

“Eliminar Vigo como sede dos exames MIR non ten sentido e non só é un erro político, senón que é unha decisión incomprensible, sen criterios técnicos coñecidos e tomada sen diálogo coas comunidades autónomas”, manifestou a deputada popular, quen saudou que a ministra de Sanidade se comprometera co conselleiro de Sanidade a revisar esta decisión e estudar a recuperación da sede en Vigo.

PROPOSTA POSITIVA, LEAL E CENTRADA EN VIGO

Patricia García defendeu “unha proposta positiva, leal institucionalmente e centrada no que de verdade importa: a cidade de Vigo, os aspirantes e o sistema sanitario galego”. Porén, lamentou que, “mentres desde o PPdeG propoñemos sumar, os socialistas galegos optan por dividir e buscar un titular contra a Xunta”.

A deputada popular lamentou que os deputados socialistas “non se sumaran á maioría que aprobou esta iniciativa no Parlamento galego, a través da que enviarmos unha mensaxe clara ao Ministerio de Sanidade: que Galicia está unida na defensa de Vigo como sede dos exames MIR”.

O Grupo Popular incide en que a Xunta impulsará a construción do novo centro de saúde de Fisterra cando o Concello poña a disposición os terreos

A portavoz de Sanidade do Grupo Popular, Encarna Amigo, incidiu hoxe no Parlamento de Galicia que a Xunta impulsará as xestións necesarias para a construción dun novo centro de saúde en Fisterra no momento que desde o Concello se poña á súa disposición os terreos necesarios. “Confiamos que o novo alcalde teña unha actitude máis conciliadora que o anterior grupo de goberno e facilite que os veciños poidan gozar do novo centro de saúde”, manifestou.

“Sen parcela non hai centro de saúde posible”, asegurou Encarna Amigo, quen apuntou que “cando ese terreo se poña a disposición da Xunta haberá un novo centro de saúde, que triplicará o espazo do actual, pasando de 345 a máis de 1.000 metros cadrados, con cinco consultas para adultos, unha de pediatría e unha sala de xuntas para o persoal”.

RETICENCIAS MUNICIPAIS

A deputada popular lamentou que, “a pesar da vontade amosada pola Xunta para construír o novo centro de saúde en Fisterra moderno, accesible, amplo, dotado con equipamento renovado e preparado para albergar novos servizos sanitarios, o Concello non foi quen de poñer a disposición do Sergas unha parcela axeitada”.

Así, lembrou “as reticencias municipais a emprazar o centro de saúde novo nun entorno diferente ao do actual, en pleno núcleo urbano”. Neste sentido, recordou que o Concello pediu estudar a opción de reformar o centro actual, proposta que os técnicos do Sergas concluíron que iso non era viable nin técnica nin economicamente.

O PPdeG critica a “falta de valentía” do Goberno central na súa decisión sobre a AP-9: “Abríase unha oportunidade, pero Pedro Sánchez optou por seguir castigando a Galicia”

O PPdeG critica a “falta de valentía” do Goberno central ao volver desbotar a oportunidade de liberar a AP-9 e con iso “seguir castigando a Galicia” e “condenar aos galegos a continuar pagando peaxes abusivas por unha autoestrada que, por xustiza e por eficacia, debería ser galega e gratuíta”.

Así o manifestaba esta mañá a secretaria xeral Paula Prado no marco da reunión da Comisión de Infraestruturas do partido celebrada hoxe en Pontevedra. Unha reunión na que, ademais dos integrantes deste órgano coordinado por Antonio Ameijide, tamén participaron o presidente provincial do PP de Pontevedra, Luis López, o líder local do partido, Rafa Domínguez.

“O único compromiso do Goberno central, apoiado polo BNG, é co bloqueo e coa falta de respecto a Galicia”, sintetizaba en referencia ao bloqueo constante por parte do Executivo estatal á posibilidade de transferir a titularidade desta infraestrutura “tal e como demandan de xeito unánime a sociedade galega e o Parlamento de Galicia”.

De feito, a día de hoxe ascenden xa a 56 as veces que a Mesa do Congreso dos Deputados prorrogou o debate sobre a transferencia da AP-9 desde que Pedro Sánchez chegou á Moncloa.

A número dous dos populares galegos censurou neste sentido a “incoherencia” tanto dun PSdeG que “levaba no seu programa e prometía en campaña electoral a liberación e gratuidade da AP-9 e agora aplaude esta decisión de Sánchez no sentido contrario” como dun BNG que “di ser nacionalista pero apoia a un Goberno que vai en contra dos intereses dos galegos”.

“Desde o PPdeG seguiremos traballando con iniciativas en todas as Cámaras para que se faga realidade dunha vez por todas o que Galicia leva anos reclamando: pedir o divorcio de Pedro Sánchez e quedar coa custodia da AP-9”, concluíu.

LUIS LÓPEZ: “PEDRO SÁNCHEZ PREFIRE DEIXARSE CHANTAXEAR ANTES QUE TOMAR DECISIÓNS”

O presidente do PP de Pontevedra, Luis López, indicou que Pontevedra, sendo unha das provincias máis poboadas e dinámicas de Galicia, está a seguir con inquedanza a parálise do Goberno socialista con relación ás infraestruturas.

Luis López detallou que, por mar, Vigo segue aínda ser estar recoñecido como Porto Nodal; por aire, por culpa das taxas de Aena que precipitaron a saída de de Ryanair de Peinador e os experimentos con torres de control remotas que son criticadas polos axentes do sector; e por terra, con estradas nacionais en pésimo estado que máis ben son camiños, como por exemplo a N-120 o seu paso por Ponteareas, os retrasos e caos continuos na rede ferroviaria de media e larga distancia, e agora para rematar cos agravios, coa perda da oportunidade de liberar a AP-9 para que sexa por fin gratuíta.

“Desde Pontevedra lamentamos que o Goberno renunciara a librar a miles de usuarios das peaxes. Prefire deixarse chantaxear a tomar decisións. Coa AP-9, non hai nin rescate, nin máis bonificacións, e nin permiten sequera que se debata o traspaso da vía a Galicia que suma xa 56 bloqueos no Congreso. Atrás quedan promesas electorais e palabras, porque o certo é que a parálise de Sánchez sáelle cara aos milleiros de usuarios”, lamentou o presidente provincial.

A COMPLICIDIDADE DO PSOE E O BNG EN PONTEVEDRA

O líder local do partido na cidade, Rafa Domínguez, engadiu que o Grupo Municipal logrou aprobar dúas mocións neste mandato para instar ao Goberno de España a asumir o rescate da AP-9 e avanzar na liberalización das peaxes.

Domínguez criticou a actitude do BNG e do PSOE de Pontevedra, aos que acusou de ser “cómplices da estratexia de dilación de Pedro Sánchez”. O presidente local do PP está convencido de que os outros dous grupos políticos da Corporación municipal apoian propostas pola reivindicación social, “pero non exercen ningunha presión real sobre o Executivo central porque antepoñen os seus intereses partidistas aos da cidadanía”

A OBSESIÓN DE SÁNCHEZ CON ILLAR A GALICIA

O coordinador de Infraestruturas do PPdeG, pola súa banda, tamén se manifestou nesta liña preguntándose “cales son os motivos que xustifican a obsesión de Pedro Sánchez con illar a Galicia por terra, mar e aire”.

Referíase así ao feito de que a nosa Comunidade estea perdendo conexións aéreas por “decisións unilaterais e imposicións do ministro Óscar Puente” e de que as estradas galegas de titularidade estatal estean “no peor estado de mantemento da historia”. Algo ao que habería que engadir os “incumprimentos reiterados” por parte do Goberno central na posta en marcha de novas infraestruturas.

Para Antonio Ameijide, portavoz do Partido Popular na Deputación de Lugo, o máximo exemplo deste “illamento” é o que acontece tamén no eido ferroviario, con “problemas constantes” e con “provincias enteiras como a de Lugo illadas e desconectadas da Alta Velocidade”.

Aprobado o plan de traballo da Comisión sobre a posible modificación da letra do himno de Galicia

A Comisión especial de estudo sobre a posible modificación da letra do himno de Galicia aprobou o seu plan de traballo, sen ningún voto en contra, que, ademais de incorporar toda a documentación reunida pola ponencia constituída xa na X lexislatura, inclúe a elaboración de informes e comparecencias da Real Academia Galega, o Consello da Cultura Galega e o Instituto de Estudos Galegos Padre Sarmiento, ademais da presenza do catedrático Manuel Ferreiro Fernández.

O deputado popular José Luís Ferro manifestou que “o plan de traballo ten un valor engadido moi importante porque da protagonismo á cultura e á ciencia galega, non á improvisación nin á polémica, respectando o legado de Pondal pero abrindo tamén unha xanela para pensar no futuro”.

“Non se pode afirmar que é urxente tomar unha decisión definitiva e formular unha proposta cun horizonte temporal de, como mínimo, un ano vista; nin se pode afirmar que buscamos o consenso e propoñer organizacións de parte, cando xa hai antecedentes de consultas ás principais institucións académicas de Galicia; nin se pode afirmar que a modificación dun símbolo de Galicia require unanimidade política e consenso social e pretender impoñela cun articulado pechado; nin podemos afirmar que o himno como símbolo de Galicia ten un enorme valor simbólico e abordar o debate da súa posible modificación só desde un punto de vista do seu rigor filolóxico”, indicou José Luís Ferro respecto das propostas realizadas polos demais grupos parlamentarios.

Deste xeito, cualificou o plan de traballo aprobado como “serio, obxectivo e que solicita os informes pertinentes das institucións que son de todos, non de ningunha cor política”. “Orientar os traballos desta comisión cara unha conclusión predeterminada sería un grave erro, porque o que debemos permitir é un debate aberto e obxectivo sobre se é conveniente ou non modificar o noso himno”, indicou.

O Grupo Popular pide ao Goberno central que cese coa conxelación do Fondo de Compensación Interterritorial e incremente as achegas ata acadar as contías realizadas en 2009

A viceportavoz do Grupo Popular, Cristina Sanz, pediu hoxe ao Goberno central que cese coa conxelación das achegas do Fondo de Compensación Interterritorial (FCI) que Galicia recibe do Estado, de tal xeito que os recursos adicionais que reciba poidan ser destinados ao financiamento de obras ou actuacións que favorezan o reequilibrio e o desenvolvemento de todos os territorios, dea cumprimento ao compromiso asumido por Pedro Sánchez de incrementar as achegas e retome a contía equivalente á realizada en 2009.

Tomando como referencia o informe do Consello de Contas, Cristina Sanz lembrou que a dotación do FCI nos orzamentos do Estado para o ano 2023 era de 432 millóns de euros, o que representa unha caída do 67,68 por cento desde o ano 2008 e un importe conxelado desde 2014.

Ademais, a participación de Galicia nese fondo experimentou unha caída do 81,02 por cento desde 2008, sendo a comunidade máis afectada e recibindo en 2023 a porcentaxe máis baixa de todos os exercicios analizados (8,92 por cento). En concreto, o Estado pasou de destinar a Galicia a través deste fondo 197 millóns de euros en 2009 a 38,6 millóns na actualidade.

NOVO DESEÑO

Diante desta situación, e recollendo o manifestado polo Consello de Contas, a viceportavoz popular demandou “un novo deseño do fondo de compensación interterritorial que garanta o financiamento suficiente dos investimentos produtivos das comunidades autónomas e reduza os desequilibrios territoriais, velando polo establecemento dun equilibrio económico adecuado e xusto, e unha mellor aplicación do principio de solidariedade”.

Cristina Sanz criticou que “a promesa de Pedro Sánchez de duplicar os recursos dos fondos de cohesión territorial segue pendente de concretarse”, pero, a pesar de que eses recursos non experimentaron variacións desde o ano 2014, o gasto licitado pola Comunidade galega pasou de 580 millóns de euros naquel ano a 1.404 millóns no 2023. “A pesar da conxelación dos fondos estatais, Galicia case triplicou o seu gasto en investimentos, tendo que financialos con cargo aos seus propios recursos”, salientou.

O Parlamento de Galicia pide ao Goberno central que a creación dos novos xulgados de violencia contra a muller en Vigo e A Coruña non supoña a eliminación de xulgados de instrución

O Parlamento de Galicia aprobou hoxe a proposición non de lei do Grupo Popular, que non contou co apoio do PSdeG, a través da que se demanda ao Goberno central a creación de novos xulgados de violencia sobre a muller nas cidades de A Coruña e Vigo, como órganos adicionais e específicos, sen que iso supoña a transformación nin eliminación de xulgados de instrución. Así mesmo, pídese que planifique a planta xudicial de Galicia de forma rigorosa, transparente e dialogada coa Xunta, atendendo a informes técnicos, datos de carga de traballo e criterios de equilibrio territorial.

A deputada popular Katy Varela lembrou que “a Xunta leva tempo reivindicando ao Goberno central a creación de novas unidades xudiciais e máis prazas de xuíces e maxistrados”. Ante esta demanda, o Goberno de Pedro Sánchez decidiu este ano ampliar as prazas en Galicia pero, das catro novas prazas de xuíces de violencia sobre a muller aprobadas para Galicia, só dúas, as de Santiago e Ourense, son de nova creación.

IMPACTO NEGATIVO NA CALIDADE DO SERVIZO

“Lamentamos a decisión do Goberno central de que en A Coruña e en Vigo se creen estas unidades xudiciais a costa de suprimir outros tantos xulgados de instrución, unha decisión que causa preocupación nos axentes xudiciais porque terá un impacto negativo na calidade do servizo que se presta aos cidadáns”, sinalou.

Katy Varela explicou que “a supresión destes órganos instrutores suporá unha sobrecarga inmediata e directa para os restantes xulgados de instrución, afectando negativamente á tramitación de dilixencias previas, medidas cautelares e causas complexas que requiren especial atención”. Ademais, tanto Vigo como de A Coruña presentan características demográficas, sociais e xurisdicionais  que as fan especialmente sensibles á perda de recursos: ambas son cabeceiras de partido xudicial e sedes de órganos especializados e provinciais, atendendo tamén á poboación doutros municipios da contorna.

Por último, a deputada popular subliñou que “a Xunta xa anunciou que procederá ao reforzo do persoal destes catro novos xulgados de violencia contra a muller, co obxectivo de paliar o aumento da carga de traballo derivada das novas funcións, e tamén das fiscalías”.

O Parlamento galego reitera ao Goberno de España a urxente necesidade de completar o cadro de persoal da Unidade de Policía Adscrita a Galicia

O Parlamento de Galicia aprobou hoxe a proposición non de lei do Grupo Popular, que non contou co apoio de BNG e PSdeG, a través da que se reitera ao Goberno de España a urxente necesidade de completar o cadro de persoal da Unidade de Policía Adscrita de Galicia (UPA) para que poida seguir prestando as súas funcións en termos de seguridade e eficiencia, en ámbitos como na protección das vítimas de violencia de xénero ou na prevención e investigación dos incendios forestais. En concreto, a viceportavoz popular, Paula Prado, lembrou que este corpo “perdeu unha media de nove axentes cada ano desde que goberna Pedro Sánchez, a pesar de que o ministro Marlaska adquiriu o compromiso de reforzalo cun mínimo de 50 axentes”.

Paula Prado lamentou que a Unidade de Policía Adscrita a Galicia “seguiu batendo récords á baixa no número de axentes e tocou fondo este ano: actualmente afronta o día a día cunha plantilla aínda máis mermada e reducida a 341 axentes, tres menos que o pasado ano e a cifra máis baixa desde que comezou a operar en 1991”.

RECORTE DO 28% DESDE O GOBERNO DE MARIANO RAJOY

“A UPA vive unha situación dramática, porque se continúa sen reforzos vaise ver irremediablemente obrigada a deixar de prestar algúns dos seus servizos”, lamentou a viceportavoz popular. En concreto, referiuse á protección da vítimas de violencia de xénero, xa que hoxe so hei un axente por cada sete vítimas incluídas no sistema Viogen; ou á prevención e investigación dos incendios forestais.

Neste sentido, explicou que “estamos a falar dun recorte de plantilla de máis dun 28 % desde que en 2013 o Goberno de Mariano Rajoy realizara a última cobertura de prazas, que permitiu acadar a cifra récord de 474 axentes”, e lamentou que “a chegada de Pedro Sánchez á Moncloa agudizou aínda máis o recorte, xa que nestes últimos anos perdemos un total de 63 axentes”.

Deste xeito, Prado concretou que “temos un corpo policial con 3 de cada 10 postos vacantes e ao 68 % da súa capacidade total; con dificultades organizativas pola falta de mandos; con cada vez máis axentes preto de pasar á segunda actividade; e que só coa súa vocación de servizo público e a duras penas é quen de facer máis con menos”.