Día: 29 Maio, 2026

O Parlamento de Galicia aprobou hoxe unha iniciativa defendida polo deputado do Grupo Popular Julio García Comesaña na que se reclama ao Goberno de España que calquera futura lei sobre o desempeño da docencia e da ensinanza se elabore de forma consensuada coas comunidades autónomas, cun calendario de implantación realista e coa correspondente garantía de financiamento.

Durante a súa intervención na Comisión 4ª de Educación e Cultura, García subliñou que a proposta aprobada “non vai contra ninguén nin pretende bloquear melloras educativas”, senón que busca “defender os intereses de Galicia e reclamar seriedade, diálogo e financiamento suficiente ao Executivo central”.

O deputado popular advertiu que o Ministerio de Educación está a impulsar cambios “sen contar realmente coas comunidades autónomas, que son as que sosteñen e xestionan o sistema educativo no día a día”, e reclamou que se respecte o principio de cogobernanza.

ADIANTO DE GALICIA NAS MEDIDAS EDUCATIVAS

García puxo en valor o acordo educativo acadado en Galicia en 2023 cos principais sindicatos do ensino, que permitiu melloras progresivas nas condicións docentes con planificación e financiamento propio, e sinalou que o modelo galego “xa adiantou moitas das medidas que agora se presentan a nivel estatal”.

A iniciativa aprobada insta ao Goberno central a pactar coas comunidades autónomas o desenvolvemento da futura lei, garantir unha memoria económica suficiente e establecer un calendario de implantación realista que teña en conta as diferentes realidades territoriais, especialmente no ámbito rural e na dispersión poboacional.

“O que pedimos é sentido común: consenso, planificación e financiamento”, concluíu Julio García, quen defendeu que a medida supón “unha defensa do sistema educativo galego e da estabilidade necesaria para seguir mellorando a educación pública”.

RENOVACIÓN DO PLAN XERAL DE NORMALIZACIÓN DA LINGUA GALEGA

Na Comisión 4ª, o Parlamento de Galicia tamén aprobou a iniciativa do Grupo Popular para reafirmar o apoio á Lei de Normalización Lingüística e o impulso á renovación do Plan Xeral de normalización da lingua galega, adaptando as medidas do mesmo aos novos usos sociais do idioma.

O portavoz de Lingua do Grupo Popular, José Luis Ferro, subliñou durante a súa intervención que “hai cuestións sobre as que é lexítimo discrepar, pero a lingua galega pertence á categoría na que unha sociedade madura debe ser capaz de atopar puntos de encontro”, engadindo que “o galego non é patrimonio dun partido político, senón de todos os galegos”.

Ferro lembrou que os principais avances en materia lingüística en Galicia “naceron do consenso e non da imposición”, citando como exemplo a aprobación por unanimidade da Lei de Normalización Lingüística en 1983 e do Plan Xeral de 2004, “dous fitos construídos desde posicións políticas diferentes pero cunha convicción común: defender a lingua desde a unidade”.

“O máis sorprendente é que o BNG critique hoxe un proceso no que decidiu non participar. Mentres uns traballaban para construír consensos arredor da lingua galega, outros optaron por quedar fóra e instalarse, unha vez máis, na confrontación política”, afirmou José Luis Ferro.

O deputado popular destacou que o novo Pacto pola Lingua “está avanzando grazas ao compromiso de entidades culturais, expertos, profesionais e colectivos sociais que si entenderon a importancia de sumar e non de dividir”. “Hai moita xente facendo un traballo serio e rigoroso para fortalecer o futuro do galego desde o acordo e a responsabilidade”, engadiu.

“O BNG pretende agora desacreditar un proceso plural e aberto simplemente porque non foi quen de implicarse nel. Pero a realidade é que o Pacto pola Lingua segue avanzando con diálogo, con participación social e con propostas concretas para impulsar o uso e o prestixio do galego”, sinalou o deputado popular.

José Luis Ferro lamentou tamén que “o nacionalismo volva antepoñer a estratexia partidista ao interese xeral da lingua”. “Galicia necesita máis vontade de acordo e menos ruído político. O galego deféndese traballando e construíndo consensos, non tentando dinamitar os espazos de entendemento”, concluíu.

Finalmente, o portavoz popular pediu o apoio da Comisión á iniciativa do PPdeG , que se resume en dous puntos: reafirmar o respaldo á Lei de Normalización Lingüística e instar á Xunta a presentar unha proposta de renovación do Plan Xeral de Normalización da Lingua Galega, que foi aprobada sen ningún voto en contra.

“Os grandes avances do galego sempre naceron dunha palabra: acordo”, concluíu Ferro.

O portavoz do Grupo Popular no Parlamento de Galicia, Alberto Pazos Couñago, denunciou hoxe “a maior aldraxe a Galicia” tras o acordo aprobado no Congreso para a transferencia da AP-9, ao considerar que “modifica e desvirtúa por completo” o texto aprobado por unanimidade na Cámara galega.

Durante a rolda de prensa celebrada no Parlamento, Pazos acusou ao PSOE e ao BNG de “dinamitar a posición común de país” e asegurou que o novo texto supón “un pacto entre traidores” co que “Pedro Sánchez pretende aforrar unha vez máis a costa do peto dos galegos”.

“O máis grave é que esta aldraxe foi bendecida por dous galegos: pola señora Pontón, que traizoou á súa nación, e polo señor Besteiro, unha vez máis o máis servil vasalo de Pedro Sánchez”, afirmou.

O portavoz popular exhibiu o texto aprobado inicialmente no Parlamento galego para evidenciar “os tachóns e eliminacións” introducidos posteriormente no Congreso.

Segundo explicou, a nova redacción elimina cuestións fundamentais como a obriga do Estado de asumir os custos derivados dunha posible nulidade das prórrogas da concesión, a supresión do incremento anual acumulativo do 1% nas peaxes ou o financiamento estatal das obras comprometidas e das bonificacións ás persoas usuarias recorrentes.

Neste sentido, Alberto Pazos asegurou que “o único acordo válido é o aprobado por unanimidade no Parlamento de Galicia”, porque nel “o Goberno central asume as súas responsabilidades económicas, as obras comprometidas e as bonificacións necesarias”.

“O texto que PSOE e BNG queren vender agora como bo para Galicia elimina todas esas garantías, unha a unha”, advertiu.

Pazos preguntouse “canto vale a palabra da señora Pontón e do señor Besteiro, que votan unha cousa en Galicia e a contraria en Madrid”, para concluír que “vale tanto como a presunta honradez de Pedro Sánchez: nada”.

NOVA INICIATIVA NO PARLAMENTO

Alberto Pazos anunciou ademais que o Grupo Popular presentará unha nova iniciativa parlamentaria para “retornar á posición común de país que nunca se debeu romper”.

A proposta defenderá que se respecte literalmente o texto aprobado por unanimidade en Galicia, que a transferencia non implique cargas económicas para a comunidade, que o Estado continúe financiando as bonificacións vixentes e que a Xunta dispoña de plena capacidade para a xestión integral da AP-9.

CORRUPCIÓN E DETERIORO DEMOCRÁTICO

Na súa comparecencia, o portavoz popular tamén criticou duramente a situación política do Goberno central e os últimos casos que afectan ao PSOE e ao entorno do presidente do Goberno.

“Desde a miña última rolda de prensa coñecemos a imputación do ex presidente Zapatero, o rexistro da sede do PSOE en Ferraz, a citación xudicial da muller do presidente e vimos tamén ao seu irmán sentado no banco dos acusados”, lembrou.

Segundo Pazos, “na España de Pedro Sánchez, o Goberno protexe a presuntos delincuentes e acusa aos que perseguen o delito”, responsabilizando directamente ao presidente “dun deterioro sen precedentes da calidade democrática”.

O portavoz popular asegurou que “hai tempo que o vaso da paciencia dos españois está absolutamente desbordado” e reclamou “devolverlles a voz aos cidadáns para que decidan o futuro do país”.

Finalmente, o portavoz popular felicitou ás Forzas Armadas con motivo da celebración do seu día en Galicia e trasladou o recoñecemento do Grupo Popular “aos máis de 8.000 homes e mulleres galegos que prestan servizo no Exército”.