O PPdeG apoia a candidatura de Ana Méndez para a alcaldía da cidade de Ourense en 2027

O PPdeG apoia a candidatura de Ana Méndez Gil para a alcaldía da cidade de Ourense de cara ás eleccións municipais de 2027, poñendo en valor o traballo “discreto e moi rigoroso” da presidenta da xestora local do PP de Ourense e portavoz municipal no Concello.

“Cremos que Ana Méndez leva moito tempo traballando para ofrecer solucións aos problemas da cidade, construíndo un equipo, e  cun modelo de cidade diferente”, sinalou a secretaria xeral do PPdeG, Paula Prado, hoxe durante un paseo pola cidade de Ourense, xunto coa candidata e co presidente do PP da provincia de Ourense, Luis Menor. “A cidade non só son infraestruturas e escaleiras, tamén é ocio, atención as familias, cultura e políticas sociais”, engadiu.

A número dous dos populares galegos subliñou o respaldo absoluto a Ana Méndez dende a dirección autonómica do partido liderada por Alfonso Rueda. “Somos un partido previsible e apoiamos a quen leva traballando por Ourense moito tempo, ofrecendo unha alternativa de cidade fronte a eses partidos con liortas internas que dificilmente poden ofrecer unha candidatura para resolver os problemas da veciñanza”, dixo. Tamén puxo en valor o traballo rigoroso de Ana Méndez fronte a un alcalde que “só pensa no seu propio beneficio e no show”.

Para a secretaria xeral dos populares galegos, Ourense merece a “seriedade e rigor” doutra forma de gobernar, a que pode aportar Ana Méndez, á que augurou que se una a ampla lista de mulleres do PPdeG que gobernan en 32 concellos de toda Galicia, lembrando que Ourense é a provincia con maior representación feminina.

ANA MÉNDEZ AFRONTA O RETO CON HUMILDADE E DETERMINACIÓN

Por outra banda, Ana Méndez Gil asegurou que afronta esta nova etapa “cun enorme orgullo, moita ilusión, pero tamén cun enorme sentido da responsabilidade”, agradecendo ao Partido Popular a confianza depositada nela e o apoio recibido durante estes anos por afiliados, simpatizantes e compañeiros de partido.

A candidata popular destacou que asume este reto “con humildade, pero tamén coa determinación de quen sabe que a súa cidade merece abrir unha nova etapa que devolva a Ourense a estabilidade e a ambición”. “Eu non dou este paso para administrar o presente. Dou este paso para construír o futuro”, engadiu.

Durante a súa intervención, Ana Méndez Gil reivindicou un cambio de rumbo para a cidade e asegurou que “Ourense ten que pasar da improvisación á planificación, das escusas aos resultados e do espectáculo ao traballo. Merece un proxecto serio, claro e pensado para a cidade, non para os intereses duns poucos”. “Ese é o meu compromiso desde hoxe. Chegou a hora de cambiar Ourense”, concluíu.

LUIS MENOR: “O OBXECTIVO É SER DECISIVOS NA CAPITAL”

Por último, Luis Menor puxo en valor o “intenso traballo de organización” que a formación provincial desenvolve desde o ano pasado a través de congresos locais e a creación de xestoras, co fin de preparar o partido para as municipais de 2027.

Neste contexto, reafirmou que un dos grandes obxectivos do PP de Ourense para a cita local coa urnas é “conseguir ser decisivos na capital”. Un Ourense forte, onde reside un de cada tres habitantes de todo o territorio ourensán, “dará pulo a toda a provincia”, defendeu Menor contrapoñendo este horizonte coa situación actual dunha cidade sumida nunha “política de ocorrencias e unha “nefasta xestión que desatende diariamente as necesidades da poboación”.

O reto de recuperar o espazo perdido no Concello e lograr que a capital lidere a provincia ten desde agora nome propio na figura de Ana Méndez, subliñou o presidente provincial, destacando a consolidación da candidata como referente do partido na cidade durante o último ano.

Esta nova etapa que agora se abre buscará “promover a unidade, sentar as bases dunha candidatura comprometida coa súa cidade e, sobre todo, construír un proxecto alternativo, ilusionante e con capacidade de ofrecer respostas concretas aos cidadáns”. Para logralo, Menor garantiu que Méndez non só contará co respaldo da dirección provincial, senón tamén co aval do Goberno galego “comprometido de verdade con Ourense”, que “inviste na cidade mentres outros se dedican a mentir e a desviar as súas responsabilidades”.

O PPdeG propón reforzar a protección das persoas consumidoras fronte á discriminación na contratación dixital

O PPdeG defenderá no Parlamento de Galicia unha iniciativa para reforzar a protección dos dereitos das persoas consumidoras e garantir que ningún cidadán teña que renunciar ás vantaxes da contratación dixital para poder beneficiarse de descontos ou bonificacións recoñecidas legalmente.

A proposición non de lei presentada na Cámara galega parte dunha realidade cada vez máis habitual: empresas e operadores que ofrecen tarifas reducidas a colectivos como persoas maiores, familias numerosas ou persoas con discapacidade, pero que lles esixen acudir presencialmente para acreditar esa condición, impedíndolles completar todo o proceso de compra por internet.

Para o PPdeG, esta práctica supón unha discriminación indirecta e carece de xustificación, xa que existen numerosos exemplos de empresas que permiten aplicar os descontos durante a compra en liña e comprobar posteriormente a documentación no momento de acceder ao servizo.

UNHA MAIOR PROTECCIÓN DOS CONSUMIDORES
Co obxectivo de poñer fin a estas situacións, o Grupo Popular propón que o Parlamento inste á Xunta de Galicia a impulsar catro actuacións.

En primeiro lugar, solicitar ao Goberno de España a modificación da normativa estatal de defensa das persoas consumidoras e da Lei de Familias Numerosas para prohibir expresamente que o acceso ás bonificacións legais quede condicionado á utilización exclusiva da canle presencial.

En segundo lugar, promover unha actuación coordinada co resto das comunidades autónomas nas conferencias sectoriais de Consumo e Servizos Sociais para impulsar unha regulación básica común en todo o Estado.

Ademais, a iniciativa reclama reforzar os mecanismos de inspección, denuncia e sanción da Xunta fronte ás prácticas comerciais que vulneren os dereitos das persoas consumidoras, aplicando a lexislación galega mentres non se aprobe a reforma estatal.

Por último, o PPdeG propón desenvolver campañas de información e sensibilización para que os colectivos afectados coñezan os seus dereitos na contratación dixital e as vías de reclamación e denuncia das que dispoñen, en colaboración coas organizacións de consumidores, entidades do terceiro sector e asociacións representativas.

REUNIÓN CON REPRESENTANTES DE CONSUMIDORES E ENTIDADES SOCIAIS
Co obxectivo de acadar un consenso para a presentación da iniciativa, o deputado popular Jesús María Fernández Rosende, autor da iniciativa, e a voceira de Política Social, Raquel Arias, celebraron unha reunión con representantes de organizacións de consumidores e de entidades sociais de Galicia.

Para os deputados populares a transformación dixital debe servir para facilitar a vida das persoas e non para crear novas barreiras, especialmente, aos colectivos que xa contan cunha protección específica recoñecida pola lei. Por iso, defenden unha regulación que garanta que os dereitos dos consumidores sexan efectivos tamén no ámbito dixital en condicións de igualdade para todos.

Para Miguel López, secretario xeral da Unión de Consumidores de Galicia, é preciso combater as prácticas discriminatorias que afectan ás persoas con discapacidade, ás persoas maiores, ás familias numerosas e a outros colectivos beneficiarios de bonificacións, que se ven obrigados a realizar trámites presenciais, agravando así a situación de desigualdade que padecen.

Pola súa banda, o presidente da Asociación Galega de Familias Numerosas, Luis Sánchez, defendeu que a accesibilidade dixital debe ser inclusiva e evitar novas discriminacións. O presidente de Fademga, Eladio Fernández, salientou que esta iniciativa permitirá avanzar na accesibilidade das persoas con discapacidade intelectual. Finalmente, o presidente de CERMI Galicia, Ramón Sestayo, lembrou que este colectivo representa arredor do 10 % da poboación e subliñou a necesidade de garantir que os servizos, as contornas e os produtos sexan accesibles para todas as persoas.