A portavoz de Política Social do Grupo Parlamentario Popular, Raquel Arias, acusou ao presidente do Goberno, Pedro Sánchez, de tratar aos menores migrantes non acompañados, dos que centenas seguen en Ceuta desde hai case mes e medio, como se fosen “mercadorías”. “Os menores non son números e moito menos poden ser moeda de cambio política”, subliñou. “Iso non é protexer aos menores, é abandonalos, igual que abandonou ao seu país”, engadiu.
Nesta liña, denunciou que Pedro Sánchez “renunciou a gobernar” ante o “ataque á integridade territorial” que sufriu España na cidade autónoma o 30 e o 31 de xullo. “O único que fai Sánchez é traer problemas a España”, advertiu a deputada popular, quen denunciou que o “único plan” do seu goberno, o cal “carece” de política migratoria, consiste na “defensa a ultranza de Marrocos”. “Manter a Sánchez con respiración asistida -afirmou- está sendo dramático para España, o que se vive en Ceuta é so o último episodio, pero é especialmente grave”.
Durante a súa intervención para presentar unha PNL que reclama incrementar a achega económica que recibe Galicia para acoller menores migrantes non acompañados, que vén de ser reducida polo Goberno central nun 82%, Raquel Arias cualificou de “bochornoso” o que se continúa a vivir en Ceuta, onde “aínda non sabemos cantos menores” continúan; “sen ter explicación da morte dramática de 141 migrantes”, sen saber “o futuro dos migrantes que permanecen” na cidade autónoma; e “sen solucionar a situación sanitaria, política e social xerada”; sumado á “incapacidade dos ceutís para facer a súa vida ordinaria”.
Na resposta á invasión sufrida por Ceuta produciuse a “tormenta perfecta”, ao xuntarse “a incompetencia coa inoperancia, o descontrol coa improvisación e as mentiras coas medidas verdades”. 40 días despois, criticou, o Executivo de Sánchez é incapaz de concretar cantos menores continúan na cidade autónoma, en medio dun baile de cifras entre o presidente do Goberno e os seus ministros; “e se non saben cantos menores hai que protexer, como os van protexer”, incidiu.
Esa mesma incoherencia dáse co destino dos menores non acompañados: “Unha parte do Executivo opina que onde mellor están os menores é coas súas familias e deben volver a Marrocos, pero outra parte considera que diso nada, que teñen que repartirse polas comunidades autónomas”.
Sobre o papel dos partidos da oposición en Galicia, a deputada do Grupo Popular afeou que “non asistiron” ás concentracións do pasado 2 de setembro para apoiar ao pobo ceutí. Sinaladamente, o BNG, que “van de pacifistas”, pero preferiron manter unha xuntanza con EH Bildu, cos “herdeiros de ETA”. “Afortunadamente, vostedes e nós non pensamos o mesmo. Nós temos solidariedade con quen chega, solidariedade con quen acolle, e responsabilidade con quen goberna. A responsabilidade das persoas que están en Ceuta é do Goberno, ao que vostedes apoian e aplauden. Deles é a responsabilidade de que mulleres e nenas leven máis dun mes desamparadas, de que aumentaran os delitos sexuais”, así como de filiar aos menores.
“NON HAI SOLIDARIEDADE SEN RECURSOS”
O PPdeG, como plasma a PNL defendida hoxe, esixiu ao Goberno central que “incremente a achega económica a Galicia para sufragar a atención” dos menores migrantes non acompañados, despois de deixala en apenas 740.000 euros, un 82% menos que o ano anterior; “actúe con lealdade institucional”, “evitando decisións unilaterais que comprometan a capacidade de resposta” das comunidades autónomas, volvendo ao “consenso”; e “garanta unha planificación e unha coordinación efectiva”.
“Reclamamos tamén, un control efectivo das nosas fronteiras, para evitar que se volvan a dar situacións tan bochornosas como a que se se está vivindo en Ceuta. Con imaxes que dan a volta ao mundo e retratan a España como un país fallido”, lamentou Arias. “Acoller dignamente esixe planificar seriamente e dotar de recursos”, lembrou.
“Galicia non recibe leccións de solidariedade, Galicia dá exemplo de solidariedade”, indicou a portavoz de Política Social do Grupo Parlamentario Popular, quen lembrou que a Comunidade xa foi unha das que acolleu máis menores nos anos 2022, 2023 e 2024, ademais de votar recentemente a favor de destinar 25M€ a Ceuta. “Para Galicia, a diferencia do Goberno central, a protección dos menores é unha prioridade”, dixo.
O MODELO DE GALICIA, “REFERENCIA” EN ESPAÑA
“En Galicia, afortunadamente, si se traballa con planificación, apostando por un modelo que xa é unha referencia”, cun “dos sistemas de protección de menores máis inclusivos e integradores de España”. Nos últimos catro anos aumentáronse en dúas ocasións as axudas mensuais ás familias acolledoras, cun investimento de preto de 1 millón de euros o ano pasado; está implementado o acollemento en familia allea, en convenio con Cruz Vermella, nas catro provincias; o acollemento en familia extensa, en convenio con Aldeas Infantiles, destinado a parentes directos; e o acollemento especializado con dedicación exclusiva: un programa piloto pioneiro en España, cunha proxección de investimento de máis de 3 millóns de euros ata mediados de 2029, para atender a menores con necesidades especiais.
Segundo datos do propio Goberno central, Galicia é a segunda comunidade con mellor ratio de acollemento familiar, un 56% sobre o total de medidas de protección, 9 puntos por riba da media española. E na comparativa autonómica, supera amplamente a comunidades como Cataluña (39%) ou o País Vasco (28%).
