O Parlamento Europeo reclama unha reforma urxente da Política Pesqueira Común grazas ao papel determinante do Partido Popular Europeo

O Parlamento Europeo aprobou hoxe, no pleno celebrado en Estrasburgo, unha resolución sobre a avaliación da Política Pesqueira Común (PPC) e os pasos futuros, na que reclama á Comisión Europea que avance sen demora na súa revisión e actúe sobre os problemas estruturais identificados na súa propia avaliación.

O eurodeputado do PPdeG Francisco Millán Mon, membro da Comisión de Pesca, subliñou: “acabouse o tempo de avaliar, é tempo de actuar”. Así mesmo, destacou que o papel do Partido Popular Europeo foi “determinante”, tanto para impulsar a presentación desta resolución, como para conseguir que as principais demandas do sector quedasen recollidas no texto. Millán Mon agradeceu o labor da Presidenta da Comisión de Pesca, Carmen Crespo, na posta en marcha desta resolución.

A resolución reclama unha PPC máis equilibrada e flexible, que teña en conta as tres dimensións da sustentabilidade —ambiental, económica e social—, e pide revisar elementos como a obriga de desembarque, o concepto de capacidade pesqueira, os criterios socioeconómicos na fixación de TACs e cotas e a definición da pesca artesanal.

Por outra parte, a resolución pide tamén avanzar na simplificación das normas relativas á pesca e, entre outros elementos, urxe a cambiar o Plan Plurianual do Mediterráneo e a revisión da implementación de determinados aspectos do Regulamento de Control, como certas obrigas de notificación.

O PALANGRE NAS 87 ÁREAS

Para Millán Mon, un dos elementos máis destacados e de actualidade para Galicia é a demanda á Comisión para excluír o palangre de fondo do Regulamento de Augas Profundas de forma urxente. O eurodeputado galego recordou unha vez máis o grave prexuízo que o peche de 87 áreas está a provocar a esta arte e a necesidade de poñer remedio urxente “a unha situación que carece de sentido, ao excluírse das zonas de pesca unha arte cun impacto insignificante sobre os fondos mariños”.

Millán Mon lembrou que a pasada semana a OPP de Burela presentou en Bruxelas o informe ISPAMER, que conclúe que o impacto do palangre pedra-bola sobre os fondos mariños é practicamente inexistente. “Hai evidencia científica que debe ser tida en conta”, destacou. “O Parlamento Europeo acaba de pronunciarse e está a pedir á Comisión que actúe. Agora correspóndelle á Comisión actuar e corrixir esta situación o antes posible”, concluíu.

Paula Prado urxe un diálogo “real e efectivo” co colectivo médico ante o “deterioro de servizos” por culpa do Goberno de Sánchez e o BNG na sanidade pública

A secretaria xeral do PPdeG, Paula Prado, urxe abrir un diálogo “real e efectivo” co colectivo médico para negociar a modificación do Estatuto Marco que permita acabar coas folgas e, por conseguinte, cos graves problemas que está ocasionando, dos que culpa “ao Goberno de Sánchez e os seus socios independentistas do BNG”, responsables do “deterioro progresivo dos servizos” na actividade e nos tempos de acceso á sanidade pública. “Coa sanidade non se xoga”, engadiu.

Así o manifestou hoxe a número dous dos populares galegos nunha rolda de prensa na sede autonómica do PPdeG, onde advertiu que o conflito sanitario provocado polo Goberno central está impactando nas listas de espera en Galicia. Neste punto, lamentou que dende o pasado mes de decembro, os paros médicos xa supuxeron a suspensión de case 280.000 actos médicos na comunidade.

Para Prado, o proxecto de Lei do Estatuto Marco é un texto que non conta co apoio e respaldo dos facultativos, senón que máis ben provocou incrementar aínda máis o enfado e a crispación entre o colectivo. De feito, xa se fixou unha folga indefinida e ininterrompida a partir do 28 de outubro.

“Sánchez actúa sen ter en conta outros intereses que non sexan os del, goberna por supervivencia e día tras día amosa a súa falta de compromiso con Galicia”, lamenta Prado, que reivindica un trato “xusto” para Galicia que o Executivo central “deixe de recortar” en medidas, achegas e iniciativas que poidan beneficiar á comunidade.

Para a secretaria xeral, destes recortes tamén ten culpa o BNG, que define como o partido que decidiu “vender a Galicia a cambio de nada”, unha alianza que “lle está saíndo cara a todos os galegos e galegas”. Así, a dinámica de recortes de servizos de Sánchez con Galicia, está “sustentada polos independentistas galegos”.

O GOBERNO GALEGO, RESPONSABLE E COMPROMETIDO

Entre outros recortes á sanidade galega, citou o prexuízo que provoca o déficit de profesionais no sistema, cuxa situación compete ao Ministerio de Sanidade. “Precisamos medidas que axuden a paliar este déficit de especialistas, como aumentar a idade de xubilación ata os 72 anos, axilizar a homologación de títulos estranxeiros e incrementar a oferta de formación sanitaria especializada”, citou.

Pola contra, Prado valorou que Galicia conta cun Goberno “serio, responsable e comprometido” co que de verdade importa: os galegos e galegas. Así, subliñou que o Executivo de Rueda incrementou a oferta de formación sanitaria especializada en especialidades como medicina familiar e comunitaria e pediatría, ofertando nos últimos anos o 100% das prazas formativas que se lle acreditan. Ademais, lembrou que antes dos paros de decembro, a data de 30 de novembro, a sanidade galega rexistraba máis actividade e menos tempos de espera.