O PPdeG pon en valor o apoio do Goberno galego ao sector marisqueiro cun plan de choque de 23 millóns de euros

O PPdeG pon en valor o apoio do Goberno galego ao sector marisqueiro, cun plan de choque dotado con case 23 millóns de euros para a rexeneración dos areais e o sostemento económico das familias do mar, e así reverter os efectos dos temporais do inicio do ano nos bancos marisqueiros. Un apoio que contrasta “coa hipocrisía do BNG”, lamentan os populares, recordando que os nacionalistas demandan en Europa medidas cando, hai dous meses, presumían de ter acadado un acordo co Goberno central para que os profesionais quedaran exentos do pago das cotas á Seguridade Social.

A realidade é que, despois de comprometerse hai case cinco meses a aplicar esta exención, dada a imposibilidade dos mariscadores e mariscadoras de levar a cabo a súa actividade a causa dos devanditos temporais, coa conseguinte mortandade dos bivalvos, o Executivo de Pedro Sánchez continúa sen cumprir a súa palabra. Un agravio comparativo respecto a outros sectores que contan con mecanismos de protección antes causas de parálise de actividade.

O desleixo do Goberno central contrasta coa folla de ruta deseñada polo Goberno galego, que inclúe un plan de choque dotado con 22,7 M€. Articúlase en tres grandes eixos: 19,2 M€ destinados á sinatura de convenios de colaboración coas confrarías de pescadores; 1,5 M€ para o reforzo poboacional achegando semente de bivalvos; e 2 M€ para proxectos de conservación e restauración da biodiversidade.

A meirande dotación do plan baséase na sinatura de convenios directos coas confrarías, que permiten ás entidades titulares compensar economicamente ás persoas mariscadoras que participen nas tarefas de recuperación. A remuneración acada os 700 euros no caso daquelas que completen o máximo de días de traballo ao mes. Ademais, tamén se contemplan apoios para as entidades pola súa labor de organización, seguimento e control.

A DOBRE CARA DOS NACIONALISTAS

Para o PPdeG, o BNG volve a demostrar a súa hipocrisía, escenificando ante o Pleno do Parlamento Europeo a súa preocupación pola situación do sector, e tratando de responsabilizar ao Executivo galego, despois de que o seu único deputado no Congreso asegurase ante representantes das persoas mariscadoras que o seu partido conseguira, a través de negociacións co Goberno central, un acordo para que quedaran exentas dos pagos á Seguridade Social.

Unha demanda que o Partido Popular vén formulando de xeito reiterado nos últimos meses, mediante múltiples accións nas distintas Cámaras lexislativas. No Parlamento de Galicia logrou que se aprobara, sen votos en contra, unha iniciativa instando ao Executivo de Pedro Sánchez a que asuma as súas obrigas legais e constitucionais, que unha vez máis recorta axudas en Galicia. Na Comisión de Pesca do Senado impulsou unha iniciativa que tamén reclamaba a exención das cotas. E presentou ante o Congreso unha batería de preguntas coa mesa finalidade.

A maiores, xa o pasado mes de marzo, a Xunta de Galicia enviou unha carta formal á dirección do Instituto Social da Mariña esixindo a devandita exención, sen que, transcorridos máis de seis meses, se teña recibido ningunha resposta por parte do Ministerio de Inclusión, Seguridade Social e Migracións.

O PPdeG enxalza o investimento que a Xunta destina a fármacos innovadores contra os cancros de mama e ovario

Os deputados do Grupo Parlamentario Popular Cristina Sanz e José Manuel Mato puxeron en valor, nunha visita á sede da Asociación Española Contra o Cancro de Lugo, o investimento que a Xunta anunciou recentemente –preto de 48 M€- para a compra de varios medicamentos innovadores e de vangarda para loitar contra os cancros de mama e de ovario nos hospitais públicos galegos. “Esta potente inxección económica sitúa a Galicia á cabeza da medicina de precisión e supón un salto cualitativo na calidade de vida das pacientes”, sinalaron.

Da man do presidente da entidade, José Manuel Rozas, e do secretario, Daniel Botana, os parlamentarios puideron coñecer de primeira man o traballo diario de apoio e asesoramento que realiza a asociación. Durante o encontro, aproveitaron para trasladarlle “o compromiso prioritario e firme” do Goberno galego na loita contra a enfermidade. “A mellor forma de apoiar o inmenso labor que fan entidades como a AECC de Lugo é garantir que a sanidade pública galega ofreza sempre as solucións terapéuticas máis avanzadas e eficaces, con tratamentos máis individualizados e de vangarda”, apuntaron os deputados populares.

Neste senso, afondaron en que deses case 48 M€, arredor de 36 M€ diríxense ao tratamento do cancro de mama, que segue a ser o tumor máis frecuente entre as mulleres galegas, con 2.396 novos casos diagnosticados no ano 2023. E que case 12 M€ irán destinados a fármacos de precisión para pacientes con cancro de ovario –unha patoloxía que, en 2023, rexistrou 220 novos diagnósticos- ou de mama. “Son –tal e como salientaron- novas terapias que representan un gran avance respecto á quimioterapia convencional”.

O Parlamento aproba reforzar a formación a través do campus virtual do comercio galego para apoiar o sector ante a nova realidade do consumo

O Parlamento de Galicia vén de aprobar unha iniciativa do Grupo Parlamentario Popular relativa a impulsar e reforzar a formación a través do campus virtual do comercio galego, co obxectivo de axudar ao pequeno comercio a adaptarse ás tendencias actuais de consumo.

Tal e como remarcou a deputada do Grupo Parlamentario Popular, Felisa Rodríguez, o comercio local galego atópase inmerso nun proceso de transformación profunda motivado pola dixitalización, o auxe do comercio electrónico e unha clientela cada vez máis conectada. Neste escenario, defendeu que a formación continua é a chave para que os establecementos tradicionais melloren a súa presenza dixital, adapten os seus modelos de negocio e reforcen a súa capacidade de innovación para incrementar a súa competitividade. Así, considerou que a dixitalización ten que ir acompañada da formación, porque “dixitalizar debe significar máis oportunidades, non dificultades”.

Segundo apuntou Felisa Rodríguez, o campus virtual do comercio galego preséntase como unha ferramenta estratéxica para chegar a un maior número de persoas, con independencia da súa localización xeográfica. Así mesmo, incidiu en que esta plataforma non só contribúe a impulsar a profesionalización do comercio local, senón que tamén fortalece o seu papel como motor económico e social do territorio.

A deputada popular fixo fincapé en que a capacitación en materias como o márketing dixital, a xestión empresarial, a atención ao cliente ou a integración de novas tecnoloxías resulta esencial para dar resposta ás demandas do mercado. Por este motivo, sinalou a importancia de que calquera profesional do sector poida acceder a estes recursos coa máxima flexibilidade.

Felisa Rodríguez subliñou que apoiar activamente esta plataforma supón avanzar no apoio efectivo a un sector estratéxico. Así, a iniciativa aprobada sen votos en contra busca dotar ao pequeno comercio de ferramentas para afrontar con éxito os retos da nova realidade e consolidar un modelo comercial moderno, competitivo e sostible.

Para rematar, puxo en valor o Plan Estratéxico de Comercio 2025-2030 do Goberno galego, o cal mobiliza máis de 320 M€ en 74 accións de apoio á dixitalización e modernización, ás prazas de abastos, aos centros comerciais abertos e, tamén, á remuda xeracional.