Rueda pide “esforzos renovados” aos populares coruñeses para contribuír a que Galicia sexa “motor do cambio” en España con Feijóo á fronte

O presidente do PPdeG, Alfonso Rueda, aspira a que Galicia sexa “peza fundamental e motor do cambio en España” para contribuír á vitoria de Alberto Núñez Feijóo nas Eleccións Xerais do 29 de novembro. Así o manifestou na Xunta Directiva Provincial do PP da Coruña, onde resaltou que xa hai data “para o cambio, para empezar a reconstruír todo o que destruíu Sánchez”. Neste sentido, pediulles aos populares coruñeses “esforzos renovados” e non dar ningunha batalla por vencida.

Así o destacou durante a reunión, que encabezou xunto ao presidente do partido na provincia, Diego Calvo, e na que tamén participou a secretaria xeral do PPdeG, Paula Prado. Rueda sinalou que as vitorias se constrúen “desde abaixo”. Así, animou aos populares a “xerar confianza, dar estabilidade e ser exemplo de que as cousas aquí funcionan”, pondo en valor o modelo de “estabilidade e moderación” do Goberno galego fronte aos oito anos de “caos e corrupción” do Goberno sanchista.

Para Rueda, as razóns de que Pedro Sánchez convocase agora eleccións  fundaméntanse en que “non lle saíu a xogada de tapar con dous decretos trapalleiros oito anos de inacción en vivenda”. Neste punto, lembrou que o presidente do Executivo central volveu incumprir un ano máis o seu propio anuncio de presentar os Orzamentos Xerais do Estado -segue cos de 2023- e que cada día se coñecen máis detalles das diferentes tramas corruptas do Goberno.

Ademais, afea a PSdeG e BNG que este modelo de “caos e corrupción” de Sánchez sexa “o que defenden” e o que se replica en cidades como A Coruña e Santiago de Compostela. “Mentres os do NON seguen negando calquera opción de progreso, nós queremos aproveitalas todas”, apuntou.

Para o presidente do PPdeG, Galicia fai o que debería ser normal pero que, por desgraza é cada vez máis excepcional. Así, subliñou medidas do Goberno galego do PP como o plan de vivenda, xa que se están construíndo máis de 4.000 vivendas en toda a comunidade autónoma, delas son máis de 1.000 de promoción pública na Coruña. Ademais, tamén se referiu á zona tensionada da Coruña e de Santiago de Compostela, sinalando que o Goberno do PPdeG xa avisara do que pasaría con estas medidas: “un auténtico fracaso”, dixo.

Tamén puxo en valor o modelo galego de Orzamentos, xa que se presentan en tempo e forma todos os anos; ou a captación de proxectos de gran envergadura como o xigante automobilístico SAIC, sinalando que vai supoñer “un antes e un despois” para a provincia da Coruña. “Aquí en Galicia buscamos o progreso. Non poñemos obstáculos innecesarios”, engadiu. Para Rueda, o modelo galego é o dun “modelo estable, unido, con folla de ruta e con prioridades claras: a xente”.

Na reunión da Xunta Directiva tamén puxo o foco nos próximos retos electorais, sinalando que o que pase nas Xerais influirá despois nas municipais. Por iso, animou aos populares a seguir medrando nos concellos, sen renunciar a nada.

DIEGO CALVO:  “O OBXECTIVO É GAÑAR CON CLARIDADE”

Pola súa banda, Diego Calvo fixo fincapé en que o vindeiro 29N os españois teñen a oportunidade de decidir o país que queren para os próximos catro anos. “Estamos ante unha cita transcendental, un momento decisivo para o futuro de España e non podemos fallar”, sinalou.

Neste sentido, mostrouse convencido de que a provincia da Coruña saberá responder e poderá poñer o seu gran de area para poñer punto e final a un Goberno marcado pola corrupción, responsable dunha confrontación política que dividiu os españois e incapaz de acadar acordos.

Por último, Calvo puxo sobre a mesa que estas eleccións son o primeiro paso para preparar as municipais de maio, e reclamou aos seus alcaldes e voceiros “máis traballo, unidade e confianza ca nunca”.

Alberto Pazos: “España merécese un Executivo que se pareza máis a un goberno democrático que ao clan dos Soprano”

“Estamos ante un Goberno central en absoluta descomposición”, apuntou, hoxe, o portavoz do Grupo Popular no Parlamento de Galicia, Alberto Pazos, quen indicou que a convocatoria de eleccións xerais anticipadas para o vindeiro 29 de novembro “non responde a un interese democrático, senón que é unha fuxida cara adiante de Pedro Sánchez coa única intención de tapar a corrupción sistémica do sanchismo.

“España merécese un Executivo que se pareza máis a un goberno democrático que ao clan dos Soprano”, recriminou o portavoz, quen, a este respecto, referiuse ás diferentes frontes abertas na Audiencia Nacional. E apuntou, tamén, ás últimas informacións xudiciais sobre os plans dunha trama criminal para apartar á xuíza que instrúe a causa do irmán de Pedro Sánchez: “Resulta extremadamente grave”. Sumado a isto, fixo referencia ao “espectáculo inaceptable da amnistía e a impunidade” de Puigdemont. E é que, tal e como recordou, é “o mesmo Puigdemont que Pedro Sánchez prometeu traer a España para poñelo en mans da xustiza”.

Por todo isto, Pazos incidiu en que o vindeiro 29 de novembro os españois terán que escoller entre o modelo dun Executivo acurralado pola Xustiza que rompe consensos, ameaza a xuíces, fai listas negras de xornalistas e depende de quen quere romper o país; ou a alternativa do modelo galego: “O camiño do rigor, das certezas, dos acordos de maioría e do respecto absoluto ás institucións”.

RESOLVER CON FEITOS EN MATERIA DE VIVENDA
Asemade, o portavoz popular destacou que a vivenda é unha “absoluta prioridade” para a Xunta, e puxo en valor o anuncio do presidente Rueda dunha nova liña estratéxica de 7 millóns de euros para axudar aos concellos a construír vivenda pública municipal, con ata 80.000 euros por fogar e protección pública permanente.

“Fronte ao populismo e a demagoxia da oposición, que vén ao Parlamento a facer soar chaveiros sen ter repartido nin unha soa chave dunha vivenda pública alá onde teñen responsabilidades, a realidade de Galicia mídese en compromisos cumpridos”, subliñou Pazos. Neste senso, lembrou que neste ano 2026 Galicia ten 4.670 vivendas públicas en marcha e mantén firme “o obxectivo histórico” de duplicar o parque público antes de que remate o ano 2028. “Porque Galicia –engadiu- non vive de slogans”.

Do mesmo xeito, censurou que a esquerda galega “aplauda os titulares que veñen de Madrid”, pero vote en Galicia en contra de medidas dirixidas á mocidade e á vivenda protexida, en referencia ao anuncio desta semana de Pedro Sánchez: “Intentan vendernos como unha solución pioneira e revolucionaria unha medida que o Goberno galego leva aplicando con éxito desde 2023”.

UN GRAN PACTO DE PAÍS FRONTE Á CONFRONTACIÓN
Pazos amosou a “enorme satisfacción” dos populares despois de que o Parlamento dese luz verde ao novo Plan xeral de normalización da lingua galega, que cualificou como un “fito histórico” e “un gran pacto de país”.

“O galego non é nin debe ser un elemento de confrontación, senón o maior patrimonio que nos une”, salientou o portavoz, quen criticou a estratexia do “non a todo” dun BNG “radicalizado e ancorado na confrontación” e que quedou “só e illado na súa propia intransixencia” por ser incapaz de sentarse a debater coas demais forzas políticas e de asinar un pacto proposto polo PPdeG: “Fronte aos da imposición que fractura, gañou a cordialidade que une. Onte gañou Galicia”.

FALECEMENTO DE XOSÉ MANUEL BEIRAS
Pazos aproveitou a súa intervención para amosar o “respecto e fondo pesar” polo falecemento de Xosé Manuel Beiras. En nome do Grupo Parlamentario Popular, trasladou as condolencias á súa familia, aos seus amigos e a todo o nacionalismo galego: “Con independencia das evidentes e fondas distancias políticas, as persoas están sempre por riba das ideoloxías e resulta obrigado trasladar o noso máximo respecto a quen durante tantos anos formou parte desta casa, sendo, ademais, un destacadísimo membro da vida política de Galicia”.

Os eurodeputados do PPdeG poñen en valor a aprobación no Parlamento Europeo de 2,7 millóns de euros para os traballadores do sector auxiliar do automóbil en Galicia

O eurodeputado do PPdeG, Adrián Vázquez, sinala como “moi positivo” que a Unión Europea responda a problemas reais dos territorios. Así o trasladou tras o pleno do Parlamento Europeo que se celebrou onte, no que se aprobou a mobilización de 2,7 millóns de euros, correspondentes ao Fondo Europeo de Adaptación á Globalización (FEAG), para os traballadores do sector auxiliar do automóbil en Galicia. O diñeiro apoiará a reincorporación ao mercado laboral dos traballadores despedidos na industria auxiliar do automóbil.

Adrián Vázquez explicou que esta axuda está dirixida aos 671 traballadores de 20 empresas do sector que perderon o seu emprego, concentrados sobre todo na área de Vigo. Ademais, prevese que 400 deles participen directamente no plan. O 95% do orzamento destínase a servizos personalizados para os traballadores.

“É moi positivo que a UE responda a problemas reais dos territorios con esta determinación, e é mellor aínda que o faga en coordinación co coñecemento directo que teñen as administracións rexionais de cada territorio”, afirmou o eurodeputado.

“Este plan de reconversión engloba formación, orientación e apoio económico para que os traballadores afectados atopen canto antes un emprego estable e de calidade. O plan no seu conxunto xa empezou o pasado setembro en Galicia, e a súa estrutura foi deseñada con sindicatos, empresarios e o propio Goberno galego, atendendo as necesidades concretas dos traballadores afectados”, remarcou o eurodeputado galego.

O tamén eurodeputado do PPdeG Francisco Millán Mon celebrou “a mobilización destes fondos para apoiar a 400 traballadores galegos. É unha mostra concreta de que Europa está preto dos galegos cando máis o necesitan”. Tamén destacou a importancia da industria do automóbil en Galicia, en particular en Vigo, e a necesidade de que os traballadores conten co apoio necesario ante a profunda transformación do sector, marcada pola electrificación e a incorporación de novas tecnoloxías.

“Desde o PP sempre defendemos que debemos acompañar aos traballadores nestas situacións e, ao mesmo tempo, crear as condicións necesarias para que a industria europea siga sendo competitiva e poida manter e xerar emprego”, subliñou.

FORMACIÓN PARA A INDUSTRIA DO FUTURO

O programa inclúe orientación profesional, procura activa de emprego e acompañamento tras a recolocación. Tamén ofrece formación en competencias dixitais, Industria 4.0 e 5.0, automatización industrial e sustentabilidade, aliñada co Plan Director de Automoción de Galicia 2025–2027. Ademais, prevé reciclaxe profesional cara a sectores con alta demanda de perfís industriais, como a aeronáutica, as enerxías renovables, a loxística e o mantemento industrial.

O plan contempla tamén incentivos económicos para quen participe no seu itinerario de reinserción, axudas para desprazamentos e para o coidado de persoas dependentes, e 200 euros mensuais durante seis meses para quen se reincorpore ao emprego ou emprendan. Estas medidas teñen especialmente en conta aos traballadores de maior idade: un de cada catro afectados supera os 54 anos.

No Parlamento Europeo, así mesmo, lamentouse que o uso do FEAG siga sendo limitado e desigual na Unión Europea, e que varios Estados membro nunca o solicitasen. Galicia, en cambio, recorreu a este instrumento en múltiples ocasións e para sectores tan dispares como o téxtil, o metal, a construción naval ou o aluminio.

“Galicia é un exemplo de xestión de fondos europeos para todas as rexións de Europa. Cando se traballa da man, e se coordina a visión sobre o terreo das administracións rexionais coa visión global das institucións europeas, os resultados son extraordinarios”, afirmou Vázquez.