Santiago de Compostela, 1 de setembro de 2016.- O secretario xeral dos populares galegos, Miguel Tellado, e a vicesecretaria de acción electoral, Luisa Piñeiro, ofreceron hoxe unha rolda de prensa para presentar as liñas xerais da campaña das vindeiras eleccións autonómicas.
Nela presentouse o lema de campaña, que será “En Galicia si”. Tellado explicou que con el quérese salientar que o voto á candidatura de Feijóo é o único capaz de evitar os bloqueos, vetos e liñas vermellas que predominan na política nacional: “En Galicia si queremos ter un goberno forte, porque sabemos que a estabilidade política é un factor fundamental para ter resultados positivos para o noso país”, resumiu Tellado.
Deste xeito, o número dous dos populares galegos exemplificou que en Galicia si levamos once trimestres consecutivos de crecemento porque en si temos un goberno unido cun Plan Estratéxico definido ou que na nosa comunidade si se están reformando a metade dos centros de ensino público este verán porque si houbo fondos adicionais por cumprir cos obxectivos de déficit.
Así mesmo, salientou que en Galicia tamén se puido baixar o IRPF e suprimir o imposto de sucesións ao 99% dos contribuíntes porque “en Galicia si hai un goberno solvente que foi capaz de ser o que menos incrementou a débeda nestes anos”, ademais de que aquí si temos as taxas universitarias máis baixas do Estado e transporte interurbano gratuíto para a mocidade “porque en Galicia si que crecemos con bases sólidas como os récords de exportacións ou de turistas”.
“Mentres en España segue o ‘no es no’, nós dicimos que ‘En Galicia si’”, concluíu o secretario xeral do PPdeG, poñendo en valor que a cidadanía galega coñece as vantaxes e os resultados de ter contado cun goberno estable durante estes anos.
“En Galicia si temos na man asegurarnos un goberno responsable e evitar caer nas mans de políticos irresponsables como ocorre no ámbito nacional”, destacou Tellado.
O secretario xeral do PPdeG expuxo tamén o logotipo que acompañará a este lema, un ‘Feijóo’ co mapa de Galicia substituíndo á primeira o do apelido do candidato. “Un Feijóo co acento en Galicia”, sinalou Tellado, remarcando que “contra o que algúns prognosticaban e mesmo desexaban” Feijóo puxo Galicia primeiro e “segue en Galicia para evitar que caia nunha crise política” despois de sacala da crise económica.
O número dous dos populares galegos puxo en valor a un Feijóo “que leva Galicia dentro” e que “demostra que en Galicia si foi posible mellorar e cree que en Galicia si é posible seguir avanzando”.
UNHA CAMPAÑA “POSITIVA” QUE SÓ PODE FACER O PPDEG
A vicesecretaria de acción electoral do PPdeG, Luisa Piñeiro, explicou que o PPdeG levará a cabo unha campaña con dúas características fundamentais “positiva e a pé de rúa”.
Piñeiro referiuse ao éxito acadado cunha mensaxe positiva nas últimas eleccións xerais e á boa acollida dos actos de rúa desenvolvidos nesa mesma campaña e tamén nos últimos meses polo propio candidato a través do ‘Faladoiro’.
“Revalidar o goberno de Galicia non vai ser doado pero é posible se conseguimos unha alta porcentaxe de participación entre as persoas que maioritariamente queren para Galicia un goberno estable e non un lío ingobernable”, destacou Piñeiro, para o que comprometeu unha campaña activa e intensa.
Así, formulou unha axenda que terá o seu primeiro fito o sábado 10 no tradicional mitin da praza de touros de Pontevedra e que dende entón se comporá dunha mestura de mítines con actos sectoriais, encontros con colectivos e xantares e paseos de contacto directo coa rúa.
En canto á mensaxe, a vicesecretaria salientou que “somos os únicos que podemos saír en positivo” ao ser a única forza que conta cun balance, xa que PSOE e BNG “aínda se avergoñan” do seu paso pola Xunta e as Mareas “defraudaron” coa súa xestión nas cidades.
Neste sentido, anunciou que contar con todos os conselleiros nas listas facilitará divulgar este balance e facer unha campaña “a varios niveis” complementando os actos do candidato cos dos conselleiros, dos distintos cabezas de lista, do secretario xeral e do voceiro parlamentario.
Respecto aos rivais, Piñeiro sinalou que, ao carecer de balance e dun programa realista, “só poden saír a criticar e a descualificar, como xa están facendo”.
Nesta liña, Tellado indicou que “nós non saímos a contra, entre outras cousas porque non saberíamos en contra de quen”, xa que enfronte só atopamos “un lío de partidos que non se entenden nin dentro deles, nin entre eles nin moito menos entenden Galicia”.
