Santiago, 4 de outubro de 2022.- O Pleno do Parlamento de Galicia aprobou hoxe, co voto en contra de BNG e PSdeG, a nova lei de medidas extraordinarias dirixidas a impulsar a provisión de postos de difícil cobertura na sanidade galega, “co obxectivo de dar solución ao gran problema de falta de facultativos que afecta a toda España”, manifestou a portavoz popular de Sanidade, Encarna Amigo.
“Fronte a un Goberno galego propositivo e que pon enriba da mesa solucións concretas, eficaces e realistas aos problemas máis graves que afectan ao sistema público de saúde en toda España, atopámonos cunha oposición sen propostas e que o único que lles preocupa é que unha boa medida non lles estrague unha boa campaña para as eleccións municipais”, lamentou.
“Atopámonos ante unha situación complexa de provisión de prazas na sanidade, na que compre tomar decisións valentes e precisas”, sinalou Encarna Amigo, quen salientou que “o acceso mediante concurso é un incentivo real, como o puidemos comprobar coa primeira quenda do proceso de adxudicación das prazas de difícil cobertura ofertadas este ano para atención primaria, na que 91 profesionais optaron por ir a cubrir prazas que hai anos que ninguén escollía”.
Encarna Amigo explicou que, “grazas ao mesmo mecanismo que estenderá esta lei, nas vindeiras semanas teremos cubertas cun facultativo fixo, en todas as áreas sanitarias, prazas para as que antes era moi difícil conseguir un médico”, ante o que engadiu que “cada convocatoria desenvolverase mediante un decreto aprobado polo Consello da Xunta, que se fundamentará nun informe previo onde se xustifique debidamente, con criterios obxectivos, as dificultades de cobertura dos postos de traballo que se van a ofrecer”.
SUPLIR CARENCIAS E ABANDONO GOBERNO CENTRAL
A portavoz popular incidiu que “o que está facendo o Goberno galego con esta nova lei é suplir as carencias e o abandono ao que ten sometido o Goberno de Pedro Sánchez ao todo o Sistema Nacional de Saúde”. “As solucións para paliar o déficit de especialistas en atención primaria e para incentivar as prazas de difícil cobertura na sanidade, que son responsabilidade do Goberno central, non terminan de chegar, polo que a Xunta está a poñer todos os recursos, dentro das súas competencias, e segue a avanzar con medidas propias”, manifestou.
Deste xeito, e dirixíndose aos deputados socialistas, Amigo cualificou de “abraiante a capacidade que teñen de estar constantemente poñéndolle deberes á Xunta, cando o único Goberno que non está facendo a parte que lle toca é o de Pedro Sánchez”. Así, apuntou que “o único que lles interesa é obstaculizar o proceso de aprobación desta lei, probablemente porque as solucións que pode achegar en termos de mellora da asistencia en moitos concellos non lles conveñen aos seus intereses electorais”.
Respecto do BNG, Encarna Amigo subliñou que “é o único partido nacionalista no Congreso, xunto con Bildu, que se puxeron do lado do PSOE votando en contra de que o Goberno central tome as medidas que lle esixiron varios gobernos autonómicos, incluídos o vasco e o catalán”. “Eles si defenderon solucións para a súa sanidade pública, pero xa sabemos que o BNG se ten que elixir entre Galicia e o PSOE, sempre elixe o PSOE”, indicou.
