26 de abril de 2023. O Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que sitúe a Ferrol entre as súas accións prioritarias e urxentes e materialice os compromisos pendentes coas veciñas e veciños deste municipio, en particular, desenvolvendo as medidas previstas no Pacto de Estado por Ferrol, dirixido á reactivación económica e social da cidade e das comarcas de referencia; dotando dos orzamentos necesarios para desenvolver con urxencia infraestruturas para modernizar as instalacións de Navantia Ferrol, nomeadamente, a construción dun dique seco que permita poñer en marcha o estaleiro 4.0; e estendendo a Ferrol os beneficios da alta velocidade, logrando a inclusión da liña Coruña-Ferrol no corredor atlántico de mercadorías, ademais da imprescindible modernización da liña Ferrol-Ribadeo.
O deputado do Grupo Popular e candidato á Alcaldía de Ferrol, José Manuel Rey, afirmou que “cremos nesta cidade, nas súas capacidades, en que temos unha situación xeográfica de carácter estratéxico, que temos un porto que é toda unha oportunidade para a fachada atlántica, que temos unhas instalacións industriais estratéxicas para o conxunto do Estado que exportaron material industrial a todo o mundo”.
REACTIVACIÓN ECONÓMICA
“Pero, o que Ferrol necesita é compromiso real, con orzamentos, non con palabras”, manifestou José Manuel Rey, ante o que lembrou que o Pacto de Estado por Ferrol recolle demandas como a recuperación do tecido empresarial; o reforzo das industrias estratéxicas, como o naval, a enerxía e as electrointensivas; a modernización do sector económico da comarca, especialmente nos sectores forestal, naval, primario e alimentario; a creación dun polo enerxético que aproveite as diferentes modalidades de produción de enerxía; o fomento da innovación e o coñecemento; a potenciación do CIS Ferrol e o campus industrial; o incremento da competitividade a través da aposta polas infraestruturas da comarca; ou a consolidación, ampliación e modernización dos servizos públicos docentes, sociais e sanitarios”, concretou.
Entre as medidas que se solicitan a través desta proposición non de lei, José Manuel Rey citou, en primeiro lugar, as dirixidas á reactivación económica, con actuacións como a declaración estratéxica de iniciativas como Triskelion en Mugardos; Ence, EDP Renovables e Sentury en As Pontes; Valogreene ou IFFE-Biotech en As Somozas; ou Nervión no Porto Exterior de Ferrol. Neste sentido, demandou tamén “pechar o solo empresarial necesario para asentar novas empresas, que son as que xeran emprego e diversifican; así como avanzar en iniciativas como a Zona Franca de Ferrol”.
MELLORA CONEXIÓNS FERROVIARIAS
O deputado popular saudou o comezo da construción das fragatas F-110, o aumento de traballo no estaleiro de Ferrol con encargos de eólica mariña ou reparacións de buques, pero avogou por levar adiante “unha transformación caro ao estaleiro 4.0, coa construción dun novo dique e o dique de reparacións”.
Para rematar, e no ámbito das infraestruturas de comunicación, Rey felicitouse pola chegada do AVE a Galicia, aínda que alertou que “Ferrol e Lugo non poden quedar á marxe dos beneficios da alta velocidade”. Así, salientou que a semana pasada, a iniciativa do Grupo Popular no Parlamento Europeo, se aprobara a inclusión de Ferrol e Lugo na Rede TransEuropea de Transporte.
Así mesmo, incorporáronse á iniciativa do Grupo Popular tres puntos da emenda do BNG, a través dos que se solicitan a realización dun estudo integral, en colaboración co Centro de Estudos e Experimentación de Obras Públicas (Cedex) da situación da ría, para determinar as causas do colapso produtivo e as medidas necesarias para a súa rexeneración; colaborar cos concellos na elección do mellor sistema de saneamento para as augas residuais, así como para a realización das obras necesarias para executalo; e declarar Zona de Especial Necesidade de Rehabilitación a casa natal de Carvalho Calero e as parcelas necesarias para desenvolver o proxecto de recuperación, co fin de destinala para os usos dotacionais que o barrio necesita.
