O PPdeG indicou que, fronte aos discursos catastrofistas dos grupos da oposición, hai unha Xunta que inviste na mellora dos servizos públicos do rural galego.

Durante unha visita aos terreos onde se vai construír o novo centro de saúde de Becerreá, a deputada do Grupo Parlamentario Popular, Encarna Amigo, acompañada do portavoz do PP da localidade, José Fernández Carrete, fixo referencia á recente adxudicación da redacción do proxecto; un paso decisivo, salientou, para facer realidade unha actuación que contará cun investimento superior aos 3,2M€. “É unha das actuacións sanitarias máis importantes dos últimos anos para Becerreá e para toda a súa comarca”, remarcou Encarna Amigo, quen explicou que este novo centro, xunto co PAC, “fará deste municipio un punto de referencia asistencial”.

Con máis de 2.000 metros cadrados, contará con consultas de medicina e enfermería e áreas específicas para pediatría e para a atención á muller. Entre as novidades, figuran consultas de traballo social, de hixienista ou, tamén, para a docencia. “Unha infraestrutura –dixo- que permitirá ofrecer unha asistencia máis moderna, máis cómoda para os usuarios e con mellores condicións de traballo para os profesionais sanitarios”.

Así mesmo e tal e como apuntou, levarase a cabo un reforzo do Punto de Atención Continuada. “O Goberno galego cumpre con Becerreá e con toda a comarca da montaña lucense”, sinalou. Para a deputada popular, a mellor resposta aos desafíos demográficos é garantir servizos públicos de calidade, con investimentos reais e proxectos transformadores.