O PPdeG denunciou “a instrumentalización partidista” do Panteón de Galegas e Galegos Ilustres por parte do BNG e esixe un regulamento urxente que regule os usos permitidos no recinto.

A través dunha proposición non de lei do Grupo Parlamentario Popular, os populares veñen de expresar o seu “firme rexeitamento” ante a utilización política realizada pola organización nacionalista xuvenil Galiza Nova, o pasado 23 de xullo, no interior deste espazo. Tal e como apuntan, lonxe de manterse o respecto e a solemnidade propios dun espazo de homenaxe a figuras fundamentais da nosa historia, realizáronse “proclamas, arengas e consignas” de marcado carácter ideolóxico, “máis propias dun mitin que dun acto institucional”.

Así mesmo, sinalaron que, durante o evento, tamén se ondearon bandeiras estreladas, “un símbolo identificado co independentismo galego” que non representa oficialmente a Galicia nin ao conxunto dos galegos”. Neste punto, lembran que este espazo é un dos principais símbolos institucionais da identidade colectiva e que “o seu espírito debe permanecer sempre á marxe do uso partidista e a confrontación partidaria”, tal e como recolle a Lei que regula o Panteón de Galegas e Galegos Ilustres.

Os populares lamentan que, unha vez máis, os nacionalistas “lle falten o respecto ás institucións” e traten de apropiarse de espazos que “son un símbolo compartido e patrimonio” de toda a sociedade galega, polo que, engaden, “debe primar o respecto ao carácter integrador e de consenso”.

APROBACIÓN DO REGULAMENTO DE USOS DO ESPAZO

Neste contexto, resulta imprescindible preservar a neutralidade institucional do Panteón, reservando a súa utilización de xeito exclusivo para actos de carácter institucional, cultural, académico ou conmemorativo; e desvinculándoo de actos de natureza partidista.

Así, a iniciativa, rexistrada hoxe, avoga porque o Padroado do Panteón –formado polo Parlamento de Galicia, a Xunta, o Concello de Santiago e o Arcebispado da arquidiocese de Santiago- culmine a aprobación do regulamento de usos que preserve a natureza e o significado do lugar, así como fixe as normas relativas ás honras, protocolos e cerimonias que nel se desenvolvan. O obxectivo, remarcaron os populares, é garantir que este espazo de encontro, recoñecemento e memoria compartida “continúe sendo patrimonio común de todos e non un instrumento ao servizo de fins partidistas”.