O líder do Partido Popular de Santiago, Borja Verea, puxo en valor as máis de 400 vivendas de promoción pública que impulsa a Xunta de Galicia na cidade e a gratuidade das escolas infantís, da que se benefician preto de 2.000 nenos e nenas composteláns, como dous exemplos concretos “do Santiago que quero: unha cidade na que formar unha familia, atopar unha vivenda e construír un futuro non sexa unha carreira de obstáculos”.
Verea sinalou que “o importante non é falar de millóns de euros, senón do que eses investimentos significan para a vida das persoas. Que unha parella nova poida acceder a unha vivenda, que unha familia non teña que pagar pola escola infantil dos seus fillos ou que un mozo atope un bo emprego sen ter que marchar da súa cidade. Ese é o Santiago polo que quero traballar”.
En materia de vivenda, o líder popular destacou a necesidade de seguir incrementando a oferta para facilitar o acceso a un fogar, especialmente entre os mozos e as familias. “Santiago non pode resignarse a que os seus fillos teñan que marchar porque non atopan onde vivir. Temos que ser capaces de ofrecerlles oportunidades para quedar, para independizarse e para desenvolver aquí o seu proxecto de vida”, afirmou.
Neste sentido, tamén puxo en valor a gratuidade das escolas infantís como unha medida que facilita a conciliación e alivia a economía familiar. “Quero unha cidade que acompañe ás familias, que lles poña as cousas fáciles e que entenda que apoiar a quen decide ter fillos é tamén apostar polo futuro de Santiago”, sinalou.
Unha cidade que transforme o talento en oportunidades
Verea destacou tamén o potencial da fábrica europea de intelixencia artificial e do novo CESGA para impulsar a actividade económica e o emprego cualificado na cidade.
“Temos unha universidade de referencia, investigadores extraordinarios e un enorme talento que non sempre somos capaces de reter. Temos que aproveitar todo ese potencial, atraer empresas e investimentos e ofrecer aos nosos mozos oportunidades profesionais sen ter que marchar”, explicou.
O líder popular insistiu en que Santiago debe aspirar a consolidarse como unha cidade de referencia en innovación e novas tecnoloxías, aproveitando a súa condición de capital universitaria e científica.
Verea tamén se referiu aos investimentos previstos en educación e sanidade, como a ampliación do CEIP Cardeal Quiroga Palacios, a reforma do CEE A Barcia, a mellora das urxencias do Hospital Clínico e a posta en funcionamento do Centro de Protonterapia de Galicia.
“Queremos que os nosos fillos estuden nas mellores condicións, que as familias conten con bos servizos públicos e que as persoas maiores reciban a atención que necesitan. Unha cidade que coide das persoas en todas as etapas da súa vida”, sinalou.
Finalmente, Verea destacou que o financiamento autonómico da capitalidade se incrementou un 30 % no que vai de lexislatura, fronte ao 14,3 % de crecemento do orzamento global da Xunta, e defendeu a necesidade de que Santiago conte cos recursos necesarios para exercer plenamente a súa condición de capital de Galicia.
“Santiago ten todo para ser unha cidade de referencia. Temos talento, temos potencial e temos oportunidades. O que necesitamos é ambición, capacidade de xestión e un proxecto que permita aproveitar todo iso para mellorar a vida dos composteláns”, concluíu.
