O Partido Popular de Ourense reuniu esta tarde en Aixiña a súa gran familia nun multitudinario magosto-mitin na cidade, nun ambiente de convivencia, entusiasmo e mobilización electoral a só nove días das eleccións xerais do 29 de novembro. Un encontro no que os populares exhibiron unidade e confianza na vitoria de Alberto Núñez Feijóo, reivindicando a necesidade de abrir unha nova etapa política en España, baseada na estabilidade, na responsabilidade e na capacidade de xestión.
O acto contou coa participación da secretaria xeral do PP de Galicia, Paula Prado; do presidente provincial do PP de Ourense, Luis Menor; da cabeza de lista ao Congreso, Ana Belén Vázquez; do número un ao Senado, Miguel Santalices; e da candidata á Alcaldía de Ourense, Ana Méndez Gil, que exerceu como anfitrioa.
Nun encontro marcado polo carácter festivo dunha das tradicións máis arraigadas na provincia, os populares coincidiron en lanzar unha mensaxe de máxima mobilización para os últimos días de campaña e en reivindicar a figura de Feijóo como a alternativa para recuperar a confianza dos españois nas institucións.
Paula Prado defendeu o “modelo de unidade” do PPdeG
A secretaria xeral do PPdeG, Paula Prado, puxo en valor o “modelo de unidade” e o “gran equipo” do partido como clave para reivindicar as inquedanzas e as demandas dos ourensáns e dos galegos.
Para a número dous dos populares galegos, actos de tan boa acollida como o magosto do PP da cidade de Ourense amosan que o PPdeG “é o partido da xente, o partido que máis se parece a Galicia”. Neste sentido, apelou á cidadanía para que exerza o “voto útil” apoiando ao Partido Popular de Alberto Núñez Feijóo o próximo 29 de novembro. “Queremos que o resto de españois teñan un modelo de estabilidade, de unión e de xestión, como o que temos en Galicia”, dixo, fronte aos partidos como o BNG e Bildu, socios de Sánchez, cuxo modelo “só ofrece violencia e crispación”, estando moi afastados “do que quere a sociedade, que é un modelo de equipo e de unidade coma o do PP”.
Por todo isto, Prado insta aos ourensáns a “non ter medo” e “non calar” nas urnas, defendendo o proxecto de Alberto Núñez Feijóo como o único “que vai unir a este país”. “O 29N hai que elixir, e non entre dereitas ou dereitos. Senón entre decencia ou delincuencia”, concluíu a número dous dos populares galegos.
Luis Menor: “Ourense está a piques de darlle a España o mellor presidente”
O presidente provincial do PP de Ourense, Luis Menor, reivindicou a forza e a unidade do partido nun encontro que definiu como unha demostración da ilusión coa que os populares afrontan a recta final da campaña electoral.
“O magosto é moito máis que castañas e lume. É amizade, reencontro e convivencia. Ourense deulle ao mundo bo viño, bo Entroido e, sobre todo, moi boa xente. E está a piques de dar o mellor presidente para España!”, proclamou Menor, que destacou o orgullo de que un ourensán, Alberto Núñez Feijóo, estea chamado a liderar unha nova etapa política no país.
O presidente provincial defendeu unha maneira de entender a política que teña “raíces, os pés na terra e proximidade coa xente”, asentada nas conviccións, na responsabilidade, na valentía e na palabra dada. “A política non é un privilexio. É un servizo. Así vivimos a política no Partido Popular”, afirmou.
Menor tamén se referiu ao cara a cara televisivo celebrado a noite anterior entre Feijóo e Pedro Sánchez, no que considerou que o líder popular foi o “indiscutible gañador”. Ao seu xuízo, Feijóo demostrou “capacidade de xestión, experiencia, ideas moi claras e absoluto compromiso”, transmitindo a confianza que necesita España para afrontar o futuro. “Feijóo presentouse ante os españois como o que é: un xestor, unha persoa que defende a xestión como a arte de gobernar”, sinalou Menor, quen contrapuxo esa actitude ao ton “victimista e nada crible” que atribuíu a Sánchez. O líder provincial dos populares asegurou que o debate serviu para reforzar a esperanza de moitos españois e deixar aínda máis clara a alternativa que representa o PP. “Non se trata de esquecer esta escura etapa, trátase de evitar que volva pasar”, advertiu.
Finalmente, Menor fixo un chamamento á mobilización total: “Que non quede un só voto fóra das urnas! España merece unha política á altura dos seus cidadáns e o 29 de novembro temos a oportunidade de levar ao mellor presidente á Moncloa”.
Ana Belén Vázquez: “A decencia gaña o debate e gañará nas urnas”
A cabeza de lista do Partido Popular ao Congreso dos Deputados por Ourense, Ana Belén Vázquez, centrou a súa intervención na transcendencia das eleccións xerais e na necesidade de que España recupere un Goberno asentado na honestidade, na responsabilidade e na eficacia. “Quedan só nove días para elixir o futuro do noso país. Onte á noite quedou claro: a decencia gaña o debate e gañará nas urnas”, afirmou a candidata, en referencia ao cara a cara entre Feijóo e Sánchez.
Vázquez advertiu de que o próximo 29 de novembro os españois deberán escoller entre “dous modelos: a mentira, a incompetencia e unha xestión que esnaquizou a clase media; ou a verdade, a honradez e o rigor de Alberto Núñez Feijóo”.
A candidata popular reivindicou a necesidade de recuperar a boa xestión como principio fundamental da acción de goberno, especialmente na defensa dos servizos públicos e das familias. “Os servizos públicos non se proclaman, xestiónanse. España necesita reconstrución, valores e servidores públicos, non impostores”, subliñou.
Vázquez concluíu cunha mensaxe de confianza na vitoria electoral: “España merece un presidente decente. O 29N, imos gañar o cambio”.
Santalices chama a concentrar o voto para garantir un Goberno forte
O número un da candidatura popular ao Senado por Ourense, Miguel Santalices, reivindicou a importancia de que o 29 de novembro se traduza nunha maioría sólida que permita a Alberto Núñez Feijóo gobernar con estabilidade, sen depender de intereses particulares nin de negociacións que condicionen o futuro do conxunto dos españois.
Santalices defendeu un modelo político baseado no respecto ás institucións, na igualdade entre territorios e na defensa dos servizos públicos, fronte á confrontación e á inestabilidade que, segundo sinalou, caracterizaron os últimos anos da política nacional. Así, o candidato popular apelou á experiencia de Feijóo á fronte da Xunta de Galicia como garantía dunha maneira de gobernar que coñece as necesidades reais dos cidadáns, cumpre os compromisos e sitúa a xestión por diante da propaganda.
Neste sentido, subliñou a importancia de que Ourense participe de maneira decisiva no cambio político, cunha mobilización que permita reforzar a representación da provincia tanto no Congreso como no Senado. Santalices incidiu en que cada voto será determinante para construír unha maioría capaz de ofrecer estabilidade, seguridade e oportunidades, e animou aos simpatizantes e afiliados a intensificar o traballo nos últimos días de campaña para que a ilusión que se percibe nos actos electorais se converta nunha ampla participación nas urnas.
Ana Méndez reivindica o traballo dos interventores e apoderados
A candidata á Alcaldía da cidade, Ana Méndez Gil, aproveitou o encontro para agradecer o traballo e a implicación de todas as persoas que están a colaborar durante a campaña electoral. En especial, tivo palabras de recoñecemento para os interventores e apoderados, os presidentes de distrito e os seus equipos, as persoas que están mobilizándose nas carpas e na rúa, as Novas Xeracións e o equipo interno do partido.
“Quero darvos as grazas de corazón a todos os que estades traballando arreo nestes días. Sei o esforzo e as horas que hai detrás de cada tarefa e de cada acción na rúa. O voso traballo é fundamental e demostra que somos un gran equipo, un partido unido, con xente comprometida e disposta a dar o mellor de si mesma”, destacou Méndez, que puxo en valor a ilusión e o compromiso colectivo para afrontar o reto electoral mediante unha campaña de proximidade, contacto directo coa cidadanía e presenza constante nos barrios e nas rúas de Ourense.