O portavoz do Grupo Popular, Alberto Pazos, salientou hoxe no Debate de Política Xeral que se celebra no Parlamento galego que hai un ano “Alfonso Rueda prometeu estabilidade e Galicia goza hoxe da estabilidade institucional prometida”, e apuntou que neste tempo “avanzamos no cumprimento do programa electoral que o Partido Popular presentou aos galegos, fomos quen de reclamar un trato xusto para Galicia alí onde se nos estaba negando e aprobamos iniciativas lexislativas de gran calado”. “Un estilo propio, alonxado dos vaivéns, dos caprichos, das liortas e da inestabilidade, que aposta polo rigor e polo sentidiño”, subliñou.
Alberto Pazos comezou a súa intervención salientando que “o Presidente Rueda decidiu solicitar a celebración deste Debate no primeiro instante en que resultaba legalmente posible, apenas transcorrido un ano de goberno, e esta prontitude acredita unha vontade de transparencia e diálogo fóra de toda discusión e digna de todo recoñecemento”.
ORZAMENTOS PRORROGADOS
“O mundo vive momentos convulsos, nun momento de enorme estabilidade internacional, en plena guerra comercial entre bloques e superpotencias e recuperadas as regras fiscais suspendidas primeiro pola pandemia e despois pola invasión de Ucraína”, lembrou o portavoz popular, quen lamentou que neste contexto “o Goberno de Pedro Sánchez acaba de prorrogar os orzamentos do Estado de 2023, que veñen da anterior lexislatura, pero despreza ao Congreso ao furtarlle a celebración dun Debate sobre o Estado da Nación”.
Respecto da industrialización de Galicia, Pazos criticou que “escoitamos á oposición defender a necesidade dunha fábrica de fibras sostibles de orixe vexetal, pero sen aproveitar a masa forestal que serve de materia prima e sen producir a celulosa soluble coa que se fabrican esas fibras sostibles”. Neste sentido, afirmou que “este Goberno vai continuar facendo o que prometeu, con independencia dos cambios de opinión da oposición, dos seus exercicios de hipocrisía e, incluso, da súa capacidade para inventar unha nova linguaxe”.
“Comparar a produción de pasta de papel coa produción de celulosa soluble é simplemente unha burda manipulación: nin son comparables os seus procesos de produción, nin son comparables os consumos de auga, nin son comparables as emisións”, asegurou.
E, dirixíndose aos grupos da oposición, sinalou que “o seu plan industrial é converter a Galicia na terra de Nunca Xamais, e así pódese escribir un conto, pero non o futuro de Galicia”. “Non queremos elixir, queremos industria e queremos agro, queremos minería e queremos gandería, queremos enerxía e queremos pesca, queremos todo porque Galicia o merece todo, menos esa oposición triste, gris e pontoniana que non merece ninguén”, dixo.
REPARTO EQUILIBRADO E CONSENSUADO
Sobre o financiamento autonómico, Alberto Pazos lembrou que “neste Parlamento acordamos que era imprescindible un novo sistema que atendese ao custe real de prestación dos servizos públicos, un sistema que establecese un reparto atendendo á poboación axustada e no que pesase máis o envellecemento e a dispersión, que tanto encarecen os servizos en Galicia”.
“Porén, Pedro Sánchez négase a avanzar nun reparto equilibrado e consensuado dos recursos públicos que corresponden ás comunidades autónomas, pero a cambio accede graciosamente a perdoar unha parte da débeda autonómica a petición dun partido independentista, que non goberna ningunha autonomía pero que si parece gobernar ao Goberno de España”, manifestou o portavoz popular. Ademais, cualificou a proposta feita polo Goberno de Pedro Sánchez de “burda, que a esquerda galega tivo que dar o mellor de si para tentar xustificar este novo e inxustificable abuso, que basicamente consiste en que aqueles que temos menos débeda fagamos un esforzo extra para pagar os pufos daqueles que máis se endebedaron”.
O portavoz popular afirmou que para a oposición “os servizos públicos non son máis que unha oportunidade para a demagoxia”, a pesar de que “Galicia experimentou nos últimos anos un incremento sen precedentes”. En concreto, destacou que “o noso sistema educativo é hoxe envexado, tanto pola súa equidade como pola súa calidade”. “Somos a primeira comunidade autónoma que garantiu que calquera neno ou nena galego poida completar a súa vida educativa, desde a escola infantil ata rematar a súa formación universitaria ou profesional, de maneira gratuíta, ao tempo que a redución do fracaso escolar acadou os mellores datos da súa historia”.
A GALICIA QUE DEMANDAN OS GALEGOS
No ámbito das políticas sociais, subliñou que “multiplicamos por cinco o número de dependentes atendidos, triplicamos as prazas de residencia, multiplicamos por seis as prazas de centros de día e por oito os usuarios do servizo de axuda no fogar, adiantando máis dun ano o acordo de mellora do financiamento deste servizo”. Así mesmo, engadiu que “no último ano reducimos sete puntos a taxa Arope, situándonos como a cuarta comunidade autónoma con menor risco de exclusión social e que Galicia teña hoxe a taxa de pobreza máis baixa da súa historia”.
Alberto Pazos destacou que “hoxe dedicamos a sanidade 1.740 millóns de euros máis que os que se dedicaban durante o goberno do Bipartito, traballan 7.000 profesionais máis que daquela e dedicamos un 39 por cento do orzamento, fronte ao 34 por cento que dedicaban nacionalistas e socialistas cando gobernaban”. “Os programas de cribados de cancro, os cribados neonatais, o calendario vacinal ou a extensión de mamógrafos a todas as áreas sanitarias supuxeron avances sen precedentes na prevención”, indicou o portavoz popular, quen criticou á oposición porque “seguen contabilizando camas cando hoxe a cirurxía ambulatoria é unha realidade completamente estendida ou cando operacións que antes implicaban estancias hospitalarias de semanas agora obteñen altas en 48 horas”.
Por último, Pazos avogou por “seguir traballando ata acadar as 4.000 vivendas publicas prometidas; avanzar nunha igualdade real, completa e definitiva entre homes e mulleres; na desaparición da fenda entre o rural e o urbano; ou no desenvolvemento do noso autogoberno”. “En definitiva, comprometéndonos coa Galicia que demandan os galegos, os mesmos que co seu voto decidiron manter alonxada esta terra dos extremismos”, rematou.
