O PPdeG critica a incongruencia do BNG ao pedir unha comisión de investigación sobre a prórroga da concesión da AP-9

O portavoz do Grupo Popular, Alberto Pazos, criticou hoxe no Pleno do Parlamento galego a “incongruencia” do BNG ao pedir unha comisión de investigación sobre a ampliación da concesión da AP-9: “unha infraestrutura de titularidade estatal, cunha concesión outorgada polo Goberno central e que está sendo obxecto dun expediente de infracción reservado pola Comisión Europea”.

“O auténtico fin que perseguen con esta iniciativa é manipular, porque solicitan a constitución dunha comisión de investigación cuxas conclusións xa teñen perfectamente redactadas, incluíndo aos supostos responsables duns inventados delitos e irregularidades que ninguén está a investigar ou perseguir”, apuntou.

Alberto Pazos incidiu que “a proposta que hoxe nos traen os nacionalistas galegos é un cúmulo de incongruencias evidentes, omisións interesadas e de groseiras falsidades, que teñen como único obxectivo establecer un relato que permita salvar a cara á señora Pontón ante o seu enésimo ridículo electoral”.

PRÓRROGAS DE GOBERNOS DE PSOE E DE PP

“Non existe responsabilidade xudicial ou política no ámbito galego, non obra documentación nas institucións galegas, os posibles comparecentes non terían obriga legal de atender os requirimentos deste Parlamento e, como colofón, non podemos acceder ao expediente reservado da Comisión Europea”, sinalou respecto da proposta de comisión de investigación.

Na súa intervención, o portavoz popular explicou que “o BNG omite que o que está a investigar a Comisión Europea é se as dúas prórrogas da concesión da AP-9, tanto a concedida polo Goberno socialista de Felipe González por 10 anos ou a do Goberno de PP de José María Aznar por 25 anos, que contaron co visto bo dos servizos técnicos do Estado que fiscalizaron o procedemento, se adecúan ou non á normativa europea de competencia”. En concreto, ambas prórrogas, aprobadas por Real Decreto, foron informadas favorablemente polo Consello de Estado e a Avogacía do Estado.

Respecto das peaxes da AP-9, Alberto Pazos sinalou que “o incremento que sufrimos nos últimos anos ten unha orixe moi clara: a inflación e un convenio para a ampliación da ponte de Rande que incrementou as peaxes en todo o trazado da autoestrada, a razón do 1 por cento de suba anual durante 20 anos”. “O Goberno socialista de Zapatero, a través do ministro galego José Blanco, asinou o convenio de ampliación 48 horas antes dunhas eleccións xerais, ocultando ata despois da cita electoral o custo que supoñía para todos os galegos e, despois de perder as eleccións, esixiron revertelo para que a obra se fixera con cargo aos orzamentos do Estado”, lembrou.

“Nós non imos participar nesta cerimonia da confusión que pretende o BNG e imos seguir centrados nas dúas cuestións que centran os intereses dos galegos en relación á AP-9: a súa cesión á Galicia e a gratuidade das súas peaxes, que BNG e PSdeG prometeron antes das eleccións”, rematou o portavoz popular.

O PPdeG sitúa ó sector primario, os fondos europeos e a conexión con Portugal como tres das prioridades da nova lexislatura no Parlamento Europeo

O Partido Popular de Galicia sitúa a defensa do sector primario, a xestión dos fondos europeos e o fortalecemento dos vínculos con Portugal como tres das principais prioridades da Comunidade na nova lexislatura do Parlamento Europeo.

Así o puxeron de manifesto esta semana os eurodeputados galegos Francisco Millán Mon e Adrián Vázquez nas xornadas de estudo organizadas polo Partido Popular Europeo en Cascais, nas que participaron tamén o presidente nacional do partido, Alberto Núñez Feijóo, e os 189 parlamentarios que integran o Grupo Popular na Eurocámara.

A familia popular europea –grupo maioritario no Parlamento Europeo– volveu reiterar así nestes días a súa disposición a facer seus os intereses de Galicia. De feito, os seus integrantes non dubidan en erixirse como 189 defensores de Galicia en Europa.

Facendo balance, o eurodeputado Francisco Millán Mon insiste na necesidade de acercar as institucións europeas á cidadanía e que as reformas e cambios que se impulsen desde Bruxelas “sexan graduais e teñan en conta as preocupacións e intereses dos cidadáns e dos sectores afectados”.

Unha cuestión na que tamén incide Adrián Vázquez referíndose de xeito específico ao sector primario: “Europa ten rectificar errores cometidos na pasada lexislatura e escoitar e defender aos gandeiros, agricultores e pescadores. Galicia non pode permitirse deixar de ser unha potencia mundial no sector primario”.

Os populares propoñen neste eido a creación dun comisario europeo específico para a Pesca, tal e como manifestaron durante a pasada campaña electoral e como referendaron tanto o presidente do Partido Popular Europeo, Manfred Weber, como a presidenta da Comisión Europea, Ursula von der Leyen.

FONDOS EUROPEOS E UNIÓN TRANSFRONTEIRIZA

Millán Mon subliña a importancia tamén de fomentar a industria en Europa, na medida en que crea emprego estable e de calidade e “corre o risco de quedar rezagada ante o crecemento do sector industrial en Estados Unidos e China”.

No que se refire aos fondos europeos, Adrián Vázquez explica pola súa banda que é necesario que “vaian alí onde se executan mellor”. E, neste sentido, enxalza os altos niveis de execución do Goberno galego nos fondos que dependen da Administración autonómica “a pesar do bloqueo constante por parte do Goberno de Sánchez”.

“Sánchez bloquea uns fondos importantes e necesarios para Galicia por mero interese político: prefire ofrecer financiamentos particulares a comunidades como Cataluña, que non cumpre e que está en bancarrota, en vez de a Galicia, que non só cumpre, senón que emprega os fondos para mellorar a vida dos galegos e non para organizar referendos ilegais”, explica.

Destacou tamén que, no tempo que leva como presidente autonómico, Alfonso Rueda “fixo máis pola unión de Galicia e Portugal que o que fixo Pedro Sánchez nos últimos seis anos”. Tal e como se puido comprobar esta semana co manifesto conxunto firmado entre o Goberno galego e o luso a favor da conexión por Alta Velocidade entre Vigo e a fronteira portuguesa.

O Grupo Popular pide ao Goberno central unha actuación urxente na construción das autovías comprometidas con Galicia e no arranxo e mantemento das estradas da súa competencia

O viceportavoz do Grupo Popular, Julio García Comesaña, amosou hoxe a preocupación pola situación das estradas de titularidade estatal en Galicia, polo que pediu unha actuación urxente do Goberno central tanto na construción das novas autovías comprometidas como no arranxo e mantemento das estradas da súa competencia.

Julio García lembrou que o Grupo Popular defenderá no Pleno da vindeira semana unha proposición non de lei a través da que se solicita ao Goberno de España un compromiso real e efectivo para a construción de infraestruturas viarias vitais. “Estamos a falar de novas autovías fundamentais para a conexión por estrada de Galicia coa Meseta, así como a propia vertebración interior da nosa comunidade, como son as autovías A-56, entre Lugo e Ourense; A-52, no acceso a Vigo; A-74, que conecta A Mariña Lucense; e A-76, de Ourense a Ponferrada”, concretou..

NO FURGÓN DE COLA DAS PRIORIDADES DO GOBERNO CENTRAL

“Lamentablemente, todas elas deben figurar no furgón de cola entre as prioridades do Goberno de Pedro Sánchez, porque ano tras ano os galegos asistimos con resignación a súa ausencia nos plans de actuacións viarias estatais”, indicou, para incidir que “este agravio comparativo respecto ao trato que reciben outras comunidades autónomas non nos vai facer decaer no desánimo e desde o Partido Popular de Galicia imos seguir insistindo na solicitude ao Goberno de España para que se poña mans á obra e leve adiante estes proxectos vitais para a nosa comunidade”.

O viceportavoz popular tamén demandou ao Goberno central atención ás infraestruturas da súa competencia xa existentes en Galicia, levando a cabo as actuacións necesarias de mantemento para garantir un tránsito seguro e cómodo polas mesmas.

Así, referiuse á A-8, que conecta Galicia con Asturias, na que “seguimos á espera de que o Ministerio de Transportes adopte unha solución definitiva ao problema de tráfico nesta vía cada vez que a néboa aparece polos cumios de Mondoñedo ou Abadín”.

“Pero é que, o que resulta moi preocupante, é que a vía alternativa a A-8 cando a néboa obriga a prohibir o tráfico por esta autovía, é dicir, a estrada N-634, presenta un estado máis que deficiente, o que fai preciso unha actuación urxente para a renovación da capa de rodadura, a mellora da sinalización, o balizamento e o peche de tramos para evitar a entrada de animais á calzada”, dixo o viceportavoz popular, a pesar de que existe un proxecto de intervención redactado polo Goberno de Mariano Rajoy en 2017, “pero que o Goberno de Pedro Sánchez ten gardado nun caixón desde hai sete anos, facendo caso omiso das reclamacións realizadas desde distintas institucións, entre elas este Parlamento de Galicia”.

AGOCHAR O ABANDONO DE ANOS DA A-6 E A-52

Respecto das autovías A-6 e A-52, García Comesaña sinalou que “de pouco serve que o Ministerio de Transportes teña recoñecido o mal estado do firme destas dúas autovías, froito do abandono que sufriron durante moitos anos sen actuación algunha nas mesmas”. Neste sentido, apuntou que agora o Ministerio de Transportes “intente agochar este abandono coa realización de actuacións de emerxencia no firme destas dúas autovías, cando o que realmente precisan estas autovías é un reacondicionamento integral do firme, para o que fai falta vontade e orzamento que, lamentablemente, o Goberno de Pedro Sánchez non ten con Galicia”.

Para rematar, Julio García Comesaña referiuse á AP-9 e avanzou que o Goberno de Pedro Sánchez “vai xustificar a súa negativa tanto a transferencia a Galicia desta autopista como a eliminación das peaxes en motivos económicos, máis desde que comprobamos que, cada vez que o señor Puente fala, sube o prezo da transferencia e da concesión: pasou dunha cifra de entre 1.260 millóns e 2.600 millóns de euros para a transferencia; á última cifra de 6.000 millóns para esa mesma concesión”. “Son cifras que van incrementando segundo aumentan as incongruencias e as contradicións dos dirixentes socialistas respecto da AP-9”, engadiu.

“Desde o Grupo Popular nunca nos cansaremos de pedir rigor ao Goberno de Pedro Sánchez á hora de afrontar tanto a transferencia como a gratuidade da AP-9, máxime cando os propios socialistas prometeron durante a campaña electoral o levantamento das peaxes nesta autopista”, manifestou

O Parlamento galego solicita que a Xunta continúe estendendo o programa Xantar na casa a máis concellos e máis usuarios

O Parlamento de Galicia aprobou hoxe a proposición non de lei do Grupo Popular, que non contou co apoio do PSdeG, a través da que se insta á Xunta a que continúe estendendo o programa Xantar na casa para que un maior número de galegos poidan beneficiarse
do mesmo.

A portavoz popular de Política Social, Raquel Arias, sinalou que “os bos resultados obtidos e a excelente valoración por parte dos usuarios, e tamén das súas familias, lévanos a incidir na conveniencia de que o programa Xantar na casa se amplíe a un maior número de concellos e de posibles beneficiarios”.

O programa Xantar na casa é un servizo de proximidade que desenvolve a Xunta en colaboración cos concellos e que consiste na subministración de comidas no propio domicilio das persoas usuarias. Esta iniciativa ten como obxectivo principal garantir unha dieta saudable, adaptada e equilibrada ás necesidades específicas de cada usuario, principalmente persoas maiores e que viven soas.

Na actualidade, o Goberno galego reparte a través deste programa máis de 17.000 menús semanais a máis de 2.000 persoas espalladas por máis de 200 concellos. A Xunta financia o 50 por cento da comida, mentres que a outra metade corre a cargo do concello e dos usuarios a partes iguais.

A comida repártese nos domicilios nunha única entrega para todos os días da semana, polo que o usuario so ten que quentala antes de consumila. Ademais, facilítanselles os electrodomésticos necesarios en caso de que non os teñan, como neveira ou microondas.

O Parlamento galego pide desenvolver un novo Plan de saúde mental de Galicia para fortalecer a saúde pública e dotar de máis recursos neste ámbito

O Parlamento de Galicia aprobou hoxe a proposición non de lei do Grupo Popular, que non contou co apoio de BNG nin de PSdeG, a través da que se insta á Xunta desenvolver un novo Plan de saúde mental de Galicia, como oportunidade para avanzar no fortalecemento da saúde pública, actualizar os programas e intervencións, e dotar de máis recursos nete ámbito sanitario. Así mesmo, pídese continuar desenvolvendo proxectos psicoeducativos entre a mocidade galega, impulsando recursos e programas que dean resposta ás características específicas médicas e psicosociais daqueles que a idades temperás presentan un trastorno mental ou risco de padecelo.

A portavoz popular de Sanidade, Encarna Amigo, lembrou que o Plan de saúde mental de Galicia 2020-2024 conta cunha dotación orzamentaria de 83 millóns de euros, o que supuxo un incremento anual do gasto en saúde mental de 17 millóns de euros. “Agora xa está anunciado un novo Plan de saúde mental 2025-2030, porque a saúde mental e, máis concretamente, a saúde infanto-xuvenil é de primordial importancia para o Goberno de Alfonso Rueda, como o demostra o feito da recente creación dunha Subdirección específica de saúde mental”, afirmou.

CUMPRINDO OBXECTIVOS

Na súa intervención, Encarna Amigo fixo un repaso do grao de cumprimento dos obxectivos do Plan de saúde mental e, sobre a contratación de persoal, creáronse o 100 por cento das prazas recollidas través das leis de orzamentos e actualmente xa están cubertas máis do 60 por cento das prazas, con persoal contratado a tal efecto ou que obtivo estas prazas polos distintos mecanismos de oferta.

“Ademais, co obxectivo de darlle a máxima estabilidade a esas prazas, na oferta pública de emprego deste ano para prazas de difícil cobertura convocáronse, para adxudicación en propiedade, 175 destas prazas para profesionais da saúde mental: concretamente 44 de psiquiatría, 37 de psicoloxía e 94 de enfermaría especialista”, engadiu.

En canto ao compromiso da posta en marcha dos hospitais de día de saúde mental infanto-xuvenil, neste momento xa están en funcionamento unidades nas sete cidades galegas, así como unidades de hospitalización psiquiátrica infanto-xuvenil no Hospital de Santiago e no Álvaro Cunqueiro de Vigo. Ademais, creáronse sete unidades de prevención intensiva do suicidio, unha por cada área sanitaria, que xa atenderon a máis de 1.500 persoas.

Para rematar, Encarna Amigo destacou o aumento do ratio de profesionais da psicoloxía clínica, desde 3,4 profesionais por cada 100.000 habitantes no 2020 a 5,2 por 100.000 habitantes na actualidade. Así mesmo, aumentouse o ratio de psiquiatras desde os 7,4 por 100.000 en 2019 a 8,6 na actualidade.

O PPdeG reivindícase como “o partido da mocidade” con medidas como a gratuidade da matrícula universitaria e a ABAU común

O Partido Popular de Galicia reivindicouse hoxe como “o partido da mocidade galega” como a gratuidade da matrícula ao longo de toda a carreira universitaria ou o acordo para “acabar coas desigualdades entre comunidades” cunha ABAU común e máis xusta.

En declaracións aos medios esta mañá en Santiago de Compostela –acompañada pola presidenta de Novas Xeracións de Galicia, Nicole Grueira e o coordinador de Educación do PPdeG, Ovidio Rodeiro­–, a secretaria xeral do PPdeG insistiu na aposta do seu partido por “premiar e estimular o esforzo do alumnado” e de aí medidas pioneiras impulsadas desde Galicia.

Medidas como a proposta dunha ABAU común a partir de 2025 formalizada esta semana nun acordo asinado polas 12 comunidades autónomas gobernadas polo Partido Popular, que representan ao 70% do alumnado español, e coa que se pretende poñer fin aos “17 camiños distintos” que existían ata o de agora nesta proba e que prexudicaban aos mozos e mozas galegas.

“Galicia lidera o debate a nivel nacional e logramos sacar adiante a nosa postura, dando solucións onde o Goberno central e os seus socios só ofrecen división, mantendo a nosa autonomía e competencias, pero cunha mellor coordinación”, explicou Paula Prado subliñando que este pacto “se axusta á lei e blinda as singularidades da nosa Comunidade, especialmente en todo o que respecta á nosa lingua propia”.

No que se refire á gratuidade da matrícula universitaria á que deu luz verde o Consello da Xunta este luns, a número dous dos populares galegos recordou que o presidente Alfonso Rueda comprometera en campaña electoral que esta medida sería unha realidade nos primeiros 100 días de goberno e “aquí temos o resultado”.

“Galicia foi pioneira coa conxelación das taxas universitarias, tamén ratificada para o vindeiro curso por décimo cuarto ano consecutivo, e agora damos un paso máis coa gratuidade da matrícula”, engadiu ao respecto.

Prado quixo aproveitar tamén a ocasión para animar á mocidade galega a “seguir apostando polo partido que mellor defende os seus dereitos” cun apoio maioritario como o acadado o pasado 18 de febreiro, no que máis do 40% dos mozos e mozas galegas escolleron a papeleta do PPdeG.

O Parlamento galego solicita á Xunta a actualización do Plan especial de protección civil fronte a riscos sísmicos

O Parlamento de Galicia aprobou por unanimidade a proposición non de lei do Grupo Popular a través da que se insta á Xunta a actualizar o Plan especial de protección civil fronte a riscos sísmicos na Comunidade galega (SISMIGAL). “Esta actualización, que inclúe unha análise exhaustiva do risco e a consulta con organismos chave, asegurará que o novo plan sexa máis eficaz, coordinado e adaptado ás realidades actuais, cumprindo cos máis altos estándares de seguridade e protección civil”, indicou o deputado popular Ángel Rodríguez Conde.

A Xunta, a través desta actualización do Plan especial de protección fronte ao risco sísmico en Galicia, pretende dar unha resposta rápida e eficaz que minimice os posibles danos ás persoas, bens e medio ambiente, co obxectivo de restablecer os servizos básicos para a poboación no menor tempo posible ante estes movementos sísmicos.

COÑECER O PERIGO EXISTENTE

En concreto, Ángel Rodríguez dixo que “ten como finalidade coñecer o perigo existente en Galicia fronte ao risco sísmico e tratar de calibrar a vulnerabilidade das construcións cuxa destrución poda ocasionar vítimas, danar servicios básicos ou efectos catastróficos asociados”. Así, no seu deseño realizouse un estudo pormenorizado de cada parroquia galega e unha base de datos que recolle todos os edificios de Galicia, con especial atención a infraestruturas como hospitais e centros educativos; poboacións, estradas, tendidos eléctricos e demais elementos sensibles.

O SISMIGAL prevé a realización dunha revisión ordinaria completa do plan segundo o estableza a normativa vixente, así como revisións extraordinarias cando se estime necesario para adaptar o plan á realidade científica, técnica, social ou administrativa do momento na comunidade autónoma ou no conxunto do Estado.

“Consideramos necesaria a revisión e actualización do Plan Especial vixente, na busca dunha mellora na estrutura organizativa e funcional para a intervención en emerxencias causadas por terremotos, na coordinación co Plan Estatal para a protección civil ante o risco sísmico e a actualización das áreas de maior risco que implicará a definición das necesidades de intervención e localización de recursos e infraestruturas utilizables nas actuacións de emerxencia”, indicou Ángel Rodríguez.

Neste documento concretarase, entre outras cuestións, o perigo de terremotos, a estimación da vulnerabilidade e o risco sísmico en termo de danos, ademais de expoñer as fases e situacións de emerxencia que se poden producir, detallando a estrutura e organización de resposta, os procedementos de información á poboación, seguimento e notificación, a operatividade dos distintos grupos e os procedementos de coordinación co plan estatal.

O Grupo Popular pide ao Goberno central que mova ficha e aprobe a declaración de zona catastrófica para as rías galegas

A deputada do Grupo Popular Paula Mouzo esixiu hoxe no Parlamento de Galicia que o Goberno central “mova ficha e aprobe a declaración de zona catastrófica par as rías galegas, tal e como xa llo solicitou o Senado por maioría”.

No debate dunha proposición non de lei sobre a perda de produción marisqueira na ría de Arousa, Paula Mouzo explicou que a Xunta xa ten en marcha un estudo sobre as causas desta situación, cun seguimento continuo das zonas de marisqueo a través dos técnicos da Consellería do Mar e das asistencias técnicos das propias confrarías.

En concreto, indicou que a Xunta, a través do Centro de Investigacións Mariñas, “está realizando o seguimento e monitorización dos bancos de libre marisqueo da ría de Arousa, propoñendo actuacións para a súa recuperación ademais de diversas accións de investigación relacionadas co marisqueo e a súa problemática”.

RECUPERACIÓN DA PRODUCIÓN

Respecto das medidas impulsadas para a recuperación da produción marisqueira, a deputada popular subliñou que a Xunta xa ten en execución varias iniciativas neste eido apoiadas con axudas, como os 1,7 millóns de euros para proxectos colectivos de conservación e restauración da biodiversidade e dos sistemas ecomariños; os 4,5 millóns en apoio ás confrarías para a vixilancia dos bancos marisqueiros e a contratación de biólogos; ou os 300.000 euros para proxectos de mellora da produtividade dos bancos marisqueiros afectados por perdas de produción.

Por último, Paula Mouzo incidiu que “a Xunta carece de competencias para dragar a ría de Arousa, unha actuación que corresponde en exclusiva á Administración Xeral do Estado”, e puxo como exemplo a actuación que a Dirección Xeral de Costas está a realizar na ría do Burgo en A Coruña.

O Parlamento de Galicia pide ao Goberno de España que defenda ante a Comisión Europea unha normativa de protección dos cetáceos compatible coa práctica pesqueira

O Parlamento de Galicia aprobou hoxe por unanimidade a proposición non de lei do Grupo Popular a través da que se demanda ao Goberno de España que defenda ante a Comisión Europea a posta en marcha dunha normativa de protección dos cetáceos que sexa compatible coa práctica pesqueira, equilibrando riscos e afectacións, e integrando aquelas medidas de disuasión de interacción que eviten a paralización da frota pesqueira.

O portavoz de Pesca do Grupo Popular, Miguel Fidalgo, lembrou que o Goberno de España publicou unha orde en 2020 na que se establecían unha serie de mecanismos para facer máis sinxelo o control das capturas, normativa que a solicitude da Comisión Europea tivo que modificar para reducir as capturas accidentais de cetáceos. Segundo esta nova orde, os buques pesqueiros cunha eslora total superior a 8 metros, que utilicen artes de arrastre de fondo á parella, cerco, artes menores de enmalle ou enredo, volanta e rasco non poderán faenar entre o 22 de xaneiro e o 20 de febreiro de 2024.

41 BARCOS ESPAÑOIS AFECTADOS

“Son 41 barcos españois, dos que 18 son galegos, os directamente afectados por esta normativa, que tiveron que cambiar de caladoiro ou amarrar pola veda para protexer aos golfiños”, sinalou o portavoz popular.

Neste sentido, lembrou que o ministro de Pesca “anunciou compensacións adecuadas e xustas a quen se vira prexudicado, ben con axudas a cargo do Fondo Europeo Marítimo da Pesca e a Acuicultura ou ben con outro tipo de mecanismos”. “Lamentablemente, de momento deste diñeiro non se sabe nada, pero o que é verdade é que os armadores están sen actividade e os tripulantes, no paro”, dixo.

O Grupo Popular pedirá no Pleno un compromiso real e efectivo do Goberno central para a realización de infraestruturas viarias vitais para Galicia

O Grupo Popular solicitará no Pleno da vindeira semana un compromiso real e efectivo do Goberno central para a realización de infraestruturas vitais para Galicia, ante a falta de avances en actuacións comprometidas e o agravio comparativo respecto a outras comunidades. Así mesmo, solicitará que o Goberno do Estado complete a dotación de 15 millóns de euros solicitada por Galicia, no marco do PERTE Nova Economía da Lingua, para a execución do Proxecto Nós de impulso do galego nos ámbitos tecnolóxicos.

Ao remate da Xunta de Portavoces, a viceportavoz Paula Prado informou que a Mesa do Parlamento aceptou a solicitude do Grupo Popular para a creación dunha Comisión de Estudo para abordar a proposta da Comunidade Autónoma de Galicia diante da reforma do sistema de financiamento autonómico, co obxectivo de elaborar o seu ditame logo das comparecencias de expertos que tiveron lugar na pasada lexislatura e a extensa documentación que se solicitou e que agora servirá de base para a elaboración das conclusións.

BNG PARAGÓXICO

Neste sentido, Paula Prado considerou “paragóxico que desde o BNG se nos pida ambición nesta Comisión de estudo e ao mesmo tempo insistan nas súas teimas defendendo un cupo para Galicia e unha negociación bilateral co Goberno central”. “Non hai máis cego que o que non quere ver, porque só hai que lembrar que a práctica totalidade dos expertos que compareceron na pasada lexislatura nesta Comisión, coa única excepción da persoa que propuxeron os nacionalistas galegos, incidiron no prexudicial que sería para Galicia a extensión do cupo foral ou a cesión de máis porcentaxe de imposto sobre a renda a todas as comunidades autónomas”, lembrou.

“Pero é que tamén nos insisten na solicitude dunha negociación bilateral para o financiamento autonómico de Galicia, co único obxectivo de seguir os pasos que lle marcan os seus aliados independentistas cataláns, máis preocupados de espremer a Pedro Sánchez no seu beneficio propio, sen preocuparse en absoluto de tratar en igualdade de condicións ás demais comunidades autónomas”, apuntou Paula Prado. Así, insistiu que “imos seguir defendendo unha negociación multilateral xusta e equitativa do financiamento autonómico, de xeito que se atendan as necesidades específicas de cada comunidade autónoma para que poidan atender a prestación dos servizos públicos en igualdade de condicións para todos os españois”.

Respecto da orde do día da sesión plenaria, a viceportavoz popular informou que está prevista a comparecencia dos conselleiros de Sanidade e de Facenda e Administración Pública.

INFRAESTRUTURAS E PROXECTO NÓS

Dentro do apartado de proposicións non de lei, o Grupo Popular solicitará, en primeiro lugar, que o Goberno central complete a dotación de 15 millóns de euros que se lle solicitaron por Galicia, no marco do PERTE Nova Economía da Lingua, para o desenvolvemento do Proxecto Nós. Esta iniciativa, que prevé unha mobilización de máis de  45 millóns de euros e a creación de 450 empregos, ten por obxectivo favorecer a creación de ferramentas que permitan que o galego estea presente en todos os ámbitos, especialmente no tecnolóxico con sintetizadores de voz, recoñecedores de fala ou xeradores de lingua natural.

Para levar adiante esta iniciativa, a Xunta solicitou ao Goberno central, con cargo ao PERTE Nova Economía da Lingua, que está dotado cun orzamento global de 1.100 millóns de euros, unha partida de 15 millóns de euros, pero a día de hoxe o Goberno de Pedro Sánchez so achegou 2 millóns de euros, unha cantidade absolutamente insuficiente para un proxecto que aspira a situar o galego na sociedade e na economía dixital.

A segunda das proposicións non de lei do Grupo Popular incide nunha das demandas máis insistentes desde Galicia e menos atendidas por parte do Goberno central: a realización e mellora de infraestruturas viarias vitais na Comunidade galega, ante a falta de avances na planificación de traballos. “O Goberno central leva anos acumulando incumprimentos en relación á execución das novas infraestruturas viarias comprometidas en Galicia, especialmente aquelas que resultan vitais para a comunicación coa meseta e para a vertebración interna do territorio, como son as autovías de competencia estatal A-56, A-52 no acceso a Vigo, A-74 ou a A-76, por poñer algún exemplos”, concretou a viceportavoz popular.

“Galicia non pode permitir o agravio comparativo que está a sufrir respecto das atencións que presta o Goberno central a outras comunidades autónomas, polo que consideramos necesario que o Parlamento galego se pronuncie nesta cuestión unha vez máis e insista na demanda dun compromiso real e efectivo do Goberno de Pedro Sánchez para a realización de infraestruturas vitais para a Comunidade galega”, dixo.

Por último, dentro do apartado de preguntas ao Goberno galego, o Grupo Popular solicitará unha valoración da xuntanza celebrada a semana pasada co secretario de Estado de Transportes e Mobilidade Sostible e co comisionado do Goberno central para o Corredor Atlántico, “unha reunión sobre a que non entendemos o ocultismo a que a quixo someter o Goberno central, negando información algunha sobre os asuntos e o contido da mesma”.

A segunda pregunta do Grupo Popular ao Goberno galego ten que ver coa repercusión na cidadanía galega que está a ter o programa EBICI, que a Xunta puxo en marcha para favorecer modos de transporte máis sustentables e saudables, a través de vehículos non motorizados e diminuíndo o uso do vehículo particular, coa conseguinte redución de emisións e de contaminación acústica.

NOVA ABAU

E, en terceiro lugar, desde o Grupo Popular cuestionará sobre a situación das negociacións sobre os exames de avaliación para acceder á universidade. Neste sentido, Paula Prado asegurou “non entender como desde o Goberno central se deixa liberdade a cada comunidade para elaborar os seus exames de ABAU, con estándares metodolóxicos, de esixencia e de avaliación diferentes en cada autonomía, que deriva en 17 portas de acceso diferentes á universidade para unha mesma praza”.

Deste xeito, reiterou que “avogamos por desenvolver un modelo de avaliación homologable a todas as comunidades autónomas para acceder á universidade, como quedou de manifesto no día de onte no acordo asinado en Salamanca por responsables de todas as comunidades autónomas gobernadas polo PP, un acordo axustado á lei e que, ao mesmo tempo, blinda as singularidades de Galicia, especialmente en todo o que respecta á nosa lingua propia”.