O Pleno do Parlamento galego aproba a nova Lei de cultura inclusiva e accesible, que apoia e da visibilidade ao talento de tantas persoas que pola situación de dificultade permanecen agochadas

O Pleno do Parlamento de Galicia aprobou hoxe a nova Lei de cultura inclusiva e accesible de Galicia, unha norma que “pretende facilitar o dereito de acceso á cultura de todas as persoas, sen excluír a ninguén, e que define un claro obxectivo: conciliar a cultura coa realidade das diferenzas que presentan as persoas, facendo fincapé en todas aquelas que pertencen a colectivos cuxa desvantaxe persoal ou social acaba por supor un verdadeiro atranco no ámbito cultural”, manifestou a portavoz de Cultura do Grupo Popular, Carmen Pomar.

En concreto, Pomar sinalou que “estamos diante dunha lei de dobre fluxo que busca, explicitamente, apoiar e dar visibilidade á creatividade e ao talento de tantas persoas que pola súa situación de dificultade permanecen agochadas para o público potencial e para a sociedade en xeral, coas consecuencias sociais e económicas que isto conleva e, inherente, o dano para o seu desenvolvemento persoal”.

UN ANTES E UN DESPOIS

A portavoz popular explicou que “o ordenamento xurídico galego carece neste momento dunha norma que regule este acceso á cultura en termos inclusivos e que integre, baixo este paraugas, mesmo a creación como o consumo cultural”. “A norma está pensada para aqueles colectivos desfavorecidos ou con maiores dificultades de inclusión, polo tanto en desvantaxe, para seren removidos todos e calquera dos obstáculos que inhiban ou prexudiquen a súa participación plena na vida cultural”, apuntou.

“Unha lei que marcará un antes e un despois para o acceso á cultura das persoas, ben como consumidoras, ben como produtoras, ou en ambas as dúas perspectivas”, asegurou Carmen Pomar, quen apuntou que “trátase de recoller ao longo dos seus 21 artigos e 5 disposicións un novo escenario para ir da man dos colectivos da diversidade, desfacendo barreiras e marcando obxectivos para que a cultura sexa 100 por cento accesible para todas as persoas e para que a cultura sexa unha ferramenta de expresión para todas e todos, sen excepción”.

Respecto dos mecanismos de seguimento, Carmen Pomar explicou que a lei prevé a creación do Observatorio da Cultura Inclusiva e Accesible de Galicia, “como órgano colexiado que, aínda que dependente da Consellería con competencias en materia de cultura, poda ser participado doutros órganos da Xunta e, incluso, doutras administracións públicas ou entidades do tecido asociativo e industrias culturais, e que levará a cabo o seguimento do cumprimento desta norma, nunha dinámica viva e aberta de análise e avaliación constante”.

 

O Grupo Popular destaca que o modelo fiscal consolidado de Galicia permite facer novas rebaixas selectivas de impostos

O viceportavoz popular, Julio García Comesaña, salientou hoxe no Pleno, no debate das emendas á totalidade do proxecto de Lei de medidas fiscais e administrativas, que “o modelo fiscal consolidado en Galicia permite facer novas rebaixas selectivas de impostos, que benefician fundamentalmente ás rendas medias e baixas e aos colectivos especialmente protexidos”. Porén, avogou por ver este proxecto de Lei como “unha oportunidade para que os grupos parlamentarios poidan achegar as súas propostas, porque hai e haberá debate sobre o seu contido e as emendas presentadas”.

García Comesaña afirmou que con esta nova Lei “séguese a consolidar as importantísimas rebaixas de impostos que o Goberno galego leva implantando desde o ano 2016, que nos levou a ser unha das cinco comunidades autónomas que mellor tratamento da ás rendas de ata 21.000 euros no IRPF”. En concreto, explicou que no imposto de sucesións apróbase unha nova redución aplicable para os irmáns, tíos, sobriños, sogros, cuñados, xenros e noras, que suporá que as herdanzas de ata 25.000 euros a favor de calquera persoa deste grupo de parentes non tribute.

ACTUACIÓNS NO ÁMBITO DA VIVENDA

No ámbito da vivenda, o viceportavoz popular indicou que “vanse establecer dúas deducións para estimular ás persoas propietarias de vivendas baleiras a súa posta no mercado do aluguer de vivenda”. “Son medidas que van a apoiar aos pequenos propietarios, xa que non se poderán beneficiar destas deducións aqueles que posúan máis de 3 vivendas destinadas ao aluguer”, apuntou.

En concreto, as persoas que teñan algunha vivenda baleira que para poñela en condicións de ser usada precise determinadas obras poderán deducirse un 15 por cento do custe das obras, sempre que o valor de mercado da vivenda non supere os 300.000 €. Ademais, incentivarase cunha dedución de ata 500 euros o primeiro ano o aluguer de vivendas por parte particulares, sempre que a renda non supere os 700 euros mensuais.

Julio García apuntou que esta nova Lei de medidas fiscais e administrativas inclúe unha serie de medidas tributarias para facilitar o acceso á vivenda dos cidadáns galegos. Así, exímese de tributación no ITP-AXD todas as operacións implicadas na construción e financiamento da vivenda protexida de promoción pública, establecendo unha dedución na cota do 100%. Ademais, equipáranse os locais comerciais que se destinen a uso de vivenda ás vivendas, de xeito que as operacións gravadas polo tributo se beneficien dos tipos bonificados recoñecidos para as vivendas, ao tempo que se estimulan as operacións de promoción, construción e rehabilitación de vivendas que se poñan no mercado do aluguer, que poderán beneficiarse dunha dedución do 75 por cento na cota do citado imposto.

RECURSOS NATURAIS AO SERVIZO DOS GALEGOS

“A Xunta ten claro que a xestión da riqueza dos recursos naturais de Galicia ten que estar ao servizo dos intereses de toda a poboación galega”, afirmou o viceportavoz popular. Neste sentido, referiuse ao proceso de diminuír o número de autoxeneradores eólicos en Galicia a través da repotenciación; equiparar os locais comerciais coas vivendas en materia impositiva; a posta en marcha da taxa turística; conxelar o canon de perdas nas traídas de augas ata o 2028; o fomento da reciclaxe con ese canon unitario de tratamento por tonelada de contía reducida; a licenza de caza ou pesca indefinida para os maiores de 65 anos; a consolidación mediante lei das redución progresivas das ratios de alumnado.

Así mesmo, a nova Lei favorecerá a simplificación e axilización do procedemento para a recoñecemento da situación de dependencia e o dereito a prestación do Sistema para a Autonomía e Atención á Dependencia; a axilización de construción de vivendas protexidas de promoción pública de titularidade autonómica; a utilización de edificacións existentes para o seu destino a vivenda; ou a garantía de duración permanente do réxime de protección da vivenda.

 

O Grupo Popular asegura que os gobernos do PPdeG “levan anos demostrando que Galicia pode funcionar ofrecendo máis e mellores servizos públicos, ao tempo que se baixan impostos”

A viceportavoz do Grupo Popular, Paula Prado, salientou hoxe no Pleno do Parlamento galego, no debate de totalidade dos orzamentos da Xunta para 2025, que os gobernos do PPdeG “levan anos demostrando que Galicia pode funcionar ofrecendo cada vez máis e mellores servizos públicos, ao tempo que se baixan os impostos”. Así mesmo, cualificou a BNG e PSdeG como “a esquerda dos recortes, porque non só pretenden subir impostos, senón que pretenden ademais recortar servizos”.

Paula Prado concretou que, “a efectos prácticos, os orzamentos de 2025 significan que as familias galegas seguirán sendo as únicas de España que gozan dunha educación pública gratuíta desde a escola infantil ata a universidade; que a mocidade teña reservadas ata o 40 por cento das máis de 1.500 vivendas de promoción pública que está a desenvolver o Goberno galego; que as mulleres galegas de máis de 40 anos poidan acceder á reprodución asistida na sanidade pública; que as vítimas de violencia de xénero teñan a súa disposición cinco centros de atención 24 horas; ou que os galegos que reciban unha herdanza de parentes colaterais non teñan que pagar o imposto de sucesións”.

A ESQUERDA DOS RECORTES

Pola contra, a viceportavoz popular sinalou que BNG e PSdeG “son a esquerda dos recortes”. Así, explicou que “o BNG que se vende como defensor dos máis desfavorecidos quere recortar en máis de 50 millóns de euros a Risga e as axudas de inclusión social; o BNG que se vende como defensor da sanidade pública pretende recortar na compra de material sanitario; ou o BNG que di estar ao carón das familias pretende recortar as actividades da campaña de verán da Xunta, deixando a 11.500 nenos galego sen campamento”.

“Así mesmo, e logo do que vimos padecer aos valencianos estes últimos días a consecuencia da DINA, o BNG cre que a mellor opción é reducir o investimento na Axencia Galega de Emerxencias ou recortar en tres millóns de euros a partida destinada á adquisición de vehículos equipados para a defensa contra o lume”, apuntou.

RECORTES NA SANIDADE

Respecto das emendas do PSdeG, Paula Prado manifestou que “os mesmos socialistas que se manifestan en defensa da sanidade pública, queren aplicar recortes no pago das liñas telefónicas do Sergas ou no pago dos servizos postais, necesarios para que a cidadanía reciba as comunicacións derivadas de programas como o de cribado de cancro”.

“Pero é que o mesmo PSdeG que propón agora a gratuidade e supresión das peaxes nas autoestradas galegas é o que na campaña das pasadas eleccións autonómicas deu a súa palabra de que a AP-9 e a AP-53 ían ser gratuítas, e a día de hoxe estas autoestradas seguen sen ser gratuítas e para o vindeiro xaneiro percorrer a AP-9 custará 27 euros”, indicou a viceportavoz popular, quen engadiu que “os socialistas son os responsables de paralizar no Congreso a transferencia da AP-9, que xa leva 12 ampliacións do prazo de emendas”.

 

O Grupo Popular contrapón a xestión eficiente dos recursos públicos do Goberno galego coas fantasiosas contas carentes do máis elemental rigor de BNG e PSdeG

O portavoz do Grupo Popular, Alberto Pazos, criticou hoxe no debate de totalidade no Pleno do Parlamento dos orzamentos da Xunta para 2025 que para BNG e PSdeG “nada é imposible, cando mentes” e explicou que “reducen as súas emendas a unha enorme e impúdica mentira, na que basta desexar algo para que se converta en realidade”. “Os galegos nos demandan menos ruído e máis diálogo, e máis acordos e menos confrontación, pero tamén unha xestión eficiente dos recursos públicos e non fantasiosas contas carentes do máis elemental rigor”, apuntou.

Alberto Pazos manifestou que “o Parlamento debería recuperar de maneira inmediata a súa capacidade para xerar consensos, pero iso non será posible se non superamos o actual clima de confrontación, que nace da aparente incapacidade da oposición para asumir o resultado das urnas do pasado mes de febreiro”.

PRODUTO CADUCADO DA OPOSICIÓN

“A suposta alternativa que BNG e PSdeG ofrecen hoxe aos galegos non é máis que unha reprodución exacta do debate celebrado hai un ano, convenientemente remaquetado para presentar aos galegos, como se fose novo, o que non é máis que un produto longamente caducado”, sinalou. Así, criticou que os seus argumentos son “a mesma análise catastrofista, as mesmas conclusións equivocadas, as mesmas receitas rexeitadas unha e outra vez polos galegos, e, como non, a mesma actitude altiva que lles impide recoñecer nin un só logro a un Goberno que acaba de conseguir a súa quinta maioría absoluta consecutiva”.

O portavoz popular afirmou que Galicia “precisa alcanzar certos acordos básicos en materias fundamentais para o seu futuro”, como un pacto sobre a lingua, un pacto pola industria ou unha estratexia de acción exterior. Pero, puntualizou que “eses acordos se teñen que articular necesariamente en torno a un programa, a uns prantexamentos e a uns principios compartidos e validados por unha inmensa maioría dos galegos”.

“Chegou o tempo de que asuman que os galegos non comparten a súa compulsiva teima por subir impostos ou por inventar novos tributos, e de recoñecer que os galegos non comparten o seu recorrente mantra de que viven nunha Galicia asolada por falsos recortes que só existen no seu imaxinario partidista”, asegurou.

Pazos criticou que “gracias á visión positiva e creativa da esquerda galega podemos implementar novidosísimos programas en materia de vivenda ou de igualdade mediante a simple fórmula de deixar de pagar a débeda ou de eliminar concertos educativos, aínda que iso supoña deixar a milleiros de nenos galegos sen escolarizar, simplemente porque se lles esqueceu incluír nas súas emendas un centro educativo alternativo onde cursar os seus estudos”.

FISCALIDADE REAL, EQUILIBRADA E CONSECUENTE

Respecto das propostas en materia fiscal de BNG e PSdeG, o portavoz popular indicou que “cada ano reiteran a creación de novos impostos e o aumento dos tipos nos xa existentes, pero variando o cálculo da recadación para facelo coincidir milimetricamente coas cantidades que necesitan para cadrar a súa contabilidade creativa”. En concreto, dixo que “as mesmas figuras fiscais que para o BNG recadaban o pasado ano 209 millóns de euros, este ano alcanzan milagrosamente os 255 millóns de euros”.

“A Xunta vai seguir optando por manter unha fiscalidade real, equilibrada e consecuente”, subliñou Alberto Pazos, que contrapuxo co “Goberno de Pedro Sánchez, que incrementou a fiscalidade dos autónomos, os impostos aos hidrocarburos, ao diésel, ás bebidas azucaradas, aos plásticos dun so uso ou ao tratamento do lixo, e todo iso namentres incrementaba a recadación do Estado gracias aos perniciosos efectos da inflación e á negativa do Goberno a deflactar impostos”.

O portavoz popular destacou “o modelo fiscal xusto de Galicia, que nos sitúa entre as comunidades que mellor tratamento fiscal proporciona ás rendas máis baixas”. “Un modelo que garante unha maior xustiza social, como amosa o feito de que durante 15 anos consecutivos mantivésemos unha taxa de pobreza inferior á media estatal ou que o índice de GINI presente resultados sensiblemente mellores en Galicia que no conxunto de España”, matizou.

Respecto da condonación da débeda proposta polo PSdeG, Alberto Pazos criticou que fixen en 115 millóns de euros a suposta condonación para Galicia fronte aos 15.000 millóns de euros para Cataluña. Deste xeito, sinalou que “unha cousa é que defendan unha condonación da débeda, que nós consideramos un pésimo negocio para Galicia, e outra ben distinta é que en sede parlamentaria os socialistas lle falten ao respecto aos galegos asumindo unha cifra absolutamente ridícula”.

 

O PPdeG insiste na demanda de cinco xulgados específicos de violencia de xénero en Galicia ante os reiterados incumprimentos de Pedro Sánchez

O Partido Popular de Galicia insiste na súa demanda ao Goberno central de poñer en marcha cinco xulgados específicos de violencia de xénero nas cidades galegas, tal e como se comprometera a facer Pedro Sánchez.

A través dunha moción rexistrada na Comisión de Xustiza do Senado, os populares galegos recordan a “reivindicación” conxunta do Goberno galego co Tribunal Superior de Xustiza de Galicia de crear estas unidades xudiciais nas cidades de Pontevedra, Ferrol, Ourense, Santiago e Lugo.

A portavoz de Xustiza do Grupo Popular e senadora pola provincia de Pontevedra, Pepa Pardo, recorda ademais que esta demanda formou parte do acordo de investidura, convertido en “papel mollado”, asinado entre o BNG e o PSOE para facer presidente a Pedro Sánchez.

“Estamos ante un novo desprezo do Goberno central a Galicia coa complicidade dun BNG que é incapaz de esixir o cumprimento daquilo polo que lle deron o poder a Sánchez”, explica a senadora popular subliñando que tan só unhas semanas despois da sinatura do pacto de investidura, o propio Goberno confirmou que entre as unidades xudiciais aprobadas para o ano 2024 non aparecían estes xulgados.

“O señor Besteiro asegurou que este ano xa iamos contar con tres destes cinco xulgados, nas cidades de Ourense, Santiago e Lugo. Pero o ano está a piques de rematar e eses xulgados nin están nin se lles espera”, critica.

A VIOLENCIA CONTRA AS MULLERES, UNHA LACRA NA NOSA SOCIEDADE

Con motivo da conmemoración do Día Internacional da eliminación da violencia contra as mulleres, desde o PPdeG remarcan que esta é unha das grandes lacras da nosa sociedade e insisten na necesidade de poñer todos os medios posibles ao alcance das administracións para poder combatela de xeito eficaz e eficiente.

Recordan así mesmo que en Galicia se presentaron o pasado ano 7.500 denuncias por violencia de xénero, o que supón un 7% máis que no ano anterior. “Ante o aumento da violencia contra as mulleres, o que fai Pedro Sánchez coa súa negativa a crear estes xulgados é desprotexelas”, apunta Pardo.

“Xa está ben de facer feminismo de pancarta e de instrumentalizar ás mulleres. É o momento de cumprir co que Galicia merece e necesita”, conclúe.

 

O Grupo Popular emenda os orzamentos da Xunta para 2025 para incentivar que pequenos propietarios con inmobles baleiros poñan estas vivendas no mercado de aluguer

O Grupo Popular incorpora nas súas emendas aos proxectos de Lei de orzamentos da Comunidade galega para 2025 e de medidas fiscais e administrativas dúas iniciativas para incrementar o mercado de vivendas en aluguer en Galicia a través de incentivos aos pequenos propietarios con inmobles baleiros para que os poñan no mercado con deducións no IRPF dos gastos derivados da súa adecuación ou polo simple arrendamento da vivenda.

O portavoz do Grupo Popular, Alberto Pazos, acompañado polos conselleiros de Facenda, Miguel Corgos, e de Vivenda e Planificación de Infraestruturas, María Martínez, informou que as emendas ao proxecto de Lei de medidas fiscais e administrativas incorporan novas exencións fiscais orientadas a estimular que as persoas propietarias de vivendas as poñan no mercado de aluguer.

En concreto, o conselleiro de Facenda explicou que “o obxectivo é incrementar un 3 por cento o número de alugueres, o que supón incrementar a curto prazo o mercado con 1.000 novas vivendas”.

DEDUCIÓNS NO IRPF

Para iso, en primeiro lugar, introdúcese unha dedución do 15 por cento na cota autonómica do IRPF dos gastos derivados da adecuación dun inmoble baleiro para destinalo ao arrendamento como vivenda, cun importe máximo de 3.000 euros por vivenda e ano durante tres anos; e, en segundo lugar, establécese unha dedución de 500 euros na cota autonómica do IRPF polo arrendamento de vivendas baleiras.

Os destinatarios destas dúas deducións serán as persoas propietarias dun máximo de tres vivendas, cun límite de 700 euros do prezo mensual do aluguer, un arrendamento por un tempo mínimo de tres anos e que as vivendas leven, polo menos, un ano baleiras.

A conselleira de Vivenda manifestou que estas bonificacións fiscais “enriquecen as medidas xa impulsadas pola Xunta” e resaltou a colaboración dos concellos, pero lamentou “a deixadez do Goberno central e dunha lei estatal que non é só que non axude, senón que está a prexudicar claramente aos pequenos propietario que non se atreven a alugar as súas vivendas”.

Por este motivo, reclamou que “o Estado modifique esta Lei claramente lesiva e que se está demostrando tan ineficaz” e afirmou que o Goberno galego actúa “para dar solucións efectivas ás limitacións e á inseguridade xurídica creada coas propostas de creación de zonas tensionadas ou de limitación dos prezos, que da lugar a que os propietarios, ben sexa promotores privados ou ben particulares, non poñan as vivendas no mercado do alugueiro”.

EMENDAS AO ESTADO DE GASTOS

Previamente, Alberto Pazos informou que o Grupo Popular presentou 7 emendas ao estado de gastos do proxecto de Lei de orzamentos, entre as que destacan principalmente o incremento de 500.000 euros das axudas para as federacións deportivas galegas, co obxectivo de colaborar o máximo posible no seu correcto funcionamento; un axuste de 400.000 euros da partida destinada a axudas a partidos políticos, de xeito que se adecúe á evolución do IPC xa que leva conxelada desde o ano 2017; ou a apertura da posibilidade para que as asociacións sectoriais sen ánimo de lucro poidan beneficiarse tamén das subvencións para o financiamento de accións formativas con compromiso de contratación de desempregados.

Dentro das emendas ao proxecto de Lei de medidas fiscais e administrativas, Alberto Pazos apuntou que se reforma a implantación do imposto sobre as estadías turísticas, concretando aspectos substantivos do tributo, que xa figuraba no artigo 8 da Lei de medidas. Deste xeito, esta taxa autonómica estará bonificada ao 100 por cento por parte da Xunta e se habilita aos concellos a establecer unha recarga de carácter municipal, que poderán aplicar a partir do 1 de xaneiro.

Outra das cuestións que o Grupo Popular incorporou nas súas emendas ao proxecto de Lei de medidas fiscais e administrativas ten relación co sector eólico. En concreto, van dirixidas a catro aspectos. En primeiro lugar, a repotenciación dos parques eólicos, establecendo a obriga de repotenciar os parques eólicos cunha antigüidade superior aos 25 anos, agás que nos proxectos autorizados se fixase unha vida útil dos aeroxeradores superior, que, en todo caso, terá un máximo de 30 anos.

En segundo lugar, a posibilidade de retramitación voluntaria daqueles parques que actualmente están en tramitación ou autorizados, pero non en funcionamento. Esta medida permitirá reactivar un sector castigado por decisións xudiciais, xa que os promotores poderán volver tramitar o parque, incluso conxuntamente coa súa liña eléctrica de evacuación, e adaptarse ás previsións da Lei 2/2024, de promoción dos beneficios sociais e económicos dos proxectos que utilizan os recursos naturais de Galicia.

NOVO PLAN EÓLICO

En terceiro lugar, establécese un novo canon eólico, de forma que a súa base impoñible dependerá da altura total dos aeroxeradores e cunha unha tarifa de 75 euros por cada metro. A previsión é que esta nova regulación entre en vigor o 1 de xaneiro de 2026, cunha recadación global prevista similar á correspondente ao sistema actual.

“E, por último, un aspecto que consideremos importante porque afecta directamente aos consumidores: en tanto non se aproba un novo Plan Sectorial Eólico, o 50 por cento da enerxía xerada polos novos parques que se atopan dentro das Áreas de Desenvolvemento Eólico, incluídas no Plan Sectorial Eólico de Galicia, deberá ser destinada a consumidores galegos, a través de contratos de subministración a longo prazo”, indicou Alberto Pazos. Esta medida está totalmente aliñada coa Lei 2/2024, de promoción dos beneficios sociais e económicos dos proxectos que utilizan os recursos naturais de Galicia, e que xa establece que, para parques que se atopen fóra desas áreas, a porcentaxe de enerxía xerada para consumidores galegos sexa do 80 por cento.

 

O PPdeG acusa a Pedro Sánchez de “desmantelar a seguridade dos ourensáns” a través de recortes nos horarios e plantillas dos cuarteis da Garda Civil

O Partido Popular de Galicia acusa a Pedro Sánchez de “desmantelar a seguridade dos ourensáns” a través dos recortes que o seu Goberno está aplicando nos horarios de atención ao público dos cuarteis e no número de efectivos da Garda Civil na provincia de Ourense.

En declaracións aos medios nas inmediacións do cuartel da Garda Civil en Bande, a secretaria xeral dos populares galegos, Paula Prado, denunciou que cada vez son menos os cuarteis abertos con atención presencial as 24 horas e que, pola contra, cada vez son máis os que, como o deste concello, abren só de 9:00 a 14:00 horas e só nuns días concretos da semana.

“O Goberno de Sánchez non está coidando á Garda Civil e nós, por suposto, estamos moi preocupados”, asegurou ao tempo que poñía o foco nas intencións do Ministerio de Interior de seguir pechando cuarteis –entre eles o do concello ourensán de Baltar– e de levar a cabo unha “barbaridade” como é a “substitución de axentes reais por axentes virtuais”.

A isto hai que engadir ademais que, entre os postos sen cubrir e as baixas médicas, cada día faltan 1.000 axentes da Garda Civil en Galicia e máis de 160 na provincia de Ourense. Polo tanto, desde o PPdeG esperan que “Sánchez e os seus rectifiquen polo ben da Garda Civil e pola seguridade de todos os galegos e galegas”.

ANA VÁZQUEZ: “QUEREMOS UNHA SEGURIDADE DE PRIMEIRA”

Paula Prado estivo acompañada nesta xornada polo presidente do PP na provincia de Ourense, Luis Menor, a alcaldesa de Bande e secretaria xeral provincial, Sandra Quintas, e as deputadas pola provincia Rosa Quintana e Ana Vázquez.

Esta última alertou de que dos 38 cuarteis da Garda Civil en Ourense, actualmente só catro deles permanecen abertos durante as 24 horas: os de Xinzo, Carballiño, Verín e O Barco. Algo, na súa opinión, totalmente incomprensible nunha provincia avellentada e cunha gran dispersión poboacional.

A tamén secretaria nacional de Interior do PP recordou así mesmo que, segundo datos do propio Ministerio, a criminalidade tense incrementado de xeito xeneralizado no conxunto de Ourense e que este incremento alcanza o 27% nas zonas rurais, onde se concentran case o 60% dos roubos con forza de toda a provincia.

“Queremos unha seguridade de primeira porque non somos cidadáns de segunda”, concluíu reivindicando que os veciños do rural pagan os mesmos impostos que o resto de cidadáns e que teñen o mesmo dereito a “vivir en liberdade e con seguridade nos seus concellos”.

LUIS MENOR: “REIVINDICAMOS SERVIZOS DIGNOS”

Luis Menor, pola súa banda, criticou o descoñecemento que o Goberno de Sánchez ten do mundo rural, subliñando que mentres o PP loita de modo permanente por fixar poboación, crear emprego e ofrecer a mellor calidade á veciñanza, o Goberno central desmantela servizos públicos básicos como a seguridade, imprescindibles para garantir o futuro do rural.

O obxectivo do PP é axudar ao medio rural “garantindo uns niveis de seguridade óptimos”, ao igual que nas contornas urbanas. “Reivindicamos servizos dignos da Garda Civil no rural”, incidiu Luis Menor, labor que se fai tanto desde o propio partido como desde as institucións nas que goberna o PP.

Neste sentido lembrou que a través dunha iniciativa presentada na Deputación de Ourense, e ademais de facer un recoñecemento ao labor que desenvolve a Garda Civil, acordouse esixir a súa presenza no rural, sen pechar máis cuarteis, con máis efectivos e mesmo ofrecendo incentivos para todos aqueles axentes que queiran ocupar postos en zonas rurais.

O PARTIDO CON MÁIS ALCALDESAS DE GALICIA

A secretaria xeral dos populares galegos quixo tamén aproveitar a presenza de Sandra Quintas para reivindicala como “unha das 27 rexedoras que nos converten no partido con máis alcaldesas de Galicia” e das que case a metade, un total de 13, son precisamente da provincia de Ourense.

“No Congreso tamén somos maioría”, engadiu poñendo en valor que, grazas aos 13 representantes do PPdeG na Cámara Baixa, a visibilidade de Galicia está garantida no lugar onde se toman tanta decisións que afectan á nosa Comunidade.

 

O PPdeG reivindica a forza do partido en Ourense á hora de construír maiorías que sexan serias e útiles para os veciños

O Partido Popular de Galicia reivindicou hoxe a forza da formación en Ourense á hora de defender os intereses de todos os galegos e galegas e especialmente no que se refire a construír maiorías que sexan unha alternativa seria e útil para os veciños.

Así o asegurou a secretaria xeral do partido, Paula Prado, esta tarde no Magosto Popular organizado polo PP de Ourense, no que tamén participaron o presidente provincial, Luis Menor, e a presidenta da xestora local, Victoria Núñez, e ao que asistiron máis de medio millar de persoas. Ante eles a número dous dos populares galegos reivindicou que non hai PP en Galicia sen o PP de Ourense.

Salientou neste sentido os grandes resultados electorais nunha provincia que en febreiro deu un 50% de apoio ao presidente Rueda e nunha cidade na que o partido tamén foi maioría e colaborou á súa vez á maioría absoluta. Por iso quixo agradecer a todos os representantes do partido o seu compromiso e traballo diario, amosándose convencida de que o PP ourensán seguirá sumando éxitos no futuro.

Pese a isto, animou aos seus a seguir traballando, a non deixar tempo nin espazo á relaxación e a seguir sendo útiles a cidadanía. Puxo así como exemplo á Galicia que funciona da man de Alfonso Rueda e que este luns dará un paso máis cara a aprobación dos Orzamentos autonómicos máis altos da historia.

Unhas contas que reservan 240 millóns de euros só para a cidade de Ourense e que son o reflexo da Galicia que constrúe o PPdeG, co presidente Rueda á fronte, desde a estabilidade, o rigor e a xestión.

LUIS MENOR: “A FORZA DO PARTIDO RESIDE NA MILITANCIA”

Luis Menor puxo en valor que só unha formación como o Partido Popular é quen de facer unha demostración de compromiso da militancia como no magosto celebrado esta tarde coa presenza de varios centos de afiliados e simpatizantes, “persoas implicadas” que apoiaron arreo para ofrecer os mellores resultados electorais nas autonómicas e nas europeas deste ano.

O presidente provincial afirmou que estes resultados son froito “dun traballo ben feito”, onde a verdadeira fortaleza “reside na súa militancia”.

En nome da dirección do partido en Ourense, Luis Menor destacou que “debemos responder a ese compromiso” estando sempre do lado dos cidadáns e “chegando a acordos que sexan útiles e bos para esta cidade e, por suposto, para a provincia”. Mentres, lamentou, outros partidos dedícanse “a pensar en calquera artimaña que nos aparte de gobernos lexítimos e onde a veciñanza ocupa o último posto das súas preocupacións”.

“Ese non é o Partido Popular”, defendeu, un partido de goberno que seguirá loitando como sempre para situar á cidade en postos de privilexio, “atractiva e afable para os visitantes e con múltiples oportunidades para crear un proxecto persoal e profesional de vida”.

VICTORIA NÚÑEZ: “AS NOSAS SIGLAS UNEN, NON DIVIDEN”

A presidenta da xestora local, Victoria Núñez, expresou a súa satisfacción por comprobar, unha vez máis, a multitudinaria resposta ao magosto do PP, un encontro que tamén serve para lanzar á cidadanía de Ourense “unha mensaxe de compromiso deste partido con todas aquelas iniciativas ou propostas que teñan como fin a mellora da calidade de vida de toda a veciñanza”. Con especial énfase, engadiu, nas persoas que máis axuda precisan, pero sempre pensando no ben da Comunidade.

Para Victoria Núñez “este é o principal valor deste partido”, que defende unha sociedade sen diferenzas, xusta e igual, con independencia do lugar de residencia, “que procura que non haxa distinción entre cidadáns de primeira ou de segunda”. Nesta liña pediu á militancia que sigan a demostrar que as siglas do PP “unen e non dividen como buscan outros permanentemente”.

 

Alberto Pazos asegura que BNG e PSdeG “están arrepentidos de ter solicitado a creación da Comisión de Investigación sobre os contratos da Xunta”

O portavoz do Grupo Popular, Alberto Pazos, asegurou hoxe que, “cada día que pasa e vendo os movementos e sobreactuación permanente que están a facer tanto BNG como PSdeG, estamos máis convencidos de que están arrepentidos de ter solicitado a creación da Comisión de Investigación sobre a contratación pública da Administración galega”. Diante desta situación, afirmou que o Grupo Popular “vai seguir poñendo un pouco de sentidiño á celebración desta Comisión de Investigación, que consideramos é unha oportunidade para botar abaixo definitivamente todas as falacias que nacionalistas e socialistas están a espallar sobre a exemplar xestión que os Goberno do Partido Popular están a facer en Galicia”.

Alberto Pazos manifestou que “non se entenden todas e cada unha das trabas que BNG e PSdeG intentan poñer ao normal desenvolvemento desta Comisión de Investigación se, de verdade, tiveran interese real en coñecer o proceso de construción do Hospital Público Alvaro Cunqueiro ou as numerosas contratacións que levou adiante a Xunta durante a emerxencia sanitaria derivada da Covid-19”.

UNHA TRABA TRAS OUTRA

En concreto, lembrou que “comezaron coa solicitude para ampliar o prazo de suxestións ás normas de funcionamento; cuestionaron o informe sobre as súas propostas porque a letrada o fixo de xeito verbal á Presidenta da Comisión; pediron retrasar a Mesa e a Comisión para aprobar o plan de traballo, porque non lles ía ben a data prevista; boicotearon a Mesa por un defecto formal de prazo de convocatoria, que subsanamos habitualmente en todas as Mesas das comisións deste Parlamento; tentaron retrasar a celebración da Comisión na que se aprobou o Plan de Traballo da Comisión porque alegaban que o Grupo Popular non quería negociar con eles, cando a verdade é que levabamos esperando máis dunha semana pola súa resposta á nosa chamada; e despois interpoñen un recurso para suspender a celebración desa reunión da Comisión”.

“Sen esquecernos das súas dúas últimas pataletas: a primeira, presentando un escrito na tarde do mércores para revogar o acordo do Plan de Traballo; e, a máis recente, anunciando que van impugnar a Mesa celebrada onte porque din que non se lles comunicou con antelación como ía ser a execución do Plan de Traballo”, sinalou.

Por este motivo, demandou aos deputados do BNG que “deixen de actuar, poñer paos nas rodas desta Comisión de Investigación e póñanse a traballar, se de verdade queren coñecer como foi o proceso para a construción do Hospital Público Álvaro Cunqueiro e como se desenvolveron todos os contratos realizados polos últimos gobernos do Partido Popular na Xunta”.

Alberto Pazos considerou “inexplicable que BNG e PSdeG rexeitaran a oferta realizada polo Grupo Popular para incorporar no plan de traballo 16 comparecentes que figuraban nas súas propostas entre eles altos cargos do Goberno galego e representantes de empresas que contrataran coa Xunta, pero van ter á súa disposición unha amplísima documentación e 39 comparecentes que poderán dar resposta a todas as súas dúbidas e desconfianzas respecto da actuación desenvolvida pola Xunta nestes últimos anos”.

FIXADAS 23 DAS 39 COMPARECENCIAS

O portavoz popular informou que no día de onte celebrouse a Mesa da Comisión de Investigación na que se aprobou unha primeira fase do calendario de comparecencias e o requirimento dos 118 documentos que figuran no Plan de Traballo. En concreto, as comparecencias darán comezo o vindeiro xoves, 21 de novembro, ás 10 da mañá co subdirector xeral de Asistencia Sanitaria do Sergas entre os anos 2005 e 2009, José Ramón Gómez Fernández; ao que seguirá a conselleira de Sanidade do Goberno bipartito, María José Rubio; o ex xerente do Hospital Xeral e primeiro xerente do Hospital Público Álvaro Cunqueiro, Félix Rubial; o ex secretario xeral do SERGAS, Antolín Rodríguez Martínez; a conselleira de Política Territorial, Obras Públicas e Transporte do Goberno bipartito, María José Caride; e a ex conselleira de Sanidade entre os anos 2009 e 2011, Pilar Farjas.

Esta primeira fase de comparecencias continuará o venres, 22 de novembro (con outros 6 comparecentes); o martes, 26 de novembro (6 comparecentes); e o mércores, 27 de novembro (5 comparecentes). En total, nesta primeira fase de comparecencias pasarán polo Parlamento galego 23 das 39 persoas que serán citadas nesta Comisión de Investigación, quedando as outras 16 para unha segunda fase que será concretada nunha nova reunión da Mesa.

“O Grupo Popular está a tomarse moi en serio a celebración desta Comisión de Investigación, por respecto a este Parlamento e a todos os galegos que teñan interese en coñecer a verdade sobre a contratación pública realizada pola Xunta nestes últimos anos, pero resulta lamentable que tanto BNG como PSdeG optaran por facer todo o posible para desprestixiar esta Comisión de Investigación, intentando retrasar a súa celebración con todas as artimañas ao seu alcance”, sinalou.

Para rematar, Pazos asegurou que BNG e PSdeG “están a trasladar un día tras outro a sensación de que están máis que arrepentidos de crear esta Comisión de Investigación e agora tentan saír deste embolado no que se meteron enlodando todo o posible o terreo e poñendo todas as trabas posibles para retrasar a súa celebración”. “Nós, desde o Grupo Popular, imos poñer todo o que estea na nosa man para continuar celebrando con normalidade e celeridade esta Comisión de Investigación, que é o que defendemos desde o primeiro momento porque estamos convencidos que é o que queren de nós todos os galegos”, dixo.

 

Adrián Vázquez celebra que o Parlamento Europeo atrase a implementación da lei de deforestación “polo ben do agro galego”

 

 

O Parlamento Europeo, grazas á iniciativa do Partido Popular Europeo, aprobou esta semana o aprazamento da implementación do Regulamento europeo de Deforestación. Esta lei foi adoptada pola mesma cámara en decembro de 2021 e a súa entrada en vigor estaba prevista para o 30 de decembro de 2024, é dicir, en dúas semanas. Con todo, a presión dos eurodeputados populares logrou a adopción dun aprazamento de 12 meses e o compromiso da Comisión Europea de reducir toda a burocracia asociada á súa aplicación.

 

O eurodeputado do PPdeG Adrián Vázquez celebra esta decisión “polo ben do agro galego”, tendo en conta que o atraso “permitirá aos agricultores e gandeiros de toda Europa, tamén aos da nosa Comunidade, adaptarse dunha forma máis progresiva e asumible a esta nova regulación”.

 

O Grupo Partido Popular Europeo, que foi un dos impulsores desta lei para alcanzar o fin da deforestación ilegal para a produción de soia, café, caucho, aceite de palma e gando, mantén que a ambición ecolóxica é perfectamente compatible con non poñer máis trabas aos produtores agrícolas. “Europa debe ser ambiciosa na súa axenda ecolóxica, pero non pode lexislar contra a xente que máis coida do noso campo”, insistiu Adrián Vázquez.

 

Na mesma liña, o vicepresidente executivo da Comisión, Maroš Šefčovič, asegurou nunha carta remitida a Christine Schneider, responsable do EPP para estes asuntos, o forte compromiso da Comisión en reducir a burocracia ao medio rural. A Comisión Europea ten previsto publicar unha versión actualizada das directrices e un novo conxunto de preguntas frecuentes a finais de 2024 para achegar máis aclaracións e simplificacións sobre esta cuestión.

 

“Estamos a cumprir coas nosas promesas de campaña electoral. Non pode ser que sigamos afogando en papeis a quen enche as nosas neveiras e coidan do noso agro”, sinala o eurodeputado galego, sen esconder a súa enorme satisfacción co resultado desta votación.

 

“Ademais, o atraso na implementación deste regulamento vén acompañado dunha serie de melloras substanciais no seu contido, centradas maioritariamente en reducir a burocracia que soportan os nosos produtores rurais”, conclúe Vázquez.