O Pleno do Parlamento de Galicia aprobou hoxe a nova Lei de cultura inclusiva e accesible de Galicia, unha norma que “pretende facilitar o dereito de acceso á cultura de todas as persoas, sen excluír a ninguén, e que define un claro obxectivo: conciliar a cultura coa realidade das diferenzas que presentan as persoas, facendo fincapé en todas aquelas que pertencen a colectivos cuxa desvantaxe persoal ou social acaba por supor un verdadeiro atranco no ámbito cultural”, manifestou a portavoz de Cultura do Grupo Popular, Carmen Pomar.

En concreto, Pomar sinalou que “estamos diante dunha lei de dobre fluxo que busca, explicitamente, apoiar e dar visibilidade á creatividade e ao talento de tantas persoas que pola súa situación de dificultade permanecen agochadas para o público potencial e para a sociedade en xeral, coas consecuencias sociais e económicas que isto conleva e, inherente, o dano para o seu desenvolvemento persoal”.

UN ANTES E UN DESPOIS

A portavoz popular explicou que “o ordenamento xurídico galego carece neste momento dunha norma que regule este acceso á cultura en termos inclusivos e que integre, baixo este paraugas, mesmo a creación como o consumo cultural”. “A norma está pensada para aqueles colectivos desfavorecidos ou con maiores dificultades de inclusión, polo tanto en desvantaxe, para seren removidos todos e calquera dos obstáculos que inhiban ou prexudiquen a súa participación plena na vida cultural”, apuntou.

“Unha lei que marcará un antes e un despois para o acceso á cultura das persoas, ben como consumidoras, ben como produtoras, ou en ambas as dúas perspectivas”, asegurou Carmen Pomar, quen apuntou que “trátase de recoller ao longo dos seus 21 artigos e 5 disposicións un novo escenario para ir da man dos colectivos da diversidade, desfacendo barreiras e marcando obxectivos para que a cultura sexa 100 por cento accesible para todas as persoas e para que a cultura sexa unha ferramenta de expresión para todas e todos, sen excepción”.

Respecto dos mecanismos de seguimento, Carmen Pomar explicou que a lei prevé a creación do Observatorio da Cultura Inclusiva e Accesible de Galicia, “como órgano colexiado que, aínda que dependente da Consellería con competencias en materia de cultura, poda ser participado doutros órganos da Xunta e, incluso, doutras administracións públicas ou entidades do tecido asociativo e industrias culturais, e que levará a cabo o seguimento do cumprimento desta norma, nunha dinámica viva e aberta de análise e avaliación constante”.