Francisco Conde aposta por “poñer a Lugo no mapa das prioridades” do próximo Goberno de España

O cabeza de lista do PP ao Congreso dos Deputados pola provincia de Lugo, Francisco Conde, explicou en declaracións aos medios de comunicación despois da foto de familia da candidatura do PP lucense ao Congreso e ao Senado de cara ás eleccións xerais do vindeiro 29 de novembro que “desde o PP lucense partimos co obxectivo de poñer a Lugo no mapa das prioridades do próximo Goberno”. Así o sinalou tras a foto de familia da candidatura do PP lucense ao Congreso e ao Senado de cara ás eleccións xerais do vindeiro 29 de novembro.

Conde, xunto coa secretaria xeral do PPdeG, Paula Prado e a presidenta provincial do PP de Lugo, Elena Candia, asegurou que “asumimos esta campaña con moita responsabilidade, humildade e ambición” porque “somos plenamente conscientes da situación que temos en España, en Galicia e en Lugo” e cremos que “Lugo se xoga moito”.

De feito, defendeu que “a nosa provincia ten unha oportunidade para reivindicar as súas capacidades en materia industrial e enerxética, no sector primario ou na loita contra o reto demográfico”. En definitiva, unha oportunidade para que Lugo poida seguir avanzando na creación de emprego e dar oportunidades aos nosos mozos e tamén aos nosos maiores”.

O cabeza de lista do PP ao Congreso por Lugo asegurou que “imos estar pegados ao territorio. Imos escoitar con moita humildade aos lucenses para identificar esas prioridades e, sobre todo, trasladar a alternativa que supón o Partido Popular”.

Nese sentido, “temos ao mellor candidato posible, Alberto Núñez Feijóo, que coñece moi ben España, Galicia e, como todos sabemos, a provincia de Lugo”. Ademais, subliñou que “vai a trasladar confianza e liderar o que cambio que tanto precisa España, Galicia e Lugo”.

PAULA PRADO: “PSOE E BNG SON O MESMO PERRO CON DIFERENTE COLAR”

A secretaria xeral do PPdeG afirmou que “España merece un cambio”, porque “non podemos estar instalados na parálise” e “ten que volver funcionar”. Para que o país “saia deste desgoberno” -incidiu-, é necesario que “o PSOE non siga gobernando” e que o BNG “non teña tampouco esa capacidade de influír”. Porque -advertiu- “votar ao BNG é o mesmo que votar ao PSOE”, porque “o BNG foi quen puxo tamén aí a Pedro Sánchez á fronte do Goberno”: “Son o mesmo perro con diferente colar”.

A situación de declive que provocaron oito anos de sanchismo, engadiu Paula Prado, e que no caso da provincia de Lugo tradúcense en “falta de infraestruturas” e “desconexión”, entre outras eivas, “obriga a poñer enriba da mesa” unha “alternativa seria de futuro e cambio para España”, que “goberne para todos”, e que “lidera Alberto Núñez Feijóo”. Con “capacidade de xestión, solvencia e rigor” acreditados, é “o que España merece e España necesita”.

A secretaria xeral do PPdeG contrapuxo a forma de actuar dos populares, que prefiren saír “á rúa” para “escoitar á xente” e resolver problemas, mentres outras formacións políticas saen á rúa para queimar contedores e agredir a comerciantes e xornalistas.

Así mesmo, Paula Prado cualificou o equipo de candidatos e candidatas lucenses ao Congreso e ao Senado, encabezados por Francisco Conde e José Manuel Barreiro, como unha “gran candidatura”, capacitada para obter nestas Eleccións Xerais, como xa fixo en 2023, “os mellores resultados de España para o PP”.

ELENA CANDIA: “LUGO SUFRIU DE PRIMEIRA MAN O DESGOBERNO DE SÁNCHEZ”

Finalmente, a presidenta provincial do PP de Lugo, Elena Candia, puxo en valor o “bo equipo representativo de homes e mulleres, xente que se incorpora por primeira vez e xente con experiencia, son persoas de distintos sectores que coñecen á perfección as necesidades dos nosos concellos e dos nosos sectores produtivos, a carencia de infraestruturas e, en definitiva, o que a nosa provincia necesita”. Nese sentido, pediulles a todos eles que “traballen por e para Lugo”.

Candia cre que “os lucenses coñecen como Lugo sufriu de primeira man a situación dun desgoberno, a carencia de orzamentos e os compromisos incumpridos”. E subliñou que “o que temos enfronte, cando tivo que elixir entre Partido Socialista, entre Pedro Sánchez, entre BNG ou Lugo, sempre todos, sen distinción, elixiron o primeiro”.

Por iso, “ademais dos mellores desexos” para o proxecto que lidera Alberto Núñez Feijóo porque “será o mellor para a nosa cidade e para Galicia”; insistiu en pedir que “Lugo estea no centro”. Con ese obxectivo, “traballaremos para que se acade ese resultado e que Lugo estea no centro do seu traballo”.

Paula Prado defende o PP como “única opción de cambio” para poñer fin á inseguridade xerada pola esquerda nas cidades como A Coruña

A secretaria xeral do PPdeG, Paula Prado, defende que o Partido Popular é a única opción real para o cambio en España e para o restablecemento de servizos públicos esenciais como a seguridade cidadán. “Non podemos vivir nun país con medo, con comercios e hostalería coas reixas baixadas por culpa da violencia e a incitación ao odio da esquerda”, sinalou nunha visita á Coruña, cidade na que precisamente se viviron actos violentos e vandálicos hai unhas semanas, a través de mobilizacións convocadas por partidos de esquerda.

Así o manifestou a número dous dos populares galegos durante un paseo pola cidade, acompañada polo presidente do PP da cidade e candidato á Alcaldía, Miguel Lorenzo, e outros cargos do partido. No paseo pola cidade coñeceron de preto as necesidades da veciñanza e as consecuencias da inseguridade na que é a cidade galega con máis número de delitos. “Isto non é casual, aquí goberna Inés Rey, unha socialista como Pedro Sánchez que en oito anos fixo que a seguridade desaparecera da acción do Goberno”, sinalou Prado.

Para Prado, o BNG é “cómplice” deses oito anos de inseguridade, xa que o independentismo galego “é socio do PSOE, antepuxo os seus intereses a cambio de nada para Galicia”. Neste sentido, lembra que votar ao BNG e votar ao PSOE “é exactamente o mesmo, son o mesmo perro con distinto colar”. Así, insiste, a única forma de que haxa un cambio de Goberno é co Partido Popular que lidera Alberto Núñez Feijóo.

Destacou o modelo de xestión, rigor e responsabilidade de Feijóo como “imprescindible, máis que nunca, para poñer aos servizos públicos no lugar que merecen”.

A número dous dos populares galegos tamén se referiu a folga nacional convocada pola esquerda e os sindicatos o próximo 11 de novembro contra a oposición, lembrando que estes partidos e os seus satélites “non fixeron nada en oito anos de Goberno de Sánchez”. Para Prado, resulta “insólito” que se convoque unha folga “en contra dun partido que non goberna e non ten responsabilidades”, asunto que supón, de novo, “incitación ao odio e a violencia”, como ocorreu coas manifestacións na Coruña.

“Non podemos consentir, como vimos na Coruña, que a violencia, a inseguridade e os saqueos fagan que os comercios teñan que pechar as súas portas”, concluíu.

MIGUEL LORENZO AUMENTARÁ O NÚMERO DE POLICÍAS LOCAIS CANDO SEXA ALCALDE: “OS CORUÑESES SOFREN 28 DELITOS AO DÍA”

Pola súa banda, Miguel Lorenzo comprométese a que cando sexa Alcalde aumentará o número de policías locais, a recuperar a Policía de Barrio e a construír un novo cuartel para a policía municipal, como medidas prioritarias ante o récord de delitos na Coruña. As estatísticas oficiais, lembra, reflicten que os coruñeses sofren 28 delitos ao día.

“Segundo as estatísticas do Ministerio do Interior correspondentes ao primeiro semestre do ano, os delitos non deixan de aumentar na nosa cidade, xa se produciron un 10% máis que hai un ano e seguimos sendo a cidade de Galicia con maior número de delitos que xa superan os 5.000 e son mil máis que en Vigo”, explicou.

Para Lorenzo, Inés Rey leva anos sen facer caso ás propostas do Partido Popular para solucionar este grave problema de inseguridade. “Hai outra forma de gobernar para que os coruñeses se sintan seguros de novo, e chegará o próximo mes de maio da man do PP”, engadiu.

García Comesaña pide “un apoio maioritario” a Feijóo “fronte a un PSOE ineficaz e neglixente” e os seus socios, como o BNG

O cabeza de lista do PP ao Congreso dos Deputados pola provincia de Pontevedra, Julio García Comesaña, solicitoulle aos cidadáns un “apoio maioritario e unha confianza rotunda” en Alberto Núñez Feijóo o próximo 29 de novembro para que España recupere unha xestión eficaz, unha fiscalidade xusta e unha atención real ás necesidades da xente.

O número 1 da candidatura popular sinalou que o único voto útil para os 950.000 pontevedreses é o do PP “fronte a un PSOE ineficaz e neglixente nos servizos públicos e que leva oito anos castigando e discriminado á nosa provincia cos investimentos”; e a outras opcións políticas baseadas no extremismo, os seus socios como BNG.

Acompañdos pola secretaria xeral do PPdeG, Paula Prado, e polo presidente provincial do PP de Pontevedra, Luis López, os candidatos e candidatas ao Congreso e o Senado pola provincia de Pontevedra elixiron Vigo para lanzar as súas primeiras mensaxes na precampaña para as eleccións xerais.

Julio García Comesaña relatou algúns dos agravios e recortes de Pedro Sánchez con Pontevedra: unha provincia sen avións, estradas cheas de socavóns, trens con retrasos e avarías, as cidades de Vigo e Pontevedra sen as infraestruturas que precisan, un intento constante de acabar co noso litoral, un sector agrogandeiro sen defender en Europa, problemas na extensión axeitada de Internet e telefonía móbil, empresarios e autónomos asfixiados a impostos e uns cidadáns que tremen cando teñen que ir ao súper, botar gasolina ou pagar a electricidade. O candidatoavogou pola “experiencia de xestión demostrada” de Alberto Núñez Feijóo para que se atenda á provincia “tras máis de oito anos de abandono absoluto”.

PAULA PRADO: “DIMITIREMOS A SÁNCHEZ NAS URNAS”

A secretaria xeral do PPdeG reafirmouse en que o Partido Popular de Galicia ten o mellor equipo de candidatos e candidatas ao Congreso e ao Senado; sinaladamente, na provincia de Pontevedra, con Julio García Comesaña como número un polo Congreso e cun equipo, en ambas cámaras, que conxuga a experiencia de ter estado xa nas Cortes Xerais e a ilusión dos que se incorporan por primeira vez, contando con perfís mozos.

Neste sentido, puxo en valor que os populares cumpren coa súa palabra a diferencia do PSOE, como demostra a dimisión este martes do xa ex titular de Transporte, Óscar Puente, que asegurou que vén motivada polas enquisas desfavorables a raíz do accidente ferroviario de Urda. En todo caso, lembrou que “o verdadeiro culpable” é Pedro Sánchez, pois foi el quen situou tanto Puente como a José Luis Ábalos á fronte das infraestruturas españolas. “Dimitiremos a Sánchez nas urnas”, subliñou.

Paula Prado, quen insistiu en que os populares non pararán ata coñecer todas as explicacións e ter as garantías de que non se repitan traxedias como a de Urda e a de Adamuz, chamou a recuperar a decencia a partir do 29N, con Galicia como “o motor do cambio”, para deixar atrás a propaganda, a neglixencia e a indecencia, que encarnan o peor da política.

Un cambio -incidiu- que só garante Alberto Núñez Feijóo, como avalan os seus anos á fronte da Xunta, polo que o PP se erixe na “única opción útil” para evitar que Sánchez siga á fronte do Goberno, e devolver a Galicia todo o que lle arrebatou  xunto aos seus socios do BNG estes oito anos coa súa política de recortes e castigo a nosa terra.

LUIS LÓPEZ: “NECESITAMOS FACER AS COUSAS MELLOR QUE NUNCA”

Finalmente, o presidente provincial do PP de Pontevedra, Luis López, foi o encargado de pechar o acto de presentación dos candidatos ao Congreso e ao Senado, no que lle pediu aos cidadáns “que rematen con este ciclo negro” e que aposten polo Partido Popular e por Alberto Núñez Feijóo “como única solución de futuro para non ter que lamentar que veñan outros catro anos perdidos máis para a provincia e para Galicia”.

Lembrou que o PP “é o partido favorito dos pontevedreses pola súa proximidade e porque realmente é o único que os escoita, entende e atende” e anunciou que todos os militantes “darán o mellor de si mesmos” nas próximas semanas para volver gañar as eleccións despois de facelo en todas as convocatorias que houbo na presente década. “Necesitamos facer as cousas mellor que nunca para obter un resultado histórico e contribuír ao cambio político que precisa España da man de Alberto Núñez Feijóo”, manifestou.

Paula Prado anima aos galegos e galegas a “formar parte do cambio” arroupando a Feijóo nun acto multitudinario en Santiago o 14 de novembro

A secretaria xeral do PPdeG, Paula Prado, anima aos galegos e galegas que queiran “formar parte do cambio” en España a arroupar a Alberto Núñez Feijóo nun gran acto multitudinario no Multiusos Fontes do Sar, en Santiago de Compostela, que se celebrará o próximo 14 de novembro. O obxectivo, di Prado, é demostrarlle ao presidente do PP nacional que Galicia “está con el, traballando sen descanso para que sexa o próximo presidente de España”. Tamén estará presente o líder do PPdeG, Alfonso Rueda, nun acto no se que se prevé unha gran mobilización de afiliados e simpatizantes.

Así o manifestou esta mañá na sede autonómica do partido, tras unha reunión de traballo do Comité de Campaña do PPdeG para as Eleccións Xerais, no que Prado exerce como directora de campaña. Neste sentido, o mitin de Feijóo en Santiago tamén servirá para amosar que a maquinaria do PP en Galicia está “sempre engraxada” e conta cun “gran equipo” para contribuír a “darlle esplendor a España”.

A número dous dos populares galegos reivindica o proxecto de Feijóo como “o único válido” para que España funcione, deixando a un lado a todos eses partidos que estes oito anos deron o seu apoio a Sánchez. “Acabouse o tempo do BNG, en Galicia non forma parte da ecuación do cambio, porque aquí a única opción para desaloxar a Sánchez da Moncloa é o Partido Popular”, engade.

Neste punto, tamén criticou que a esquerda “intente branquear” a imaxe de Óscar Puente e de Pedro Sánchez, despois de que se coñecese onte a dimisión do xa ex ministro de Transportes, cando realmente non se vai pola traxedia de Urda, senón polos “malos resultados nas enquisas”, o “único que lles importa”.

Para Prado, esta dimisión fíxose “baixo o respaldo do Goberno, de Sánchez, e de diferentes dirixentes do PSOE”. Así, lembrou que ata o propio Besteiro dixo que Puente representa o mellor da política. “Se de verdade representaran o mellor da política, o xa exministro dedicaríase a xestionar e non a tuitear. Encarna a peor política”, subliña. A secretaria xeral dos populares galegos insiste en que a responsabilidade é de Pedro Sánchez, “quen primeiro puxo as Infraestruturas en mans de Ábalos e despois de Puente”, polo que “os dimitiremos nas urnas”.

No encontro de traballo, no que se abordaron as próximas accións da campaña a 25 días de que se celebren as eleccións, Prado lembrou o obxectivo de percorrer Galicia para escoitar á veciñanza e dar a coñecer o proxecto de Alberto Núñez Feijóo, “un contrato con España, porque el, como ben sabemos en Galicia, é unha persoa de palabra”.

Tamén aproveitou para defender o modelo de “rigor, responsabilidade e xestión” que caracteriza ao PPdeG, fronte a “propaganda” do PSOE, “consentida” polos seus socios de goberno do independentismo galego.

No comité de campaña, reivindicaron que o Partido Popular “ofrece seguridade e promete devolver a España todo o que Sánchez lle arrebatou”.

O Parlamento aproba reclamar medidas para paliar o incremento dos custos do gasóleo e dos fertilizantes ante a inacción do Executivo central

O Parlamento de Galicia vén de aprobar, hoxe, a iniciativa do Grupo Parlamentario Popular que reclama medidas para paliar o incremento dos custos do combustible e dos fertilizantes e que están a asfixiar a actividade gandeira e pesqueira ante a inacción do Goberno central. “Pedimos axudas suficientes, inmediatas e eficaces. Pedimos menos burocracia e máis coordinación coas Comunidades autónomas”, sinalou o deputado popular Miguel Fidalgo.

Neste senso, explicou que, desde o inicio da guerra de Irán, o gasóleo agrícola incrementouse máis dun 60 % e o gasóleo pesqueiro, arredor dun 88 %. Unha suba á que hai que engadirlle, dixo, o encarecemento dos fertilizantes, dos pensos e da enerxía e, tamén, dos aparellos e da carnada. Recordou que a Unión Europea permite mobilizar axudas de ata o 70 % dos sobrecustos derivados do incremento do combustible e dos fertilizantes, pero que o Executivo de Pedro Sánchez decidiu limitar esa axuda “a uns míseros 20 céntimos por litro”.

Asemade, fixo referencia a unha demanda do propio sector pesqueiro, que reclama unha axuda de polo menos 40 céntimos por litro, calculada sobre o consumo real e aplicada directamente no momento de repostar. Tal e como sinalou Fidalgo, as axudas deben responder a ese incremento real dos custos e chegar a tempo, non converterse, en cambio, “nunha carreira de obstáculos burocráticos. Para o deputado popular, o agro e o sector pesqueiro galegos “non poden parar”: “Canto máis teñen que perder para que o Goberno de España entenda que estamos ante unha situación de emerxencia?”.

Fronte á inacción, a “cero empatía” dun Executivo central “que parece gobernar contra a xente”, fixo fincapé en que “a Xunta do presidente Rueda si está ao lado dos sectores produtivos”, e recordou os 3,6 M€ en axudas directas para mitigar o incremento dos prezos dos fertilizantes e do gasóleo. Unha achega, apuntou, da que se beneficiarán arredor de 4.500 agricultores e gandeiros galegos.

A COMPLICIDADE DOS GRUPOS DA OPOSICIÓN
Afeou a actitude de complicidade de socialistas e nacionalistas galegos co Goberno de Madrid, a quen acusou de “levar á ruína” ao país e de ter “cero empatía coa Galicia que madruga”. “Cando houbo que elixir entre Pedro Sánchez e Galicia, elixiron sempre Pedro Sánchez”, lamentou. “O BNG –continuou- é moi bravo en Galicia, pero moi manso en Madrid. Demasiada comprensión co goberno que ten nas súas mans boa parte das solucións que hoxe reclama o sector”.

Por outra banda, Fidalgo criticou o voto en contra do PSdeG e que prefira aplaudir ao peor goberno de España desde que hai democracia a defender “a quen produce, traballa e sostén unha parte esencial da economía galega”.

Paula Prado reivindica o PP como “á única opción útil en Galicia” para poñer fin ao Goberno de Sánchez e dos seus “cómplices” do BNG

A secretaria xeral do PPdeG, Paula Prado, reivindica o Partido Popular como “á única opción útil en Galicia” de cara ás Eleccións Xerais do 29 de novembro, xa que calquera outra alternativa posibilitará que Sánchez teña opcións de seguir gobernando. Igualmente, lembra que o BNG tampouco entra na “ecuación do cambio”, xa que agora pide responsabilidades e dimisións, pero “en oito anos non foi capaz de romper co Goberno”. Para Prado, aqueles partidos políticos que apoiaron na investidura a Sánchez -coma o BNG- “son tan culpables da situación que vive España coma é o PSOE”.

Así o manifestou a número dous dos populares galegos nunha visita a Pontevedra, na que estivo acompañada pola número dous ao Congreso pola provincia, Pepa Pardo, así como o número tres ao Congreso, Pedro Puy, e o suplente da candidata número 3 ao Senado, Guille Juncal. Tamén participou no paseo o presidente do PP local e candidato á Alcaldía, Rafa Domínguez. Durante o percorrido polas rúas pontevedresas, achegáronse á veciñanza e aos comerciantes para presentarlles o proxecto do PP de Alberto Núñez Feijóo como a mellor opción para o 29N, xa que ofrece “rigor, xestión, seguridade e recuperar todo aquilo que o Goberno de Sánchez e os seus socios nos arrebataron”.

“A única solución é confiar no Partido Popular, o partido que se preocupa realmente das necesidades de todos. E nós non queremos revanchas, tan só traballar para cambiar o país”, reivindica Prado, que insiste en que Galicia será o “motor do cambio” para que Alberto Núñez Feijóo sexa o próximo presidente do Goberno de España.

Para a secretaria xeral do PPdeG, o Goberno de Sánchez e os seus socios, que “antepón a propaganda á xestión”, non pode continuar un minuto máis. “España está en fallo sistémico por culpa de Sánchez, preocupado só por resistir”, engade.

En canto ao independentismo galego, que goberna na cidade de Pontevedra, a secretaria xeral salientou que a “verdadeira cara” deste partido é que cando ten que elixir entre Sánchez ou Galicia, “sempre elixe Sánchez”, polo que resulta evidente que non pode estar na ecuación do cambio en España. “A mellor España merece o mellor goberno, xógase o futuro do noso país”, engade.

Ademais, puxo en valor a Alberto Núñez Feijóo e o seu proxecto de “seriedade, experiencia e xestión por encima de calquera interese”, co obxectivo de devolverlle á cidadanía a confianza no sistema.

LEMBRANZA PARA AS VÍTIMAS DA TRAXEDIA DE URDA

Con motivo desta visita a Pontevedra, a número dous dos populares galegos tivo palabras de recordo para as vítimas do accidente ferroviario de Urda e as súas familias, especialmente para os achegados de Mari Carmen Vázquez, veciña de Cerdedo Cotobade, moi vinculada á cidade, que faleceu no tráxico suceso.

O PPdeG contrapón a política de feitos e investimentos da Xunta en materia de vivenda coa propaganda electoralista do Goberno de Sánchez

O deputado do Grupo Parlamentario Popular Moisés Rodríguez puxo hoxe en valor as medidas estratéxicas do Goberno galego destinadas a que “cada vez máis familias teñan opción a desfrutar dunha vivenda digna a prezos accesibles”. Así, contrapuxo o compromiso da Xunta, que se mide en “programación, feitos e en investimentos”, coas proclamas e a “propaganda electoralista” do Executivo de Pedro Sánchez.

O parlamentario popular recordou que, no 2027, a Xunta vai destinar case 520 M€ a políticas de vivenda –un 50% máis que en 2026- e que, no referido ao desenvolvemento de vivenda de promoción pública a cifra acada os 326 M€, “exactamente o dobre”.

“Galicia non improvisa a súa política de vivenda”, apuntou Moisés Rodríguez, tras facer referencia ao reto asumido polo Goberno galego de converter a vivenda como un dos piares fundamentais nesta lexislatura, facendo fincapé nas más de 4.600 VPP en marcha e no obxectivo de duplicar o parque público residencial e acadar as 8.000 vivendas en 2028, todas elas con cualificación permanente. “Construír máis significa tamén garantir solo”, indicou Moisés Rodríguez. Por iso, a Xunta puxo en marcha unha Estratexia Galega de Solo Residencial que permitirá desenvolver chan para aproximadamente 25.000 novas vivendas, das que 20.000 serán protexidas.

Xunto á construción e á mobilización do solo, o parlamentario popular detallou as modificacións normativas que o Goberno galego leva impulsando para dinamizar o mercado. Entre elas, destacan a conversión de locais comerciais en vivendas, a recuperación de edificios inacabados ou a cualificación indefinida das vivendas públicas e protexidas en solo público, asegurando o seu uso social permanente.

Asemade, destacou as novas medidas para que “máis familias dispoñan dunha vivenda pública protexida”, elevando a 4 veces o IPREM –4,5 para familias numerosas-; reservando o 30% das vivendas públicas en venda para persoas de entre 36 e 45 anos con fillos pequenos; e reservando, tamén, o 20% das novas VPP para os inscritos no rexistro de demandas con máis de cinco anos de antigüidade.

Denunciou a improvisación do Goberno central na elaboración dos dous decretos lei e a súa ineficacia, tal e como se puxo de manifesto coa retirada de vivendas do mercado do alugueiro e o incremento da inseguridade xurídica para os propietarios: “O Estado debería construír vivenda, incentivar a protexida e mobilizar as baleiras”. Asemade, referiuse ás consecuencias declaración de zonas tensionadas, unha medida fracasada tal e como reflicten os datos: na Coruña, descendeu o 60% do número de contratos; e, en Santiago, no primeiro mes desde a posta en marcha da medida, un 55%.

Para rematar, sinalou que o PPdeG segue a ser o único valor seguro para garantir o dereito a unha vivenda digna.

O PPdeG pide a modernización e o acondicionamento integral do edificio de almacéns no porto de Sada-Fontán

O PPdeG vén de solicitar que se liciten canto antes as obras para cambiar a cuberta e acondicionar o edificio de almacéns e locais dos armadores no porto de Sada-Fontán, ao tratarse dun espazo estratéxico onde tradicionalmente se concentran tamén os servizos da lonxa e os talleres de carpintería de ribeira.

A través dunha iniciativa parlamentaria, impulsada pola deputada Nazareth Cendán, os populares poñen de manifesto a necesidade de atender as reclamacións que o sector marítimo-pesqueiro local vén trasladando nos últimos tempos para mellorar as condicións de traballo e xestión dos profesionais neste espazo portuario. Neste senso, Cendán apuntou que o acondicionamento e a modernización destas instalacións é básico ante os efectos da acción do mar e dos fenómenos meteorolóxicos, pero sobre todo “para que o sector poida prestar un labor máis eficiente e en condicións de máxima seguridade”.

Tal e como expuxo, a iniciativa “encaixa co compromiso que o Goberno galego mantén coa transformación dos portos pesqueiros en motores de crecemento económico, social e medioambiental, a través da mellora das súas infraestruturas”. Segundo explicou, a normativa galega de obras en espazos públicos establece que as actuacións de renovación deben priorizar a eliminación de materiais degradados ou antigos, substituíndoos por alternativas axeitadas como cubertas metálicas de alta resistencia salina.

Deste xeito, salientou que cómpre corrixir o deterioro do teitume mediante unha impermeabilización completa que evite filtracións de humidade e frear a corrosión dos elementos metálicos da envolvente provocada pola forte exposición ambiental.
ESCOITA ACTIVA E CONTACTO DIRECTO CO SECTOR
Pola súa banda, a portavoz do Grupo Municipal do Partido Popular de Sada, Esperanza Arias, quen acompañou á deputada autonómica na súa visita á zona portuaria, destacou que “esta iniciativa nace do contacto directo co sector marítimo-pesqueiro de Sada e da escoita activa das súas peticións”. Así, subliñou o compromiso da formación local ao trasladar estas demandas ao Parlamento de Galicia co obxectivo de “garantir a reparación e o acondicionamento dos almacéns do porto”.

A iniciativa do Grupo Popular pon o foco na necesidade de executar unha adecuación tanto interior como exterior do edificio de locais. O obxectivo prioritario desta intervención é recuperar a estanquidade do inmoble para lograr unha optimización óptima do espazo de almacenamento dos aparellos, garantindo así a total funcionalidade e operatividade duns almacéns esenciais para o día a día dos armadores e mariñeiros de Sada.

Nicole Grueira: “A Xunta investiu en apenas dous anos máis no colexio de Pol que o concello en dezanove”

O Parlamento de Galicia aprobou recentemente unha iniciativa do Grupo Parlamentario Popular na que se insta á Xunta de Galicia a requirirlle ao Concello de Pol o cumprimento “efectivo e inmediato” das competencias que legalmente lle corresponden no CEIP Rosalía de Castro de Mosteiro. Neste senso, a deputada e portavoz do PPdeG no municipio, Nicole Grueira, referiuse á falta de mantemento, conservación, vixilancia e limpeza das instalacións.

Tal e como sinalou, “o deterioro” que presenta o centro é consecuencia directa do abandono continuado das obrigas do concello. Así, alertou de que non se trata de feitos illados, senón de carencias graves que a comunidade educativa leva tempo denunciando sen recibir resposta. Entre elas, destacou o arranxo da cancela traseira –que afecta á seguridade do recinto-, deficiencias na limpeza ordinaria e problemas de filtracións: “Falamos de persianas rotas, enchufes estragados, cables soltos, aulas que precisan pintura e canlóns sen limpar”.

Fronte a este desleixo, puxo en valor o compromiso do Goberno galego co CEIP de Pol. “A Xunta investiu en apenas dous anos máis no colexio de Pol que o concello en dezanove”, apuntou, ao lembrar o investimento de arredor de 30.000 euros na renovación de ventás da aula infantil e na mellora das instalacións da cociña.

TRES ANOS SEN SERVIZO DE CONSERXERÍA
Segundo expuxo é “especialmente preocupante” a situación do servizo de conserxería, xa que o colexio iniciou o curso 2026-2027 sen conserxe, prolongando esta carencia por terceiro ano consecutivo. Trátase, dixo, dun servizo básico para atender as necesidades cotiás do centro e colaborar no normal desenvolvemento da actividade educativa que o Concello non está a cubrir.

Grueira subliñou que o desleixo constante e a falta de resposta municipal alcanza tamén os gastos de funcionamento. Referiuse a que no ano 2021 o centro sufriu unha reclamación da subministradora eléctrica por máis de 16.000 euros en facturas pendentes que correspondían ao Concello. E criticou que o propio colexio tivese que adiantar cartos para unha desratización urxente por razóns de salubridade.

Neste sentido, a iniciativa aprobada esixe que o Concello asuma as tarefas de conservación, mantemento e vixilancia. E aseverou que non se pode pretender que sexan outras administracións, o propio centro ou as familias quen suplan de maneira permanente unhas obrigas que son estritamente municipais. Finalmente, a deputada insistiu en que a situación require unha actuación urxente porque o alumnado ten dereito a desenvolver a súa actividade nunhas instalacións seguras, dignas e adecuadamente mantidas.