Alfonso Rueda reivindica que a “boa política” comeza “no local” e aplaude o legado dos exalcaldes e exconcelleiros do PPdeG

O presidente do PPdeG, Alfonso Rueda, reivindicou hoxe en Sanxenxo que a “boa política” comeza “no pequeno, polo local”, poñendo en valor os esforzos de exalcaldes e exconcelleiros populares históricos de Galicia, os que deixaron “un importante legado” para que o PPdeG sexa “o que é hoxe: unha gran familia”.

Así o manifestou durante o acto de homenaxe, que cualificou de “bonito, emocionante e moi xusto”, a antigos representantes populares da provincia de Pontevedra. Baixo o nome “Compromiso compartido”, é un recoñecemento público a quen gobernaron coas siglas do partido, liderando o desenvolvemento das infraestruturas, a economía e os servizos locais dos seus respectivos concellos; así como ao resto de representantes públicos que dedicaron anos de servizo na oposición ou en tarefas de goberno local. Neste sentido, os populares instaron a fixarse nestes representantes para “coller impulso e ánimo” para os próximos retos electorais, tanto para as Xerais do 29N como para as municipais de 2027.

O acto, con máis de 1.500 asistentes, serviu para poñer en valor a vocación de servizo público, proximidade e entrega absoluta de representantes do PPdeG nunha provincia que, historicamente, contribuíu aos grandes fitos electorais do partido. Na homenaxe interviñeron tamén o presidente honorífico do PPdeG e expresidente provincial, Mariano Rajoy, e o presidente do PP na provincia de Pontevedra, Luis López, facendo de anfitrión o alcalde de Sanxenxo, Telmo Martín.

Durante o seu discurso, Rueda puxo en valor a importancia de recordar de “onde vimos”. “Estamos aquí porque moita xente nos trouxo aquí e este acto é de xustiza”. Todas as historias que viviron os presentes ao longo da súa vida política reflexan que “só hai unha historia, a desta gran familia, o gran equipo que formamos”. “Dicimos que somos o partido que máis se parece a Galicia”, e se por algo é “é porque Galicia son familias”.

“UN ESFORZO MÁIS, SEGUIR TRABALLANDO COMO FACEMOS”

O líder dos populares galegos tamén fixo referencia aos próximos comicios do 29N, insistindo en que Galicia ten que ser “o motor do cambio” para elevar a Alberto Núñez Feijóo á presidencia do Goberno de España. “Feijóo meréceo, porque foi presidente de Galicia durante moitos anos, porque nos coñece ben e porque está á fronte dun reto que merece todo o apoio do mundo”, sinalou Rueda. “Para iso pídovos un esforzo máis, seguir traballando como facemos: con verdade, sentidiño e xenerosidade”, engadiu, sen necesidade de “ter que falar doutros, como fan outros partidos políticos, que se dedican a criticar mentres nós nos dedicamos a traballar”.

Neste sentido, referiuse ao expresidente do Goberno, Mariano Rajoy, quen tamén tivo que afrontar o reto que está a vivir agora Alberto Núñez Feijóo. “El sabe mellor que ninguén que hai que comezar dende abaixo”, dixo o número un do PPdeG. “Mariano Rajoy ve as cousas dende onde hai que velas, dende os concellos”, porque todo o que “aprendes nos municipios, se pode aplicar en moitos outros lugares”.

De feito, Mariano Rajoy afirmou que daquela época se levou “grandísimos aprendizaxes”. “Ao fin, só recordamos o que estamos vivindo hoxe neste acto: que todos fomos concelleiros ou alcaldes do Partido Popular e a moita honra, moi orgullosos”, pedindo tamén un esforzo para levar a Alberto Núñez Feijóo á presidencia do Goberno de España.

LUIS LÓPEZ: “O VOSO TRABALLO É A NOSA CARTA DE PRESENTACIÓN”

Pola súa banda, o presidente provincial de Pontevedra, Luis López, deu as grazas na súa intervención aos que “renunciastes ao voso tempo, á vosa tranquilidade, para loitar por un lugar mellor para a vosa xente; aos que vos arremangastes nos 80, nos 90, nos 2.000 e agora; aos que sempre estabades aí; aos que nos ensinastes o que é traballar polos demais, o que significa ser xente de palabra, o valor do sentidiño, ter principios, camiñar ao carón da xente e saber xestionar, douvos as grazas”.

O presidente provincial fixo mención especial “aos que nos cederon o testemuño, a eses mestres da política próxima e a eses concelleiros cuxa pegada vive nos seus concellos”. Con especial emoción, lembrou a aqueles que hoxe foron representados polas súas familias “porque xa non están con nós, pero sempre estarán no recordo”. “Grazas de todo corazón en nome do millón de persoas que viven aquí”, engadiu.

“Dende o ano 1979, houbo 7.960 persoas que foron nas listas do PP, tivemos 2.600 concelleiros e un total de 152 alcaldes e alcaldesas, unhas cifras extraordinarias e que se traducen no que somos: unha gran familia que arrima sempre o ombro e fai piña, como é agora neste acto”, indicou Luís López. Ese orgullo pola andaina compartida é o “motivo principal polo que nace este acto, subliñando que congregar a máis dun milleiro de ex-concelleiros é un fito que “só está ao alcance do PP”, dixo.

Neste sentido, Luis López contrapuxo a solidez do PP coa situación doutras formacións: “Hai partidos que non son quen de reunir nin á xente que teñen agora porque se levan mal entre eles, moito menos aos que militaron no pasado, e hai partidos que naceron onte e non teñen nin historia que recordar, nin persoas que reunir”. Pola contra, sinalou que os motivos dos populares están “na porta da casa”, xa que non hai camiño, praza, pavillón ou centro cultural na provincia que non leve a impronta dos homenaxeados.

“UNHA HISTORIA COMPARTIDA”

O acto, que contou coa entrega de agasallos a exalcaldes e exalcaldesas, converteuse nunha demostración de forza e unidade orgánica e na reafirmación da cohesión do partido en Galicia e, concretamente, en Pontevedra, provincia na que o PPdeG goberna en 28 concellos.

A alcaldesa de Marín, María Ramallo, moderou o coloquio central do acto, titulado “Unha historia compartida”, no que compartiron as súas experiencias vitais e profesionais Purificación Álvarez, mestra e alcaldesa da Guarda entre 1989 e 1999; Juan José González, concelleiro da Illa de Arousa entre 1997 e 2019, que logrou manter a súa acta de forma ininterrompida durante máis de dúas décadas, e Manuel Gómez, concelleiro de Lalín durante máis de 30 anos.

Paula Prado destaca no Congreso Provincial de NNXX de Ourense a “forza” da mocidade galega que contribuirá ao “gran cambio” no Goberno de España

O IX Congreso Provincial de Novas Xeracións de Ourense, celebrado hoxe baixo o lema “Somos quen cambia as cousas”, elixiu ao ourensán Martín Gil como novo presidente das NNXX da provincia, cun 98,5% dos votos nun acto que congregou a máis de 200 mozos. “Mozos así representan á xuventude galega, comprometida e rigorosa, que vai contribuír ao gran cambio necesario neste país”, sinalou a secretaria xeral do PPdeG, Paula Prado, na clausura do Congreso. No acto tamén participaron o presidente provincial do PP de Ourense, Luis Menor, e a presidenta de NNXX de Galicia, Nicole Grueira. Prado e Menor instaron á mocidade popular a mobilizarse nas Eleccións Xerais do 29 de novembro, para demostrar “a forza de Galicia” fundamental para poñer fin ao sanchismo e conseguir que Alberto Núñez Feijóo sexa o próximo presidente do Goberno de España.

A número dous dos populares galegos felicitou a Martín Gil polo reto político que asume e tamén agradeceu o traballo do presidente saínte, Nacho Campo. “Os mozos son fundamentais para que este 29N elixamos o Goberno que queremos, para decidir entre a delincuencia ou a decencia”, destacou.

Lembrou que o PPdeG é o partido máis votado polos mozos e mozas de Galicia, sendo a primeira opción do electorado menor de 30 anos, un éxito que agarda que se repita. “Non demos nada por gañado nin nada por perdido. O que pase este 29N será fundamental para os seguintes retos electorais”, subliñou.

Paula Prado enxalzou ás Novas Xeracións como a organización xuvenil máis importante e comprometida de Galicia, “sen pancartas, sen ruído e sen radicalismos”, fronte a unha esquerda “cada vez máis desnortada” e un independentismo galego “que caerá co sanchismo que apoian en Madrid a cambio de nada para Galicia”.

En contraste, puxo en valor o Goberno galego de Alfonso Rueda como exemplo das políticas que se preocupan polo que lle importa aos galegos e galegas, especialmente en temas esenciais como a vivenda. “É o gran problema da cidadanía, unha dificultade que afecta, sobre todo, aos mozos que non poden independizarse”, destacou Prado, que criticou os oito anos de política sanchista “antivivenda” fronte aos esforzos do Executivo autonómico por construír vivenda e redobrar esforzos para facilitar o acceso a un fogar para os menores de 36 anos, entre outras medidas pioneiras.

LUIS MENOR: “O PP É O ESPAZO IDÓNEO PARA QUE MOCIDADE CONTRIBÚA ÁS DECISIÓNS QUE AFECTAN Á SÚA TERRA”

Pola súa banda, o presidente provincial do PP de Ourense destacou que este Congreso culmina a campaña que permitiu percorrer as nove comarcas ourensás para dar voz á mocidade, congregando a preto de 500 participantes e demostrando que a organización xuvenil “ten ganas de traballar” polo futuro da provincia.

Neste contexto celebrou dous fitos clave: a creación da agrupación de NNXX de Verín e a constitución do primeiro equipo comarcal na Limia. Un intenso esforzo territorial que o presidente provincial pediu manter a Martín Gil, para seguir medrando por toda a provincia, “e demostrar o voso profundo compromiso co partido e coa sociedade ourensá”.

Agradecido ao novo presidente da organización xuvenil e ao seu equipo polo paso dado, o líder provincial reivindicou ao PP como o espazo idóneo para que a mocidade poida formarse e “contribuír ás decisións” que afectan á súa terra. Así, puxo en valor a política municipal como “o primeiro chanzo e a canteira” do partido, instando á nova dirección de NNXX en Ourense a fomentar a implicación política xuvenil nos concellos.

O presidente provincial remarcou que este conclave chega nun momento histórico ante o “inminente e transcendental” reto das eleccións xerais do próximo 29 de novembro. Menor encomendou á nova directiva o “encargo maiúsculo” de traballar ao máximo para facer presidente a Alberto Núñez Feijóo, reconstruír España e atender as necesidades máis destacadas da mocidade. Unha “proba de lume” electoral, na que mostrou a súa absoluta confianza pola preparación e enerxía da organización.

MARTÍN GIL: “QUERO LOGRAR QUE NINGÚN MOZO DE OURENSE SINTA QUE A POLÍTICA NON VAI CON EL”

Para Martín Gil, asumir a presidencia de NNXX de Ourense representa un firme compromiso cos mozos da provincia. O dirixente mostrou o seu profundo agradecemento ao presidente provincial e ao conxunto do PPdeG por brindarlles apoio, “dándonos espazo, escoitándonos e confiando en nós”. A cambio, ofreceu a “lealdade, traballo e ilusión que nos caracteriza” para afrontar esta nova etapa.

Na súa faceta como profesor, confesou que constata diariamente como os mozos senten que a política actual non fala deles. Por iso, asumiu o reto de lograr “que ningún mozo de Ourense sinta que a política non vai con el”. O novo presidente definiu á organización non só como unha escola na que “aprendemos a escoitar, a organizar, a debater e a servir”. Novas Xeracións, afirmou, é tamén “a voz dunha xeración con problemas moi concretos”, destacando o reto da vivenda e o desexo de non ter que elixir entre a súa terra e o seu proxecto de vida.

Asegurou que a súa principal tarefa será trasladar todas estas inquietudes directamente ao partido para “transformalas en propostas políticas reais”. Para lograr este fin, anunciou a súa intención de ampliar a base social da formación e saír a buscar aos mozos “alí onde están”. Gil subliñou que asume esta responsabilidade nun momento moi delicado para España, pero que á vez representa unha gran oportunidade política, pois o país merece un Goberno que “pense nas próximas xeracións” para garantir un futuro de certeza.

Neste sentido, apelou ao traballo intenso para as próximas eleccións porque “as novas xeracións queremos ser decisivas”. Concluíu lembrando que Ourense sempre foi unha provincia fiel ao proxecto do PP “e ten que volver demostralo nas urnas”.

NICOLE GRUEIRA: “TRABALLEMOS POLO FUTURO QUE QUEREMOS”

Por outra banda, a presidenta de NNXX de Galicia, Nicole Grueira, agradeceu o traballo da mocidade ourensá e animou aos seus compañeiros a seguir traballando “polo futuro que queremos para Galicia”. Neste sentido, apelou ao modelo do PPdeG de liderar equipos con “humildade e liberdade”. Para Grueira, o PPdeG é o partido que “cre na xuventude e na gran forza de equipos como o que hoxe lidera Martín Gil nas xuventudes ourensáns”.

O PPdeG pon en valor o impulso da Xunta ao solo industrial coa ampliación do parque empresarial do Corgo

O PPdeG reivindicou hoxe o pulo da Xunta de Galicia ao tecido industrial e empresarial da provincia coa aprobación definitiva da ampliación do parque empresarial do Corgo como Proxecto de Interese Autonómico (PIA), unha medida estratéxica que permitirá licitar as obras o vindeiro ano.

Durante unha visita recente ás instalacións do polígono, os deputados do Grupo Parlamentario Popular Cristina Sanz e Manuel Mato, puideron coñecer de primeira man os detalles do proxecto. Esta ambiciosa actuación contará cun investimento estimado de 11,6 M€ para incrementar a superficie desta área empresarial en máis de 200.000 m² –en concreto, 203.089 m²-, ata superar unha superficie total de 347.000 m². Os populares enxalzaron a celeridade do Goberno galego, que iniciará de inmediato o trámite de expropiación de terreos mentres traballa en paralelo no proxecto de urbanización para axilizar os prazos ao máximo.

Neste senso, explicaron que o proxecto inclúe a construción dun novo viario principal, que descorrerá paralelo ao actual, e a prolongación dos transversais existentes para dar servizo ás novas parcelas. A intervención tamén incorporará zonas verdes, unha parcela destinada a equipamentos públicos e a habilitación de 1.138 prazas de aparcamento, das que 319 serán de carácter público. Esta ampliación faise de xeito urxente dado que as 144.159 m² da superficie actual están xa vendidas na súa totalidade.

Para a deputada popular Cristina Sanz, este paso adiante é unha proba do “compromiso real da Xunta co dinamismo económico de Lugo”, ofrecendo espazos competitivos para que as empresas poidan medrar e crear emprego no territorio. Porque, segundo dixo, dotar de solo industrial de calidade aos concellos resulta fundamental para fixar tecido produtivo e garantir o desenvolvemento e o futuro da contorna rural.

Pola súa banda, o deputado Manuel Mato remarcou que “a verdadeira política industrial faise con feitos e investimentos directos nas infraestruturas”, poñendo en valor que o Goberno galego ten actualmente en marcha a promoción de 1,5 millóns de m² de novo solo empresarial na provincia de Lugo, cun investimento global que supera os 68 M€.

Miguel Fidalgo: “Galicia non pode seguir sendo a que máis aposta polo naval e a que menos respaldo recibe do Goberno de España”

O Parlamento de Galicia vén de aprobar –sen votos en contra- unha iniciativa do Grupo Parlamentario Popular para continuar recoñecendo e impulsando o carácter estratéxico do sector naval galego como motor industrial, tecnolóxico e de creación de emprego, co obxectivo de consolidar a súa posición como potencia naval europea e mundial. “Galicia non pode seguir sendo a que máis aposta polo naval e, ao mesmo tempo, a que menos respaldo recibe do Goberno de España”, remarcou Miguel Fidalgo.

“O que propoñemos –dixo- é recoñecer o camiño que está a seguir o Goberno galego e reclamar que o Goberno de España acompañe ese reforzo cun compromiso estable”. Un compromiso, explicou, que estea á altura do peso económico de Galicia, da súa capacidade exportadora e da súa contribución á soberanía industrial e tecnolóxica do país. A iniciativa insta ao Executivo central a amosar unha sensibilidade especial coas necesidades do sector naval galego mediante o impulso de políticas enerxéticas, laborais, fiscais, industriais e tamén de financiamento que favorezan a súa competitividade.

Neste senso, o parlamentario popular defendeu a necesidade de que a Xunta de Galicia dea traslado ao Executivo de España do Plan Director da Construción Naval 2025-2027. “Unha folla de ruta, con 63 M€ e máis de 60 medidas para impulsar a dixitalización, a innovación, a internacionalización, a formación e as infraestruturas”, indicou. O propósito é que a Administración do Estado, no ámbito das súas competencias e en colaboración coa Unión Europea, deseñe un plan de apoio que complemente o dito plan director e garanta a carga de traballo dos estaleiros e da industria auxiliar nos vindeiros anos.

Do mesmo xeito, demanda que as institucións da Unión Europea desenvolvan novas medidas de apoio á innovación, á formación e á adaptación tecnolóxica para reforzar a capacidade de tracción do sector sobre o tecido económico de Galicia.

UN PIAR FUNDAMENTAL
Tal e como salientou Miguel Fidalgo, o sector naval galego atravesa un dos mellores momentos das últimas décadas, cunha carteira de pedidos que garante carga de traballo para varios anos e un incremento sostido do emprego. Na actualidade, Galicia concentra arredor do 40 % da carteira de pedidos de todo o Estado, un impacto económico que representa aproximadamente o 3,5 % do PIB galego e xera 14.000 postos de traballo directos.

Durante a súa intervención, o parlamentario popular referiuse á recente celebración en Vigo da décima edición da feira internacional Navalia, a cal volveu evidenciar a fortaleza deste ecosistema, acadando cifras récord con máis de 600 expositores e preto de 1.200 marcas representadas. Por este motivo, a iniciativa aprobada recolle o mandato de continuar apoiando este evento estratéxico como escaparate internacional da capacidade industrial galega e ferramenta de xeración de oportunidades comerciais.

RETOS DE FUTURO E ESTABILIDADE LABORAL
Miguel Fidalgo apuntou que este contexto positivo non debe ocultar os importantes desafíos de futuro. Así, incidiu na importancia de liderar ámbitos como a descarbonización do transporte marítimo, a aplicación da intelixencia artificial e os sistemas autónomos, sen esquecer a necesidade de garantir persoal cualificado e reforzar a formación profesional e universitaria vinculada ao naval.

Finalmente, avogou por favorecer o diálogo social e a estabilidade laboral no conxunto da cadea de valor do naval, promovendo en todo momento condicións de traballo dignas, seguras e de calidade, ao tempo que se continúa poñendo en valor publicamente a histórica e estratéxica contribución deste sector ao desenvolvemento de Galicia.

Rueda insta aos populares de Lugo a ser “motor do cambio” en España: “As Xerais gáñanse tamén en cada aldea, en cada vila e en cada cidade galega”

O presidente do PPdeG, Alfonso Rueda, insiste en “aspirar a todo” como “única receita” do éxito para os próximos retos electorais e augura que Galicia será “o motor do cambio en España”, contribuíndo de maneira destacada á vitoria de Alberto Núñez Feijóo nas Eleccións Xerais do 29 de novembro. Así o manifestou na Xunta Directiva Provincial do PP de Lugo, onde lles pediu aos populares lucenses implicación, rapidez e traballo para demostrar como se fan as cousas no PP. “As xerais gáñanse tamén en cada aldea, en cada vila e en cada cidade galega”, dixo.

Así o sinalou durante a reunión, que encabezou xunto á presidenta do partido na provincia, Elena Candia. Tamén participaron a secretaria xeral do PPdeG, Paula Prado, e o presidente do PP local, Ramón Carballo. Rueda puxo en valor os éxitos electorais de Lugo, a provincia co mellor resultado de toda España en 2023, un logro que anima a “superar” baixo o modelo de “estabilidade e moderación” do PPdeG, en contraste co modelo do sanchismo de oito anos de “caos e desvergoña”.

Ademais, afea aos socialistas galegos e ao BNG que “sustenten” este modelo sanchista, así como outras opcións como Frente Amplio que, para o presidente do PPdeG, “son caras da mesma moeda”.

Para Rueda, as razóns de que Pedro Sánchez convocase agora eleccións fundaméntanse en que “non lle saíu a xogada de tapar con dous decretos trapalleiros oito anos de inacción en vivenda”. Neste punto, lembrou que o presidente do Executivo central volveu incumprir un ano máis o seu propio anuncio de presentar os Orzamentos Xerais do Estado -segue cos de 2023, fronte ao modelo galego de orzamentos en tempo e forma anualmente- e que cada día se coñecen máis detalles das diferentes tramas corruptas do Goberno.

Para o presidente do PPdeG, Galicia fai o que debería ser normal pero que, por desgraza é cada vez máis excepcional: solucionar os problemas dos galegos e galegas. Así, subliñou medidas do Goberno galego do PP como o plan de vivenda, xa que se están construíndo máis de 4.000 vivendas en toda a comunidade autónoma. Delas, 615 proxéctanse na cidade de Lugo.

Tamén se referiu á Atención Primaria, cun plan de choque fomentado dende o Goberno galego para mellorala, así como a reforma e a construción de novos centros de saúde, como o do Sagrado Corazón ou a Milagrosa. No apartado da lingua, lembrou o acordo histórico polo galego “para que ninguén se apropie dunha riqueza que é de todos”.

ELENA CANDIA: “LUGO XÓGASE MOITO NESTAS ELECCIÓNS”

Pola súa banda, Elena Candia asegurou que “Lugo se xoga moito nestas eleccións” á vista dos “incumprimentos e débedas de Sánchez” coa cidade e coa provincia, especialmente, en materia de infraestruturas. “Merecemos un Goberno empático co noso territorio e que dea resposta ás necesidades importantes de Lugo e a provincia”, engadiu.

A dirixente popular citou o incumprimento dos prazos anunciados polo propio Goberno para a finalización da A-54: “Xa perdemos a conta das veces que anunciaron o seu remate, pero a realidade é que continuamos sen conexión completa por autovía entre Lugo e Santiago”. Tampouco avanzou na autovía entre Lugo e Ourense ou na da Mariña, a pesar de ser prometida polos representantes socialistas na campaña das anteriores eleccións xerais, e moitas estradas nacionais continúan en mal estado.

En clave municipal, lembrou “a falta de avances en relación ao compromiso para o mantemento da ponte branca ou sobre o convenio coa Confederación Hidrográfica Miño-Sil para a mellora da rúa Fermín Rivera”. Candia incidiu tamén no incumprimento do anuncio do propio Ministro Puente para a posta en marcha da nova estación de tren en Lugo. “É unha mostra máis da falta de compromiso con Lugo como evidencian a perda de frecuencias ferroviarias e de conexións con Barcelona ou o norte peninsular”.
A presidenta provincial defendeu o modelo do Partido Popular como “proxecto político unido, forte, serio e avalado pola xestión” ante “o esperpento que temos en fronte”. Por iso cre que “estas eleccións deberan ser motivacionais”.

Candia lembrou a forte implantación do Partido Popular nestes momentos no territorio da provincia de Lugo onde goberna para o 65% da poboación. Así, amosouse convencida de lograr, co apoio de todos e a implicación da militancia, o ilusionante reto de alcanzar os resultados das anteriores xerais do 2023 nas que o a provincia de Lugo rexistrou o maior apoio porcentual (50,35%) ao Partido Popular.

Pepa Pardo denuncia a desprotección das vítimas de violencia de xénero en Galicia polas fallas nas pulseiras antimaltrato

A popular Pepa Pardo, amosou hoxe a súa profunda indignación e preocupación tras coñecerse o último informe da Fiscalía Superior de Galicia, que alerta de graves deficiencias operativas no sistema de control telemático de agresores. Pardo acusou ao Executivo central de deixar “unha vez máis” ás mulleres nunha situación de extrema vulnerabilidade.

“Outra vez as mulleres vítimas de violencia de xénero volven ser noticia porque o autoproclamado goberno máis progresista da historia da democracia, aqueles de ‘son feminista porque son socialista’, volveunas deixar desprotexidas”, denunciou con dureza a representante popular.

A Fiscalía galega advertiu explicitamente da existencia de “incidencias relevantes” no funcionamento dos dispositivos, sinalando fallas críticas como a perda de cobertura no medio rural ou nas zonas fronteirizas, así como constantes falsos positivos que alteran o seguimento real dos agresores.

Para Pardo Pumar, esta situación é o reflexo dun Goberno central “ausente e máis centrado nos seus propios problemas”. Pardo afirmou que as vítimas están desprotexidas “porque no Executivo están  máis preocupados por tapar a súa corrupción, por tapar a invasión de Ceuta e, como non, por protexer á única muller que de verdade lle importa a este goberno, que é Begoña Gómez”.

Ante a gravidade dos feitos, a voceira popular esixiu responsabilidades inmediatas e unha solución técnica urxente para un sistema que debera ser infalible.

“Xa está ben, as vítimas non se merecen isto. E agora que, señores do PSOE? Van garantir dunha vez por todas que as mulleres de Pontevedra, que as mulleres galegas e que todas as vítimas de violencia de xénero estean protexidas fronte aos seus maltratadores?”, ou tamén van dicir agora, como Patxi López, que ‘ningunha muller se queixou’?”, concluíu.

Paula Prado defende o PPdeG como “motor do cambio”, da man de Alberto Núñez Feijóo, para poñer fin aos recortes do sanchismo en Galicia

A secretaria xeral do PPdeG, Paula Prado, defende o traballo do partido en Galicia como “motor do cambio” para contribuír á vitoria de Alberto Núñez Feijóo como próximo presidente do Goberno de España, co obxectivo de poñer fin aos “recortes do sanchismo” e aos “castigos e agravios infinitos” deste Goberno central con Galicia, á que trata como “unha comunidade autónoma de segunda”. Pola contra, Prado subliña que os galegos e galegas están “ben defendidos” no Congreso e no Senado grazas ao traballo dos deputados nacionais e senadores populares e as reivindicacións do conxunto de todo o PPdeG.

Así o manifestou hoxe a número dous dos populares galegos nunha rolda de prensa na sede autonómica do PPdeG, onde lembrou que quedan 45 días para “o gran cambio”, coas Eleccións Xerais do 29N, nas que augura que o Partido Popular, con Feijóo á fronte, “traballará para levantar o que fundiron outros e construír un futuro mellor, unha reconstrución nacional”.

Para a secretaria xeral do PPdeG, o único bo que fixo Pedro Sánchez durante a súa lexislatura foi convocar eleccións. Así, criticou as súas políticas de “recortes” con Galicia e citou temas como a vivenda, o caos ferroviario, o Real Decreto que modifica o Regulamento Xeral de Costas, a falta de fondos para renovación de centros educativos, agravios no financiamento autonómico, déficit de profesionais sanitarios ou a lei de dependencia, entre moitos outros.

Ademais, lembrou que esta política de recortes do PSOE ten como “cómplice” ao BNG. Para a secretaria xeral do PPdeG, o independentismo galego, socio de Goberno en Madrid, “defende o modelo de Sánchez e véndese a cambio de nada para Galicia, por moito que intenten terxiversar a historia”. Neste sentido, subliña que son “os do non a Galicia e aos galegos e galegas”.

As consecuencias do Goberno de Sánchez e os seus socios do BNG, sinalou Prado, obrigaron ao Goberno galego de Alfonso Rueda a redobrar esforzos en numerosos eidos, sendo en moitas ocasións insuficientes por culpa dos agravios que ten o Executivo central coa nosa comunidade.

INVASIÓN, CORRUPCIÓN E SINFÍN DE ESCÁNDALOS

“Nesta lexislatura vivimos unha invasión sen precedentes a Ceuta, perdemos a conta das persoas investigadas do círculo de Sánchez, sufrimos situacións moi dolorosas como a Dana ou o accidente de Adamuz, vemos como Puigdemont volverá a España sen represalias, un apagón do que non hai responsables, o incremento dos custes e o nivel de vida e un sinfín de escándalos dos que xa non podemos mirar cara outro lado”, explicou.

Neste punto, Prado insistiu en que é momento de “decidir entre delincuencia ou decencia, entre mafia ou democracia, entre o sanchismo ou a seriedade do Partido Popular”.

O Grupo Provincial Popular de Lugo leva a Bruxelas as necesidades para impulsar o sector primario, a industria e a captación de fondos europeos

Os deputados do Grupo Provincial Popular mantiveron varias reunións institucionais en Bruxelas, no Parlamento Europeo da man do eurodeputado Adrián Vázquez, para abordar temas fundamentais para a provincia, con especial atención ao sector primario, ao desenvolvemento industrial e á captación de fondos europeos para impulsar proxectos e investimentos no territorio.

O voceiro provincial popular, Antonio Ameijide, destacou a importancia de poder chegar a este tipo de institucións “nas que poñer sobre a mesa a realidade da provincia de Lugo” así como “coñecer de primeira man as liñas de traballo e as oportunidades que ofrece a Unión Europea”. “Lugo ten que estar presente en Europa; necesitamos coñecer as oportunidades que existen, defender os intereses dos nosos veciños e traballar para que os recursos europeos se traduzan en investimentos e oportunidades para os nosos concellos”, sinalou.

Antonio Ameijide tamén quixo agradecer “a Adrián Vázquez que nos dese esta oportunidade de poder trasladar as necesidades da provincia a Europa, poder dar voz aos nosos veciños no Parlamento Europeo “.

As xuntanzas tiveron lugar con Valentina Corsetti, coordinadora da unidade de España e Portugal da Dirección Xeral de Política Rexional e Urbana da Comisión Europea; así como con Eleonora Orso, asesora de políticas públicas e coordinadora do foro de desenvolvemento económico de Eurocities.

Un dos eixes das reunións foi o sector primario, clave para a economía lucense e para o mantemento da actividade económica, así como para fixar poboación no rural.

Neste senso, Ameijide destacou que “a gandería e a agricultura son sectores estratéxicos para Lugo, non só polo seu peso económico, senón tamén polo seu papel na conservación do territorio e na fixación de poboación”, polo que incidiu na necesidade de que as decisións adoptadas en Europa teñan en conta as características das explotacións lucenses e das persoas que viven e traballan no rural.

O desenvolvemento industrial foi outro dos ámbitos analizados, coa vista posta na necesidade de favorecer a chegada de novos investimentos, fortalecer o tecido empresarial e crear oportunidades de emprego. “Lugo ten potencial para medrar, xerar emprego e atraer proxectos empresariais, pero para conseguilo é fundamental coñecer os instrumentos europeos que poden contribuír a ese desenvolvemento e traballar para que a provincia non quede á marxe das oportunidades de investimento”, afirmou.

CAPTACIÓN DE FONDOS EUROPEOS

A captación de fondos europeos tamén foi un dos temas destacados xa que Europa pode contribuír ao financiamento de proxectos transformadores para a provincia. O acceso aos programas comunitarios e o coñecemento das convocatorias son aspectos relevantes para que os concellos poidan desenvolver iniciativas que melloren os servizos, impulsen a actividade económica e favorezan a cohesión territorial.

“Deste xeito os concellos, sobre todo os máis pequenos, terían unha maior capacidade para poder captar e fixar poboación e así ter a opción de atraer novos proxectos empresariais ou colaborar no crecemento dos xa existentes”, aseverou.

 Antonio Ameijide destacou en que “non é suficiente con falar de fondos europeos: hai que coñecer as posibilidades reais de acceso, preparar proxectos e traballar para que eses recursos cheguen a Lugo e logo sexan realidades”.

O PPdeG esixe ao Goberno central a cesión gratuíta dos activos da SAREB en Galicia para ampliar o parque público de vivenda

“Moitos destes bens foron rescatados co diñeiro de todos os cidadáns e o lóxico é que revertan directamente no benestar social dos galegos”, sinalou hoxe o portavoz do Grupo Parlamentario Popular, Alberto Pazos, ao anunciar a presentación dunha proposición non de lei no vindeiro pleno para esixirlle ao Goberno de España a cesión gratuíta e definitiva de todas as vivendas e solos da SAREB situados na comunidade autónoma.

Pazos detallou que, segundo datos oficiais, a SAREB dispón en Galicia dun patrimonio residencial inmobilizado de 1.756 vivendas e 2.654 solos, concentrados maioritariamente nas zonas onde máis se necesita ampliar o mercado –máis de 1.000 vivendas na Coruña, ao redor de 400 en Pontevedra, preto de 200 en Lugo e case unha vintena en Ourense-. “A cesión gratuíta destes activos permitiría ampliar de forma inmediata o parque público de vivenda para destinalo ao alugueiro social e a programas de acceso á vivenda protexida”, remarcou.

Neste senso, o portavoz contrapuxo o modelo do PPdeG, baseado “no servizo público e o sentido común”, co de Pedro Sánchez, que “prefire xestionar o solo desde unha lóxica de especulación financeira”: “Galicia ten proxecto, ten estratexia e sabe como poñer eses recursos a funcionar; o único que falta é a vontade política do Goberno central”.
MÁIS TRANSPARENCIA E MENOS INTERVENCIONISMO
Seguindo co bloque de vivenda, o Grupo Popular defenderá unha segunda iniciativa para esixir ao Ministerio de Vivenda e Axenda Urbana “información clara, detallada e accesible” sobre o número total de inmobles postos a disposición en Galicia, a súa localización exacta, así como tamén a data real de entrega das chaves aos propietarios ou adxudicatarios. “A política de vivenda non se mide polo fume dos anuncios, senón polas vivendas construídas, entregadas e habitadas”, salientou Pazos, quen criticou a política de anuncios, titulares e propaganda do Executivo de Pedro Sánchez.

Así mesmo, os populares formularán unha pregunta oral para avaliar o impacto real dos últimos reais decretos lei estatais. Pazos cualificou estas medidas de “puramente intervencionistas” e advertiu que, lonxe de achegar solucións, “só conseguen xerar inseguridade xurídica aos propietarios, provocando que se retiren aínda máis inmobles do mercado”. Fronte a isto, o portavoz puxo en valor que a Xunta responde con feitos a través das máis de 4.000 novas vivendas de promoción pública en marcha e o despregamento de medidas pioneiras como o impulso de novo solo residencial ou a facilidade para converter baixos en vivendas: “O problema da vivenda soluciónase construíndo e dando facilidades, non con receitas intervencionistas que afogan o mercado”, subliñou.

AVAL XURÍDICO AO SECTOR EÓLICO
Así mesmo, o PPdeG preguntará sobre o impacto da recente resolución do Tribunal Superior de Xustiza de Galicia (TSXG) arredor do parque eólico de Bustelo: “A xustiza aplica a doutrina do Tribunal Supremo e avala, punto por punto, o rigor técnico, ambiental e xurídico co que tramita a Xunta de Galicia”. Neste punto, incidiu en que “cada parque paralizado de forma inxustificada supuxo un atranco á competitividade e puxo en risco investimentos cruciais para o emprego”.

Para rematar, o portavoz popular informou dunha iniciativa para denunciar o “abandono” por parte do Goberno central do proxecto da Biblioteca Pública do Estado en Vigo, cualificándoo como “un novo engano” cunha cidade que agarda por esta infraestrutura desde hai case dúas décadas.

Finalmente, Alberto Pazos anunciou a comparecencia do conselleiro de Sanidade, a petición propia, para informar polo miúdo do novo Plan de Reforma de Atención Primaria e Comunitaria 2026-2030.

Paula Prado pon en valor o Domingo das Mozas de Lugo como símbolo do “rico patrimonio cultural” de todos os galegos e galegas

A secretaria xeral do PPdeG, Paula Prado, pon en valor o traxe tradicional galego e a lingua como “símbolos do noso rico patrimonio cultural” de todos os galegos e galegas, a través de actos como o Domingo das Mozas, celebrado hoxe en Lugo no marco das festas patronais de San Froilán.

A número dous dos populares participou hoxe no desfile do traxe tradicional, unha das xornadas máis relevantes das festas patronais lucenses, nas que a alcaldesa, Elena Candia, fixo de anfitrioa.

Prado tamén participou na ofrenda posterior a Rosalía de Castro, onde reivindicou as “raíces” e a lingua como “patrimonio de todos os galegos”, lembrando o gran pacto social acadado para actualizar o Plan Xeral de Normalización da Lingua Galega, que se aprobou esta mesma semana no Parlamento de Galicia.