O PPdeG enxalza o compromiso do Goberno galego co tecido veciñal, a través da nova convocatoria de axudas que ascende a 3M€

O PPdeG enxalza o compromiso do Goberno galego co tecido veciñal, a través da nova convocatoria de axudas que ascende a 3M€.

Neste senso, as deputadas autonómicas, Dolores Hermelo e Patricia García, mantiveron un encontro coa directiva da Asociación Veciñal de Gandón, en Cangas, para trasladarlles a nova liña de subvencións destinada ás asociacións veciñais, confederación, federacións ou unións de asociacións de veciños, así como tamén ás comunidades de augas e asociacións de mulleres rurais.

Tal e como destacaron, estas achegas supoñen un soporte económico importante, xa que lles permite financiar actuacións de mellora, reforma e ampliación dos seus locais sociais, así como tamén a adquisición do equipamento necesario para o seu funcionamento diario e a organización de actividades comunitarias.

Durante o encontro, puideron coñecer as iniciativas que a entidade está a desenvolver e polas que a puxeron como “exemplo de xestión proactiva”. Así, Dolores Hermelo fixo fincapé no papel “fundamental e insubstituíble” que xogan este tipo de entidades na vertebración do territorio: “Asociacións como a de Gandón son o verdadeiro corazón das nosas parroquias, xa que realizan un traballo impagable na dinamización social e cultural dos barrios e son esenciais para garantir a prestación de certos servizos de proximidade”. “E –engadiu- actúan como un fío condutor que mantén vivas e cohesionadas as nosas zonas rurais”.

Ao remate da visita, ambas as dúas deputadas puxeron en valor que estas achegas demostran con feitos o “firme compromiso e apoio incondicional” do PPdeG cara ao tecido asociativo e veciñal. “Nós cremos nas asociacións como un poderoso instrumento de transformación real dos nosos barrios e parroquias”, subliñou Patricia García, quen salientou os recursos para que as entidades sigan medrando e mellorando a vida da veciñanza.

O PPdeG salienta o compromiso do Goberno galego coa conservación da contorna paisaxística da Ribeira Sacra

O PPdeG puxo en valor os máis de 1,5M€ que o Goberno galego destina, este 2026, á conservación da contorna paisaxística e á loita contra a erosión de viñedos na Ribeira Sacra.

Durante unha visita á sede do Consello Regulador da Denominación de Orixe Protexida Ribeira Sacra, dos deputados autonómicos, Katy Varela, Raquel Arias e Juan Casares, salientaron a importancia desta achega, xa que, entre os seus obxectivos, está o de preservar todo este ámbito e evitar a desaparición dos socalcos de pedra. Segundo dixo Katy Varela, este tipo de cultivo da vide, tradicional da Ribeira Sacra, contribúe de forma moi significativa á singularidade paisaxística desta zona que aspira a ser declarada Patrimonio Mundial da UNESCO.

UNHA ACHEGA DE MÁIS DE 1,5M€, EN 2026
Ao abeiro desta liña de axudas, o Goberno galego pon a disposición dos viticultores, de xeito individualizado e como máximo, unha achega de 2.000€ por hectárea para o sistema de cultivo tipo 1, zonas con socalcos de pedra e onde o traballo se realiza de forma non mecanizada; e de 1.000€ por hectárea para o tipo 2, o que se leva a cabo de forma mecanizada.

En 2025, resultaron beneficiarios 794 viticultores e unha superficie de arredor de 810 hectáreas, das cales 519 hectáreas correspondentes co sistema de cultivo tipo 1, e 291 hectáreas co de tipo 2.

“Esta liña de axudas, xunto con outras como as de promoción da calidade dos viños ou as de reestruturación de viñedos, demostran a sensibilidade da Xunta co sector vitivinícola galego, que achega o 1,4% do PIB da nosa Comunidade”, subliñou Juan Casares. E é que, tal e como explicou, este sector xera un Valor Engadido Bruto duns 890 millóns de euros anuais e mantén o 1,5% do emprego, contabilizando tanto os postos de traballo directos coma os indirectos.

MÁIS DE 1.200 HECTÁREAS DE CULTIVO EN TERRAZAS
Esta denominación de orixe é unha das cinco protexidas que posúe Galicia. Na actualidade, o Consello Regulador da Denominación de Orixe Protexida Ribeira Sacra ampara unha superficie produtiva dunhas 1.253 hectáreas -das cales arredor de 900 practican o sistema de cultivo en terrazas ou socalcos-, correspondentes a preto de 1.878 viticultores e 93 adegas certificadas. Na vendima de 2025, este selo de calidade recolleu algo máis de 4,6 millóns de quilogramos de uva, o que amosa a súa posición destacada no sector.

Segundo salientou Raquel Arias, o sector vitivinícola é “un motor económico fundamental para o desenvolvemento do territorio da Ribeira Sacra”. Unha actividade –engadiu- que non só favorece o asentamento da poboación, senón que “abre expectativas de futuro para as xeracións máis novas”.

No encontro, celebrado en Monforte, os parlamentarios populares aproveitaron para abordar a situación actual e recoller as súas demandas desta entidade que, tal e como apuntaron os deputados do PPdeG, “velan pola calidade do produto e poñen en valor todo o territorio”.

O PPdeG urxe ao BNG que se mobilice polo sector lácteo en Madrid, en lugar de criticar ao Goberno galego, que si está ao carón dos produtores “dende o minuto un”

O PPdeG critica a “manipulación” do BNG por “erixirse en salvadores do sector lácteo”, cando foi o Goberno galego o que estivo “dende o minuto un” ao carón dos produtores. Os populares urxen un cambio na lei estatal da cadea alimentaria ao Ministerio de Agricultura, polo que reclaman aos independentistas galegos que “se mobilicen polo sector lácteo en Madrid, onde son socios do Goberno de Sánchez, e “en lugar de apoiar as medidas galegas, dedícanse só a lanzar mensaxes baleiras ao aire”.

A prioridade dos populares é garantir o futuro dos produtores galegos, conscientes da situación que están a vivir, marcada pola redución dos prezos ofrecidos aos gandeiros nos contratos, un contexto agravado polo incremento dos custos de produción derivados do conflito en Oriente Próximo. “Situámonos, hoxe e sempre, ao carón dos nosos gandeiros. Somos o partido do rural, a favor da sustentabilidade do noso sector lácteo, un piar na economía galega”, insisten dende o PPdeG.

Por este motivo, o Goberno galego actuou “con responsabilidade e medidas”, reforzando os controis para verificar que se cumpre a lexislación na sinatura dos novos contratos e vixiando que leite está entrando desde outros países europeos e como se vende despois nos lineais.

Neste sentido, para o PPdeG resulta “sorprendente” e “bochornosa” a petición do BNG de que a Xunta de Galicia convoque a Mesa do Lácteo. Os populares lembran que o Goberno galego xa leva semanas reuníndose con diferentes axentes da cadea de valor: dende os produtores, a través dos sindicatos Unións Agrarias, Asaga e Agromuralla; ata a industria e a distribución.

GALICIA PROMOVE MEDIDAS, MADRID MIRA CARA OUTRO LADO

“Ignoran que o Goberno galego si promove medidas, mentres o PSOE e o BNG miran cara outro lado en Madrid, que é onde teñen que apoiar ao sector, pedíndolle ao seu socio Sánchez que actúe e que garanta o futuro do sector”, apuntan dende o PPdeG. 

Nesta liña, os populares reiteran ao Goberno central a necesidade de “máis compromiso” co sector lácteo, con medidas “efectivas e reais” que introduzan na Lei estatal da cadea alimentaria os umbrais que eviten a venda a perdas, así como un control máis exhaustivo dos contratos da leite ata a súa renovación e unha avaliación de posible competencia desleal dos excedentes que están entrando a España de outros países da Unión Europea. “A Consellería do Medio Rural leva traballando para paliar a situación no sector lácteo desde o primeiro momento, moito antes de que os señores do BNG se manifestaran”, conclúe o PPdeG.

Alberto Pazos advirte de que o desleixo do Goberno central pon en risco a planificación do Xacobeo de 2027

O portavoz do Grupo Parlamentario do PPdeG, Alberto Pazos, urxiu, hoxe, ao Goberno central a que constitúa a Comisión Interadministrativa, o órgano encargado de habilitar os incentivos fiscais para as empresas patrocinadoras e colaboradoras do Xacobeo 2027. “Esta inexplicable demora está a poñer en perigo a planificación do Ano Santo”, dixo.

Na rolda de prensa posterior á Xunta de Portavoces, Alberto Pazos amosou a súa preocupación ante a inacción do Executivo de Pedro Sánchez por un evento que é unha prioridade para Galicia e, que, tal e como advertiu, estase vendo comprometido. Nesta mesma liña, salientou a transcendencia do Ano Santo, xa que marcará a axenda cultural e turística do próximo ano. “É este un novo agravio a Galicia ou é, simplemente, desleixo?”, apuntou Pazos, para continuar remarcando que “Galicia non pode permitirse novos agravios nin este desleixo”.

Así, de cara a garantir que o próximo Xacobeo sexa un éxito, instou de novo ao Goberno a que deixe de poñer trabas, co fin de poder traballar con seguridade.

UN GOBERNO QUE GOBERNA E UN PPDEG QUE SOLUCIONA
Sobre o Debate de política xeral, que terá lugar o vindeiro 8 de abril, Alberto Pazos, volveu incidir en que será unha data na que “se confirmará con feitos que a Galicia de hoxe funciona, que hai un goberno que goberna e que o PPdeG é a solución aos problemas reais dos galegos”.

Neste senso, salientou a estabilidade institucional que caracteriza a Galicia, debido á “xestión rigorosa e con sentidiño” do presidente Rueda. Así, fixo fincapé “na palabra cumprida” en ámbitos como a vivenda, a cal, dixo, é a prioridade; en educación, servizos públicos e en gasto social, para “atender o que é urxente”; no industrial e na innovación, co fin de que Galicia sexa recoñecida como un polo de atracción de investimentos que garantan un futuro mellor para a mocidade; e en melloras fiscais para as familias e para quen máis o precisa.

Fronte a isto, o portavoz popular amouse convencido de que a Galicia que reflectirán os grupos da oposición, nese debate, pouco ou nada terá que ver coa que coñecemos: “Pasaremos da habitual visión catastrofista e apocalíptica do BNG á visión desenfocada do PSdeG”. “Uns –engadiu- ondearán a pancarta do non a todo e outros levarán a que lles ordenen desde Madrid. Uns centrarán o seu debate en que canto peor digamos que lle vai a Galicia, mellor nos irá a nós; e outros quedaranse sen voz no momento de ter que defender os intereses de Galicia”.

O PPdeG advirte que o Goberno de Sánchez deixa sen cubrir unha de cada tres prazas de médicos de valoración de incapacidades da Seguridade Social en Galicia

O PPdeG denuncia a “alarmante carencia” de facultativos de valoración de incapacidades no Instituto Nacional da Seguridade Social (INSS), un servizo dependente do Goberno central que dispón na actualidade dunha de cada tres prazas sen cubrir no conxunto das catro provincias galegas.

Así se desprende dos datos facilitados polo Goberno de Sánchez tras unha pregunta dos deputados do PP no Congreso, que ven “preocupante” a resposta do Executivo, ao recoñecer que só se cobren 37 das 55 prazas dispoñibles en A Coruña, Lugo, Pontevedra e Ourense. Así, hai na actualidade 18 dotacións sen funcionamento, unha situación que para os populares galegos “confirma a incapacidade de xestión de Sánchez e os seus socios independentistas”.

A resposta oficial recolle que a “falta de profesionais médicos afecta a todos os ámbitos e as unidades médicas do INSS non son alleas a este problema”, polo que o propio Goberno de Sánchez recoñece esta carencia de efectivos e, pese a isto, “o Ministerio de Sanidade négase a escoitar aos propios profesionais e as demandas das Comunidades Autónomas”, reitera o deputado galego Jaime de Olano.

UN “GRAVE DÉFICIT” DENDE QUE SÁNCHEZ CHEGOU Á MONCLOA

Os deputados populares insisten nun “grave déficit” que se acentúa en provincias como Lugo, onde nos últimos sete anos -dende que Sánchez preside o Goberno- se reduciu nun 75% a cobertura destas prazas médicas. 

 No caso de Ourense, o número de médicos activos pasou de 7 en 2019 a apenas 5 na actualidade. En A Coruña e en Pontevedra prodúcese un descenso similar, pasando dos 18 efectivos activos en ambas provincias hai sete anos aos 15 actuais. 

 SÓ DOUS MÉDICOS EN LUGO

 Centrándonos só nos datos de 2025, Lugo sofre a maior falta de cobertura. Das 9 dotacións convocadas, só hai dúas en activo. A Coruña ten cinco prazas sen funcionamento das 20 totais, mentres que Ourense funciona só con cinco médicos, pese as sete prazas que hai convocadas. Por último, Pontevedra ten 15 facultativos traballando, pero deixa catro prazas sen cobertura.

Os populares condenan que “o Goberno se negue a ofrecer os datos sobre o tempo medio de espera dende a solicitude ata a recepción dun ditame por parte do equipo de valoración de incapacidades”. Nese sentido, “moito nos tememos que o servizo rexistra un longo tempo de agarda”, advirte Jaime de Olano.

O propio Executivo explica que foron convocadas 181 prazas en toda España no 2024 -incluíndo as prazas que quedaran vacantes nas convocatorias dos dous anos anteriores- e só 53 persoas superaron o proceso selectivo. E no 2025 convocáronse 161 das que 127 se corresponden con prazas sen cubrir nas dos anos 2023 e 2024. É dicir, perdéronse as prazas que quedaron vacantes na convocatoria do 2022.

O deputado lucense Jaime De Olano incide en que a falta de cobertura destas prazas “é un exemplo máis da incapacidade do Goberno de Sánchez en dar resposta ás necesidades de tódolos españois e, particularmente, do castigo a Galicia”, polo que urxe ao Ministerio de Sanidade a “tomar medidas ante este problema transversal”.

De Olano condena tamén a actitude de PSOE e BNG, “moi bravos en Galicia e moi mansos en Madrid” porque “en Galicia maniféstanse contra a Xunta de Galicia polo déficit de médicos, pero en Madrid non fan nada, a pesar de que recoñecen que este asunto afecta a todos os ámbitos e a todo o país”.

O PPdeG cualifica de “cinismo absoluto” as críticas do PSdeG polas axudas ao marisqueo

O Partido Popular de Galicia cualificou hoxe de “cinismo absoluto” as recentes declaracións do PSdeG respecto ao plan de rescate autonómico para o sector marisqueiro. Desde as filas populares advirten aos socialistas galegos que “non teñen lexitimidade ningunha para dar leccións” mentres o Executivo central segue dándolle as costas a miles de profesionais e ás súas familias en Galicia.

“É un insulto que o PSdeG se atreva a facer estas declaracións cando o Goberno central puxo exactamente cero euros enriba da mesa para axudar ás persoas mariscadoras galegas “, sinalan desde o PPdeG. “Pola contra, o Goberno galego actúa con rigor técnico, cunha folla de ruta clara e mobilizando uns 23 M€”.

Fronte á “pura propaganda socialista”, os populares puxeron en valor a inxección “real e tanxible” da Administración autonómica, que xa permitirá compensar ás persoas mariscadoras con ata 700€ mensuais por profesional por realizar traballos de recuperación e rexeneración dos bancos marisqueiros, ademais de destinar 1,5 M€ para a semente e outros 2 M€ adicionais para o apoio estrutural ao sector.

O “BULO” DAS AXUDAS ESTATAIS

O PPdeG lamenta as acusacións do PSdeG de que a Xunta “chega tarde”: “Se hai alguén que non chega nunca a axudar nas rías galegas ese é o Partido Socialista. Teñen a desvergoña de falar de atrasos cando as supostas axudas do Goberno central correspondentes aos anos 2023 e 2024 nunca chegaron a materializarse”, denuncian.

Neste sentido, os populares lembraron un agravio aínda maior: o pasado 10 de febreiro, o Consello de Ministros aprobou a declaración de Galicia como ‘Zona gravemente afectada por unha emerxencia de protección civil’ debido aos últimos temporais. “Pois ben, mentres para outras comunidades autónomas esa declaración veu acompañada da activación de fondos inmediatos, para Galicia aínda non houbo absolutamente nada. Cero euros. Iso si é deixar tirado ao sector”, remarcan.

COTAS DA SEGURIDADE SOCIAL

Sobre a insistencia do PSdeG en que a Xunta bonifique as cotas da Seguridade Social das mariscadoras, o Partido Popular cualifícao de “manobra de distracción para tapar a falta de compromiso do Estado”.

A Seguridade Social é unha competencia estritamente estatal e os cartos recádaos o Estado. “O máis doado, o máis lóxico e o máis directo é que o Goberno central exima do pago destas cotas ás mariscadoras mentres non poidan faenar e se manteña paralizada a actividade extractiva. Que o Estado poña o seu grao de area e perdoe a cota en vez de pedirlle á Xunta que lla pague ao Estado con fondos autonómicos”, argumentan.

Finalmente, o PPdeG lanzou unha mensaxe directa aos cargos socialistas: “Se realmente queren axudar ás persoas mariscadoras, o que teñen que facer é deixar de facerse fotos de cara á galería co delegado e o subdelegado do Goberno e comezar a arrimar o ombreiro. Que vaian a Madrid a esixir que se liberen os fondos de zona gravemente afectada e que demostren con feitos, e non con notas de prensa baleiras, que lles importa o marisqueo galego”.

O PP condena “o abandono” do Goberno de Sánchez aos gandeiros lucenses que deixou sen fondos para paliar os ataques do lobo a pesar da alta incidencia dos danos

O PP lucense lamenta “a falta de sensibilidade” do Goberno de Sánchez cos gandeiros afectados polos ataques do lobo; toda vez que “os deixou sen fondos estatais no 2025 para paliar estas perdas”.

Os deputados no Congreso Jaime De Olano e Cristina Abades e as deputadas no Parlamento de Galicia Encarna Amigo e Katy Varela visitaron no municipio de Cervantes acompañados polo portavoz, Óscar Fernández, unha gandería de vacún en extensivo que ten sufrido perdas polos ataques desta especie para analizar a incidencia do lobo nas explotacións da zona.

A provincia de Lugo rexistrou no pasado ano 2025 máis de 1.400 animais afectados, o que supón o 47% do total de toda Galicia. É dicir, Lugo é a provincia máis afectada; xa que concentra, practicamente, a metade das perdas de toda a comunidade. Os populares advertiron, ademais, de que “a incidencia multiplicouse por tres na última década”.

E a pesar de todo, “o Goberno de Sánchez deixa abandonados aos gandeiros galegos e lucenses”. O Goberno de Sánchez “preferiu desviar 20M€ que correspondían ás comunidades para previr e compensar o impacto causado por esta especie a sufragar unha serie de medidas para despregar o coche eléctrico”.

Os populares lembran que “a débeda con Galicia alcanza os 12M€ porque o Ministerio para a Transición Ecolóxica e o Reto Demográfico aínda non transferiu a Galicia as partidas das últimas anualidades”.

Fronte ao “desinterese” que amosa o Goberno de Sánchez, “a Xunta leva anos implicándose e apoiando aos gandeiros e gandeiras” con medidas e recursos propios para garantir a convivencia entre as poboacións da especie e a actividade gandeira no rural.

O Goberno central tamén está a “incumprir os prazos para enviar a Bruxelas o informe que reflicte o estado das poboacións de lobo no norte de España”, que é favorable. “Galicia fixo os deberes, pero o Goberno de Sánchez non convocou ás CCAA á Conferencia Sectorial”, apuntan.

EQUILIBRIO: CONTROL PARA A COMPATIBILIDADE

O Partido Popular ten logrado a aprobación no Congreso dos Deputados da retirada do lobo da Listaxe de especies silvestres en réxime de protección especial (LESPRE), “unha medida que estaba a prexudicar ao sector”.

Con todo, en Galicia non é posible aplicar medidas de control porque o TSXG mantén suspendido o plan de xestión autonómico desta especie. De feito, é o único tribunal de España que impide á Administración actuar neste sentido.

Os populares defenden “o equilibrio entre a protección da especie e a súa compatibilidade coa actividade gandeira”.

Paula Prado esixe ao Goberno de Sánchez que se “poña do lado do emprego” e actúe “de forma urxente” para frear a crise do Grupo Losán

A secretaria xeral do PPdeG, Paula Prado, urxe ao Goberno de Sánchez e aos seus socios que actúen “de forma urxente para frear a crise que vive o Grupo Losán e que pon en perigo 800 postos de traballo -directos e indirectos- en Galicia”. Informa de que representantes galegos do Partido Popular nas diferentes cámaras están presentando iniciativas para esixirlle ao Ministerio de Economía, ao Ministerio de Industria e a SEPI (Sociedade Estatal de Participacións Industriais) que “se poñan do lado das familias e do emprego” e que tomen unha decisión para reverter esta situación.

Así o sinalou a número dous dos populares galegos nunha xuntanza en Curtis co alcalde da localidade, Javier Caínzos; o alcalde de Vilasantar, Fernando Pérez, e concelleiros doutros municipios como Oza-Cesuras que se están vendo afectados pola crise desta empresa punteira no sector da madeira. Na cita tamén estiveron presentes deputados autonómicos e do Congreso, así como senadores que están atendendo as reivindicacións locais nas diferentes cámaras.

“Estamos ante unha situación moi delicada que o Goberno de España non está escoitando”, lamentou Paula Prado, quen esixiu a Sánchez que teña en conta o plan de viabilidade económica que presentou en Madrid o Grupo Losán para “protexer eses postos de traballo que están en perigo e que son fundamentais para que a xente continúe vivindo no rural”.

A secretaria xeral do PPdeG tamén lle recordou ao BNG, que se poña “do lado de Galicia” e que deixe de “apoiar incondicionalmente a Sánchez”. “Son moi bravos en Galicia e moi mansos en Madrid”, engadiu Prado, reivindicando actuacións “xa, fronte ao desgoberno do Goberno central”.

DEBATE NO SENADO O 16 DE ABRIL

Neste sentido, Paula Prado afirmou que o PP presentou unha proposición non de lei no Congreso e no Senado. Concretamente, a do Senado debaterase o 16 de abril e “ese día veremos como se posicionan o PSOE e o BNG, se ao carón da industria ou non”, sinalou. “Veremos se están onde teñen que estar, cos traballadores, Galicia e co emprego no rural”, como fai o Partido Popular.

Os populares solicitan ao Goberno central que se convoque de maneira urxente unha mesa de traballo institucional para coordinar unha solución integral, exercer as funcións que corresponden á SEPI como instrumento do Goberno en empresas estratéxicas e impulsar unha coordinación efectiva entre os ministerios competentes.

Ademais, piden que se recoñeza e atenda formalmente o acordo unánime adoptado polos concellos afectados en Galicia, trasladando resposta institucional as súas peticións no marco do principio de lealdade e cooperación entre administracións.

“AO CARÓN DOS TRABALLADORES E DA INICIATIVA EMPRESARIAL”

Pola súa banda, o rexedor de Curtis, quen está a liderar as reivindicacións dos concellos galegos afectados, remarca unha vez máis “a urxencia dunha resposta rápida, firme e sen demora para a reactivación industrial do Grupo Losán, moi necesaria para Curtis, a comarca e toda Galicia”. “Esta reactivación é vital para o sector, para a economía e para estes concellos, tan necesitados de emprego e de actividade económica para que o rural siga vivo”, engadiu.

Javier Caínzos, que pediu que os ministerios e a SEPI actúen, tamén aproveitou para poñer en valor o labor que o PPdeG está a realizar nas diferentes cámaras e agradeceu o seu compromiso coa veciñanza e as familias afectadas pola crise desta empresa. “O PP está sempre onde ten que estar: ao carón dos traballadores e ao carón da iniciativa empresarial”, destacou.