Paula Prado contrapón a política de xestión e eficacia dos gobernos do PP fronte á incapacidade de Pedro Sánchez para sacar adiante uns Presupostos

A secretaria xeral do Partido Popular de Galicia, Paula Prado, deixou hoxe en evidencia a incapacidade de Pedro Sánchez á hora de conseguir sacar adiante os Presupostos Xerais do Estado contrapoñéndoa coa eficacia e a xestión de gobernos do PP que, tanto na Xunta como en moitos concellos, si son quen de aprobar e executar ano a ano as súas contas.

“Viveiro aprobou a semana pasada os seus Orzamentos, sen ningún voto en contra, e Galicia xa ten en marcha os Orzamentos de 2026, que se todo vai ben entrarán en vigor por décimo sétimo ano consecutivo en tempo e forma”, explicou incidindo en que “algo que debería ser o normal estase convertendo en excepcional nun bo número de administracións encabezadas por PSOE e BNG”.

Paula Prado fixo estas declaracións esta mañá durante a visita que realizou a Viveiro xunto á presidenta provincial do PP de Lugo, Elena Candia, a deputada nacional Cristina Abades, o senador José Manuel Balseiro, deputados autonómicos e concelleiros populares, que foron recibidos pola alcaldesa Mariña Gueimunde. Sobre esta última precisamente destacou que é unha das 30 alcaldesas que fan do PPdeG o partido con máis mulleres rexedoras de Galicia.

“Nos cinco meses que vai cumprir sendo alcaldesa xa se converteu nunha referente da Mariña lucense”, engadiu ao tempo que enxalzaba a Gueimunde como “unha muller valente, con ganas de cambiar as cousas, que defende aos seus veciños e que é un gran exemplo para todas as mulleres que traballan en política”.

Para a número dous dos populares galegos, tanto a rexedora viveirense como o resto de alcaldes e alcaldesas que “tinguen de azul máis da metade dos concellos de Galicia” son a constatación de que “fronte aos pactos de perdedores de PSOE e BNG, a gran maioría dos concellos con estabilidade e xestión, sen sobresaltos nin liortas, son os liderados polo PPdeG”.

ELENA CANDIA: “NON TODOS SOMOS IGUAIS”

A presidenta provincial do PP de Lugo quixo afondar tamén nesta idea, asegurando pola súa banda que o proxecto dos populares márcase como obxectivo “liderar as institucións para traballar por todos coa templanza e a serenidade que precisan os grandes cambios co compromiso e coas ganas que representan alcaldes e alcaldesas como Mariña Gueimunde”.

Elena Candia amosouse convencida de que “a forza, a responsabilidade e o acerto constituirán a liña de traballo” da alcaldesa de Viveiro e, á súa vez, reflexan que “non todos somos iguais”. Algo que os veciños deste concello, ao igual que os do resto de concellos da provincia, saben ben da man do PSOE e do BNG.

“Hoxe reivindicamos a política de compromiso e de feitos do PPdeG fronte aos pactos en despachos e as promesas incumpridas do PSOE e fronte a un BNG centrado en todo menos en traballar para todos”, concluíu.

O CAMIÑO DO QUE VIVEIRO “NUNCA DEBEU PERDERSE”

A alcaldesa aproveitou a visita para facer un chamamento á unidade e ao traballo colectivo para “volver ao camiño do que Viveiro nunca debeu perderse” e “deixar de lado o partidismo e pensar en que neste concello hai veciños e veciñas que precisan de apoio e de investimentos”.

Referiuse así tanto á Deputación de Lugo como ao Goberno central, que, en contraposición á aposta do Goberno de Alfonso Rueda, acumulan anos de desleixo con este concello. “Necesitamos que, ao igual que temos o apoio do PPdeG e do PP de Lugo, poidamos contar co respaldo de todas as administracións para que Viveiro volva ter o que lle corresponde e merece”, concluíu neste sentido.

O PPdeG esixe ao alcalde de Vigo que recapacite a súa decisión e permita que a Xunte leve adiante o proxecto do novo Centro de Asociacionismo

As deputadas do Grupo Popular Patricia García e Loli Hermelo esixiron hoxe ao alcalde de Vigo que recapacite a súa decisión e permita que a Xunta leve adiante o proxecto do Centro de Asociacionismo que ten previsto implantar no antigo edificio xudicial da rúa Lalín, no que ten previsto investir 19 millóns de euros para atender as necesidades de locais de 70 colectivos vigueses.

Xunto á delegada da Xunta en Vigo, Ana Ortiz, e a presidenta do PP nesta cidade, Luisa Sánchez, Patricia García e Loli Hermelo criticaron que o alcalde vigués “poña os intereses partidistas por enriba das necesidades da cidade” e lamentaron que “máis de 70 entidades veciñais, culturais e sociais están a verse prexudicadas por quen prefire preitear antes que dialogar e chegar a acordos entre as administracións públicas”.

TRANSFERIDO Á XUNTA EN 1994

O antigo edificio xudicial da rúa Lalín foi transferido sen condicións á Xunta polo Estado en 1994, polo que consta ao seu nome no Catastro e abona o IBI anualmente polo mesmo. O Concello de Vigo concedeu nun primeiro momento licenza de obra á Xunta para a realización do proxecto de adecuación deste edificio, pero dous meses despois decidiu suspendela alegando dúbidas sobre a titularidade do inmoble.

Diante desta situación, as deputadas populares demandaron ao alcalde de Vigo que “aparque a súa fobia contra todo o que ten que ver coa Xunta na cidade e mire algo polos beneficios dos seus veciños e asociacións, que están esperando por unhas instalacións nas que poder levar adiante os seus proxectos e actividades, pero que o Concello ten paralizadas sen xustificación congruente algunha”.

Ver a luz

Pedro Puy.

A película The Blues Brothers (1980) xa é de culto. O seu argumento é coñecido: os irmáns Jake e Elwood Blues, interpretados respectivamente por John Belushi e Dan Aykroyd, decátanse de que van embargar e vender o orfanato católico do barrio marxinal de Chicago no que se criaran, por falta de pagamento do imposto de bens inmobles. Nunha celebración relixiosa, agora baptista, oficiada polo reverendo Cleophus James (James Brown), Jake ve a luz. Ten unha misión: salvar o orfanato xuntando a súa banda de Blues, dar un concerto, e coa venda de entradas evitar o desafiuzamento da irmá Mary Stigmata, alias Nai Pingüín. No proceso, son perseguidos pola Policía Local polas máis de cen multas de aparcamento pendentes de Elwood, por unha moza abandonada por Jake, por unha banda de músicos country aos que suplantan nun local e por unha tropa de neonazis aos que atropelan durante unha manifestación. O concerto é un éxito, o imposto é pagado, pero a cidade de Chicago queda medio esnaquizada tralas frenéticas persecucións.

Esta semana o presidente do Goberno, Sánchez, tamén viu a luz. Foi en Santiago de Chile, no Palacio de la Moneda (o bombardeado por Pinochet), na compaña dos presidentes das repúblicas chilena, brasileira, colombiana e uruguaia. Pronto se unirán México e Honduras, e anúnciase algún que outro país de maior exemplaridade e tradición democrática, como Australia ou Canadá. A súa misión: salvar a democracia. Crear unha plataforma en defensa das institucións democráticas fronte aos movementos populistas de ultradereita e unha «dereita tradicional que ten sucumbido diante desa internacional reaccionaria do odio e a mentira». Non semella que sexa así en Alemaña, Polonia ou na Unión Europea, onde os seus correlixionarios gobernan coa dereita tradicional. Máis ben parece unha prolongación do muro que erixiu na súa investidura. Cuestión de visións.

Non só na ficción os irmáns Blues, cumprindo unha nobre misión tras ser alumeados pola divindade, deixaron tras de si unha boa recua de escachamentos. Foi a comedia musical máis cara da historia. Os 12 millóns de dólares de orzamento inicial convertéronse en 27,5, algo comprensible nunha película na que ademais das extraordinarias participacións de James Brown, Ray Charles, Aretha Franklin ou John Lee Hooker foron contratados máis de 500 extras, 200 membros da Garda Nacional de Illinois e 100 policías locais de Chicago, máis de 60 coches de policía que remataron esnaquizados, 3 tanques Sherman e 3 helicópteros, que precisaron un permiso especial para deixar caer o coche dos neonazis desde 400 metros de altura. Co tempo, os ingresos compensaron a produtora, pero a súa rodaxe segue a ser un exemplo de como non facer as cousas a xeito.

E é que ás veces as boas misións, xurdidas de alumeamentos, deixan consecuencias. Pola nobre causa de salvar a democracia no mundo fronte ao populismo da extrema dereita, en España poden quedar polo camiño a independencia e unidade do poder xudicial, a función lexislativa, orzamentaria e de control do poder lexislativo, ou a capacidade do Estado de recadar con equidade os seus propios tributos progresivos en todo o territorio. Quizais antes de dar leccións de democracia ao mundo sería prudente non esnaquizar o Estado de dereito en España. Ignoro os motivos, pero en España a película The Blues Brothers comercializouse co título de Granujas a todo ritmo.

O PPdeG salienta que o xacemento romano Aquis Querquennis compre 50 anos do inicio das escavacións convertido nun punto de referencia e atracción de visitantes do turismo cultural galego

Os deputados do Grupo Popular Juan Casares e José Luis Ferro, acompañados da alcaldesa Sandra Quintas, salientaron hoxe que, cando se compren 50 anos do inicio das escavacións arqueolóxicas no xacemento romano de Aquis Querquennis de Bande, este espazo converteuse nun punto de referencia e atracción de visitantes a esta comarca da Baixa Limia ourensá no contexto do turismo cultural galego, sobre todo no ámbito histórico patrimonial.

O xacemento romano de Aquis Querquennis, situado na parroquia dos Baños do concello de Bande, constitúe un dos conxuntos arqueolóxicos máis representativos da romanización do noroeste peninsular, tanto polo seu estado de conservación como pola súa importancia estratéxica na antiga Vía Nova, que unía Bracara Augusta (actual Braga) con Asturica Augusta (Astorga). En concreto, trátase dun antigo campamento militar romano, datado no século I d.C., que inclúe restos do campamento, do mansio, termas e outras estruturas lixeiras vinculadas á presenza militar e ao tránsito imperial.

MEDIA DE 30.000 VISITANTES CADA ANO

Os deputados populares lembraron que as escavacións no xacemento de Aquis Querquennis iniciáronse en 1975 da man do profesor Antonio Rodríguez Colmenero e desde entón este enclave consolidou o seu papel como recurso patrimonial, educativo e turístico, cunha media de 30.000 visitantes cada ano.

“O traballo que se está a desenvolver neste xacemento, así como o interese que suscita entre os seus visitantes, reforza o papel dun concello do interior como é o de Bande no contexto do turismo cultural galego, sobre todo no ámbito histórico patrimonial”, manifestou o deputado popular José Luis Ferro.

Neste sentido, Juan Casares subliñou que “a actividade investigadora e patrimonial que desenvolve o conxunto arqueolóxico de Aquis querquennis supón afondar no coñecemento dun elo máis da cadea histórica que define a Galicia como terra senlleira e ancestral”.

Pola súa banda, a alcaldesa Sandra Quintas afirmou que “o Concello de Bande aposta por aumentar a visibilidade deste xacemento como recurso patrimonial, histórico e turístico, así como por potenciar a oportunidade que abre á cooperación interterritorial con outras localidades unidas pola Vía Nova”.

Así, con motivo da celebración deste 50 aniversario do inicio das escavacións neste xacemento, o Concello ten previsto un programa de actividades para poñer en valor o traballo de investigación e conservación realizado; achegar á cidadanía e visitantes a relevancia histórica do enclave; reforzar a proxección de Aquis Querquennis como recurso patrimonial e turístico de relevancia autonómica; e promover o respecto polo patrimonio cultural como elemento de identidade colectiva.

O PPdeG sitúa a rehabilitación integral do IES Alfredo Brañas de Carballo como unha mostra máis do compromiso da Xunta coa educación pública

O deputado do Grupo Popular e portavoz do PP en Carballo, Rubén Lorenzo, xunto á tamén deputada Ethel Vázquez afirmaron hoxe que a rehabilitación integral do IES Alfredo Brañas de Carballo, que suporá un investimento superior aos 1,7 millóns de euros, “é unha mostra máis do firme compromiso da Xunta coa educación pública”. Estas obras mellorarán as condicións de traballo do profesorado e a calidade do ambiente para estudar do alumnado, convertendo o IES Alfredo Brañas nun espazo máis acolledor, eficiente e cómodo.

Esta actuación, que deu comezo recentemente e teñen un prazo de execución de nove meses, permitirá modernizar estas instalacións educativas mellorando a súa eficiencia enerxética, o confort térmico e acústico, a accesibilidade e a calidade dos espazos.

En concreto, a intervención prevista pola Xunta no IES Alfredo Brañas inclúe a renovación das carpintarías exteriores, a mellora do illamento térmico, a instalación de sistemas de iluminación máis eficientes e a adecuación de espazos interiores e accesos ao edificio, reducindo así o consumo enerxético e contribuíndo á sustentabilidade ambiental.

Rubén Lorenzo e Ethel Vázquez explicaron que esta actuación se enmarca na segunda fase do Plan de Nova Arquitectura Pedagóxica da Xunta, a través da que se investirán 200 millóns de euros nos vindeiros catro anos para transformar os centros educativos galegos en espazos modernos e adaptados ás necesidades actuais.

Na primeira fase deste plan, a Xunta investiu case un millón de euros nos centros educativos de Carballo, con obras tan demandadas como o salón de actos deste IES Alfredo Brañas.

O PPdeG salienta en Becerreá a importancia dos traballos de prevención para evitar a orixe e propagación dos incendios forestais

As deputadas do Grupo Popular Encarna Amigo e Katy Varela salientaron hoxe en Becerreá a importancia da realización de traballos de prevención para evitar a orixe e propagación dos incendios forestais nos montes galegos. Neste sentido, fixeron un chamamento á colaboración cidadá para a prevención e loita contra os incendios forestais avisando directamente ao teléfono 085, aínda que tamén se pode chamar ao 900815085 para facer denuncias anónimnas de actividades incendiarias.

Nun encontro celebrado con persoal das brigadas de bombeiros forestais do Distrito VII, no que comprobaron os traballos de creación de cortalumes feitos entre os montes de Cereixal e Furco no concello de Becerreá, Encarna Amigo e Katy Varela puxeron en valor o “traballo silencioso, pero fundamental, que este persoal leva a cabo na prevención dos incendios forestais, unha mostra do seu empeño e paixón polo coidado do monte”.

Segundo se recolle no Plan de prevención e defensa contra os incendios forestais de Galicia (PLADIGA), o plan de prevención afonda nos traballos de creación de áreas cortalumes e faixas auxiliares de pistas, na mellora das pistas forestais, nos tratamentos silvícolas preventivos e nas queimas prescritas. Ademais, lévase a cabo a revisión e o mantemento dos máis de 5.000 puntos de auga repartidos por todo o territorio galego.

As deputadas populares explicaron que “o principal obxectivo deste plan de prevención é evitar, primeiro, que o lume se produza e, no caso de producirse, minimizar os danos causados pola súa propagación”. Deste xeito, descataron o traballo de prevención realizado polas brigadas forestais para xestionar a biomasa en zonas estratéxicas mediante técnicas silvícolas adecuadas, co fin de reducir a perigosidade e o risco de incendio forestal, ao tempo que se adecúa unha rede de infraestruturas preventivas para acceder nas mellores condicións e no prazo máis corto de tempo aos lumes forestais.

Francisco Millán Mon critica la propuesta del nuevo Marco Financiero Plurianual 2028-2034 por su centralización y recortes en sectores clave para Galicia

El eurodiputado del Partido Popular de Galicia  Francisco Millán Mon ha expresado hoy su preocupación por la propuesta presentada por la Comisión Europea para el nuevo Marco Financiero Plurianual (MFP) 2028-2034, destacando que supone “un cambio sustancial y negativo en la estructura de los fondos comunitarios”.

Millán Mon critica que la propuesta fusiona diversos fondos europeos “de forma discutible” y apuesta por una centralización excesiva en manos de los gobiernos nacionales, siguiendo un modelo similar al de los fondos Next Generation, cuya gestión en España ha generado amplias críticas. “Las regiones como Galicia conocen mejor las necesidades de sus ciudadanos y ejecutan los fondos de forma más eficiente y adaptada a sus realidades”, ha señalado. En este sentido, ha recordado que Galicia logró una tasa de absorción de fondos superior al 90% en el periodo 2014-2020.

El eurodiputado popular ha alertado también sobre los “recortes muy preocupantes” en áreas como la agricultura, la pesca y la cohesión territorial, sectores estratégicos para la economía gallega y, en particular, para su sector primario. “Esta reducción de recursos puede tener un impacto muy negativo en el desarrollo y el bienestar de comunidades como la nuestra”, ha advertido.

A pesar de las críticas, Millán Mon ha reconocido que la propuesta incluye elementos positivos, como el nuevo Fondo de Competitividad, que valora como “una herramienta útil para una comunidad como Galicia, comprometida con la innovación y con la mejora de la competitividad de sus empresas”.

O PPdeG celebra o Día de Galicia cun toque de humor subliñando que “a Galicia do si” é a da gran maioría dos galegos e galegas

O Partido Popular de Galicia conmemora hoxe o Día de Galicia tras un curso político no que se despregou por completo o ‘Estilo Rueda’ de facer política na nosa Comunidade, e faino a través dun vídeo no que subliña que “a Galicia do si” é tamén a da gran maioría dos galegos e galegas.

Cun toque de humor, empregando diversos termos coa sílaba “si”, os populares galegos reivindican a Galicia en positivo como “a Galicia do futuro”, fronte a aqueles que din ‘non’ e que se opoñen calquera cousa por sistema, e explican así a idea que intentan transmitir a través desta pequena peza audiovisual: “Nós miramos cara a adiante, con orgullo, forza e identidade”.

No vídeo participa como principal protagonista o presidente Alfonso Rueda, que na contorna da Fervenza do Toxa, onde tivo lugar a conmemoración do Día de Galicia do PPdeG o pasado martes, deixa claro ante a secretaria xeral, Paula Prado, que esa fermosa paisaxe se atopa en “Si-lleda”.

Trátase, ademais, dun lugar moi especial para o líder dos populares galegos, pois moi preto de alí no mesmo concello, na Bandeira, están as súas raíces. Aproveitando un xogo de palabras, colle un estandarte galego de mans de Luis López, presidente provincial de Pontevedra, que se achegou ata a zona en bicicleta e, de paso, tamén fixo fincapé así na importancia da actividade física.

Esta é a parte final do vídeo, que dá comezo coa conversa entre dous turistas estranxeiros e o presidente provincial de Ourense, Luis Menor, que lles aclara que están ante o maxestoso río “Si-l”, nunha escena gravada no miradoiro de Moura, no municipio de Nogueira de Ramuín, na Ribeira Sacra, que segue no camiño a ser declarada Patrimonio Mundial da Unesco.

A escena serve, ademais, para deixar claro que “Galicia di ‘si’ tamén a “abrir os brazos a todo o mundo que nos queira visitar”.

O QUEIXO SAN SIMÓN E O ‘VINTESINCO’

Pola súa banda, a presidenta provincial de Lugo, Elena Candia, responde orgullosa que o produto típico de Vilalba e un dos máis coñecidos de Galicia é o queixo “San Si-món”. Faino, ademais, no interior da queixería Don Crisanto, que vén de ser galardoada hai uns días co premio ao mellor queixo de España, o que pon tamén en valor a variedade e calidade da nosa gastronomía en toda a Comunidade.

Por último, no porto de Malpica de Bergantiños, o presidente provincial da Coruña, Diego Calvo, e a deputada autonómica e percebeira Paula Mouzo Mas teñen unha curiosa conversación, na que esta non se daba conta de que é 25 de xullo, día festivo. “É verdade! Que é… vinteSinco”, dille a camariñana, con esa característica fonética tan habitual na fala da Costa da Morte dunha lingua galega que tamén é protagonista neste Día de Galicia e coa que o PPdeG está comprometido.

Así, Rueda remata recalcando que “somos a Galicia da gran maioría dos galegos e galegas; a Galicia do futuro; a Galicia do si” e, en definitiva, a Galicia do PPdeG, desexándolle un feliz día a todos os galegos e galegas.

O PP de Galicia e o PP de Gipuzkoa comparten visións dun “proxecto común” que “mellora a vida das persoas”

A sede do Partido Popular de Gipuzkoa recibiu recentemente a visita da responsable de Medio Ambiente e Cambio Climático do Goberno galego e membro do Comité Executivo do PP de Galicia, Ángeles Vázquez, nun encontro que serviu para estreitar lazos entre territorios con identidades propias pero unidos por un “proxecto político común”.

A presidenta do Partido Popular de Gipuzkoa, Muriel Larrea, recibiu á responsable galega nun ambiente de proximidade e cordialidade, reivindicando a riqueza dunha España plural na que cada terra achega a súa cultura, o seu idioma e a súa maneira de entender a vida, pero onde todos comparten un mesmo compromiso: o de traballar polo ben común desde os valores do PP.

“Galicia e Euskadi teñen linguas propias, costumes diferentes e paisaxes moi distintas, pero con este encontro demostramos que cando compartes principios, visión de país e ganas de mellorar a vida das persoas, todo iso suma”, sinalou Muriel Larrea tras o encontro.

A visita valeu para subliñar o valor da política con raíces, pegada ao terreo, que respecta a diversidade e defende unha España de cidadáns libres e iguais. Ambas dirixentes coincidiron na importancia de manter vivos os lazos entre territorios que, desde a súa singularidade, constrúen xuntos un proxecto nacional forte e cohesionado.

“Somos un partido que se constrúe desde abaixo, desde cada recuncho de España, con respecto ás nosas raíces e orgullo de formar parte dunha mesma casa común”, afirmou a presidenta do PP de Gipuzkoa.

Pola súa banda, Ángeles Vázquez aproveitou para trasladar a Muriel Larrea información sobre os últimos avances en materia de costas, tendo en conta que o Goberno de España traspasou este mes a Galicia as competencias en materia de ordenación e xestión do litoral, e o País Vasco recibiunas tamén este mesmo ano, en abril.

O PPdeG pon en valor o traballo da Xunta para solucionar os problemas de obtención do carné de conducir e pide ao Goberno central que adopte “medidas urxentes”

A secretaria xeral do Partido Popular de Galicia, Paula Prado, participou hoxe nun acto organizado por Novas Xeracións en Ourense, centrado nas dificultades que a mocidade atopa á hora de obter o carné de conducir en Galicia, no que puxo en valor o traballo do Goberno galego para solucionar este problema.

Durante a súa intervención, Prado destacou “as políticas activas da Xunta de Galicia para mellorar a mobilidade e a inserción laboral da xuventude”, como as axudas económicas para obter o carné, que xa beneficiaron a 4.000 persoas novas.

“A realidade é que o carné de conducir segue a ser unha ferramenta esencial para a independencia e o acceso ao emprego”, afirmou Prado. Porén, denunciou que “o amplo número de prazas vacantes de examinadores na Dirección Xeral de Tráfico está a xerar un colapso sen precedentes: segundo as últimas informacións, hai arredor de 3.000 persoas en lista de espera na nosa Comunidade e un prazo de ata cinco meses para poder examinarse”.

Neste sentido, lembrou que é o Goberno de Sánchez o que ten as competencias de Tráfico e esixiulle que adopte todas aquelas medidas que permitan, de maneira urxente, a cobertura de prazas de examinadores de tráfico vacantes en Galicia. “Non se pode seguir permitindo que o Goberno central mire para outro lado mentres os galegos ven paralizados os seus proxectos de vida e traballo”, insistiu Prado.

De feito, o propio director xeral de Tráfico, Pere Navarro, recoñeceu onte publicamente que “non hai suficientes examinadores para asumir todas as solicitudes de persoas que queren sacarse o carné”.

“A consecuencia disto”, indicou Prado, “é que moitos mozos e mozas perden oportunidades de traballo ou de acceder a oposicións por non dispoñer do permiso nun prazo razoable”.

O CIFP PORTOVELLO DE OURENSE, PIONEIRO NA FORMACIÓN

Con todo, Paula Prado quixo destacar unha boa nova que amosa a capacidade de Galicia, e neste caso a provincia de Ourense, para ofrecer solucións: “Hai pouco saíu do CIFP Portovello de Ourense a primeira promoción de profesores de autoescola formados nun ciclo superior de Formación Profesional. Son 14 alumnos que simbolizan o compromiso de Galicia coa formación útil e de calidade”.

“Galicia, unha vez máis, vai un paso por diante na solución dun problema que afecta a toda España, cun modelo que marca o camiño a seguir”, asegurou, e apuntou que a Deputación de Ourense prestou un apoio importante a esta iniciativa de FP ao financiar as prácticas e os materiais.

Pola súa banda, a presidenta de Novas Xeracións de Galicia, Nicole Grueira, puxo en valor a “aposta decidida” do Goberno galego pola FP dual e, en particular, por un ciclo pioneiro que só existe en Galicia e que se imparte na provincia de Ourense. “Un ciclo que permite formar a mozos e mozas que queiran ser profesores de autoescola, garantindo así o relevo xeracional nun sector clave”, engadiu.

Segundo Grueira, esta iniciativa “amosa que a Xunta e o PPdeG están ao carón da xuventude, investindo en formación e no futuro de Galicia. E se se inviste en quen vai formar os futuros condutores, estase a construír unha sociedade máis sostible, máis segura e máis responsable”.

A presidente de Novas Xeracións, acompañada do deputado autonómico José Luis Ferro e do responsable da organización xuvenil na provincia, Nacho Campo, tamén anunciou que o PPdeG rexistrou no Parlamento galego unha iniciativa.

Mentres, a responsable local do PP en Ourense, Ana Méndez, subliñou a importancia estratéxica que ten a provincia no ámbito da formación viaria: “Xogou un papel clave para que esta iniciativa fose unha realidade, grazas tamén ao impulso e á aposta da Asociación de Autoescolas de Ourense”.

Méndez destacou que “Ourense será a única provincia de Galicia —e unha das poucas en todo o Estado— onde durante o mes de agosto non haberá listas de agarda para os exames de conducir. Todos os alumnos que queiran examinarse poderán facelo sen atrasos nin limitacións”.

“ESPAÑA PRECISA QUE FEIJÓO COLLA O VOLANTE”

Finalmente, en clave nacional, a secretaria xeral do PP de Galicia lembrou que hoxe se cumpren dous anos desde que o Partido Popular, con Alberto Núñez Feijóo á fronte, gañou as eleccións xerais de 2023. “Por desgraza, continuamos cun Goberno de España liderado por Pedro Sánchez, que segue instalado na mentira, sometido ás chantaxes constantes dos seus socios independentistas e incapaz de gobernar para o conxunto dos españois”, asegurou.

Prado denunciou que estes dous anos foron “unha sucesión de cesións políticas, privilexios territoriais e escándalos de corrupción que deixan a España paralizada e sen rumbo”. E agregou: “Sánchez só pensa en aguantar un minuto máis na Moncloa, aínda que iso supoña vender a unidade e a igualdade dos cidadáns”.

Neste momento da lexislatura, a dirixente popular apelou á necesidade dun cambio de rumbo urxente: “España non pode seguir así. Hai que cambiar de condutor, e ese condutor non pode ser outro que Alberto Núñez Feijóo”.