O PPdeG impulsa unha ofensiva parlamentaria nas Cortes Xerais co obxectivo de coñecer o “impacto real” dos fallos coñecidos nas pulseiras antimaltrato en Galicia e, neste sentido, insta ao Goberno central a actuar con “total transparencia” en aras de “reparar o posible dano feito ás vítimas”.
A través dos seus representantes no Congreso dos Deputados e no Senado, veñen de rexistrar en ambas cámaras unha batería de preguntas dirixidas aos diferentes ministerios implicados –Igualdade, Xustiza e Interior– e coas que pretenden obter os datos “por provincia e partido xudicial” sobre cantas mulleres galegas se viron afectadas polo fallo deste dispositivo en Galicia.
Fano logo de coñecer o “fallo crítico” producido polo cambio de adxudicatario do sistema Cometa por parte do Ministerio de Igualdade e a migración defectuosa dos seus datos. Un fallo que, segundo a Fiscalía Xeral do Estado, causou “unha gran cantidade” de sobresementos provisionais e sentencias absolutorias en causas de violencia de xénero por falta de datos probatorios e que, en consecuencia, tivo un prexuízo directo a protección das vítimas.
Deste xeito, os populares galegos demandan unha resposta por escrito ao Goberno central ante cuestións como a duración exacta do período no que o sistema de seguimento telemático non puido facilitar información anterior ao 20 de marzo de 2024 ou as medidas específicas que se puxeron en marcha para “reparar o dano causado ás vítimas, evitar que se repitan fallos similares e garantir a total transparencia sobre o alcance real do impacto desta xestión”.
Interésanse ademais polo método de coordinación seguido na supervisión e garantía da calidade do sistema nas catro provincias galegas “para asegurar a protección efectiva e evitar a revitimización causada por estes fallos técnicos” e, nesta liña, preguntan se nalgún momento o Ministerio de Igualdade informou á Delegación do Goberno de Galicia sobre os problemas derivados do cambio dos dispositivos.
Estas iniciativas veñen logo de que desde o PPdeG xa pediran publicamente a dimisión da ministra de Igualdade por este “escándalo” e mentres seguen agardando as explicacións dun Pedro Sánchez cuxo Goberno é “o menos feminista da historia”.