O PPdeG cualifica de “película de terror” a deriva do BNG cara unha “radicalización total”

O PPdeG cualifica de “película de terror” a deriva do BNG cara unha “radicalización total” que se manifestou ao longo das últimas semanas cos chamamentos do independentismo galego á “conflitividade social”, os “ataques violentos e de odio” da súa militancia cara representantes doutras formacións ou os seus intentos por “adoutrinar” nos colexios.

A secretaria xeral dos populares galegos, Paula Prado, denunciou hoxe en rolda de prensa que ela mesma sufriu en redes sociais un destes “ataques” por parte do número 4 da candidatura do BNG ás eleccións europeas. Unhas palabras “de odio” que Ana Pontón “aínda non condenou” e que “deixan claro que o comunismo do BNG consiste en intentar silenciar e poñer na diana a quen non pensa coma eles”.

“É curioso que aqueles aos que lles parece ‘gravísimo’ o que nós dicimos e facemos sexan os mesmos que forman parte dun partido que basea a súa estratexia na ‘conflitividade social’ ou en intentar adoutrinar nos colexios”, engadiu facendo referencia ao recente documento no que a UPG “pide máis manifestacións e máis alboroto” e ás comunicacións da CIG-Ensino “intentando coar nos colexios materiais de todo tipo” co fin de “adoutrinar” aos nenos e nenas galegas.

Prado mostrou como exemplo disto último uns materiais que o sindicato nacionalista trasladou ao profesorado e nos que se pode ver, entre outras cousas, a un Eduardo Blanco Amor espido “para vestilo con camisetas reivindicativas” ou a unha Rosalía de Castro “silenciada e submisa” cunha mordaza na boca.

“Non imos consentir que isto chegue aos nosos fillos e fillas”, concluíu a secretaria xeral do PPdeG ironizando, na véspera do Samaín, con que os populares galegos están “asustados” ante “película de terror” na que se converteu o BNG logo de  reunirse cos “herdeiros de ETA”, de cualificar de “fascista” á Premio Nobel da Paz, María Corina Machado, e mesmo de “perseguir” a membros do Goberno galego, como é o caso da responsable autonómica de Política Social.

OS AGRAVIOS ACUMULADOS DE SÁNCHEZ CON GALICIA

Paula Prado celebrou que, mentres todo isto acontece, no Parlamento galego se estea vendo un “exercicio democrático e necesario” como é a presentación dos Orzamentos de 2026. Algo que, na súa opinión, constata que Galicia é “unha illa de estabilidade” que permite ao Goberno de Alfonso Rueda “seguir pensando no benestar dos galegos e das galegas e non en chistorras, soles e leitugas”.

Ao fío disto, denunciou a falta de Presupostos Xerais do Estado e a “obstaculización de investimentos” que iso supón “por moito que o secretario xeral do PSdeG fixera unha xira para criticar os Orzamentos da Xunta só porque non pode falar ben duns Presupostos estatais que nin están nin se lles espera”.

“O mesmo pasa co BNG de Ana Pontón, que segue tan bravo en Galicia e tan mansiño en Madrid”, afirmou a número dous dos populares logo de que hoxe mesmo os independentistas galegos decidiran ausentarse da Comisión do Senado na que comparecía Pedro Sánchez e “evitar así pedirlle explicacións”.

Prado rematou preguntándose “ata cando vai seguir sendo o BNG unha comparsa do sanchismo” e se realmente o independentismo galego “necesita seguir sendo tan submiso coa cantidade de agravios que Sánchez leva acumulados con Galicia”.

O Parlamento de Galicia demanda a elaboración dun protocolo para o acompañamento de persoas con discapacidade visual nos centros sanitarios

O Parlamento de Galicia aprobou hoxe por unanimidade a proposición non de lei do Grupo Popular a través da que se insta á Xunta de Galicia a estudar a elaboración dun protocolo para o acompañamento das persoas con discapacidade visual nos centros sanitarios galegos, en consenso e coa participación dos profesionais da saúde e das organización que traballan para garantir e ampliar as súas condicións de accesibilidade e inclusión.

A portavoz popular de Política Social, Raquel Arias, afirmou que “a inclusión real significa que todas as persoas, independentemente das súas condicións físicas, mentais ou sensoriais, poidan participar plenamente na sociedade”. En concreto, manifestou que “situacións tan habituais como acudir a un centro de saúde, clínica ou hospital, solicitar unha cita ou estar pendente da quenda de chamada a unha consulta pode verse condicionada pola discapacidade visual, ao tempo que as posibilidades de desorientación dentro do centro sanitario son especialmente elevadas en persoas con discapacidade visual, polo que parece oportuno xerar un ambiente onde se garanta autonomía da persoa e o apoio necesario para a súa plena inclusión”.

FORMACIÓN ESPECÍFICA PARA OS PROFESIONAIS

“Todas estas razóns fan recomendable que a Xunta impulse a elaboración dun protocolo ou guía de acompañamento a persoas con discapacidade visual nos centros sanitarios para garantir un trato accesible e unha asistencia personalizada”, sinalou a portavoz popular. Ademais, considerou “axeitado levar a cabo unha formación específica para os profesionais sanitarios sobre as técnicas de acompañamento a persoas con discapacidade visual, que pode facerse da man e en colaboración coas propias organizacións que agrupan a persoas cegas ou con discapacidade visual”.

Raquel Arias lembrou que o Servizo Galego de Saúde “xa está promovendo diferentes accións para garantir a accesibilidade e a igualdade de oportunidades para persoas con discapacidade física, incluída a visual, e a mobilidade reducida”. En concreto, referiuse ao proxecto piloto de sinalización para persoas con discapacidade visual que se está desenvolvendo na área sanitaria de Vigo; o procedemento de atención a persoas con mobilidade reducida en consultas externas, servizos de urxencias e centros de atención primaria; ou o proxecto de atención a persoas con mobilidade reducida ou discapacidade visual que se está a traballar na área sanitaria de Ferrol.

O Parlamento de Galicia pide ao Goberno central que actualice a Lei de réxime fiscal das cooperativas

O Parlamento de Galicia aprobou hoxe a proposición non de lei do Grupo Popular, co voto en contra dos deputados do PSdeG, a través da que se solicita ao Goberno de España que actualice a Lei de réxime fiscal das cooperativas, “unha norma aprobada en 1990 e que se atopa totalmente desfasada despois de 35 anos, porque o sector non é o mesmo, nin a estrutura empresarial, nin o mercado, nin os retos tecnolóxicos son os mesmos”.

A portavoz popular de Emprego, Noelia Pérez, asegurou que “conservar un marco fiscal tan desfasado xera inseguridade, limita a capacidade de investimento e dificulta o crecemento das cooperativas”. Deste xeito, subliñou que “falamos dunha demanda realizada desde a propia Confederación Empresarial Española de la Economía Social, que pide en concreto recoñecer a figura do socio colaborador, para fortalecer o capital propio; flexibilizar límites de contratación, porque a realidade produtiva de 2025 non é a de 1990; tratar o fondo de educación e promoción como un investimento social; e permitir que as cooperativas poidan medrar sen estar pendentes de se, ao facelo, fan perder beneficios que sustentan o seu propio modelo democrático”.

PARTE FUNDAMENTAL DA ECONOMÍA SOCIAL DE GALICIA

Noelia Pérez lembrou que “o cooperativismo é unha parte fundamental da economía social de Galicia, porque temos máis de 2.000 cooperativas activas, cunha facturación anual superior aos 3.500 millóns de euros e que sosteñen miles de empregos estables”. “Estamos a falar cun sector estratéxico, que combina actividade económica con compromiso territorial, cohesión social e innovación organizativa, e para o que a Xunta destinará o vindeiro ano máis de 56 millóns de euros”, dixo.

Por este motivo, manifestou que a Xunta leva tempo traballando nunha nova Lei de cooperativas de Galicia para adaptar a lexislación ás novas realidades, favorecer a creación de novas entidades e reforzar o tecido existente. “O obxectivo é dotar ás cooperativas dunha regulación máis flexible, adaptar a súa estrutura xurídica ao dereito societario, dotalas das ferramentas e métodos organizativos necesarios para mellorar a súa xestión diaria e avanzar na modernización do rexistro de cooperativas, introducindo a dixitalización e a tramitación electrónica”, concretou.

O PP afea a falta de políticas do Goberno de Sánchez en materia de vivenda: “Adif mantén abandonados máis de 74 inmobles a pesar da demanda de vivenda”

O Administrador de Infraestruturas Ferroviarias (ADIF) dependente do Ministerio de Transportes e Mobilidade Sostible dispón na provincia de Lugo de 74 inmobles baleiros que na actualidade non teñen ningún tipo de uso, segundo confirman en resposta escrita aos senadores do PP lucense José Manuel Barreiro, José Manuel Balseiro e Juan Serrano.

Os senadores populares interesáronse por coñecer o número de vivendas e o seu estado de conservación toda vez que “hai demanda de vivenda e o Goberno do Estado dispón de propiedades que na actualidade non están a ser empregadas e que poderían ser habilitadas para outros fins”. De feito, Adif recoñece que “mantén aberta a posibilidade de cesión ou disposición de inmobles”; o que revela que “na práctica non está a desenvolver unha política activa en materia de vivenda”.

“A falta de traballo do Goberno de Sánchez” esténdese, non só á falta de iniciativas para dotar de novos usos a estas propiedades na provincia, senón tamén no ámbito da conservación destes inmobles propiedade de Adif.

De feito, Adif asegura que “continúa traballando na xestión eficiente do seu patrimonio inmobiliario co obxectivo de optimizar o seu uso (…) e contribuír, na medida do posible, ao desenvolvemento territorial e social”; pero tamén recoñece que “dos 74 locais e vivendas dispoñibles ningún se atopa en boas condicións de conservación” e, incluso, 10 xa se atopan en estado ruinoso.

COMPROMISO ORZAMENTARIO A PROMESAS SEN CUMPRIR

“Mentres que o Goberno de Sánchez fai anuncios en materia de vivenda que non chega a cumprir, o Goberno galego avanza no seu obxectivo de duplicar o parque de vivenda pública en Galicia para o 2028”, aseguran os senadores. De feito, das 4.000 novas vivendas xa están en marcha preto de 3.000.

Os senadores lembran que “o Goberno de Sánchez continúa sen presentar uns Presupostos actualizados porque está máis preocupado doutras cousas que de gobernar”. En cambio, “o Goberno galego presentou as súas contas en tempo e forma”. E en materia de vivenda os Orzamentos da Xunta prevén para o 2026 preto de 29M€ para construír vivendas de promoción pública na provincia. Ademais, reserva 5M€ para unha oferta pública de adquisición de baixos na Comunidade para transformalos en vivenda pública de calidade e con carácter permanente.