O Parlamento avanza na modificación do proxecto de Lei de saúde de Galicia, unha norma que reforza a protección do persoal sanitario fronte ás agresións

A Comisión 5ª de Sanidade, Política Social e Emprego do Parlamento de Galicia aprobou hoxe o proxecto de lei de modificación da Lei de saúde de Galicia, pola que se establecen medidas de prevención e protección integral contra a violencia no ámbito sanitario da nosa Comunidade.

A portavoz popular de Sanidade, Encarna Amigo, incidiu no carácter preventivo desta norma, e aproveitou para lembrar ás máis de 850 agresión sufridas polos profesionais do Sergas, en 2024: “A violencia non pode formar parte do traballo sanitario como un risco asumido”.

Así, a norma prevé a posibilidade de cambiar a persoa infractora de profesional sanitario ou de centro, e tamén de garantir a mobilidade laboral da vítima. Inclúe, tamén, a violencia dixital, ademais da física e verbal, como conduta reprochable; e sancións por agresións aos técnicos de emerxencias sanitarias e do 061.

Entre outras medidas, contempla a creación do Plan de prevención contra a violencia e o Rexistro galego de actos de violencia externa no ámbito sanitario.

UNHA LEI DE CONSENSO

A lei contou co voto a favor do Grupo Popular e do Grupo Socialista e coa abstención do BNG e do Grupo Mixto. Para a súa aprobación final, só resta o seu debate no Pleno do Parlamento.

Neste senso, a voceira popular puxo en valor o traballo realizado durante a tramitación parlamentaria, que permitiu mellorar o texto inicial a través do diálogo entre grupos. Neste sentido indicou que foron aceptadas 8 das 11 emendas presentadas polo Grupo Socialista.

Pola contra e tal e como lamentou a voceira popular, só se incorporou unha emenda do BNG, xa que “non foi posible alcanzar acordos de transacción”. “Ou as aceptabamos na súa literalidade –engadiu- ou non había acordo”.

Neste senso, Encarna Amigo afirmou que os independentistas confunden diálogo con imposición e volveu incidir no obxectivo da norma: un marco legal de protección efectiva para “quen cada día coida da nosa saúde”.

“Esta non é unha lei ideolóxica. É unha lei para protexer aos profesionais sanitarios” afirmou, destacando que “quen coida merece ser coidado. E quen salva vidas non pode traballar con medo”.

O PPdeG pregunta ao Goberno no Congreso polo “deplorable estado” das estradas galegas tras o tren de borrascas

O Partido Popular de Galicia, a través de varios deputados galegos no Congreso, presentou este xoves unha batería de cinco preguntas dirixidas ao Goberno de España acerca do recoñecemento do “deplorable estado” das estradas da comunidade e sobre posibles plans de rehabilitación das vías tras o tren de borrascas.

Segundo o comunicado dos populares, tamén instaron ao Executivo central a responder se se van facer cargo dos gastos de reparación referidos aos danos materiais sufridos polos vehículos e atribuídos ao “mal estado” do firme.

A pesar de recoñecer os “esforzos inxentes” das empresas dedicadas á conservación fronte aos temporais que azoutaron Galicia nos últimos meses, o PPdeG advertiu que a situación das estradas estatais xa era “moi deficiente” previamente.

Así mesmo, insistiron en que as imaxes de picadas, socavóns ou carrís cortados en vías que atravesan a comunidade galega e a conectan con outras limítrofes “sucédense nos medios de comunicación das catro provincias todos os días”.

O PPdeG urxe ao Goberno a que confirme o arquivo do actual proxecto da variante de Caldas e inicie a redacción dun novo consensuado coa veciñanza

O portavoz do Grupo Popular no Parlamento, Alberto Pazos, urxiu, hoxe, ao Goberno central a que anule de xeito inmediato o actual proxecto da variante oeste de Caldas de Reis e inicie a redacción dun novo que inclúa as demandas da veciñanza e contemple as necesidades dos municipios afectados.

Acompañado do portavoz municipal, Fernando Pérez, Alberto Pazos mantivo unha xuntanza cos veciños de Godos, unha das parroquias de Caldas máis afectadas polo impacto desta variante, para informarlles da proposición non de lei que o PPdeG levará ao vindeiro pleno do Parlamento sobre o deseño desta infraestrutura. Unha iniciativa que, tal e como explicou, impulsou o voceiro local e que se fai eco das demandas e o sentir maioritario dos veciños.

Alberto Pazos, tras referirse ao anuncio feito, onte, polo secretario xeral do PSdeG da cancelación da variante, dixo que agarda a que sexa o delegado do Goberno de Galicia ou algún representante do Executivo central a que confirme esta nova, xa que “Besteiro non ten potestade ningunha para facelo”. Neste punto, amosou a súa estrañeza pola repentina preocupación do representante socialista con respecto a esta infraestrutura, xa que foi ás poucas horas de que se incluíse na orde do día do pleno a iniciativa do PPdeG cando “anunciaba o arquivo desta obra”. “Pareceríanos unha magnífica noticia –engadiu-, sobre todo se é verdade”.

Para o voceiro do PPdeG, a palabra de Besteiro “merece pouco respecto”, dados os precedentes: “É a mesma persoa que anunciou a gratuidade da AP-9. E seguimos pagando por usar esa vía”. De aí que o PPdeG manteña a iniciativa para o seu debate no pleno da próxima semana.

Así, considerou que o Goberno central debe iniciar con urxencia a redacción dun novo estudo informativo, que conteña alternativas de trazado adaptadas aos acordos plenarios acadados por unanimidade nos plenos dos concellos de Caldas de Reis e Portas.

O PPDEG, O ÚNICO QUE DEFENDE OS INTERESES DE CALDAS
Segundo Alberto Pazos, de confirmarse a cancelación do actual proxecto, lesivo para a comarca do Umia, o éxito será da veciñanza de Caldas de Reis, de quen destacou o traballo que vén realizando desde hai meses para que se teñan en conta as súas demandas. Nesta mesma liña, fixo fincapé en que o único partido que está a defender os intereses do municipio é o PPdeG, e aproveitou para destacar o compromiso do voceiro municipal, quen tomou o liderado desta cuestión e sempre estivo ao carón dos seus veciños.