O Parlamento de Galicia, a través dunha proposición non de lei do Grupo Popular, aprobou, hoxe, instar ao Goberno central a que active de forma urxente un diálogo real cos sindicatos médicos e estableza un marco de regulación específico para o persoal facultativo.
“Mentres o Goberno central agrava o problema, a Xunta demostra ser moito máis eficaz á hora de negociar e garantir a asistencia sanitaria”, apuntou a deputada do Grupo Parlamentario Popular, Encarna Amigo, ao referirse á reforma do Estatuto Marco que promove o Goberno central. E considerou necesario establecer un marco de regulación específico, conforme á normativa europea, que inclúa unha mesa de negociación vinculante para o colectivo médico, no que se teñan en conta as condicións e responsabilidades concretas do seu traballo: “Porque non se pode tratar igual a quen ten responsabilidades distintas”.
Un estatuto marco, engadiu, que xa “está superado”, polo que incidiu na necesidade de reformalo e actualizalo. Neste punto, acusou ao Goberno de Pedro Sánchez de “fallar” á hora de afrontar dita reforma, xa que, tal e como dixo, “non se pode lexislar de costas aos facultativos”, sen escoitalos, sen negociar e sen recoller as súas demandas: “Iso non é reformar, é impoñer”. Así, avogou por un espazo propio para a negociación, no que se teñan en conta as condicións e as responsabilidades concretas da profesión médica.
Encarna Amigo lamentou a soberbia, a falta de diálogo e unha negativa sistemática a sentarse a negociar de verdade cos sindicatos médicos. Unha actitude, engadiu, que está a provocar graves consecuencias para os pacientes: “Levamos meses con paros e con folgas que están paralizando o Sistema Nacional de Saúde”. En Galicia, só entre decembro e abril, máis de 200.000 procesos asistenciais tiveron que ser cancelados, entre consultas, probas ou intervencións cirúrxicas.
Contrapuxo os dous xeitos diferentes de afrontar os conflitos: o do Goberno central, baseado na imposición e o desprezo aos médicos, e o da Xunta, que demostrou que con diálogo, responsabilidade e capacidade de negociación se poden acadar solucións. “Non merecemos sufrir as consecuencias dunha ministra incapaz de resolver un problema que ela mesma xerou e que dá a sensación de que está máis pendente doutras ambicións políticas que de atender a sanidade pública”, sinalou Encarna Amigo.
Para rematar, lamentou que para o BNG, a sanidade sexa “unha pancarta”, por preferir utilizala como arma política, antes de afrontar o problema real. “Ao PSdeG xa non se lle pode pedir que goberne, pero, polo menos, non estorben”, salientou Encarna Amigo, referíndose á creación de problemas e de conflitos onde antes non os había.
