Paula Prado chama ao “gran cambio” en Tomiño da man do PPdeG para “acabar co desgoberno do BNG”

A secretaria xeral do PPdeG, Paula Prado, defende a necesidade dun “gran cambio” en Tomiño, da man dos populares, para “acabar co desgoberno do BNG” neste concello. Así, chama aos tomiñeses á “intensificar esforzos” para lograr ese “plus de confianza nas urnas” que se precisa de cara ao reto das eleccións municipais de 2027.

Así o manifestou durante o Xantar Popular do PP de Tomiño, celebrado no pavillón de Sobrada con máis de 300 asistentes. Na cita, na que exerceu de anfitrioa a presidenta do PP local, Lara Meneses, tamén participaron o presidente do PP provincial de Pontevedra, Luis López, e a responsable da área de Vivenda e Planificación de Infraestruturas do Goberno galego, María Martínez Allegue.

A número dous dos populares galegos valorou a Lara Meneses como “unha líder valente que entrou en política para mellorar o seu concello, cunha vocación de servizo público que hoxe mantén intacta”. Ademais, puxo en valor o seu traballo a favor da mocidade desde a área de Xuventude do Goberno galego, e a súa implicación para que a Administración autonómica actúe neste concello, pese a “nefasta xestión” do actual Goberno local.

Neste sentido, a secretaria xeral do PPdeG mencionou proxectos destacados nos que o Goberno galego inviste en Tomiño, como o caso da autovía AG-42 Tui-A Guarda. En concreto, no tramo entre Tui e Tomiño, o Goberno de Alfonso Rueda inviste 18 millóns de euros, coa previsión de que estea rematado en 2027.

Tamén mencionou o apoio ás comunidades de usuarios de augas e as futuras sendas Amorín-Currás e Casco urbano-Barrio de Hospital. “Investimentos, ambición e proxectos que son realidades. Iso é o que ofrece o Goberno galego fronte ao Goberno local do BNG, que está totalmente esgotado”, engadiu.

Para Prado, a política útil é a que está “pegada ao territorio” e só a representa “o PPdeG, o partido co que máis se identifican os galegos e galegas”. Sen embargo, a esquerda “ofrece un futuro desolador, no que só caben ruído, conflitividade, pancartas e corrupción”.

Neste punto puxo en valor a alternativa do Partido Popular de Tomiño, que impulsa un novidoso programa participativo para 2027, no que chegar aos 14.000 veciños e veciñas. “O obxectivo é que poidan realizar propostas e achegas que serán incluídas nos compromisos electorais para o mandato 2027-2031”, explicou.

“Queremos seguir sendo a Galicia que goberna fronte á oposición que confronta e perde eleccións”, sinalou Prado. Así, referiuse ás ultimas noticias dos casos de corrupción que asolan ao Goberno de Sánchez, como a recente imputación a José Luis Rodríguez Zapatero ou todo o que envolve ao caso Leire Díez.

Foi crítica cos “socios” do BNG, “cómplices do Goberno máis corrupto da historia de España”, que lle deron o “si” a Sánchez a cambio de “nada para Galicia”. Estes mesmos, dixo “gobernan en Tomiño e intentan bloquear proxectos, porque pensan máis nos seus intereses persoais que nas preocupacións reais dos tomiñeses”.

O CINISMO DO SINDICATO DO BNG

A número dous do PPdeG tamén se referiu durante a súa intervención á concentración do Servizo de Axuda no Fogar (SAF) de Tomiño, da man da CIG, ás portas do pavillón no que se celebrou o xantar popular. O sindicato culpa á Xunta da xestión do servizo, un argumento que non se sustenta posto que é un servizo municipal e, na lexislatura de Alfonso Rueda, séguense incrementando os investimentos para o SAF. Prado lembrou que se reforzou o servizo con 150 millóns de euros adicionais ata 2028 e, concretamente, Tomiño sumará ao que xa aporta o Goberno galego máis de 683.000 euros neste servizo, chegando aos 2,3M€ ata 2028.

“Menos mal que xa estamos afeitos ao ruído e ao cinismo da CIG, o sindicato do BNG. Igual deberían cuestionar menos a xestión do Goberno galego e cuestionar máis o traballo da alcaldesa de Tomiño -do BNG-, quen ten privatizado -como lles gusta dicir a eles- o servizo”, lamentou.

LUIS LÓPEZ: “SOMOS A ALTERNATIVA A UN BNG QUE ARRASTRA OS PÉS”

Pola súa banda, o presidente provincial do PP, Luis López, valorou moi positivamente o traballo do PP de Tomiño, con Lara Meneses á fronte, desde as pasadas eleccións, nas que subiu 11 puntos e case 1.000 votos, ata o día de hoxe, «no que se converteu nunha clara, forte e necesaria alternativa de goberno fronte a un BNG que arrastra os pés e amosa o seu absoluto esgotamento tras case vinte anos no Concello».

«O PP é o futuro de Tomiño e todos queremos que ese futuro chegue canto antes para que Tomiño deixe de perder o tempo e as moitas oportunidades que lle brindamos desde a Deputación e a Xunta», apostilou Luis López, que destacou a política de proximidade de Lara Meneses e dos populares tomiñeses «sempre dispostos a escoitar, entender e atender» aos veciños.

Finalmente, a presidenta do PP local agradeceu o apoio e colaboración que reciben cada día de máis veciños e convidounos a «traballar polo cambio» para que se abra unha nova etapa no Concello na que as prioridades serán a vivenda, o saneamento, o desenvolvemento empresarial centrado principalmente nos sectores hortofrutícola, viveirista e de planta ornamental e a dinamización sociocultural.

O PPdeG urxe maior oferta e seguridade xurídica en política de vivenda, fronte ao plan “insuficiente e sen consenso” do Goberno de Sánchez

O PPdeG reivindica as medidas “efectivas, pragmáticas e reais” en materia de vivenda que executa o Goberno autonómico, subliñando que esta é “a principal preocupación de galegos e galegas”. Pola contra, os populares critican o Plan Estatal de Vivenda “do Goberno que máis dano lle ten causado a Galicia” e urxen maior oferta e seguridade xurídica afeando cuestións como a financiación insuficiente e a falta de consenso coas comunidades autónomas por parte de Sánchez.

Así o manifestaron a secretaria xeral do PPdeG, Paula Prado, e o presidente provincial do PP de Ourense, Luis Menor, acompañados pola secretaria da Xunta Xestora do PP local, Ana Fernández, durante a clausura da xornada informativa organizada polo partido en Celanova, cuns 200 asistentes, para tratar o grave problema do acceso á vivenda. É a sexta xornada organizada pola área de Vivenda e Urbanismo do PP de Ourense, que xa fixo parada en Ourense, Barbadás, Xinzo de Limia, Verín e O Carballiño.

Prado lembrou un dos compromisos da campaña e gran obxectivo da lexislatura de Alfonso Rueda á fronte do Goberno galego: duplicar o número de vivendas públicas, pasando de 4.000 a 8.000 en toda Galicia. Neste sentido, sinalou que en 2026 entregaranse os primeiros fogares deste plan.

Ademais, destacou que o Executivo autonómico destinou un orzamento “histórico” en materia de vivenda neste 2026, con 350 millóns de euros e un plan de acción que inclúe novas modificacións lexislativas, tributarias e fiscais para incentivar e favorecer a construción de nova vivenda.

Fronte a estas medidas, a número dous dos populares galegos criticou a “inseguridade xurídica que provoca unha lei estatal de vivenda desastrosa, que pensa máis nos okupas que nos propietarios”.

Tamén puxo en valor o desenvolvemento do solo que desenvolve o goberno do presidente Alfonso Rueda para a construción de 25.000 novas vivendas, para facilitar o labor de promotores e cooperativas; así como o programa Fogar Vivo para mobilizar vivendas baleiras.

“Falamos de medidas reais, de garantías xurídicas, de pensar nos galegos e galegas por moito que lle pese á oposición”, subliñou a secretaria xeral do PPdeG, que criticou que o PSdeG defenda “a cegas” o Plan Estatal de Vivenda e que o BNG sexa “cómplice e socio do Goberno sanchista, a cambio de nada para Galicia”.

“Sánchez e os seus están máis ocupados nas súas leas internas e nos casos de corrupción que lle van aflorando día tras día”, dixo Prado, que cualificou o modelo do Goberno de Sánchez como “unha política de confrontación baleira que leva oito anos facendo da vivenda un luxo”. “Queremos menos impostos, máis oferta e máis seguridade xurídica”, engadiu.

LUIS MENOR: “É UN OBSTÁCULO PARA O CRECEMENTO ECONÓMICO”

Luis Menor advertiu que non se pode cometer o erro de analizar a falta de vivenda unicamente como unha crise habitacional, asegurando que tamén é “un terrible obstáculo para o crecemento económico de calquera territorio, tamén no rural”.

Neste sentido, puxo o foco no incremento da poboación na provincia de Ourense desde hai catro anos, achegándose na actualidade aos 307.000 habitantes, dos que case 10.000 son novos veciños, na súa maioría migrantes, “básicos no noso esquema laboral e aos que temos que ofrecer alternativas dignas para residir”.

Fronte a esta realidade “cun Goberno central que só xera problemas coas súas erradas leis”, o presidente provincial defendeu que os compromisos do PP alí onde goberna son realidades. Ademais das “valentes medidas” do presidente Alfonso Rueda, puxo en valor as iniciativas postas en marcha na Deputación de Ourense, que pese a non ter competencias directas en vivenda, “non mira cara a outro lado”.

Citou iniciativas como o primeiro Plan Provincial de Vivenda, que este ano case triplicou a súa dotación con 1,2 millóns de euros para rehabilitación de inmobles, ou a entrega esta mesma semana de tres vivendas na estación de Vilavella, no marco do proxecto Estacións Vivas. “O Partido Popular ten alternativas para contribuír a facer máis accesible a vivenda a calquera cidadán”, concluíu.

ANA FERNÁNDEZ URXE DISPOÑER DE NORMAS URBANÍSTICAS

Por outra banda, Ana Fernández sinalou a “necesidade prioritaria” de contar cun novo Plan Xeral de Ordenación Municipal (PXOM) en Celanova, xa que a vila leva máis de tres décadas sen actualizar a súa ordenación urbanística. Así, sinalou a “urxencia” de dispoñer de normas que faciliten máis solo urbanizable, máis vivenda protexida, maior seguridade xurídica, máis rebaixas fiscais e menos burocracia. Neste sentido, anunciou que levarán no seu programa das eleccións municipais a posta a disposición do Goberno autonómico de solo público para vivendas de protección oficial.

O coordinador da área de Vivenda e Urbanismo do PP de Ourense, Benito Iglesias, puxo o foco sobre dous factores clave para fixar poboación: a vivenda e o emprego. Destacou que os traballadores estranxeiros representan xa o 7 % do total de autónomos na provincia. De aí, dixo, que adquira relevancia a nova liñas de axudas da Xunta para rehabilitar vivendas en concellos de menos de 20.000 habitantes, vinculando estas achegas á contratación de traballadores en empresas galegas.

A concelleira ourensá e membro da área de Vivenda e Urbanismo do PP de Ourense, Sonia Ogando, referiuse á falida Lei estatal de Vivenda e ás reformas posteriores que non aportan seguridade xurídica aos propietarios: “Todo o contrario, beneficia a aqueles que se sitúan á marxe da lei”. Para Ogando, o Goberno central “fai un uso electoralista da vivenda, con improvisacións lexislativas por riba de solucións”. Ademais, citou unha fórmula que medrou notablemente en Galicia fronte a “inquiokupación” e okupación: os seguros de impago.

Como en xornadas anteriores, a responsable territorial do Goberno galego en materia de vivenda en Ourense e membro da área de Vivenda e Urbanismo do PP de Ourense, Pilar Fernández, detallou as axudas do Goberno galego nesta materia, entre as que destacou dous programas con moi boa acollida: Fogar Vivo, o plan de rehabilitación en municipios de menos de 5.000 habitantes, as axudas á mocidade para mercar vivendas e os programas para rehabilitar inmobles municipais.

O PPdeG enxalza o labor da UDIAF de Bergantiños, que o ano pasado atendeu a máis de 150 familias

O PPdeG enxalza o labor da Unidade de desenvolvemento infantil e apoio familiar (UDIAF) de Bergantiños.

A poucos días da celebración do Día da atención temperá, que se celebra o 16 de xuño, os deputados do Grupo Parlamentario Popular, Carmen Pomar e Rubén Lorenzo, visitaron, en Carballo, as instalacións desta unidade, que conta cun equipo interdisciplinar de seis profesionais especializados en desenvolvemento infantil e atención temperá, ademais dunha administrativa. O servizo, público e gratuíto, acolle ás familias dos concellos de Cabana, Carballo, Coristanco, Laxe, Malpica e Ponteceso.

Durante a xuntanza mantida coa coordinadora da unidade, Yaiza Antelo, e a coordinadora xeral, María García, ademais de coñecer o funcionamento e as necesidades actuais da UDIAF, recibiron a memoria anual de actividades, onde se recolle o traballo desenvolvido pola entidade na comarca ao longo de todo o ano. Así, no 2025, esta unidade atendeu a 155 familias, cuxo grado de satisfacción global é dun 4,86 puntos dun total de 5. Asemade, realizouse un total de 4.493 prestacións individuais, entre elas: 122 consultas de acollida, 190 sesións de valoración, 3.229 sesións de apoio directo a menores e familias e 863 actuacións de coordinación con profesionais dos ámbitos sanitario, educativo e social.

Tras poñer en valor o labor realizado nos seis concellos da comarca, amosaron o seu compromiso de trasladar as necesidades do centro e as demandas dos profesionais ao Parlamento de Galicia, co fin de garantir que o servizo se preste coa mellor calidade e nas mellores condicións posibles, tanto para as nenas e nenos como para as súas familias.

Este servizo, que abriu as súas portas en 2014, forma parte dun proxecto impulsado pola Asociación Galega de Atención Temperá e está financiado integramente pola Xunta de Galicia. Presta asesoramento, orientación e apoio ao desenvolvemento de nenos e nenas de entre 0 e 6 anos, seguindo o modelo da Rede Galega de Atención Temperá. A intervención baséase nun enfoque integral que inclúe tanto ao menor como ao seu entorno familiar e social.