Día: 5 de julio de 2026

O PPdeG salientou a aposta da Xunta pola tecnoloxía, polo reforzo de medios persoais e materiais e pola prevención como eixos clave na loita contra os incendios forestais.

Durante unha visita ao Centro de Coordinación Provincial de Loita contra os Incendios Forestais, en Ourense, os deputados do Grupo Parlamentario Popular, Cristina Campero e Miguel Viso, fixeron fincapé nas principais novidades tecnolóxicas incorporadas este ano ao dispositivo autonómico. Entre elas, sinalaron a ampliación da rede de videovixilancia nun 30%, con 241 cámaras distribuídas en 111 puntos estratéxicos de Galicia e das que arredor de 70 se sitúan na provincia ourensá.

Así mesmo, referíronse á plataforma XeoCode e á aplicación móbil ALume. A primeira delas, e grazas á incorporación da Intelixencia Artificial, analiza en tempo real as imaxes captadas polas cámaras de videovixilancia para detectar automaticamente columnas de fume e posibles focos nas súas fases iniciais, xerando alertas inmediatas que, posteriormente, son verificadas polos técnicos dos centros de coordinación. Pola súa banda, a aplicación móbil ALume converte á cidadanía nun aliado máis na prevención dos incendios forestais, xa que permite comunicar, tamén en tempo real e de forma rápida e sinxela, a existencia dun posible lume mediante a xeolocalización automática.

A PREVENCIÓN, A MELLOR FERRAMENTA CONTRA OS INCENDIOS

A deputada popular Cristina Campero sinalou que “a prevención e a detección temperá é a mellor ferramenta para combater os incendios forestais e Galicia está a situarse á vangarda coa incorporación de novas tecnoloxías que permiten actuar con maior rapidez e eficacia”.

Sobre a actualización do Plan de prevención e defensa contra os incendios forestais de Galicia (PLADIGA), no que se incorporan todas estas novidades, dixo que, para este 2026, conta cun orzamento de 213M€, “o maior investimento da súa historia, dos cales, sinalaron, máis de 75M€ destínanse, especificamente, ás actuacións de prevención. Un incremento, incidiu Cristina Campero, do 50% con respecto ao ano anterior, o que se traduce nun “esforzo sen precedentes” e que permitirá continuar mellorando a capacidade de anticipación, detección e resposta ante os lumes.

Nesta mesma liña, recordou que o operativo deste ano mobilizará máis de 7.000 efectivos entre diferentes administracións: “Detrás de cada incendio que se consegue evitar ou controlar hai meses de planificación, investimento e coordinación. A Xunta segue demostrando con feitos e con recursos que a prevención continúa a ser a súa principal prioridade”, sinalou.

UN CENTRO Á VANGARDA

Durante o encontro, que serviu para coñecer de primeira man o funcionamento do operativo de prevención e defensa contra os incendios forestais, Miguel Vixo puxo en valor o compromiso do Goberno galego co reforzo dos medios humanos, materiais e tecnolóxicos destinados á protección do monte galego. Neste senso, tal e como destacou, “a aposta da Xunta non consiste unicamente en aumentar os recursos, senón tamén en modernizar o sistema para adaptalo aos novos desafíos que presentan este novo tipo de incendios”.

Acompañados polo director territorial da Consellería do Medio Rural, José Manuel Armada, o deputado popular aproveitou para enxalzar o traballo que desenvolven diariamente os profesionais deste centro, unha infraestrutura esencial para a planificación e coordinación do operativo autonómico na provincia. E é que, tal e como explicou Miguel Viso, desde estas instalacións realízase o seguimento permanente das incidencias, coordínanse os distintos medios de prevención e extinción, xestiónanse os recursos despregados sobre o territorio e “garántese unha resposta rápida e eficaz ante calquera emerxencia”, grazas ao labor dos profesionais que traballan durante todo o ano ao servizo da protección do monte galego.

O PPdeG aproveitou a celebración do VIII Festival do Viño da Ribeira Sacra, que se celebra en Monforte de Lemos, para reafirmar o compromiso do Goberno galego cos produtores locais e coa protección dun modelo vitivinícola único no mundo.

 

“A gran cita vitivinícola desta fin de semana convértese no mellor escenario para poñer en valor as políticas de feitos da Xunta de Galicia, que vén de blindar o traballo do sector cun investimento de máis de 1,5 M€”, salientou a deputada do Grupo Parlamentario Popular e portavoz local, Katherine Varela, ao referirse ás axudas para a conservación paisaxística e a loita contra a erosión que beneficiarán a un total de 728 viticultores desta denominación de orixe. “O Goberno galego cumpre co agro galego”, engadiu.

 

Os populares lembran que as axudas chegan ata os 2.000 euros por hectárea para o cultivo tradicional en socalcos de pedra e ata os 1.000 euros para as zonas mecanizadas. Esta medida, tal e como apuntou, busca compensar as dificultades dunha orografía que require un coidado artesanal e que grazas a estas axudas evita o abandono e o despoboamento do rural, garantindo o relevo xeracional na comarca.

 

Pola súa banda, Encarna Amigo incidiu en que o coidado do territorio e a protección do patrimonio cultural e natural é “a mellor estratexia para impulsar a economía de toda a contorna”.

 

Para as parlamentarias populares, que estiveron acompañadas polo deputado nacional, Francisco Conde, e a deputada autonómica, Raquel Arias; o festival a carón do río Cabe supón un punto de encontro estratéxico onde o viño e os produtos gastronómicos da zona actúan como o mellor imán para o turismo de calidade. “O dinamismo que vivirá Monforte de Lemos esta fin de semana demostra que a Ribeira Sacra é unha contorna viva, con futuro e cun enorme potencial de crecemento”, salientou Katherine Varela, quen puxo en valor o éxito das 27 adegas participantes, de distintos puntos da contorna, que forman parte da Denominación de Orixe Ribeira Sacra.