Santiago, 3 de abril de 2018.- O secretario xeral dos populares galegos, Miguel Tellado, asegurou que, igual que van someter a continuidade de Paula Quinteiro a votación dentro das bases de En Marea, os deputados desta formación deberían votar tamén a continuidade de Luis Villares como portavoz dentro do grupo parlamentario.
O número dous do PPdeG tamén lembrou que o feito de que o incidente protagonizado por Quinteiro xa estea nos xulgados agrava aínda máis toda a situación que vive En Marea.
Ademais, para Tellado, que Villares pida a dimisión da súa deputada o día despois de que Martiño Noriega dixese que non tiña importancia o sucedido é unha nova mostra de que as hostilidades entre ambos xa non se poden disimular. Nese senso, afirmou que “Noriega e outros cargos de En Marea están patrocinando un motín interno contra Luis Villares”.
“Villares conta cun maior grao de respecto por parte do PP que por parte dos seus propios compañeiros de partido e iso é o que fai que cada vez estea máis desafiuzado da política”, indicou Tellado, que engadiu que estamos ante a crónica dun grupo mixto anunciado e que “en En Marea cheira a golpe de estado contra o seu portavoz”.
Tras todo o acontecido, o secretario xeral do PPdeG sinalou que «pase o que pase, as Mareas quedan máis divididas e co liderado de Villares moito máis cuestionado”.
GALICIA, LÍDER EN CREACIÓN DE EMPREGO
Sobre os datos de paro do pasado mes de marzo coñecidos esta mañá, Tellado admitiu que “non é casualidade que a única Comunidade Autónoma con orzamentos aprobados e garantidos ano tras ano sexa a que lidera a creación de emprego”.
Segundo o secretario xeral, se España tivese a mesma estabilidade institucional que lle negan os socialistas e os nacionalistas, “e que si hai en Galicia”, as cifras de paro estatais serían aínda mellores. «Mentres nós traballamos, outros queren que todo se pare», manifestou.
Tal e como amosan a cifras, a nosa Comunidade segue crecendo e creando máis e mellor emprego, algo que “avanza que será un gran verán para a nosa economía”.
Máis polo miúdo, cómpre precisar que estamos ante a maior caída do paro de toda a serie histórica, o que nos sitúa nun nivel mellor que hai 9 anos; e somos a Comunidade na que máis baixa o desemprego no último ano, cunha caída porcentual do 11,88% -superando ao Estado no ritmo de baixada tanto na evolución anual como mensual-. Así mesmo, rexistramos 25.751 afiliacións máis á Seguridade Social (2,68%) no último ano, a maior subida desde 2007 -creándose ao día 206 afiliacións no último mes-, e contamos con máis contratación indefinida -un 4,90% máis no último ano e un 9,06% máis no último mes-.
