Santiago, 24 de abril de 2018.- O portavoz de Sanidade do Grupo Popular, Aurelio Núñez Centeno, reiterou hoxe no Parlamento que a licitación de servizos concertados na área sanitaria de A Coruña “é necesaria para unha correcta asistencia á cidadanía e axústase totalmente ás leis en vigor”. Neste sentido, engadiu que este tipo de contratacións “utilízanse en todas as administracións autonómicas, incluso para temas moito máis sensibles para as persoas como o cribado de cancro ou as resonancias”.
Aurelio Núñez salientou que o Servizo Galego de Saúde “concertou só un 2,2 por cento do total dos seus actos nos últimos cinco anos”. Neste sentido, referíndose ao contrato de da área sanitaria de A Coruña, explicou que representa 18 millóns de euros anuais durante catro anos, o que representa un 2,7 por cento dos máis de 660 millóns de euros que manexa anualmente a Xerencia de A Coruña.
MENOS TRABALLADORES NA SANIDADE PRIVADA
Respecto da suposta privatización da atención sanitaria, o portavoz popular lembrou que “Galicia e o País Vasco foron as únicas comunidades autónomas nas que baixou o número de traballadores da sanidade privada entre os anos 2015 e 2016”.
“Tamén o último informe sobre privatización sanitaria das comunidades autónomas emitido pola Federación de Asociacións en Defensa da Sanidade Publica pon de manifesto que Galicia está entre as rexións cun grao intermedio de privatización, pasando do cuarto posto en 2014 ao oitavo neste ano”, apuntou.
