Santiago, 26 de setembro de 2018.- A portavoz de Asuntos Sociais do Grupo Popular, Marta Rodríguez Arias, asegurou hoxe no Parlamento que o servizo de transporte adaptado do 065 “é máis universal que nunca e está garantida a súa gratuidade por decreto”.

 

 

Marta Rodríguez lembrou que “durante anos a utilización que se estaba a facer do 065 era para servizos de transporte regular, cando o obxectivo era o de cubrir o transporte puntual”. Esta situación motivou as queixas dos usuarios o que levou á Xunta a revisar o servizo para incrementar e mellorar a atención aos usuarios.

 

 

 

 

Deste xeito, o actual Goberno galego aprobou en 2014 un decreto polo que garante a gratuidade do servizo do transporte programado puntual 065, cando o anterior Goberno bipartito establecera en 2007 que os usuarios deberían aboar unha contraprestación económica determinada pola capacidade económica do solicitante.