Santiago, 15 de febreiro de 2017.- A portavoz de Enerxía do Grupo Popular, Marta Nóvoa, asegurou hoxe no Parlamento que a Xunta de Galicia atendeu e atenderá todas as solicitudes de axuda para paliar a pobreza enerxética que cumpran cos requisitos da convocatoria, tanto de tícket eléctrico social como para evitar os cortes de luz ou gas natural. Porén, lamentou que a oposición rexeitara un acordo unánime para introducir melloras na orde reguladora destas axudas de tipo social e presionar ao Goberno central na definición de consumidor vulnerable severo ou a participación das compañías eléctricas no financiamento destas medidas.
Marta Nóvoa afirmou “o compromiso total do Partido Popular e do Goberno da Xunta con todos os fogares en situación de pobreza enerxética”. “Por iso, o actual Goberno galego foi un dos primeiros en actuar e dende o ano 2014 ten medidas específicas para paliar a pobreza enerxética, como o tícket eléctrico social e as axudas para evitar os cortes na subministración de electricidade, e que se está a ampliar ao gas natural, garantindo así o consumo enerxético ás familias máis vulnerables”, explicou.
En concreto, a portavoz popular situou en máis de 6.000 as solicitudes atendidas durante o pasado ano, a totalidade das que se presentaron. “Para o presente ano 2017 tamén está previsto atender todas as solicitudes, co compromiso de ampliar os 400.000 euros de orzamento se fose necesario para sufragar todas as solicitudes que cumpran os requisitos”, subliñou.
“De todas formas, somos conscientes de que hai marxe de mellora e o Goberno galego ten o compromiso de avanzar unha vez definido o novo marco xeral do Estado contra a pobreza enerxética”, sinalou. Así, referiuse ao anuncio feito polo propio Presidente da Xunta no último Pleno de que se estudará a ampliación da poboación diana do tícket eléctrico social.
