Santiago, 26 de maio de 2017.- A Xunta ten claro que as axudas da Política Agraria Común (PAC) “son vitais” para o desenvolvemento do sector agrogandeiro galego, segundo asegurou hoxe no Parlamento a deputada do Grupo Popular Raquel Arias.
En concordancia con este convencemento e como resultado do traballo desenvolvido, xunto co resto das Comunidades Autónomas e o Ministerio de Agricultura e Pesca, Alimentación e Medio Ambiente, o pasado mes de marzo, no marco da “Conferencia PAC post 2020: Construyendo la PAC del futuro”, consensuouse un documento no que, entre outros aspectos, “reivindícase un orzamento suficiente para que a PAC siga a ser unha ferramenta fundamental de unidade en Europa.”
Segundo explicou Arias, agora toca defender o mantemento dun presuposto suficiente e “posteriormente chegará o momento de definir a PAC, o seu enfoque e as medidas a implementar”.
O goberno galego ten “moi claro”, segundo reiterou, que o proceso de reforma da Política Agraria Común é unha “oportunidade” para Galicia e, neste contexto, a Xunta márcase como grandes liñas de traballo a fixación da poboación no rural; a revisión dos requisitos para recibir as axudas; a defensa de Galicia como rexión europea produtora de alimentos de calidade; e a equiparación das rendas rurais e urbanas.
CONTACTO CO SECTOR
A deputada popular, tras salientar a rolda de contactos que está a manter o Goberno galego co sector agrogandeiro “precisamente para buscar o máximo consenso nas demandas”, dixo que “as reivindicacións do Goberno da Xunta buscan que as singularidades de Galicia se teñan en conta á hora de establecer o reparto de fondos comunitarios”.
Así mesmo, avogou porque a modernización e mellora das estruturas agrarias sega a ser un dos eixos básicos da PAC; por manter os pagos directos; e apostar pola agricultura como parte da solución para contrarrestar o cambio climático e conservar o medio ambiente, ao tempo que se manteñen os mecanismos que permitan recuperar o equilibrio entre oferta e demanda e o reforzo das organizacións de produtores e interprofesionais.
“Todas estás reivindicacións”, asegurou Arias, “son concordantes coas políticas que está a desenvolver a Xunta no medio rural”.
