Santiago, 13 de novembro de 2020.- O deputado do Grupo Popular Rubén Lorenzo Gómez salientou hoxe no Parlamento que “existe o compromiso de poñer en marcha nos vindeiros meses un ambicioso proxecto, que suporá unha inversión de un millón de euros, para reducir os cheiros que derivan da actividade dunha empresa no lugar de Couso na parroquia de Aguiño en Ribeira”.
Rubén Lorenzo manifestou que “dende a Xunta seguirase esixindo e vixiando o cumprimento das normas e garantías medioambientais”, sobre todo “nunha área costeira de gran valor ambiental, pero tamén social e, no caso concreto desta zona do concello de Ribeira, tamén cunha actividade industrial implantada dende hai bastantes anos con varias empresas que xeran varios centos de postos de traballo”.
INSPECCIÓNS PERIODICAMENTE
O deputado popular lembrou que “o Concello é o encargado de fomentar o cumprimento do regulamento de saneamento municipal para evitar a achega de vertidos de natureza industrial á rede municipal sen o oportuno pretratamento, entidade que ostenta as competencias na autorización e control de vertidos á rede municipal”.
Ademais, apuntou que “desde a Administración hidráulica de Galicia trabállase na prestación de apoio aos concellos, axudándoos técnica e financeiramente a desenvolver de xeito máis eficaz e eficiente esas competencias que teñen reservadas”, ao tempo que tamén corrixe situacións de incumprimento normativo, mediante a realización de inspeccións dos vertidos que se detectan.
“Unha das políticas máis activas da Xunta é a relacionada coa xestión técnico-administrativa das verteduras, tanto á rede fluvial como ao medio mariño costeiro”, explicou o deputado popular, quen apuntou que o obxectivo é “conseguir a emenda efectiva de puntos de vertedura, optimizando as funcións de inspección e control das verteduras ao dominio público hidráulico e desde terra ao litoral galego”.
No caso concreto do lugar de Couso en Ribeira, Rubén Lorenzo engadiu que lévanse a cabo regularmente inspeccións periódicas ás instalacións asentadas nesta zona para verificar a existencia de vertidos ao dominio público marítimo terrestre e comprobar o cumprimento dos límites de vertido de aplicación”. “Non so se actúa cando se reciben denuncias, senón que se controla periodicamente para velar en todo momento pola preservación da garantía da calidade do medio ambiente”, dixo.
