Santiago, 12 de febreiro de 2021.- Os deputados do Grupo Popular Diego Calvo, Miguel Tellado e José Manuel Rey rexistraron esta mañá no Parlamento galego unha batería de iniciativas para solicitar cada mes deste ano carga de traballo para os estaleiros da ría de Ferrol.
“Queremos que o PSOE tome conciencia da situación e se comprometa no Parlamento galego e no Congreso a poñer unha solución a Navantia, porque non se pode estar tantos anos gobernando sen facer absolutamente nada”, indicou Diego Calvo.
O deputado popular lamentou que “vimos presentando iniciativas desde hai tempo pero desgraciadamente o Goberno central non nos fai caso”. En concreto, dixo que “estamos fartos de que o Partido Socialista vote a favor destas demandas de carga de traballo no Concello de Ferrol porque están os traballadores arredor, pero cando esas mesmas propostas veñen ao Parlamento de Santiago se absteñen e cando chegan a Madrid as votan en contra”.
SITUACIÓN DRAMÁTICA
“Imos insistir na solicitude de carga de traballo nunha situación dramática para a nosa comarca, na que, se non se lle pon remedio por parte de Navantia de maneira inmediata cun buque-ponte para que haxa carga de traballo e ocupación ata que poidan comezar o programa de construción das F-110, nas próximas semanas 1.000 persoas máis van ir a engrosar as listas do paro”, engadiu.
Deste xeito, afirmou que “todos os meses desde agora e ata que remate este 2021, e se non o conseguimos volveremos a comezar o ano que ven, imos presentar unha iniciativa neste Parlamento demandando carga de traballo para Navantia e un buque-ponte inmediato, de xeito que ese milleiro de persoas non vaian finalmente ao paro e que poidamos ter unha solución á situación de emerxencia que estamos a atravesar”.
Diego Calvo explicou que “a día de hoxe se están a rematar todos os traballo que había enriba da mesa e, cando se finalicen estes encargos, os primeiros que se van a resentir desa situación son as empresas auxiliares”. Ademais, lembrou que os últimos orzamentos aprobados polo Goberno de Mariano Rajoy en 2018 incluían unha partida para a construción das fragatas F-110. “Estamos no 2021 e as noticias que temos é que ata o 2023 seguramente non se comeza o corte de chapa destas fragatas”, lamentou
