Lembra que a ampla maioría que os galegos deron a Feijóo impediu que haxa carteis de apoio a un delincuente condenado nos balcóns da Xunta
O secretario xeral do PPdeG, Miguel Tellado, avanzou que o seu partido presentará unha declaración institucional no Parlamento para buscar a unanimidade na condena á violencia e, de forma explícita, aos acontecementos dos últimos días en moitas cidades de España. Nese senso, recoñeceu que agardan que o PSdeG e o BNG os acompañen nesta cuestión xa que os populares condenan o uso de calquera forma de violencia como manifestación política.
Logo de agradecer o traballo e o esforzo dos Corpos e Forzas de Seguridade do Estado, subliñou que é o momento de ver se o PSOE é quen de defender os seus principios fronte aos seus socios en Madrid e se o Bloque só comparte con Bildu escenarios en mitins ou tamén a súa filosofía de que as ideas se manifestan con pedradas en escaparates.
De feito, aseverou que é curioso que os mesmos que piden medidas aínda máis duras e restritivas en Galicia amparen este tipo de actos e que aqueles que din que as axudas da Xunta á hostalería e o pequeno comercio son insuficientes sexan os que amparan os destrozos nestes mesmos establecementos. Concretamente, afeou que algúns líderes do Bloque criticaran o traballo das Forzas e Corpos de Seguridade e as súas defensas veladas ao uso da violencia.
“Pouco tardou o BNG en mostrar a súa verdadeira cara. Apenas seis meses despois das eleccións non só comparten actos con delincuentes condenados como Arnaldo Otegi ou Oriol Junqueras senón que tamén comparten ideario político e xustifican as manifestacións violentas como resposta ante as decisións xudiciais”, insistiu.
A VIOLENCIA É INXUSTIFICABLE
Así mesmo, o número dous do PPdeG criticou que algúns grupos políticos escusen actos vandálicos interesadamente para poñer en tela de xuízo o noso sistema democrático. “Resulta inconcibible que, amparados nunha mal entendida defensa da liberdade de expresión, fagan xusto o contrario impoñendo ideas mediante o medo e a violencia; así como que desde o propio Goberno do Estado se poña en dúbida a nosa democracia e se cuestionen decisións xudiciais”, apuntou.
Sobre isto, engadiu que o vicepresidente do Goberno, Pablo Iglesias, é o autor intelectual da kale borroka que durante as últimas noites está atacando este país, indicando que estamos gobernados por Podemos, que por un lado cuestiona a calidade democrática de España e por outro defende a violencia como forma de expresión política; e polo PSOE, que ampara estes comportamentos e mantén como socios de Goberno a estes individuos.
“Se en Galicia non estamos gobernados por partidos semellantes foi gracias a ampla maioría que os galegos deron a Alberto Núñez Feijóo. De non ser así, tal vez estaríamos vendo carteis de apoio a un delincuente condenado desde os balcóns da Xunta”, salientou.
UN REPARTO XUSTO DAS VACINAS
O secretario xeral tamén se referiu ao plan de vacinación na Comunidade, lamentando que os avances se vexan retrasados porque o Executivo de España está dando a Galicia pouco máis da metade das doses que lle corresponden -atendendo a criterios poboacionais deberíamos recibir o 8.2% das vacinas e apenas recibimos un 5%-.
“Pedimos ao Goberno de Sánchez un reparto máis xusto, que atenda a criterios obxectivos como a poboación ou a cantidade de vacinas necesarias en cada territorio para cada fase, e non a consideracións ideolóxicas ou partidistas do propio Executivo”, sentenciou.
