Santiago, 25 de febreiro de 2021.- O Parlamento aprobou a iniciativa que instaba á Xunta a que regule o funcionamento das Unidades de Mama, para homoxeneizalas en todas as áreas sanitarias galegas e que serva de referencia para a organización dos equipos de atención multidisciplinar doutras patoloxías, comezando polo solo pélvico; unha proposición non de Lei presentada polos populares galegos. “O máis importante é que ese traballo conxunto redunde nunha mellora na atención ás pacientes e ás súas familias e nunha mellora nas expectativas de curación”, subliñou Noelia Pérez.
A deputada popular resaltou que ter un diagnóstico precoz segue a ser a mellor vía para mellorar as posibilidades de curación das persoas afectadas. Sobre isto, recordou que o Programa Galego de detección do cancro de mama permitiu reducir a mortalidade por mor desta enfermidade no 20%, un programa que é valorado moi positivamente.
Unha vez realizada a detección, sinalou que a atención de cada un dos casos coa maior premura é fundamental, sendo unha prioridade dar unha rápida resposta. Nese senso, defendeu que a iniciativa parlamentaria dos populares busca que as mulleres que padezan esta enfermidade reciban un mellor tratamento e cunha maior rapidez.
Para iso indicou que é necesario implantar procesos asistenciais integrados coa constitución de equipos multidisciplinares baixo unha coordinación única, incidindo na necesidade de que todos os profesionais de distintas especialidades que tratan a patoloxía de mama se unan baixo o mesmo paraugas para crear protocolos de actuación que melloren directamente a atención das pacientes e para racionalizar o uso dos recursos. Deste modo, obteríase unha maior eficacia e eficiencia, establecendo mecanismos de coordinación e integrando as actividades para evitar variabilidade nos diagnósticos e nos tratamentos.
A deputada lembrou que nestes momentos en Galicia existen unidades específicas de mama en Lugo, na Coruña e en Vigo, que realizan un excelente traballo, “pero botamos de menos unha homoxeneidade no seu funcionamento”. “Precisamos por tanto dun modelo homoxéneo que as regule, implantar as Unidades de Mama en todas as areas sanitarias que faltan e garantir un bo funcionamento de todas elas que redundará, sen dúbida, nunha mellor atención e por tanto nunha mellor expectativa de curación das persoas diagnosticadas con este tipo de cancro”, manifestou.
Ademais, insistiu en que a atención e a asistencia integral a unha patoloxía concreta e cunha coordinación dos procesos requiridos para a atención das doentes suporá a mellora tanto nos tempos como nos coidados recibidos e permitirá manter o funcionamento e a estrutura dos servizos de cada especialidade.
