Santiago, 16 de xuño de 2022.- O Parlamento de Galicia aprobou hoxe por unanimidade a proposición non de lei do Grupo Popular a través da que se solicita continuar ampliando a rede galega de atención temperá mediante a posta en marcha de novas unidades especializadas en previr e tratar trastornos do desenvolvemento en nenas e nenos de ata 6 anos. A deputada popular Noelia Pérez considerou necesario que “se sigan incrementando as unidades de titularidade municipal para dar unha maior cobertura territorial, reducir as listas de agarda e evitar que as familias teñan que desprazarse para recibir este servizo”.
Coincidindo coa celebración hoxe do Día da atención temperá a nivel nacional, Noelia Pérez salientou “a importancia das actuacións para satisfacer as necesidades e os dereitos dos nenos con trastornos de desenvolvemento ou en risco de padecelos, así como a importancia dun modelo baseado na prevención, na identificación e no tratamento precoz, facilitando ferramentas para que gañen en autonomía”.
Así mesmo, reivindicou o “importante papel que xogan os profesionais, as entidades e as administracións públicas, tanto autonómica como as entidades locais, nunha Rede galega de atención temperá de carácter universal e que configura un espazo común de coordinación e corresponsabilidade para facilitarlle aos cativos e ás súas familias unha prestación de carácter universal”.
“Temos claro que canto máis axiña se detecten as posibles dificultades mellores resultados se van obter da atención profesional”, sinalou a deputada popular, quen apuntou que “o acompañamento especializado durante os primeiros anos de vida é fundamental para adquirir ou recuperar funcións e habilidades persoais que melloren a súa autonomía, a súa convivencia familiar e a súa inclusión social”, manifestou.
Noelia Pérez lembrou que o Goberno galego “é plenamente consciente da necesidade deste servizo, e mostra disto é o incremento de 3,4 a 6 millóns de euros do orzamento destinado este ano a atención temperá destinado ao mantemento e posta en marcha de novas unidades en todo o territorio galego e ás axudas económicas que se conceden directamente ás familias para sufragar os custes derivados do servizo dun profesional privado, dándolle liberdade para elixir onde queren levar ao seu fillo”.
