20 de decembro de 2022. O Parlamento de Galicia aprobou hoxe a Lei de medidas fiscais e administrativas que acompaña aos orzamentos da Xunta para 2023, que “permitirá mellorar a vida dos cidadáns e ser máis útiles aos galegos con medidas como a redución de impostos, a protección das vítimas de violencia de xénero ou a baixada do canon de SOGAMA”, manifestou a viceportavoz do Grupo Popular, Paula Prado.
Ao longo da tramitación parlamentaria, incorporáronse á Lei de medidas fiscais e administrativas dúas emendas da oposición e outras catro transaccións: tres co Grupo Socialista e unha co BNG. Ademais, engadiuse unha emenda de consenso que afecta directamente aos plans básicos municipais para edificar no ámbito dos núcleos rurais e a conexión ás redes de abastecemento de augas. “Trátase dunha emenda solicitada pola asociación de traídas de auga rural de Galicia (Coxapo) para incorporar á Lei do solo de Galicia ás comunidades de usuarios reguladas pola lexislación sectorial da auga, autorizadas e con capacidade de servizo suficiente”, apuntou a viceportavoz popular.
OPOSICIÓN DE BNG E PSDEG
Paula Prado lamentou que BNG e PSdeG “non foran quen de votar a favor de ningunha das emendas do Grupo Popular, opoñéndose deste xeito a medidas de conxelación de taxas fiscais de balizamento de bateas ou da taxa do solo portuario e da auga portuaria; ou a dirixida a garantir a compatibilidade do aproveitamento da biomasa forestal coas actividades tradicionais da industria forestal galega, para evitar a especulación do prezo da madeira para usos eléctricos”.
“Tampouco apoian a bonificación do 15 por cento do canon de SOGAMA para os concellos que implanten o quinto contedor, porque BNG e PSdeG son máis de subir impostos que de baixalos, pero logo non sexan hipócritas saíndo á rúa a facer a pantomina de dicir que non é unha crise de prezos senón unha estafa”, sinalou.
Por último, Prado criticou que “tampouco foron capaces de apoiar as emendas que facían referencia a vítimas de violencia de xénero, como a que fai referencia a incorporar a violencia sexual no ámbito da protección das empregadas públicas ou a dirixida a cubrir casos excepcionais en relación aos convenios cos profesionais do taxi para a atención a vítimas de violencia de xénero e trasladalas a un concello limítrofe”.
