21 de febreiro de 2023. A viceportavoz do Grupo Popular, Marta Nóvoa, pediu hoxe no Pleno do Parlamento galego que desde o BNG “deixen de dicirlle non ao sector eólico, que vai ser crave no desenvolvemento de Galicia, sempre contando co cumprimento de todas as garantías medioambientais, técnicas e xurídicas”.
“Resulta paragóxico escoitalos falando de incumprimentos medioambientais, cando BNG e PSdeG consentiron quitar a tramitación ambiental dos parques de maior potencia, eses de máis de 50 Mw que tramita o Estado”, sinalou.
Marta Nóvoa manifestou que a proposta do BNG de creación dunha comisión de investigación no Parlamento galego sobre o desenvolvemento eólico é “un capítulo máis do negacionismo climático exacerbado duns nacionalistas galegos que perderon totalmente a razón”. “Galicia sigue sendo unha comunidade cun medioambiente e cunha natureza que todos admiran cando nos visitan, nada máis lonxe desa Galicia arrasada que vostedes queren facer ver”, dixo.
GARANTIR O INVESTIMENTO E O EMPREGO
Na súa intervención, a viceportavoz popular asegurou que “todas as resolucións ditadas pola dirección xeral competente en enerxía están avaladas por diferentes informes emitidos pola Asesoría Xurídica da Xunta”. Estes informes avalan a posibilidade de que os promotores poden expor modificacións no contido dos plans industriais en calquera momento, así como substituír estes pola monetarización e á inversa, “sempre que se garanta que levan a cabo os compromisos de investimento en emprego polos cales os proxectos eólicos foron seleccionados”.
“En Galicia non queremos nin a barra libre que agora propón o PSdeG aplacado polo Partido Socialista a nivel nacional, e tampouco secundamos a pancarta de Stop Eólicos do BNG”, asegurou Nóvoa, quen incidiu que “a tramitación eólica en Galicia obriga a someter a todos os proxectos a avaliación ambiental ordinaria”. “En Galicia estase a facer un intenso traballo para a tramitación dos parques eólicos, sobre todo coas máximas garantías medioambientais, sen quitar informes nin exposicións públicas”, concretou.
Para rematar, Marta Nóvoa afirmou que “a Xunta está a ofrecer a súa máxima colaboración co ámbito xudicial” e apuntou que “neste momento estase a completar o informe que nos ten requirido a Fiscalía para remitilo xunto con toda a documentación do expediente, así como o resto de información que se considere de especial relevancia”.
