O Parlamento de Galicia aprobou hoxe unha moción, logo dunha transacción entre o Grupo Popular e o BNG, a través da que se pide á Xunta que aborde dun xeito global o problema da seca derivada do cambio climático que afecta ás producións vexetais para consumo humano. Neste sentido, solicítase que se implique ao sistema investigador agrario e á universidade na realización de estudos sobre os graos de afectación do territorio galego e dos seus solos; e no establecemento de liñas de investigación respecto do ciclo da auga, na investigación xenética para atopar novas variedades vexetais para consumo humano ou na diminución do uso de fitosanitarios.
O portavoz popular do Medio Rural, José Antonio Armada, salientou o “especial esforzo de planificación que a Xunta está a facer para mellorar a xestión da auga e estar mellor preparada para afrontar posibles episodios de seca e escaseza”. Así, citou a entrada en vigor en 2020 da Lei de medidas de garantía de abastecemento en episodios de seca e situacións de risco sanitario; ou a aprobación, o pasado 2 de xuño, do novo Plan de Seca da demarcación Galicia-Costa, co fin de ordenar a resposta ante estes efectos e garantir o abastecemento de auga á poboación.
AXUDAS PARA EMERXENCIAS E AUDITORÍAS
Acompañando a estas medidas, a Xunta lanzou en 2019 unha liña de axudas novidosa encamiñada a prestar apoio técnico e financeiro aos concellos, para que estes dispoñan do seu propio Plan de Emerxencia fronte á seca e teñan claro como actuar ante unha actuación de escaseza de auga. Esta medida ten beneficiado a 109 concellos, entre os que se repartiron 1,3 millóns de euros.
A Xunta tamén outorgou 77 axudas a municipios para realizar auditorías nas redes de abastecemento, encamiñadas a obter información sobre a porcentaxe de perdas de auga, o que posibilitará tomar medidas para afrontar mellor as situacións de escaseza de auga.
Respecto da situación no medio rural, José Antonio Armada explicou que a Xunta “estudiou as diferentes posibilidades de apoio ao sector agrogandeiro diante da marxinación de Galicia feita coas achegas anunciadas por parte do Goberno central”. Neste sentido, lembrou que “existe un acordo xeral entre a Xunta e as organizacións profesionais agrarias de Galicia para reclamar ao Ministerio de Agricultura que corrixa os criterios de reparto das axudas da seca, co fin de non prexudicar ao sector galego”.
