O autobús de ‘Galicia non para!’ levou esta mañá ao presidente Alfonso Rueda a sumar un novo destino na súa ruta pola Comunidade e o lugar escollido nesta ocasión foi Bertamiráns, no concello de Ames, onde o líder dos populares galegos tivo a oportunidade de recibir o agradecemento da veciñanza polas medidas que está a tomar o Goberno galego a prol das familias.

O presidente puido constatar en primeira persoa, da man de pais e avós cos que mantivo unha animada conversa na praza da Mahía, a boa acollida que están a ter entre os galegos medidas como a gratuidade das escolas infantís de 0 a 3 anos ou as axudas para adquisición de libros de texto e material escolar. Ademais, tamén houbo interese polo Bono Deporte que estará dispoñible a partir do próximo ano.

O balance da xornada, aínda que chuviosa, foi moi positivo na medida en que, do mesmo xeito que o presidente do PPdeG comprobou a eficacia destas e outras actuacións por parte do Goberno galego, tamén puido tomar nota de cales son os temas que preocupan neste concello.

Entre esas cuestións, os veciños solicitáronlle impulsar un centro comercial aberto para fomentar as vendas e garantir a estabilidade do sector.

E como vén sendo habitual dun tempo a esta parte, Alfonso Rueda constatou unha vez máis a indignación que está a producir entre os galegos a situación política nacional e as negociacións para a investidura de Pedro Sánchez. Por iso quixo tranquilizar aos veciños dos diferentes puntos do concello de Ames que se achegaron a Bertamiráns asegurándolles que, do que el dependa, Galicia seguirá sendo unha “illa de estabilidade” dentro de España.

O líder dos populares galegos asistirá mañá na cidade de Pontevedra á concentración pola igualdade de todos os españois que terá lugar ás 12 do mediodía.

ALFONSO RUEDA SEGUE EN RUTA

Tras os exitosos encontros que previamente mantivera coa veciñanza de Bandeira, Portomarín, Porto do Son, Bande, Cuntis, Malpica e Sober o presidente Rueda segue así afondando nos problemas reais dos galegos, as súas impresións, suxestións e inquedanzas.

Algo para o que tamén se puxo en marcha a páxina web rueda.gal; a través da cal todo aquel que o desexe poderá trasladarlle ao presidente Alfonso Rueda todo aquilo que lle preocupa, que vai ben e o que é posible mellorar.

Deste xeito, aquelas persoas que non poidan achegarse de xeito presencial aos lugares onde estea instalado o autobús de ‘Galicia non para!’, poderán facer chegar as súas suxestións a través da web (á que se pode acceder tamén a través dun código QR impreso nos posavasos que se reparten no autocar).

Ao longo dos vindeiros días e semanas, o autocar continuará a súa viaxe por diversos concellos das catro provincias galegas.