A Comisión 3ª, de Economía, Facenda e Orzamentos do Parlamento de Galicia aprobou hoxe o ditame do proxecto de Lei de estatística de Galicia, un texto que adapta á nova realidade a norma existente desde 1988 tendo en conta a achega de nova regulamentación, o desenvolvemento da tecnoloxía e a multiplicación das fontes de datos. O texto lexislativo queda agora pendente da súa aprobación definitiva en sesión plenaria.
A viceportavoz do Grupo Popular, Cristina Sanz, explicou que “estamos ante unha lei eminentemente técnica” pero destacou a importancia da estatística porque “toda actividade política baséase en datos, que son os que permiten facer proposicións ou tomar decisións”. Así, subliñou a necesidade de contar con “datos oficiais obxectivos e imparciais, tanto para que os políticos gobernen como para que os cidadáns exerzan control sobre o seu goberno”.
AUTOGOBERNO
Cristina Sanz asegurou, ademais, que “para o exercicio dun bo autogoberno é necesario dispor dunha boa información e, con tal fin, os redactores do Estatuto de Autonomía de Galicia incluíron como competencia exclusiva a estatística de interese galego”.
“Esa foi a primeira pedra na construción dun sistema estatístico propio, que se consolidou coa aprobación en 1988 da Lei de estatística de Galicia e a creación do Instituto Galego de Estatística e do Consello Galego de Estatística”, lembrou a viceportavoz popular, quen anotou que “agora cómpre adaptar a normativa á nova realidade á luz da experiencia e tendo en conta a achega da nova regulamentación, o desenvolvemento da tecnoloxía e a multiplicación das fontes de datos”.
Respecto da tramitación parlamentaria desta nova lei, a viceportavoz popular destacou “o espírito de consenso e de chegar a acordos amosado por todos os grupos parlamentarios”. Deste xeito, explicou que se incorporaron ao texto, ben directamente ou a través de transaccións, 4 das 9 emendas que presentou o PSdeG e 8 das 19 que rexistrara o BNG.
