Categoría: Parlamento de Galicia

O Grupo Popular avoga neste primeiro período de sesións do ano por “seguir traballando polos temas que realmente importan aos galegos e cumprir cos compromisos adquiridos nas urnas o pasado 18 de febreiro, e que continúan a ser o noso obxectivo político prioritario”.

Así o manifestou o portavoz parlamentario Alberto Pazos nunha rolda de prensa na que sinalou que en Galicia “comezamos o ano cos deberes ben feitos: cos Orzamentos máis altos da historia en vigor e sendo a comunidade que rexistra un maior crecemento do PIB per cápita nos últimos 15 anos”.

“Iniciamos coa satisfacción do deber cumprido, orgullosos de crecer por riba da media e cun Goberno capaz de cumprir coa palabra dada e que goberna pensando nos problemas e na política útil para a xente” explicou Alberto Pazos, contrapoñendo o estilo de gobernar en Galicia con estabilidade, rigor e xestión “fronte ao peor Goberno central da historia, cunha xestión caótica e irresponsable”.

GOBERNO GALEGO SERIO E SOLVENTE

“Seguiremos exercendo o respaldo apoio parlamentario que nos deron as urnas para apoiar un Goberno serio e solvente á altura do que demandan o conxunto dos galegos” indicou Alberto Pazos sinalando como prioridades políticas “a defensa dos nosos servizos públicos fundamentais, como son a educación, a sanidade ou as políticas sociais, apoio xa efectivo desde o primeiro momento polo investimento prevista nuns Orzamentos xa en vigor para este ano”.

A defensa das nosas competencias para que Galicia adquira o máximo nivel de autogoberno constitucionalmente posible foi outra das prioridades nomeadas polo portavoz popular para o presente período de sesións “na que insistiremos no traspaso inmediato dos medios para exercer a xestión do noso litoral ou das competencias en meteoroloxía, co fin de optimizar a efectividade das alertas e aproveitar os nosos recursos punteiros”.

A apertura a todos os investimentos industriais que queiran vir a Galicia, cumprindo sempre a normativa medioambiental, que ofrezan oportunidades aos galegos ou a promoción de Galicia a través da extensión dos beneficios fiscais polo Xacobeo 2027, foron outras das medidas nomeadas por Alberto Pazos.

O portavoz popular sinalou como obxectivos claros que “Galicia continúe pola senda dun crecemento sostible con compromiso e visión de futuro” e manifestou as súas dúbidas ao respecto de que “os partidos da oposición se incorporen a traballar en serio por Galicia e os galegos e vez de argallar cortinas de fume na procura exclusiva duns intereses electorais que cada vez lle son menos favorables”.

“E se xa somos pouco optimistas ao respecto da oposición, menos aínda no que se refire ao Goberno de España que prefire mirar ao pasado que afrontar as súas responsabilidades presentes e botar balóns fóra antes que asegurar infraestruturas precisas para hoxe e para o futuro de Galicia”.

APOIO AO POBO VENEZOLANO

Alberto Pazos finalizou a súa intervención amosando o apoio do PPdeG “ao pobo venezolano, que pide respecto ao que decidiron as urnas e que lle devolvan o país que lles roubaron” e fixo referencia á asistencia no día de onte dos deputados e deputadas do PPdeG ás concentracións en apoio á democracia, a liberdade e aos dereitos de Venezuela.

O portavoz parlamentario tamén amosou a súa “solidariedade coa situación incerta do activista e xornalista fillo de galegos, Carlos Correa, e esiximos ao Goberno central que mova ficha para lograr a súa liberdade e a dos presos que o son exclusivamente por non ser afíns ao réxime ditatorial que goberna na actualidade Venezuela”.

O portavoz do Grupo Popular, Alberto Pazos, asegurou hoxe que «pechamos o período de sesións no Parlamento de Galicia coa satisfacción do deber feito e listos afrontaremos o novo período de actividade parlamentaria con todo o ánimo para seguir levando adiante os compromisos adquiridos con todos os galegos e defendendo a un Goberno galego, presidido por Alfonso Rueda, que seguirá traballando na defensa do conxunto da sociedade galega”.

Nunha comparecencia para facer balance da actividade parlamentaria, na que estivo acompañado dos viceportavoces do Grupo Popular Paula Prado, Julio García Comesaña e Cristina Sanz, Alberto Pazos indicou que afrontamos “un momento no que o debate do novo modelo de financiamento e a consecución de novos traspasos de competencias á Galicia, como a definitiva sobre o noso litoral, a AP-9 ou as relativas á meteoroloxía, serán ámbitos de debate político; sen esquecer a toma de novas decisións para mellorar os servizos públicos que se prestan a todos os galegos, tanto no ámbito sanitario, como no educativo ou na atención aos nosos maiores e máis novos”.

OPOSICIÓN LEAL E DEFENSORA DOS INTERESES DE GALICIA

“Estaremos listos e dispostos para todo iso e esperamos atopar enfronte a unha oposición leal a Galicia e defensora dos seus intereses, pero, lamentablemente, a súa estreita relación co Goberno socialista de Pedro Sánchez prívalles de mirar exclusivamente cara Galicia, converténdose en tontos útiles dun Goberno central extorsionado polo independentismo catalán e vasco”, manifestou o portavoz popular, quen lamentou que “estamos vivindo un dos momentos máis caóticos da historia de España polos incontables casos de corrupción que asolan ao propio Goberno, ao Partido Socialista e, directamente, ao entorno do Presidente Sánchez”.

Diante desta situación, subliñou que “desde o PPdeG, desde o Grupo Popular e, estamos seguros que tamén desde o Goberno galego, imos continuar facendo todo o posible para que Galicia se manteña afastada deste barullo mesetario e continúe pola senda de estabilidade e prosperidade da que, felizmente, gozamos todos os galegos nestes últimos anos gracias aos gobernos de Alberto Núñez Feijóo e de Alfonso Rueda”.

INTENSA ACTIVIDADE LEXISLATIVA

Respecto da actividade desenvolvida no Parlamento galego, Alberto Pazos destacou tres cuestións principais. En primeiro lugar, a aprobación de cinco novos textos lexislativos neste período de sesións que se pecha: a Lei dos orzamentos da Administración galega para 2025, coa que os galegos volven ter, por décimo sexto ano consecutivo, unha contas en tempo e forma; a Lei de medidas fiscais e administrativas, coa que se pon a disposición dos concellos a posibilidade de habilitar unha taxa turística e se da un novo impulso ao sector eólico galego; a nova Lei de estatística, aprobada por unanimidade; a Lei de cultura inclusiva e accesible, que contou coa abstención dos tres grupos da oposición; e, finalmente, a Lei de promoción dos beneficios sociais e económicos dos proxectos que utilizan os recursos naturais de Galicia.

Respecto desta última norma, Pazos lembrou a súa importancia ao garantir que “calquera proxecto que se desenvolva na nosa terra relacionado coa produción de enerxía redunde en beneficios directos e medibles para o conxunto da poboación, e, o que é máis importante, respectando totalmente o noso medio natural e sen mermar nin unha soa garantía ambiental”. Neste sentido, lamentou que esta Lei non contara co apoio dos grupos da oposición, “amosando, unha vez máis, a súa incoherencia política, e incidindo nas súas teimas dunha industria eólica sen muíños, unha minería sen minas, unha industria sen factorías, un turismo sen turistas, emprego sen empresas, e queren a colleita pero non están dispostos a traballar a terra”.

Unha segunda cuestión destacada polo portavoz popular foi a relativa á “obsesión que teñen os grupos da oposición respecto do suposto uso abusivo da maioría que ten o Partido Popular neste Parlamento”. Neste punto, Alberto Pazos negou este feito usando datos como que o 75 por cento das iniciativas que integran as ordes do día dos Plenos son a proposta dos grupos da oposición; que a aprobación por unanimidade das proposicións non de lei supera o 45 por cento en Pleno e o 55 por cento en Comisión; ou que máis do 37 por cento das iniciativas aprobadas en Comisión son a proposta dos grupos da oposición.

“A oposición é quen de poñer enriba da mesa a práctica totalidade dos asuntos que se van a tratar en cada Pleno, facendo de escaparate ás súas ideoloxías e, no caso das iniciativas de control ao Goberno, tendo diante aos responsables da Xunta para contrastar as súas opinións”, lembrou o portavoz popular, quen incidiu que “felizmente os galegos poden comprobar como Pleno tras Pleno e comisión tras comisión as propostas dos grupos da oposición acaban totalmente diluídas ao contrastar as súas demagóxicas demandas coa realidade da acción do propio Goberno galego, das propostas do PPdeG ou da mesma realidade social galega”.

OBXECTIVOS CUMPRIDOS

Por último, Alberto Pazos referiuse á Comisión de Investigación sobre a contratación pública da Administración galega e recoñeceu “a nosa satisfacción por un traballo ben feito e que permitiu cumprir os obxectivos que nos marcamos ao comezo desta Comisión: poñer en valor a boa xestión dos Gobernos do PPdeG tanto na construción do Hospital Público Álvaro Cunqueiro de Vigo como en todas as contratacións públicas realizadas ao longo dos últimos anos”.

“Foron 38 comparecencias e milleiros de folios de documentación oficial os que respaldaron o bo facer dos Gobernos do PP e botaron abaixo as pretensións de BNG e PSdeG de poñer en dúbida a xestión dos Gobernos de Alberto Núñez Feijóo e de Alfonso Rueda, porque nin houbo sobrecusto na construción do Hospital Público Álvaro Cunqueiro, como ben clarexaron tanto o actual conselleiro maior do Consello de Contas como o anterior; nin se puido constatar a máis mínima sombra de ilegalidade nas contratacións realizadas pola Xunta desde o 2009 ata a actualidade”, asegurou.

O portavoz do Grupo Popular, Alberto Pazos, manifestou hoxe que a Comisión de Investigación sobre a contratación da Administración galega “está chegando ao seu fin cumprindo os obxectivos que desde o Grupo Popular nos marcamos desde o primeiro momento: demostrar, con extensa documentación e en palabras dos comparecentes, o bo facer dos gobernos do PPdeG ao longo de todos estes anos.

E, deste xeito,  «botar abaixo todas e cada unha das falacias coas que, principalmente o BNG, pero co apoio incondicional do PSdeG, quixeron desprestixiar o traballo e o compromiso do Goberno do PPdeG para levantar en Vigo un dos mellores hospitais públicos de España e, se me apuran, de Europa, así como as contratacións públicas levadas a cabo nos últimos anos”.

Alberto Pazos lembrou que BNG e PSdeG “pretendían coa difamación botar abaixo a boa imaxe de xestión e transparencia dos gobernos do PPdeG, pero viron como, día a día, se lles viñan abaixo todas as súas esperanzas, chegando incluso a ter que recoñecer que eles mesmos son protagonistas de chanchullos alí onde gobernan, beneficiando a empresas e amigos con contratos menores, a imaxe e semellanza do que tanto están a criticar acusando falsamente ao Goberno do Partido Popular”.

NON HOUBO SOBRECUSTO

Porén, o portavoz popular recoñeceu que este tipo de contratos menores “son, como ben dixeron os dous representantes nacionalistas que compareceron na Comisión, totalmente legais e útiles para unha administración pública, polo que o seu uso é perfectamente lexítimo por parte de todas as administracións, e non só cando se utilizan desde os gobernos nacionalistas ou socialistas”.

“O que deixaron claro, tanto os comparecentes que pasaron pola Comisión de Investigación como a extensa documentación que se puxo a disposición dos deputados, é que é totalmente falso que exista un sobrecusto na construción do Hospital Público Álvaro Cunqueiro”, asegurou o portavoz popular. En concreto, explicou que “o Consello de Contas fai no seu informe unha comparación teórica sobre dúas alternativas para a construción deste hospital público: unha, a través de financiamento exclusivamente público, que naquel momento era totalmente imposible pola situación de crise económica que se vivía, pero que, como é normal, sairía máis barata; e outra, a través da colaboración público-privada, unha fórmula que, quedou constatado na Comisión a través dos informes elaborados por dúas importantes auditoras, xa fora barallada polo Goberno de bipartito de socialistas e nacionalistas porque era a única viable naquel momento de fonda crise económica”.

Pazos afirmou que “tampouco existe tacha algunha de legalidade nos procesos de contratación menor da Xunta, ao constatar que todos compren a normativa vixente, ademais de estar sometidos aos exhaustivos controis internos, tanto por parte da Asesoría Xurídica como pola Intervención Xeral, e externos, por parte do propio Consello de Contas”.

“O mesmo se pode dicir dos contratos de emerxencia asinados durante a pandemia da Covid-19, auditados tamén polo Consello de Contas e fiscalizados polo Goberno do Estado, ademais de quedar constatado na Comisión de Investigación que as contratacións de emerxencia foron marxinais e plenamente xustificadas para facer fronte á crise socio-sanitaria”, dixo.

TRAER A GALICIA O BARULLO DA CORRUPCIÓN

O portavoz popular criticou que BNG e PSdeG “quixeron trasladar aos galegos “unha sombra de dúbida respecto das contratacións levadas a cabo nestes últimos anos, pretendendo traer a Galicia o barullo dos escándalos de corrupción que están a asolar a Pedro Sánchez, o seu Goberno e ao Partido Socialista”. “O seu obxectivo era lavarlle a cara ao actual Goberno de España, ao que lamentablemente tan unido se senten os nacionalistas galegos”, indicou.

“Desde o Grupo Popular imos seguir traballando para que esta Comisión de Investigación remate como se merece, cun ditame de conclusións completo e exhaustivo para que quede constancia de que o que comezou sendo unha Comisión da difamación acabou sendo unha Comisión de respaldo absoluto á boa xestión e o bo facer dos gobernos de Alberto Núñez Feijóo e Alfonso Rueda”, rematou.

A portavoz de Sanidade do Grupo Popular, Encarna Amigo, demandou hoxe no Parlamento de Galicia que “o Goberno central, do mesmo que xa está a facer a Xunta de Galicia, poña en marcha un plan integral de abordaxe da obesidade con recursos económicos e humanos suficientes para levalo a cabo”.

Encarna Amigo lembrou que o Goberno galego puxo en marcha hai dous anos o Plan Obesidade Zero, dirixido a promover hábitos saudables para frear esta tendencia e desta maneira mellorar o benestar e a saúde da poboación galega. Este plan abarca un período de execución de oito anos centrándose na prevención do sobrepeso e a obesidade, tendo como meta reducir a prevalencia do sobrepeso nun 15 por cento neste tempo.

“A diferencia do plan vixente a nivel estatal, que fixa como poboación diana a infantil, o plan galego está destinado a toda a poboación”, salientou a portavoz popular. En concreto, explicou que nestes dous anos de vixencia do plan galego puxéronse en marcha a Rede galega de promoción da saúde, con representantes nas sete áreas sanitarias; e a web do Observatorio de saúde pública de Galicia, que inclúe o mapa Actúa saúde no que está identificado preto dun milleiro de recursos e actividades que promoven hábitos de vida saudable.

Así mesmo, habilitouse a plataforma dixital Sanidade mediaverso para o fomento de factores protectores do sobrepeso e a obesidade, como son a actividade física, a alimentación saudable, a hixiene do sono, o benestar emocional e a prevención de condutas aditivas.

“Pola contra, o Plan estratéxico nacional para a redución da obesidade infantil 2022-2030 é un documento do Goberno central pouco ambicioso e cunha poboación obxectivo moi limitada, excluíndo a gran maioría da sociedade”, indicou Encarna Amigo, quen lamentou que nos dous anos que leva operativo “non conseguiron poñer en marcha moitas das medidas do plan”.

O Parlamento de Galicia aprobou hoxe a proposición non de lei do Grupo Popular, co voto en contra do PSdeG e a abstención do BNG, a través da que se reclama ao Goberno central que transfira á Xunta as cotizacións por formación profesional que realizan os traballadores autónomos que tributan no IRPF.

“Esta medida non só se aliñaría coas competencias xa asumidas pola Administración galega, senón que permitiría unha xestión máis próxima, adaptada e útil duns fondos que actualmente non compren a súa finalidade”, indicou a portavoz popular de Emprego, Noelia Pérez.

Na súa intervención, Noelia Pérez explicou que en Galicia cotizan á Seguridade Social por formación arredor de 160.000 autónomos, o que supón unha aportación de máis de 1,8 millóns de euros.

“Coa entrada en vigor do novo sistema de cotización por ingresos reais, mudou a situación e todo aquel que estivera dado de alta no ano anterior no RETA estará obrigado a presentar a declaración da renda ante a Axencia Tributaria”, sinalou.

Deste xeito, na actualidade o Estado recada máis de 6,5 millóns de euros por este concepto dos autónomos galegos “que non se está investindo en formación”.

“Entra dentro da lóxica que a Xunta xestione ese 0,1 por cento das cotizacións por formación profesional das persoas autónomas galegas que tributan no IRPF, porque é a Administración máis adecuada para xestionar estes fondos, xa que está en contacto directo coas necesidades do territorio e ten experiencia na planificación e na execución de políticas formativas”, manifestou.

Ademais, a portavoz popular indicou que esta transferencia “permitiría que Galicia tivese un maior control sobre os recursos dedicados á formación profesional, mellorando a súa xestión e reducindo a burocracia cunha xestión máis áxil, eficaz e directa, evitando duplicidades e demoras”.

A portavoz de Vivenda do Grupo Popular, María Deza, afirmou hoxe no Pleno do Parlamento galego que a Xunta procederá a principios do vindeiro ano á licitación dos primeiros inmobles destinados á modalidade de aloxamentos compartidos para menores de 36 anos nunha parcela da rúa Xoán XXIII de Santiago. “A intención é replicar esta actuación noutras cidades galegas, sempre en conversación cos concellos, e por iso xa se están estudando posibles novos emprazamentos en A Coruña e Vigo”, anotou.

María Deza explicou que, para facilitar a emancipación da mocidade galega, a Xunta atribúelle ao Instituto Galego de Vivenda e Solo a facultade de impulsar, en colaboración coa consellería competente en materia de xuventude, a promoción pública e a xestión de aloxamentos compartidos, destinados a satisfacer necesidades transitorias de vivenda das persoas menores de 36 anos. “Esta iniciativa pretende facilitar a toma de decisión a hora de emanciparse, proporcionando aos mozos e mozas as mellores oportunidades para construír os seus proxectos de vida fóra do lugar onde se criaron”, dixo.

CUMPRINDO ESTRITAMENTE A NORMATIVA

En concreto, o proxecto prevé a construción de aloxamentos cunha superficie mínima de 30 metros cadrados, con salón-cociña, un baño e unha habitación, e disporán ademais de superficies para servicios complementarios compartidos, como lavandaría, zonas de ocio ou de traballo. Tamén haberá aloxamentos de dúas habitacións, nos que a superficie superará os 40 metros cadrados, cumprindo en todos os casos a normativa técnica de aplicación e a de habitabilidade.

“As modalidades de uso compartido para vivendas e aloxamentos residenciais veñen para quedarse, non só porque sigan as correntes xa existentes nos países do noso entorno, senón porque veñen a dar satisfacción a necesidades de distintos colectivos sociais e, polo tanto, as lexislacións deberán regular estas modalidades máis cedo que tarde”, explicou a portavoz popular.

María Deza afirmou que estes novos formatos living avanzan no mercado residencial en España, que alcanzará, segundo recentes estudos, o 16 por cento da oferta de obra nova destinada ao alugueiro en 2025, un modelo que xa está funcionando noutros países de Europa, como o Reino Unido ou Francia, e tamén noutras comunidades autónomas, como é o caso de Cataluña ou o País Vasco.

Na súa intervención, Deza criticou a incongruencia do BNG ao afirmar que “non lle gusta esta modalidade de aloxamentos compartidos, cando a tiña incluída no seu programa electoral, no que se indicaba expresamente que propoñían aumentar a oferta pública de aloxamentos dotacionais específicos para a mocidade e para o estudantado, que permita solucións habitacionais de pequeno tamaño durante un período máximo de cinco anos”.

Para rematar, a portavoz popular lembrou que, co fin de facilitarlle a mocidade a adquisición de vivenda, o Goberno galego decidiu reservar para os menores de 36 anos o 40 por cento do novo parque de vivenda pública que está a construír e que sexa destinada ao alugueiro, e un 25 por cento das vivendas destinadas á compra. Ademais, entre 2021 e 2023, a Xunta concedeu axudas para o acceso á vivenda por importe global de preto de 55 millóns de euros, das que 22 millóns de euros estaban dirixidas exclusivamente a menores de 36 anos. No mesmo período concedéronse axudas por preto de 8,5 millóns de euros para adquisición de vivendas, dos que máis do 60 por cento do total foi destinado exclusivamente a menores de 36 anos.

A deputada do Grupo Popular Dolores Hermelo asegurou hoxe no Pleno do Parlamento galego que “a única administración que está a ser un obstáculo para a reversión aos concellos da titularidade dos terreos portuarios sen utilización marítimo-pesqueira é o Goberno de España” e afirmou que “a Xunta está a traballar na tramitación da desafectación de zonas portuarias en consenso cos concellos”. Neste sentido, indicou que a declaración da Lei galega do litoral como plenamente constitucional “abre un novo marco para impulsar este proceso de reversións”.

Dolores Hermelo manifestou que a reversión destes terreos portuarios “é un traballo que se debe acometer entre todas as partes” e concretou que “hai interlocución e un proceso aberto entre a Xunta e os concellos galegos, pero a única administración que non aparece neste diálogo é Costas do Estado, é dicir, o Goberno central”.

MÁIS DE 450.000 METROS CADRADOS

“A Xunta mantén o compromiso de avanzar neste proceso de reversión de terreos e xa o está a facer coa Federación Galega de Municipios e Provincias”, dixo a deputada popular, quen concretou que “estamos a falar de máis de 450.000 metros cadrados que se poderán destinar a uso da cidadanía, cun valor de máis de 12 millóns de euros”.

Así mesmo, recoñeceu que a reversión “é un proceso longo e dependente da Administración central” e lembrou que a Xunta “leva máis de 30 anos con algún destes procesos aberto, esperando que o Goberno central proceda á súa tramitación, como é o caso de Cariño, Ponteceso ou Porto do Son”.

A deputada popular afirmou que a transferencia a Galicia das competencias sobre o litoral “é un empurrón a este proceso porque abre un novo marco que impulsa as reversións”. “Esta norma fará moito máis eficiente o proceso de regularización e deslinde de superficie portuaria a favor dos concellos, un novo escenario que se abre gracias ao traballo e bo facer do Goberno galego”, rematou.

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se solicita ao Goberno de España que habilite, mediante os procedementos que resulten necesarios, que as empresas que desexen patrocinar actividades turísticas ao abeiro do Xacobeo 2027 o poidan facer a partir do 1 de xaneiro de 2025.

O portavoz de Turismo do Grupo Popular, Borja Verea, lamentou que a falta de orzamentos do Estado está a impedir a declaración do Xacobeo 2027 como evento de especial interese público, que permitiría poñer en marcha os incentivos fiscais de apoio ao Xacobeo e abrir a porta á colaboración público-privada.

En concreto, este mecanismo fiscal permitiu que no pasado Xacobeo 2021-22 un total de 40 empresas aportaran 28 millóns de euros para a organización deste evento.

Ademais, Borja Verea lembrou o consenso amosado respecto desta solicitude no Consello Xacobeo celebrado o pasado 1 de xullo, no que se acordou pedir ao Goberno de España a declaración como evento de especial interese público.

A iniciativa do Grupo Popular complementouse cunha emenda do Grupo Socialista a través da que se solicita o deseño dun mapa territorial por toda a xeografía galega que chegue ao máximo número de concellos e, cando menos, a todas as comarcas galegas, facer unha distribución equitativa e igualitaria das actuacións de maior impacto por todo o territorio; e que o acceso aos distintos eventos sexa en igualdade de condicións.

O Pleno do Parlamento de Galicia aprobou hoxe por unanimidade a proposición non de lei do Grupo Popular a través da que se esixe ao Goberno central accións inmediatas de mellora da N-541 entre Punxín e Pontevedra para reducir a alta sinistralidade nesta vía de comunicación, adaptando esta estrada ás necesidades de tráfico que garantan a seguridade de vehículos e dos habitantes dos núcleos de poboación polos que transcorre, así como se realice un estudio de viabilidade que contemple unha autovía ou vía de alta capacidade sen pasar por núcleos de poboación entre O Carballiño e Pontevedra.

O deputado popular Argimiro Marnotes explicou que a N-541 conecta Punxín con Pontevedra, pero é tamén un 75 por cento do percorrido natural entre as cidades de Ourense e Pontevedra. “Esta estrada nacional é unha das principais preocupacións en materia de seguridade viaria en Galicia, que cubre as necesidades dunhas 218.000 persoas, cun tráfico intenso de turismos particulares e transporte industrial, sendo escenario habitual de accidentes graves, algúns de les con resultados fatais”.

PROBLEMÁTICA RECORRENTE

En concreto, Marnotes lembrou o accidente do autobús ocorrido o 24 de decembro de 2022 que causou a morte de sete persoas, pero tamén doutros sinistros máis recentes acontecidos ao longo dos anos 2023 e 2024. “Non estamos a falar de accidentes illados, senón dunha problemática recorrente que afecta a todos os concellos polos que transcorre a N-541”, indicou o portavoz popular, quen salientou que “agora é co Pacto do Pedre desde onde se fai toda a forza social como representación da súa veciñanza para reclamar unha solución estrutural e integral de toda a N-541, facendo entre as súas alcaldías un xestión de unión que lles honra”.

“A N-541 ten que estar adaptada á circulación que se require por uso e costume, e non pode deixar de ser unha posibilidade de crecemento de todos os concellos polos que transita”, manifestou o deputado popular.

DECEPCIONANTE RESPOSTA DO GOBERNO CENTRAL

Argimiro Marnotes considerou “decepcionante” a resposta do Goberno central no Senado á pregunta formulada polo Partido Popular respecto do estado da N-541, ao afirmar que “xa teñen, ao igual que noutras estradas nacionais, contratos de mantemento e que actuarán en función das prioridades e disposición económica, desbotando calquera mellora estrutural e tamén a elaboración dun estudo sobre a posible construción dunha autovía ou vía de alta capacidade alternativa, instando aos usuarios a empregar alternativas como a AP-9, a A-52 ou a AG-53”.

“Esta resposta é absolutamente insuficiente e demostra unha falta de empatía e comprensión das necesidades reais do territorio e das relacións sociais e comerciais entre as distintas poboacións afectadas”, rematou.

O portavoz de Medio Ambiente do Grupo Popular, Gonzalo Trenor, salientou hoxe no Pleno do Parlamento galego que o organismo Augas de Galicia contará en 2025 cun orzamento próximo aos 144 millóns de euros, o que supón un incremento do 4,7 por cento, para continuar na mellora das augas das rías e ríos galegos, da que se abastecen tamén os fogares, industrias e empresas da Comunidade galega.

“Será un investimento millonario en saneamento e abastecemento distribuído en tres grandes eixos: a construción de infraestruturas, a execución de políticas activas de resposta ante o cambio climático e a formación e divulgación para concienciar sobre unha xestión eficaz da auga desde as nosas casas, como usuarios, ata o xestor profesional”, sinalou Trenor.

Neste sentido, o portavoz popular subliñou que “o 80 por cento das masas de auga que son de competencia autonómica están en bo estado, un dato que contrasta co 56 por cento no que se sitúa a media estatal”. “Este resultado é posible gracias a que Augas de Galicia realiza un importante esforzo inversor en infraestruturas e un traballo de inspección e vixilancia a través dos mecanismos que ostenta e das súas competencias”, explicou.

Gonzalo Trenor referiuse ao Programa de control de vertidos, “a través do que Augas de Galicia realiza un control moi estrito dos vertidos que se producen, especialmente nas rías galegas”. Dotado anualmente con dous millóns de euros, este plan realizou ao longo de 2023 case 10.000 visitas e inspeccións a puntos de vertido, atendendo 635 alertas. Así mesmo, este plan permitiu reducir 36 puntos os vertidos identificados como contaminantes e emendar 650 puntos de vertedura contaminante nas nosas rías.

Por último, o portavoz popular fixo un chamamento ao resto de administracións públicas para que “colaboren e fagan as súas aportacións para a mellora das nosas rías, do mesmo xeito que está a facer a Xunta de Galicia”.